Ọ́gú 32 - BAYỊBURU Ẹzaa

Ikfu Rúbẹnu mẹe ikfu Gadu l'ekfu tẹ whẹ je eburu l'alị Giledu

¹ Ụnwu Rúbẹnu mẹe ụnwu Gadu bẹ nweru iwhe-edobe, ha l'igweligwe. Whẹ bya awhụ l'alị Jaza mẹe alị Giledu bẹ dụ ree ọkpa iwhe-edobe.

² Ọo ya bụ, ụnwu Gadu mẹe ụnwu Rúbẹnu ono bya ejekfu Mósisu mẹe Eliyéza, bụ onye l'agbajẹ ẹja nụ Chileke mẹe ndu ishi, l'achị ndu Ízurẹlu l'owhu je asụ whẹ:

³ “Alị mkpụkpu Atarotu mẹe mkpụkpu Dibọnu mẹe mkpụkpu Jaza mẹe mkpụkpu Nimura mẹe mkpụkpu Hẹshibonu mẹe mkpụkpu Eleyale mẹe mkpụkpu Sebamu mẹe mkpụkpu Nebo mẹe mkpụkpu Beyọnu;

⁴ mbụ alị ono, Onye-Nwe-Ọha meru tẹ ndu Ízurẹlu lwụta bẹ bụkwa alị, dụ ree ọkpa iwhe-edobe. Anyịbe ndu ozhi unu bẹ nweru iwhe-edobe.

⁵ Sụa, ọ -bụru l'anyi dụ unu l'obu, unu nụnu anyịbe ndu ozhi unu alị ono t'ọ bụwaruro oke alị nke anyi. Unu hakwaa t'anyi ba adashị azụ ẹnyimu Jọ́danu azụ iya ọwhu.”

⁶ Mósisu sụ ụnwu Gadu mẹe ụnwu Rúbẹnu: “?Ọo t'ụnwunna unu jeje ọgu; t'unubẹdua nọ-kirishia l'ẹka-a?

⁷ ?Ọo gụnu meru unu l'eme t'ume ba adụhe ndu Ízurẹlu nke tẹ whẹ je anata alị ono, Onye-Nwe-Ọha nụru whẹ?

⁸ Ọo nno bụ gẹ nna unu whẹ meru nteke mu zhiru whẹ tẹ whẹ shi lẹ Kádẹshi Baneya je awhụ alị ono.

⁹ Nkele whẹ jegeeru je awhụ alị ono je akpaa lẹ nsụda Ẹshukolu, whẹ mee t'ume ba adụhe ndu Ízurẹlu nke tẹ whẹ bahụ l'alị ono, Onye-Nwe-Ọha nụru whẹ.

¹⁰ Whẹ shi nno kpatsua Onye-Nwe-Ọha iwe mbọku ono, o ribuaru whẹ iya lẹ nte sụ:

¹¹ ‘Ọ tọ dụdu onye nwoke Ízurẹlu, shi lẹ Íjiputu fụta, wata l'onye, gbarụ ụkporo awha tụgbua bya l'e-gude ẹnya iya whụ alị ono, mbụ alị ono, mu riburu lẹ nte lẹ mu l'a-nụ Ébirihamu mẹe Áyiziku mẹe Jékọpu, o noo nkele whẹ te egudedu obu whẹ g'ọ ha tsoru ụzo nkemu.

¹² Ọ tọ dụdu onye ọdo, t'a gụfulewho Kálẹbu nwa Jefune onye shi l'eri Kenazu mẹe Jóshuwa nwa Nunu nkele whẹ gude obu whẹ g'ọ ha tsoru ụzo nke Onye-Nwe-Ọha.’

¹³ Onye-Nwe-Ọha dobe ọta-chịchichi iwe iya l'ẹhu ndu Ízurẹlu, o mee whẹ, whẹ tsoru echi-ẹgu ghawhee jeye ụkporo abalị ugbo labọ, jeye nteke ọgbo ono, meru ejo-iwhe ono l'ẹnya Onye-Nwe-Ọha gvụkotaru.

¹⁴ O rwukwaa ntaa, unubẹ ụnwu-a, ndu l'eme iwhe-dụ-ẹji nwụshiru-a bya akfụkwaru l'ọzori iwhe ono nna unu whẹ meru, eme t'unu mee t'iwe Onye-Nwe-Ọha kabaa onwu ọku l'ẹka ndu Ízurẹlu nọ.

¹⁵ Unu -gbakụta iya azụ sụ l'unu te etsohedu iya bẹ l'ọo-pakwaru whẹ haa l'echi-ẹgu, ya abụru l'ọo ẹka unu b'o shi ọla-l'iyi byakfuta ndu Ízurẹlu.”

¹⁶ Tọ dụ iya bụ, ụnwu Gadu ono mẹe ụnwu Rúbẹnu ono byakfutashia Mósisu bya asụ iya: “Ọo-dụ anyi ree t'anyi meta ẹka iwhe-edobe anyi l'a-nọdu mẹe t'anyi tụshia mkpụkpu ẹka ụnwegirima anyi l'a-nọdu.

¹⁷ Ọle anyịbedua l'ime onwanyi bẹ kwakọbewaru ẹhu nke ọchita ngwọgu vutaru ndu Ízurẹlu ụzo jeshia, jeye nteke anyi l'e-durwu whẹ ẹka ono, whẹ l'e-buru ono. Ụnwu anyi bẹ l'e-buru lẹ mkpụkpu-a, a tụru o shihu ike, m'ọgvu ndu bu l'alị-a.

¹⁸ Anyi ta abyadụ l'a-lwa ibe anyi jeye nteke ndu Ízurẹlu l'a-watakọta oke-alị, gbarụ whẹ nụ gẹ whẹ ha.

¹⁹ Nkele anyi te etsodu whẹ ahata oke-alị l'azụ ẹnyimu Jọ́danu azụ iya ọwhu, iwhe kparụ iya nụ bụ l'oke nke anyi bẹ dụ l'azụ Jọ́danu azụ iya ọwa l'ụzo ẹnyanwu-awata Jọ́danu.”

²⁰ Ọo ya bụ, Mósisu sụ whẹ: “Ọ -bụru l'unu l'e-me iya ẹgube ono, unu kfuru; ọ -bụru l'unu l'a-chịta ngwọgu unu l'atatiwhu Onye-Nwe-Ọha vuta ụzo ọgu ono;

²¹ ọ -bụru lẹ g'unu ha bẹ l'a-chị ngwọgu daa ẹnyimu Jọ́danu l'atatiwhu Onye-Nwe-Ọha, unu tsoru lwụa ọgu ono jeye nteke Onye-Nwe-Ọha chịfuru ndu ọhogu iya ono l'atatiwhu iya.

²² Mbụ a -lwụtalewho alị ono l'atatiwhu Onye-Nwe-Ọha, ọo ya bụ, unu alwatashia bya enweru onwunu, nkele unu mewaru iwhe a chọru t'unu mee l'ẹka Onye-Nwe-Ọha nọ, mẹe l'ẹka ndu Ízurẹlu nọ. Alị-a bẹ l'a-bụ oke alị unu l'atatiwhu Onye-Nwe-Ọha.

²³ Ọle ọ -bụru l'unu te emedu iwhe unu kfuru, ọo ya bụ l'unu meru iwhe-dụ-ẹji l'ẹka Onye-Nwe-Ọha nọ; t'o dokwaa unu ẹnya l'iwhe-dụ-ẹji, unu meru l'a-pafụta unu iwhe.

²⁴ T'unu tụshia mkpụkpu, ụnwegirima unu whẹ l'a-nọdu, unu emeta ẹka iwhe-edobe unu l'a-nọdu, nteke ono unu emedzua iwhe shi unu l'ọnu fụta.”

²⁵ Ụnwu Gadu mẹe ụnwu Rúbẹnu sụ Mósisu: “Anyịbe ndu ozhi ghu l'e-me iya gẹ gụbe onye-nwe-anyi kfuru.

²⁶ Ụnwegirima anyi mẹe unyomu anyi mẹe iwhe-edobe anyi bẹ l'a-nọdu lẹ mkpụkpu lẹ mkpụkpu, dụ l'alị Giledu.

²⁷ Ọle anyịbedua, bụ ndu ozhi ghu bẹ l'a-da ẹnyimu, anyi l'a-chị ngwọgu l'ẹhu l'ẹhu nke ọgu ono l'atatiwhu Onye-Nwe-Ọha ẹgube ono, gụbe onye-nwe-anyi kfuru.”

²⁸ O noo ya, Mósisu bya atụa iwu nụ Eliyéza, bụ onye l'agbajẹ ẹja nụ Chileke mẹe Jóshuwa nwa Nunu mẹe ndu bụ-gee ishi l'ibe nna whẹ l'ikfu Ízurẹlu l'okfu ẹhu ụnwu Gadu mẹe l'okfu ẹhu ụnwu Rúbẹnu.

²⁹ Ọ sụ whẹ: “Ọ -bụru l'ụnwu Gadu mẹe ụnwu Rúbẹnu bẹ chịtaru ngwọgu l'ẹhu l'ẹhu kwakọbe ọgu ono l'atatiwhu Onye-Nwe-Ọha, whẹ tsoru unu daa ẹnyimu Jọ́danu; a -lwụta-gelewho alị ono l'atatiwhu unu, unu anụ whẹ alị Giledu t'ọ bụru oke-alị whẹ.

³⁰ Ọle ọ -bụru lẹ whẹ ta achịtadu ngwọgu tsoru unu daa ẹnyimu, whẹ etsoru unu wata alị lẹ Kenanu.”

³¹ Ụnwu Gadu mẹe ụnwu Rúbẹnu ono sụ: “Ọo gẹ Onye-Nwe-Ọha kfuru anyịbe ndu ozhi ghu bụ g'anyi l'e-me iya.

³² Anyi l'a-chị ngwọgu daa ẹnyimu Jọ́danu bahụ l'alị Kenanu l'atatiwhu Onye-Nwe-Ọha, ọle oke alị anyi bẹ l'a-dụ l'azụ Jọ́danu azụ iya ọwa.”

³³ Tọ dụ iya bụ, Mósisu bya eworu alị-eze ẹka ono, Sáyihọnu, bụ eze ndu Amọru shi achị mẹe alị-eze ẹka ono, Ọgu, bụ eze ndu Báshanu shi achị woru nụ ụnwu Gadu mẹe ụnwu Rúbẹnu mẹe nkerẹbo ikfu Manáse, bụ nwa Jósẹfu. Ọ nụru whẹ alị ono l'owhu mẹe mkpụkpu, dụ iya nụ g'ọ ha mẹe alị, dụ iya nụ g'ọ ha, mbụ mkpụkpu lẹ mkpụkpu, dụ l'alị ono mgburumgburu.

³⁴ Ụnwu Gadu tụa mkpụkpu Dibọnu mẹe Atarotu mẹe Arowa

³⁵ mẹe Atarotu-shofanu mẹe Jaza mẹe Joguboha;

³⁶ mẹe Betu-nimura mẹe Betu-haranu. Whẹ tụkotaru mkpụkpu ono; o shihu ike. Whẹ metagee ẹka iwhe-edobe whẹ l'a-nọduje.

³⁷ Ụnwu nke Rúbẹnu tụa mkpụkpu Hẹshibonu mẹe Eleyale mẹe Kiriyatayimu

³⁸ mẹe Nebo mẹe Bálu-meyọnu. A gbanweshikota ẹwha mkpụkpu ono g'ọ ha. Whẹ tụa mkpụkpu Sibuma. Whẹ gụ-nwee mkpụkpu lẹ mkpụkpu ono, whẹ tụshiru ẹwha ọdo.

³⁹ Ụnwu Makiru, bụ nwa Manáse jee ọgu l'alị Giledu, whẹ lwụta iya; chịshia ndu Amọru, bu l'ẹka ono.

⁴⁰ Ọo ya bụ, Mósisu woru alị Giledu nụ Makiru, bụ nwa Manáse o buru l'ẹka ono.

⁴¹ Jayi, bụkwawho o-shi-l'ẹpa Manáse tụgburu je alwụta ụnwu mkpụkpu mkpụkpu, dụ iya nụ, ọ gụa ẹwha mkpụkpu ono Havọtu-jayi.

⁴² Noba tụgburu je alwụta mkpụkpu Kenatu mẹe nwa mkpụkpu, dụ-wheru iya mgburumgburu. Ọ gụa ẹwha mkpụkpu ono Noba, bụ iwhe yẹbedua l'aza.