Ọ́gú 27 - BAYỊBURU Ẹzaa

Ụnwada Zelofehadu l'ekfu t'a nụ whẹ oke alị nna whẹ

¹ Ụnwada Zelofehadu byatashia l'ọnu Ụlo-ẹkwa ndzuko. Zelofehadu l'onwiya bẹ bụ nwa Hefa, Hefa bụru nwa Giledu, Giledu bụru nwa Makiru, Makiru bụru nwa Manáse. Ndu ono bụkota ẹpa Manáse. Manáse bụru nwa Jósẹfu. Ẹwha ụnwada Zelofehadu bụ: Mahula, Nowa, Họgula, Milika mẹe Tiza.

² Ụnwada Zelofehadu ono bya akfụru l'atatiwhu Mósisu mẹe l'atatiwhu Eliyéza, onye l'agbajẹ ẹja nụ Chileke mẹe l'atatiwhu ndu ishi mẹe l'atatiwhu ndu Ízurẹlu l'owhu l'ọnu Ụlo-ẹkwa ndzuko kfulahaa sụ:

³ “Nna anyi bẹ nwụhuru l'echi-ẹgu. Ọle o to tsodu l'otu Kora, bụ otu ono, chịkoberu onwowhe tatso Onye-Nwe-Ọha okfu. Ọo iswi iwhe-dụ-ẹji o meru b'o gude nwụhu, t'ọ nwụta unwoke.

⁴ ?Ee-kwobewaro lẹ nna anyi ta anwụtadu nwa nwoke, ẹwha iya echihu l'ẹnya-uwhu, o shi tọo? Unu hẹe anyi oke g'unu hẹru ndibe nna anyi.”

⁵ Ọo ya bụ, Mósisu pata okfu ụnwada Zelofehadu ono pakfu Onye-Nwe-Ọha.

⁶ Onye-Nwe-Ọha sụ Mósisu:

⁷ “Ụnwada Zelofehadu kfuru iwhe gbarụ nụ. Unu warụ alị nụ whẹ g'unu nụru ndibe nna whẹ t'ọ bụru oke-iwhe whẹ. Unu nụ whẹ oke-alị, rwuberu nna whẹ t'ọ bụru nke whẹ.

⁸ Kfuru yeru ndu Ízurẹlu sụ whẹ: Ọ -bụru lẹ nwoke bẹ nwụhuru t'ọ nwụta nwa nwoke, t'e wota oke-alị, rwuberu iya nụ nụ ụnwu iya nwanyị t'ọ bụru nke whẹ.

⁹ Ọ -bụru l'onye ọbu ta anwụtafudua nwa nwanyị, e wota oke-alị ọbu, rwuberu iya nụ woru nụ unwune iya nke nwoke t'ọ bụru nke whẹ.

¹⁰ Nteke -bụ l'o to nwefudua unwune nwoke, e woru oke-alị ọbu, rwuberu iya nụ woru nụ nwune nna iya whẹ nke nwoke t'ọ bụru nke whẹ.

¹¹ Ọ -bụru lẹ nna, nwụru onye ọbu te enwedu unwune nwoke, e woru oke-alị ọbu, rwuberu iya nụ woru nụ ndu whẹ l'iya bụ ọkpobe abụbu t'ọ bụru nke whẹ. Iwhe ono bụ iwhe a tọru ọkpa iya mẹe nsọ, e doberu ndu Ízurẹlu, ẹgube Onye-Nwe-Ọha tụru iya Mósisu l'iwu.”

Aahọta Jóshuwa t'ọ nọ-chia ẹnya Mósisu

¹² Tọ dụ iya bụ, Onye-Nwe-Ọha sụ Mósisu: “Nyihu eli ugvu Abarimu-a je anọdu whụkota alị ọbu, mu l'eme tẹ mu nụ ndu Ízurẹlu.

¹³ Ị -whụ-gele iya whọ bẹ l'ịi-nwụhu lakfushia ndibe unu lẹ maa g'ọo nwune ghu nwoke, bụ Érọnu.

¹⁴ Iwhe kparụ iya nụ bụ l'unu kwefuru ike l'okfu mu nteke whọ, ndu Ízurẹlu swọjeru ụswo lẹ mgboro mini ono, dụ l'echi-ẹgu Zinu. Unu ta adụ ike dobe mu nsọ.” Mini ono bụ mini Meriba, dụ lẹ Kádẹshi l'echi-ẹgu Zinu.

¹⁵ Mósisu sụ Onye-Nwe-Ọha:

¹⁶ “Tẹ Onye-Nwe-Ọha, mbụ Chileke ọwhu gude ndzụ madzụ l'owhu họtanu onye l'a-nọ achị ndu Ízurẹlu.

¹⁷ Onye l'a-nọ eje eje alwa alwa l'atatiwhu whẹ, mbụ onye l'a-nọ edu whẹ eje eje alwa alwa, tẹ ndibe gụbe Onye-Nwe-Ọha ba adụ g'ọo atụru, l'ẹte enwee onye nche.”

¹⁸ Ọo ya bụ, Onye-Nwe-Ọha sụ Mósisu: “Duta Jóshuwa nwa Nunu, onye Ume nke mụbe Onye-Nwe-Ọha bu l'ẹhu, gụ ebyibe iya ẹka l'ishi.

¹⁹ Duru iya t'o je akfụru l'atatiwhu Eliyéza, bụ onye l'agbajẹ ẹja nụ Chileke mẹe l'atatiwhu ndu Ízurẹlu l'owhu, gụ anọdu l'atatiwhu ndu ono ye iya ozhi ono l'ẹka.

²⁰ Harụ ike ono, dụ ghu l'ẹka nụ iya nke ọwhu iwhe bụ Ízurẹlu l'owhu l'a-nọje eme iwhe ọ sụru tẹ whẹ mee.

²¹ Tẹ Jóshuwa kfụru l'atatiwhu Eliyéza, onye l'agbajẹ ẹja nụ Chileke. Eliyéza egude ido, bụ urimu jee mkpata ishi l'iwhu Onye-Nwe-Ọha t'ọ marụ iwhe o kpeburu l'okfu ẹhu iya. Ọo iwhe Jóshuwa sụru tẹ ndu Ízurẹlu mee bẹ whẹ l'e-meje. Ọ -sụ tẹ Ízurẹlu tụgburu whẹ atụgburu, ọ -sụ tẹ whẹ bata whẹ abata.”

²² Mósisu mee lẹge Onye-Nwe-Ọha kfuru iya. O duta Jóshuwa kfụbe l'atatiwhu Eliyéza, onye l'agbajẹ ẹja nụ Chileke mẹe l'atatiwhu edzudzu-ọha Ízurẹlu.

²³ Ọo ya bụ, o byibe Jóshuwa ẹka l'ishi woru ozhi ono ye iya l'ẹka gẹ Onye-Nwe-Ọha shi l'ẹka Mósisu kfua.