Ọ́gú 31 - BAYỊBURU Ẹzaa

Aagwata ndu Midiyanu ụgwo iwhe whẹ mejeru ndu Ízurẹlu

¹ Onye-Nwe-Ọha bya ekfuru Mósisu sụ:

² “Gwata ndu Midiyanu ụgwo iwhe ono, whẹ mejeru ndu Ízurẹlu. Ị -gwatagelewho ụgwo iwhe ono bẹ l'ịi-lakfụ ndụ-ichee unu whẹ l'alị maa.”

³ Ọo ya bụ, Mósisu sụ ndu Ízurẹlu: “Unu kwaa ụwhodu l'ime unu ngwọgu tẹ whẹ jekfu ndu Midiyanu ọgu je agwataru Onye-Nwe-Ọha ụgwo iwhe ono, whẹ mejeru ndu Ízurẹlu.

⁴ Unu l'eshi l'ikfu nọnu lẹ Ízurẹlu họta ụnu madzụ ugbo labọ l'ụkporo ụmadzu ugbo iri tẹ whẹ jeshia ọgu ono.”

⁵ O noo ya, a bya eshi l'ikfu g'ikfu ha lẹ Ízurẹlu họta ụnu madzụ ugbo labọ l'ụkporo ụmadzu ugbo iri. Ọ bụru ụkporo ụnu madzụ l'ụnu madzụ ugbo iri bẹ bụ ndu a họtakotaru kwaa whẹ ngwọgu.

⁶ Mósisu zhifu whẹ tẹ whẹ jeshia ọgu ono. Ikfu nọnu bẹ họtaru ụnu madzụ ugbo labọ l'ụkporo ụmadzu ugbo iri nke ọgu ono. Whẹ lẹ Fínihasu nwa Eliyéza, onye l'agbajẹ ẹja nụ Chileke lịru. Fínihasu gude arya, shi l'ẹka-dụ-nsọ mẹe opyi-ọku, l'ee-gbuje gude agbarụ whẹ ama.

⁷ Whẹ jekfushia ndu Midiyanu ọgu ẹgube Onye-Nwe-Ọha tụru iya Mósisu l'iwu, tụko iwhe bụ unwoke ndu Midiyanu gbukota.

⁸ Whẹ gbukwaawho ndu eze ise, l'achị ndu Midiyanu, mbụ Evi mẹe Rẹkemu mẹe Zuru mẹe Họru mẹe Reba, yekwaru iya ndu ọdo, e gburu egbu. O nokwawho gẹ whẹ gude ogu-ịgba gbua Bélamu nwa Beyo.

⁹ Ndu Ízurẹlu kpụkoo ụnwanyi ndu Midiyanu lẹ ndzụ mẹe ụnwegirima whẹ. Whẹ kwaa eswi whẹ mẹe atụru whẹ mẹe eghu whẹ mẹe iwhe lile, whẹ nweru l'ọkwata

¹⁰ tọshia ọku l'iwhe bụ mkpụkpu ẹka ndu Midiyanu bugee mẹe ẹka whẹ kpọberu ụlo-ẹkwa ebubu whẹ g'ọ ha, ọku dzụkota iya.

¹¹ Whẹ chịtakota iwhe lile ono, whẹ kwarụ l'ọkwata mẹe iwhe lile, whẹ lwụtaru l'ọgu, mbụ madzụ mẹe iwhe-edobe.

¹² Whẹ chịta ndu ono, whẹ kpụkoru lẹ ndzụ mẹe iwhe lile ono, whẹ lwụtaru l'ọgu mẹe iwhe whẹ kwarụ l'ọkwata; whẹ wolataru iya Mósisu yẹle Eliyéza, onye l'agbajẹ ẹja nụ Chileke mẹwaro ndu Ízurẹlu l'owhu l'ẹka whẹ kpọberu ụlo-ẹkwa ebubu whẹ lẹ whorokoto alị Moabu l'agụga ẹnyimu Jọ́danu lẹ mgboro mkpụkpu Jériko.

Iwu, Mósisu tụru nteke ndu Ízurẹlu shi ọgu Midiyanu lwa

¹³ Tọ dụ iya bụ, Mósisu mẹe Eliyéza, bụ onye l'agbajẹ ẹja nụ Chileke mẹe ndu ishi, l'achị ndu Ízurẹlu l'owhu wụru je agbata ndu Ízurẹlu ono, jeru ọgu Midiyanu ndzuta l'azụ ẹka ono, whẹ kpọberu ụlo-ẹkwa ebubu whẹ.

¹⁴ Iwe bya Mósisu l'ẹhu l'ẹka ndu ishi, l'achị ndu ojọgu ono, jeru ọgu ono nọ, mbụ ndu ishi, l'achị ụnu ndu ojọgu ugbo labọ l'ụkporo ugbo iri mẹe ndu ishi, l'achị ụkporo ndu ojọgu ugbo ise.

¹⁵ Mósisu sụ whẹ: “?Ọ kwa l'unu harụ t'ụnwanyi-a nọdu ndzụ?

¹⁶ Ọo ụnwanyi-a bẹ Bélamu zhiru; whẹ mee tẹ ndu Ízurẹlu meswee Onye-Nwe-Ọha l'okfu ẹhu agwa, dụ lẹ Peyọ; eshi nno; nchịkarehu bya l'echilabọ ndu nke Onye-Nwe-Ọha.

¹⁷ Ngwa, unu tụko ụnwegirima unwoke whẹ gbushikota gẹ whẹ ha, unu egbushikota iwhe bụ nwanyị, yẹle nwoke zẹbuwa l'ime whẹ.

¹⁸ Ndu unu l'a-ha bụlewho ụnwumgboko, nwoke l'ẹte akụbua ọkpa, unu dobe whẹ ndzụ tẹ whẹ nọdu-turu unu.

¹⁹ A -bya abya lẹ ndu g'unu ha, gburu madzụ l'ọgu ono mẹe ndu denyiru onye e gburu egbu ẹka, t'unu nọdukwa l'azụ ẹka ono ndu Ízurẹlu kpọberu ụlo-ẹkwa ebubu whẹ ono jeye abalị ẹsaa. O -rwulewho lẹ mbọku nke ẹto iya mẹe lẹ mbọku nke ẹsaa ya, unu awharwụa ọchi ono, wharwụa mmerwu dụ ndu ono, unu kpụru lẹ ndzụ ono l'ẹhu.

²⁰ Unu wharwụa uwe unu, unu awharwụa iwhe e gude akpọ mee mẹe iwhe e meru l'ẹji eghu mẹe iwhe a pyịru l'oshi.”

²¹ Eliyéza, bụ onye l'agbajẹ ẹja nụ Chileke sụ ndu ojọgu, jeru ọgu ono: “Ọ waa nsọ, dụ l'iwu ono, Onye-Nwe-Ọha tụru nụ Mósisu ndọwa:

²² Iwhe unu l'e-wota kpụ bụ mkpọla-ododo, mkpọla-ọcha, ope, igwe, gbamụgbamu mẹe opu.

²³ Unu wota iwhe l'ẹte adazehu adazehu mẹe a hụa ya l'ọku, hụa ahụhu t'ọku nụchaa ya anụcha, ndụge ọ dụ o gbuchafu dụ samụ. Ọle e gudefutaje mini ono, e gude atụrwu iwhe tụrwua ya. Nteke bụ l'ọo iwhe bụ: a -hụa ya l'ọku ya adazehu, unu eye iya lẹ mini ono, l'eegudeje atụrwu iwhe gude tụrwua ya.

²⁴ O -rwua lẹ mbọku nke ẹsaa, unu asaa uwe unu asa, mee onwunu t'a ba asọhe unu asọ. Unu -megee nno, unu abata l'ẹka ono ndu Ízurẹlu kpọberu ụlo-ẹkwa ebubu whẹ.”

Eekeshi iwhe ono, a lwụtaru l'ọgu Midiyanu

²⁵ Onye-Nwe-Ọha sụ Mósisu:

²⁶ “Tẹ gụbedua mẹe Eliyéza, bụ onye l'agbajẹ ẹja nụ Chileke mẹe ndu bụ ishi l'ibe nna whẹ lẹ Ízurẹlu tụko iwhe lile ono, a lwụtaru l'ọgu gụkota ọgu, mbụ madzụ mẹe iwhe-edobe, tso iya nụ.

²⁷ Unu ekekahu iwhe ono, a lwụtaru l'ọgu ono uzhi labọ. Unu kekahuru iya ndu ono, jeru ọgu ono whẹ l'igwe-ọha Ízurẹlu.

²⁸ Unu eshi l'ime ndu ọwhu, unu keru nụ ndu ono, jeru ọgu ono mẹe iwhe-edobe ọwhu, unu keru nụ whẹ wofuta ọwhu unu l'a-tụru Onye-Nwe-Ọha ụtu. Onye lanụ bẹ unu l'e-wofuta l'ime ụnu madzụ l'ụkporo ugbo ise, unu ewofuta iwhe-edobe lanụ l'ime ụnu iwhe-edobe l'ụkporo ugbo ise, mbụ eswi mẹe nkakfụ-ịgara mẹe atụru mẹe eghu.

²⁹ Unu shi l'oke iya nkewhe ono wota iya nụ Eliyéza, bụ onye l'agbajẹ ẹja nụ Chileke t'ọ bụru iwhe l'aa-nụ Onye-Nwe-Ọha.

³⁰ Unu eshikwawho l'iwhe ono, unu keru nụ ndu Ízurẹlu wofutachaa nnanụ nnanụ l'ime ụkporo labọ l'iri, mbụ lẹ madzụ mẹe l'eswi mẹe lẹ nkakfụ-ịgara mẹe l'atụru mẹe l'eghu mẹe l'anụ ọdo. Unu eworu iya nụ ikfu Lívayi, bụ ndu mkpuumkpu-ẹkwa Onye-Nwe-Ọha dụ l'ẹka.”

³¹ Ọo ya bụ, Mósisu yẹle Eliyéza, onye l'agbajẹ ẹja nụ Chileke mee lẹge Onye-Nwe-Ọha tụru Mósisu l'iwu.

³² Iwhe whuduru nụ l'iwhe ono, ndu ono, jeru ọgu Midiyanu lwụtaru l'ọgu bẹ bụ: Atụru, whọduru iya nụ bụ ụkporo ụnu atụru ugbo ụkporo ẹno l'ụkporo ụnu ẹno l'ụnu ẹsaa l'ụkporo iri.

³³ Eswi, whọduru iya nụ bụru ụkporo ụnu eswi ugbo tete.

³⁴ Nkakfụ-ịgara, whọduru iya nụ bụru ụkporo ụnu nkakfụ-ịgara ugbo ẹsaa l'ụnu iri l'ẹbo l'ụkporo iri.

³⁵ A -bya lẹ madzụ; ụnwanyi, nwoke l'ẹte akụbua ọkpa dụ ụkporo ụnu ụnwanyi ugbo ẹno.

³⁶ Ọ waa bụ g'iwhe ono, e keru nụ ndu ono, jeru ọgu Midiyanu ono ha: Atụru dụ ụkporo ụnu ugbo ụkporo labọ l'ụkporo ụnu ugbo labọ l'ụnu ẹto l'ụkporo ugbo iri l'ise.

³⁷ L'ime atụru ono, ọwhu bụ iya ụtu, l'aatụ anụ Onye-Nwe-Ọha bụ ụnu atụru l'ụkporo ugbo iri l'ẹto l'atụru iri l'ise.

³⁸ Eswi dụ ụkporo ụnu ugbo ẹno l'ụnu iri. L'ime eswi ono, ọwhu bụ iya ụtu, l'aatụ anụ Onye-Nwe-Ọha bụ ụkporo eswi ugbo ẹto l'eswi iri l'ẹbo.

³⁹ Nkakfụ-ịgara dụ ụkporo ụnu ugbo ẹto l'ụnu iri l'ishii l'ụkporo ugbo ise. L'ime nkakfụ-ịgara ono, ọwhu bụ iya ụtu, l'aatụ anụ Onye-Nwe-Ọha dụ ụkporo nkakfụ-ịgara ugbo ẹto lẹ nkakfụ-ịgara lanụ.

⁴⁰ A bya lẹ madzụ, iwhe whẹ dụ bụ ụkporo ụnu madzụ ugbo labọ. Iwhe bụ ndu e gude atụ ụtu anụ Onye-Nwe-Ọha l'ime whẹ bụ ụkporo madzụ l'ụmadzu iri l'ẹbo.

⁴¹ Tọ dụ iya bụ, Mósisu bya eworu ụtu ono, a tụru nụ Onye-Nwe-Ọha nụ Eliyéza, bụ onye l'agbajẹ ẹja nụ Chileke t'ọ bụru iwhe l'aanụ Onye-Nwe-Ọha; ẹgube Onye-Nwe-Ọha tụru iya Mósisu l'iwu.

⁴² Ọ waa g'iwhe ono, e keru nụ ndu Ízurẹlu ha ndọwa, mbụ iwhe ono, Mósisu kewafuru iche l'ọwhu e keru nụ ndu ono, jeru ọgu Midiyanu ono.

⁴³ Iwhe e keru nụ edzudzu-ọha Ízurẹlu ono bẹ atụru dụ iya ụkporo ụnu ụkporo ugbo labọ l'ụkporo ụnu ugbo labọ l'ụnu ẹto l'ụkporo iri l'ise.

⁴⁴ Eswi dụ iya ụkporo ụnu ugbo ẹno l'ụnu iri.

⁴⁵ Nkakfụ-ịgara dụ iya ụkporo ụnu ugbo ẹto l'ụnu iri l'ishii l'ụkporo ugbo ise.

⁴⁶ Ndu madzụ, e ketaru whẹ dụ ụkporo ụnu madzụ ugbo labọ.

⁴⁷ Mósisu bya eshi l'iwhe ono, e keru nụ ndu Ízurẹlu wotagee iwhe nnanụ nnanụ l'ime ụkporo ugbo labọ l'iri, lẹ madzụ mẹe l'iwhe-edobe, o woru iya nụ ikfu Lívayi, bụ ndu mkpuumkpu-ẹkwa Onye-Nwe-Ọha dụ l'ẹka, ẹgube ono Onye-Nwe-Ọha tụru iya Mósisu l'iwu.

⁴⁸ O noo ya, ndu ishi, l'achị ndu ojọgu ono, mbụ ndu ishi, l'achị ụnu ndu ojọgu ugbo labọ l'ụkporo iri mẹe ndu ishi, l'achị ụkporo ndu ojọgu ugbo ise wụru byakfutashia Mósisu.

⁴⁹ Whẹ sụ Mósisu: “Anyịbe ndu ozhi ghu bẹ gụakwaru ndu ojọgu ono, anyi chị jee ọgu ono ọgu; tọ dụ m'ọo onye lanụ, l'aachọ achọ l'ime whẹ.

⁵⁰ Ọ waa bụ iwhe anyi l'ewota t'a nụ Onye-Nwe-Ọha. Onyenọnu l'a-nụ iwhe ọ lwụtaru l'ọgu, mbụ iwhe e meru lẹ mkpọla-ododo bụ iya bụ ịyagba-ukfu, echi mgbalẹka, echi mkpụshi-ẹka, iwhe-nchị mẹe ịyagba-olu. Anyi wotaru iya t'e gude iya kfụa ụgwo iwhe-dụ-ẹji, anyi metagbaberu l'atatiwhu Onye-Nwe-Ọha.”

⁵¹ Mósisu yẹle Eliyéza, bụ onye l'agbajẹ ẹja nụ Chileke nata whẹ iwhe ono, e meshiru lẹ mkpọla-ododo ono, mbụ ọla lile ono, whẹ gude bya.

⁵² Iwhe ono, e meru lẹ mkpọla-ododo ono, ndu ishi, l'achị ụnu ndu ojọgu ugbo labọ l'ụkporo iri mẹe ndu ishi, l'achị ụkporo ndu ojọgu ugbo ise nụru Onye-Nwe-Ọha bẹ dụ ụkporo shẹkelu mkpọla-ododo ugbo ẹsato lẹ shẹkelu ẹsaa l'ugvu iya.

⁵³ Ndu ojọgu ono l'ẹhu l'ẹhu gude iwhe whẹ kwatarụ l'ọgu lwa.

⁵⁴ Mósisu yẹle Eliyéza, bụ onye l'agbajẹ ẹja nụ Chileke nata iwhe ono, e meru lẹ mkpọla-ododo ono l'ẹka ndu ishi, l'achị ụnu ndu ojọgu labọ l'ụkporo iri mẹe l'ẹka ndu ishi, l'achị ụkporo ndu ojọgu ugbo ise. Whẹ natarụ whẹ iya je edobe lẹ Ụlo-ẹkwa-ndzuko l'ẹka l'ọo-dụ l'atatiwhu Onye-Nwe-Ọha, ndu Ízurẹlu l'e-gudeje anyata ọgu ono, whẹ lẹ ndu Midiyanu lwụru.