Ọ́gú 29 - BAYỊBURU Ẹzaa

Ori oge opyi-ọku

¹ “ ‘L'abalị mbụ l'ọnwa ẹsaa bẹ unu l'e-nweje ndzuko, dụ nsọ. T'ọ bọ dụkwa ozhi, l'eejeje eje, unu l'e-jeje mbọku ono l'owhu. Mbọku ono bụ mbọku, unu l'e-gbuje opyi-ọku.

² Unu l'a-gba ẹja ọkpokota-iwhe-ọku, mbụ ẹja, mkpọ iya dụ Onye-Nwe-Ọha ree. Unu l'e-gbu nwa oke-eswi lanụ mẹe ebyila lanụ mẹe ịgogolo ẹsaa, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

³ Ngwo-ẹja nri, l'etsoje iya nụ bẹ unu l'e-gudeje ọkpobe ụturutuu-witi, a gwọkoberu mmanụ gbaa. Unu -gbua oke-eswi ono, unu eyekobeje iya ngwo-ẹja nri gbaa, mbụ ụzo ẹto l'ime nkere iri nkwẹka ụturutuu-witi, a gwọkoberu mmanụ. Unu -gbua ebyila ono, unu eyekobeje iya ụturutuu-witi gbaa, mbụ ụzo labọ lẹ nkere iri nkwẹka ụturutuu-witi, a gwọkoberu mmanụ.

⁴ A -bya l'ịgogolo ẹsaa whọ, unu -gbua nnanụ, unu eyekobeje iya ngwo-ẹja nri gbaa, mbụ ụzo lanụ lẹ nkere iri nkwẹka ụturutuu-witi, a gwọkoberu mmanụ.

⁵ Unu egbua mkpi lanụ gude gbaa ẹja iwhe-dụ-ẹji, shi nno kfụa ụgwo iwhe-dụ-ẹji, unu metagbaberu l'atatiwhu Onye-Nwe-Ọha.

⁶ Unu l'a-tụko ẹja ono g'ọ ha gbakọta, t'a gụfukwaroya ẹja ọkpokota-iwhe-ọku whọ, l'aagbajẹ l'ọnwa l'ọnwa mẹe lẹ mbọku lẹ mbọku yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ; bụ lẹ gẹ nsọ iya dụ, mbụ ngwo-ẹja ono, mkpọ iya l'adụje ree bụ iya bụ ngwo-ẹja ono, a kpọru ọku nụ Onye-Nwe-Ọha.

Mbọku ọkfu ụgwo iwhe-dụ-ẹji

⁷ “ ‘Sụa, l'abalị iri l'ọnwa ẹsaa bẹ unu l'e-nweje ndzuko, dụ nsọ. Mbọku ono l'owhu bẹ unu l'a-swịkotaje ẹgu shi nno taa ndzụ unu awhụwhu. T'ọ bọ dụkwa ozhi, l'ejeje eje, unu l'ejeje mbọku ono l'owhu.

⁸ Unu l'a-gba ẹja ọkpokota-iwhe-ọku nụ Onye-Nwe-Ọha mbọku ono, mbụ ẹja, mkpọ iya dụ ree. Unu gbua nwa oke-eswi lanụ mẹe ebyila lanụ mẹe ịgogolo ẹsaa, gbageeru awha, l'adụa gẹ whẹ ha, ọrwu dụ l'ẹhu, gude gbaa ẹja ono.

⁹ Ngwo-ẹja nri, l'etsoje iya nụ bụ ọkpobe ụturutuu-witi, a gwọkoberu mmanụ bẹ unu l'e-gudeje agba iya. Unu -gbua nwa oke-eswi ono, unu eyekobeje iya ngwo-ẹja nri gbaa, mbụ ụzo ẹto lẹ nkere iri nkwẹka ọkpobe ụturutuu-witi, a gwọkoberu mmanụ. Unu -gbua ebyila ono, unu eyekobeje iya ngwo-ẹja nri gwoo, mbụ ụzo labọ lẹ nkere iri nkwẹka ọkpobe ụturutuu-witi, a gwọkoberu mmanụ.

¹⁰ A -bya l'ịgogolo ẹsaa whọ, unu -gbua nnanụ, unu eyekobeje iya ngwo-ẹja nri gbaa, mbụ ụzo lanụ lẹ nkere iri nkwẹka ọkpobe ụturutuu-witi, a gwọkoberu mmanụ.

¹¹ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja iwhe-dụ-ẹji, l'aagbajẹ gude kfụa ụgwo iwhe-dụ-ẹji mẹe ẹja ọkpokota-iwhe-ọku ono, l'aagbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

Ori oge Ime-mkpu

¹² “ ‘L'abalị iri l'ise l'ọnwa ẹsaa bẹ unu l'e-nweje ndzuko, dụ nsọ. T'ọ bọ dụkwa ozhi, l'eejeje eje, unu l'ejeje mbọku ono l'owhu. Unu riaru Onye-Nwe-Ọha oge abalị ẹsaa.

¹³ Unu l'a-gbarụ Onye-Nwe-Ọha ẹja ọkpokota-iwhe-ọku, mbụ ẹja, a kpọkotaru ọku, mkpọ iya dụ Onye-Nwe-Ọha ree. Unu gbua ụnwu oke-eswi iri l'ẹto mẹe ebyila labọ mẹe ịgogolo iri l'ẹno, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

¹⁴ Ngwo-ẹja nri, l'etsoje iya nụ bụ ọkpobe ụturutuu-witi, a gwọkoberu mmanụ bẹ unu l'e-gudeje agba iya. Ụnwu oke-eswi ono nnanụ whẹ iri l'ẹto bẹ unu l'e-yekobeje ngwo-ẹja nri gbaa, mbụ ụzo ẹto lẹ nkere iri nkwẹka ọkpobe ụturutuu-witi, a gwọkoberu mmanụ. A -bya l'ụnwu ebyila labọ whọ, nnanụ iya bẹ unu l'e-yekobe ngwo-ẹja nri gbaa, ụzo labọ lẹ nkere iri nkwẹka ọkpobe ụturutuu-witi, a gwọkoberu mmanụ.

¹⁵ A -bya l'ịgogolo iri l'ẹno whọ, nnanụ iya bẹ unu l'e-yekobeje ngwo-ẹja nri gbaa, mbụ ụzo lanụ lẹ nkere iri nkwẹka ọkpobe ụturutuu-witi, a gwọkoberu mmanụ.

¹⁶ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

¹⁷ “ ‘O -rwua mbọku nke ẹbo, unu egbua ụnwu oke-eswi iri l'ẹbo mẹe ebyila labọ mẹe ịgogolo iri l'ẹno, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

¹⁸ A bya l'ụnwu oke-eswi ono yẹle ebyila ono mẹe ịgogolo ono gẹ whẹ ha, unu eyekobeje iya ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

¹⁹ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

²⁰ “ ‘O -rwua mbọku nke ẹto, unu egbua ụnwu oke-eswi iri lẹ nnanụ mẹe ebyila labọ mẹe ịgogolo iri l'ẹno, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

²¹ A bya l'ụnwu oke-eswi ono yẹle ebyila ono mẹe ịgogolo ono gẹ whẹ ha, unu eyekobeje iya ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

²² Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

²³ “ ‘O -rwua mbọku nke ẹno, unu egbua ụnwu oke-eswi iri mẹe ebyila labọ mẹe ịgogolo iri l'ẹno, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

²⁴ A bya l'ụnwu oke-eswi ono yẹle ebyila ono mẹe ịgogolo ono gẹ whẹ ha, unu eyekobeje iya ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

²⁵ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

²⁶ “ ‘O -rwua lẹ mbọku nke ise, unu egbua ụnwu oke-eswi tete, gbua ebyila labọ; gbua ịgogolo iri l'ẹno, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

²⁷ A bya l'ụnwu oke-eswi ono yẹle ebyila ono mẹe ịgogolo ono gẹ whẹ ha, unu eyekobeje iya ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

²⁸ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

²⁹ “ ‘O -rwua mbọku nke ishii, unu egbua ụnwu oke-eswi ẹsato mẹe ebyila labọ mẹe ịgogolo iri l'ẹno, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

³⁰ A bya l'ụnwu oke-eswi ono yẹle ebyila ono mẹe ịgogolo ono gẹ whẹ ha, unu eyekobeje iya ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

³¹ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsokwa iya whọ.

³² “ ‘O -rwua mbọku nke ẹsaa, unu egbua ụnwu oke-eswi ẹsaa mẹe ebyila labọ mẹe ịgogolo iri l'ẹno, gbageeru awha, l'adụa gẹ whẹ ha ọrwu dụ l'ẹhu gude gbaa ẹja ono.

³³ A bya l'ụnwu oke-eswi ono yẹle ebyila ono mẹe ịgogolo ono gẹ whẹ ha, unu eyekobeje iya ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

³⁴ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwọ-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

³⁵ “ ‘O -rwua mbọku nke ẹsato, unu enwee ndzuko, dụ nsọ. Ba adụkwa ozhi, l'eejeje eje, unu l'e-je lẹ mbọku ono l'owhu.

³⁶ Unu l'a-gba ẹja ọkpokota-iwhe-ọku, mbụ ẹja, a kpọkotaru ọku, mkpọ iya dụ Onye-Nwe-Ọha ree. Unu gbua nwa oke-eswi lanụ mẹe ebyila lanụ mẹe ịgogolo ẹsaa, gbageeru awha, l'adụa gẹ whẹ ha, ọrwu dụ l'ẹhu gude gbaa ẹja ono.

³⁷ Nwa oke-eswi ono mẹe ebyila ono mẹe ụnwu atụru ono gẹ whẹ ha bẹ unu l'e-yekobe ngwo-ẹja nri, l'etsoje iya nụ mẹe ngwo-ẹja mmẹe, l'etsoje iya nụ gbaa.

³⁸ Unu egbua mkpi lanụ gude gbaa ẹja iwhe-dụ-ẹji, t'a gụfukwaroya ẹja ọkpokota-iwhe-ọku whọ, unu l'agbajẹ ntekenteke yẹle ngwo-ẹja nri, l'etsoje iya nụ mẹe ngwo-ẹja mmẹe, l'etsojekwa iya whọ.

³⁹ “ ‘Ẹja lile ono bẹ unu l'a-gbajẹ nụ Onye-Nwe-Ọha nteke unu l'eri oge unu; t'a gụfukwaroya iwhe unu kweru Onye-Nwe-Ọha ụkwa iya mẹe iwhe unu tụru obu unu ama anụ Onye-Nwe-Ọha mẹe ẹja ọkpokota-iwhe-ọku mẹe ẹja nri mẹe ẹja mmẹe mẹfua ẹja ẹhu-guu.’ ”

⁴⁰ Mósisu bya atụko iwu ono, Onye-Nwe-Ọha tụru ye iya l'ẹka kfukotaru ndu Ízurẹlu.