Ọ́gú 28 - BAYỊBURU Ẹzaa

Ẹja, l'aagbajẹ mbọku lẹ mbọku

¹ Onye-Nwe-Ọha sụ Mósisu:

² “Tụaru ndu Ízurẹlu iwu sụ whẹ: ‘Unu leta ẹnya nụje mu ngwo-ẹja, rwuberu mu nụ, mbụ nri, e gude egworu mu ngwo-ẹja, mbụ ngwo-ẹja ono, a kpọru ọku, shi nno mee tẹ mkpọ iya dụ mu ree. Unu nụjekwa mu iya lẹ mgbe iya.’

³ Gụ ekfuru whẹ sụ whẹ: ‘Ọ waa ngwo-ẹja, unu l'a-kpọje ọku nụ Onye-Nwe-Ọha ndọwa: ịgogolo labọ, gbageeru awha, ọrwu l'adụa l'ẹhu. Unu gbajẹe ya mbọku mbọku t'ọ bụru ẹja ọkpokota-iwhe-ọku, unu l'agbajẹ ntekenteke.

⁴ Unu gbujee ịgogolo lanụ l'ụtsu, unu egbua ịgogolo lanụ l'urwẹnyashi.

⁵ Unu eyeje iya ẹja nri gbaa, mbụ ụzo lanụ l'ime nkere iri nkwẹka ọkpobe ụturutuu-witi, a gwọkoberu nkere ẹno ekpemu mmanụ ólivu, a tsụru l'ọtumu.

⁶ Ngwo-ẹja ono bụ ngwo-ẹja ọkpokota-iwhe-ọku, l'aagbajẹ ntekenteke, bụ iya bụ g'e meru iya dobe l'ugvu Sáyinayi, mbụ ngwo-ẹja ono, a kpọru ọku, mkpọ iya dụ Onye-Nwe-Ọha ree.

⁷ Unu -gbua ịgogolo lanụ, unu eyekobe iya ngwo-ẹja mmẹe gbaa, mbụ nkere ẹno ọvara mmẹe. Ọo l'ụlo-nsọ bẹ unu l'a-gbashịjeru Onye-Nwe-Ọha ngwo-ẹja mmẹe ono, mbụ mmẹe, shihuru ike.

⁸ Unu egbufua ịgogolo lanụ l'urwẹnyashi yekobekwa iya whọ ngwo-ẹja nri mẹe ngwo-ẹja mmẹe g'ọo nke ụtsu whọ. Unu akpọo ngwo-ẹja ono ọku gbaarụ Onye-Nwe-Ọha t'ọ bụru ngwo-ẹja, mkpọ iya dụ Onye-Nwe-Ọha ree.

Ẹja, l'aagbajẹ mbọku ọtuta-ume

⁹ “ ‘A -bya lẹ mbọku ọtuta-ume, unu gbujee ịgogolo labọ, gbageeru awha, ọrwu l'adụa l'ẹhu gude gbaa ẹja mbọku ono. Unu egude ụzo labọ l'ime nkere iri nkwẹka ọkpobe ụturutuu-witi, a gwọkoberu mmanụ, unu l'e-gudeje gbaa ẹja nri. Unu eyekobe iya ngwo-ẹja mmẹe, l'etsoje iya nụ.

¹⁰ O noo bụ iya bụ ẹja ọkpokota-iwhe-ọku, unu l'a-gbajẹ mbọku ọtuta-ume; t'a gụfukwa ẹja ọkpokota-iwhe-ọku, l'aagbajẹ ntekenteke yẹle ngwo-ẹja mmẹe, l'etsoje iya nụ.

Ẹja, l'aagbajẹ l'ọnwa ọ̀whúú

¹¹ “ ‘O -rwujee abalị mbụ l'ọnwa lile, unu agbajẹeru Onye-Nwe-Ọha ẹja ọkpokota-iwhe-ọku. Unu gudeje ụnwu oke-eswi labọ mẹe ebyila lanụ mẹe ịgogolo ẹsaa, gbageeru awha, ọrwu l'adụa l'ẹhu gude gbaa ẹja ono.

¹² Unu -gbua oke-eswi ono nnanụ, unu eyekobe iya ngwo-ẹja nri gbaa, mbụ ụzo ẹto l'ime nkere iri nkwẹka ọkpobe ụturutuu-witi, a gwọkoberu mmanụ. Unu -gbua ebyila ono, unu eyekobe iya ngwo-ẹja nri gbaa, mbụ ụzo labọ l'ime nkere iri nkwẹka ọkpobe ụturutuu-witi, a gwọkoberu mmanụ.

¹³ Unu -gbua ịgogolo ono nnanụ, unu eyekobe iya ngwo-ẹja nri gbaa, mbụ ụzo lanụ l'ime nkere iri nkwẹka ọkpobe ụturutuu-witi, a gwọkoberu mmanụ. O noo bụ ẹja ọkpokota-iwhe-ọku, mkpọ iya dụ Onye-Nwe-Ọha ree bụ iya bụ ngwo-ẹja, a kpọru ọku nụ Onye-Nwe-Ọha.

¹⁴ O nokwawho gẹ bụ: unu -gbua oke-eswi, unu eyekobe iya ngwo-ẹja mmẹe gbaa, mbụ nkerẹbo ọvara mmẹe. Ọ -bụru l'ọo ebyila bẹ unu gburu, unu eyekobe iya nkere ẹto ọvara mmẹe gbaa. Unu -gbua ịgogolo, unu eyekobe iya nkere ẹno ọvara mmẹe gbaa. O noo nke ẹja ọkpokota-iwhe-ọku, unu l'a-gbajẹ l'ọnwa l'ọnwa, mbụ l'ọnwa lile, dụ l'ime awha.

¹⁵ Unu gbujee mkpi lanụ gude gbaa ẹja iwhe-dụ-ẹji nụ Onye-Nwe-Ọha. T'a gụfukwa ẹja ọkpokota-iwhe-ọku, l'aagbajẹ ntekenteke yẹle ngwo-ẹja mmẹe, l'etsoje iya nụ.

Oge O-je-ghata

¹⁶ “ ‘Abalị iri l'ẹno l'ọnwa mbụ bẹ bụ oge O-je-ghata nke Onye-Nwe-Ọha.

¹⁷ Abalị iri l'ise l'ọnwa mbụ ono bẹ bụ ori oge. Abalị ẹsaa owhu bẹ unu l'a-takọtaje buredi, l'eete eyee iwhe l'ekoje buredi.

¹⁸ Mbọku mbụ, unu watarụ ori oge ono bẹ unu l'e-nweje ndzuko, dụ nsọ. Ba adụkwa ozhi, l'eejeje eje, unu l'e-jeje mbọku ono l'owhu.

¹⁹ Sụa, unu gbajẹru Onye-Nwe-Ọha ẹja, a kpọkotaru ọku, mbụ ẹja ọkpokota-iwhe-ọku. Unu gbua ụnwu oke-eswi labọ mẹe ebyila lanụ mẹe ụnwu ịgogolo ẹsaa, gbageeru awha, ọrwu l'adụa l'ẹhu gude gbaa ya.

²⁰ Ngwo-ẹja nri, l'etsoje iya nụ bụ ọkpobe ụturutuu-witi, a gwọkoberu mmanụ bẹ l'ee-gude agba iya. Unu -gbua oke-eswi lanụ, unu eyekobe iya ngwo-ẹja nri gbaa, mbụ ụzo ẹto l'ime nkere iri nkwẹka ọkpobe ụturutuu-witi, a gwọkoberu mmanụ. Unu -gbua ebyila lanụ, unu eyekobe iya ngwo-ẹja nri gbaa, mbụ ụzo labọ lẹ nkere iri nkwẹka ọkpobe ụturutuu-witi, a gwọkoberu mmanụ.

²¹ Ọ bụru ụzo lanụ lẹ nkere iri bẹ unu l'a-gbajẹ l'ishi ịgogolo ono nnanụ l'ime whẹ ẹsaa.

²² O nokwawhọ g'unu l'e-gbu mkpi lanụ gude gbaa ẹja iwhe-dụ-ẹji, shi nno kfụa ụgwo iwhe-dụ-ẹji, unu metagbaberu l'iwhu Onye-Nwe-Ọha.

²³ Unu l'a-tụko ẹja ono gbakọta, t'a gụfukwaroya ẹja ọkpokota-iwhe-ọku ono, l'aagbajẹ l'ụtsu bụ iya bụ ẹja ono, l'aagbajẹ ntekenteke.

²⁴ Ọo l'ụzo, dụ nno bẹ unu l'a-nọje agba ẹja ono mbọku mbọku jeye abalị ẹsaa ono. Unu mejee nri, e gude eme nke ngwo-ẹja, a kpọru ọku ono, mkpọ iya dụ Onye-Nwe-Ọha ree. Unu gbajẹe ẹja ono, t'a gụfukwaroya ẹja ọkpokota-iwhe-ọku ono, unu l'agbajẹ ntekenteke mẹe ngwo-ẹja mmẹe, l'etsoje iya nụ.

²⁵ O -rwujee mbọku nke ẹsaa ya, unu enwejee ndzuko, dụ nsọ. Ba adụkwa ozhi, l'eejeje eje, unu l'e-je mbọku ono l'owhu.

Oge Idzu

²⁶ “ ‘Mbọku, unu l'eri oge mebyi iwhe mbụ unu, t'unu nwejekwaa ndzuko, dụ nsọ, t'ọ bọ dụkwa ozhi, l'eejeje eje, unu l'e-jeje mbọku ono l'owhu. Mbọku ono bẹ unu l'a-gbajẹ ẹja mebyi iwhe ọ̀whúú unu nụ Onye-Nwe-Ọha l'ori oge Idzu unu.

²⁷ Unu gbaa ẹja ọkpokota-iwhe-ọku, mbụ ẹja, mkpọ iya dụ Onye-Nwe-Ọha ree. Unu gbujee ụnwu oke-eswi labọ mẹe ebyila lanụ mẹe ụnwu ịgogolo ẹsaa, gbageeru awha gude gbaa ẹja ono.

²⁸ Ngwo-ẹja nri, l'etsoje iya nụ bẹ bụ ọkpobe ụturutuu-witi, a gwọkoberu mmanụ. Unu -gbua oke-eswi lanụ, unu eyekobeje iya ngwo-ẹja nri gbaa, mbụ ụzo ẹto l'ime nkere iri nkwẹka ọkpobe ụturutuu-witi, a gwọkoberu mmanụ. Unu -gbua ebyila, unu eyekobe iya ngwo-ẹja nri gwoo, mbụ ụzo labọ lẹ nkere iri nkwẹka ọkpobe ụturutuu-witi, a gwọkoberu mmanụ.

²⁹ Ọ bụru ụzo lanụ lẹ nkere iri nkwẹka ọkpobe ụturutuu-witi, a gwọkoberu mmanụ bẹ unu l'e-yekobeje l'ịgogolo ono gbaa ngwo-ẹja ono.

³⁰ Unu egbua mkpi lanụ gude gbaa ẹja iwhe-dụ-ẹji, shi nno kfụa ụgwo iwhe-dụ-ẹji, unu metagbaberu l'iwhu Onye-Nwe-Ọha.

³¹ Unu tụkoje ẹja ono g'o ha gbakọta, t'a gụfukwaroya ẹja ọkpokota-iwhe-ọku ono, unu l'agbajẹ ntekenteke mẹe ngwo-ẹja nri ono, l'etsoje iya nụ mẹe ngwo-ẹja mmẹe ono, l'etsoje iya nụ. Ọle t'unu kwabẹkwa ẹnya t'ọ bọ dụ anụ lile ono, unu l'e-gbu dụ ọwhu l'e-nwe ọrwu.