Ọ́gú 30 - BAYỊBURU Ẹzaa

Okwe Onye-Nwe-Ọha ụkwa

¹ Mósisu bya ekfuru yeru ndu ishi, l'achị ikfu g'ikfu ha lẹ Ízurẹlu sụ whẹ: “Ọ waa iwhe Onye-Nwe-Ọha tụru l'iwu ndọwa:

² Nwoke -kweta Onye-Nwe-Ọha ụkwa m'ọ bụ l'o nweru iwhe o riburu lẹ nte lẹ ya te emedu, tẹ nwoke ọbu be emebyikwa okfu ọnu iya. T'o medzukwa iwhe lile, shi iya l'ọnu fụta.

³ “Nteke nwamgbọko, bukwadu l'ibe nna iya, l'ẹte alaa ji kwetaru Onye-Nwe-Ọha ụkwa, m'ọ bụ l'o nweru iwhe o riburu lẹ nte lẹ ya te emedu,

⁴ nna iya -nụa ụkwa ono, o kweru mẹe nke iwhe ono, o riburu lẹ nte lẹ ya te emedu ono, tọ dụ iwhe nna iya ono kfuru yeru iya, ọo ya bụ l'ụkwa ono, o kweru l'e-keru; iwhe ono, o riburu lẹ nte lẹ ya te emedu ekekwaruwho.

⁵ Nteke bụ lẹ nna iya nụ-geeru nke ụkwa ono; ọ jịka sụ waawa mbọku ono, ọ nụru iya; ọo ya bụ l'ọ tọ dụdu ụkwa ono, o kweru; tọ dụ iwhe ono, o riburu lẹ nte lẹ ya te emedu ono, dụ ọwhu l'e-keru. Sụa, Onye-Nwe-Ọha bẹ l'a-gụru nwamgbọko ono nvụ, o noo nkele ọo nna iya bẹ jịkaru t'o bo medzushi iya.

⁶ “Nteke bụ lẹ nwamgbọko ono bẹ kweedaru ụkwa ono tẹmenu ọ lụa ji, mbụ l'o nweru iwhe o gudewa ọnu iya ribua lẹ nte lẹ ya te emedu

⁷ ji iya ono -nụa ya, tọ dụ iwhe o kfuru yeru iya mbọku ono, ọ nụru iya, ọo ya bụ l'ụkwa ono, o kweru l'e-keru, iwhe ono, o riburu lẹ nte lẹ ya te emedu ekekwaruwho.

⁸ Ọle ọ -bụru lẹ ji iya ono bẹ nụ-geeru nke ụkwa ono, ọ nọdu mbọku ono, ọ nụru iya jịka sụ waawa, ọo ya bụ l'ụkwa ono, o kweru mẹe iwhe ono, o gude ọnu iya ribua lẹ nte lẹ ya te emedu tee ekeduru. Onye-Nwe-Ọha l'a-gụru nwamgbọko ono nvụ.

⁹ “Nwanyị-mbunu m'ọ bụ nwanyị, ji iya chịfuru -kwe Onye-Nwe-Ọha ụkwa, m'ọ bụ l'o nweru iwhe o kweru bya eribua ya lẹ nte lẹ ya te emedu, bẹ iwhe ono tukoru iya l'ishi.

¹⁰ “Ọ -bụru l'ọo nwanyị, nọ l'ibe ji iya bẹ kweru Onye-Nwe-Ọha ụkwa m'ọ bụ l'o nweru iwhe o kweru bya eribua ya lẹ nte lẹ ya te emedu,

¹¹ ji iya bya anụa ya, tọ dụ iwhe o kfuru yeru iya, mbụ t'ọ jịka sụ waawa, ọo ya bụ l'ụkwa ono, nwanyị ono kweru l'e-keru, iwhe lile o riru nte lẹ ya te emedu ekekwaruwho.

¹² Ọle ọ -bụkwanuru lẹ ji iya ono bẹ nụ-geeru iya, ọ jịka mbọku ono, ọ nụru iya sụ t'o bo vushiru ire; ọo ya bụ l'iwhe lile, shi nwanyị ono l'ọnu fụta lẹ nke ụkwa ono, o kweru mẹe lẹ nke iwhe ono, o riru nte lẹ ya te emedu ono te ekeheduru. Onye-Nwe-Ọha l'a-gụru nwanyị ono nvụ nkele ọo ji iya bẹ jịkaru sụ t'o bo vushiru ire.

¹³ Iwhe bụ ụkwa lile, nwanyị ono kweru mẹe iwhe lile o kweru bya eribua lẹ nte lẹ ya te emedu bụ ji iya b'ọ dụ l'ẹka. Ji iya -sụ t'o keru ya ekeru, ọ -sụ t'o bo vushiru ire, o too vuduru ire.

¹⁴ Ọ -bụru lẹ ji iya bẹ nụ-geeru iya t'ọ dụ iwhe l'ookfujeru yeru iya mbọkumboku, ọo ya bụ l'ụkwa lile ọbu, o kweru l'e-keru, iwhe lile ọbu, o riru nte lẹ ya te emedu ekekwaruwho. Ji nwanyị ono bẹ sụru t'o keru, o noo nkele ọ tọ dụdu iwhe o kfuru mbọku, ọ nụru iya.

¹⁵ Ọle ọ -nụ-gekwanua ya bya emee t'o bo vushi ire, yẹbedua evuru ejo-iwhe, nwanyị ono gẹge evu.”

¹⁶ O noo iwhe Onye-Nwe-Ọha tọru Mósisu ọkpa iya sụ t'e tsoje ndono, t'ọ bụru iwhe l'a-dụ l'echilabọ nwoke yẹle nyee ya mẹe l'echilabọ nna yẹle nwa iya nwanyị, mbụ nwata-mgbọko, bukwadu l'ibe nna iya, tọko laa ji.