Ọ́gú 26 - BAYỊBURU Ẹzaa

Aagụ ndu Ízurẹlu ọgu nke ugbo labọ

¹ Ọ bya ebe gẹ nchịkarehu ono megeeru, Onye-Nwe-Ọha sụ Mósisu yẹle Eliyéza nwa Érọnu, bụ onye l'agbajẹ ẹja nụ Chileke:

² “Unu gụa ndu Ízurẹlu l'owhu ọgu; unu shi iya agụgu lẹ ndu gbawarụ ụkporo awha tụgbua, mbụ ndu sụwaru oje ọgu lẹ Ízurẹlu. Unu gụa whẹ l'ibe nna whẹ l'ibe nna whẹ.”

³ Ọ bụru lẹ whorokoto alị Moabu, dụ l'agụga ẹnyimu Jọ́danu lẹ mgboro mkpụkpu Jériko bẹ Mósisu yẹle Eliyéza, onye l'agbajẹ ẹja nụ Chileke nọdu kfuru yeru ndu Ízurẹlu sụ whẹ agha:

⁴ “Unu gụa ndu Ízurẹlu l'owhu ọgu; unu shi iya agụgu lẹ ndu gbawarụ ụkporo awha tụgbua lẹge Onye-Nwe-Ọha tụru iya Mósisu l'iwu.” Ndu ọwaa bụ ndu Ízurẹlu shi l'alị Íjiputu fụta:

⁵ Ẹpa Rúbẹnu, bụ ọkpara Ízurẹlu bụ: Hanọku, onye metaru ẹnya-uwhu Hanọku mẹe Palu, onye metaru ẹnya-uwhu Palu;

⁶ mẹe Hẹzuronu, onye metaru ẹnya-uwhu Hẹzuronu mẹe Kami, onye metaru ẹnya-uwhu Kami.

⁷ Ẹnya-uwhu ono kpaa-whuu bẹ bụkota ikfu Rúbẹnu. Ndu ọwhu a gụru ọgu bẹ dụ ụkporo ụnu madzụ ugbo ise l'ụnu ugbo tete l'ụkporo ụmadzu ugbo ishii l'ụmadzu iri.

⁸ Nwa Palu nke nwoke bụ Eliyabu.

⁹ Ụnwu nke Eliyabu unwoke bụru: Nemẹlu mẹe Detanu mẹe Abyiramu. Ọo Detanu-a, mẹe Abyiramu-a b'a họtajeru tẹ whẹ bụru ishi lẹ Ízurẹlu; whẹ tsoru otu Kora kwefuru Mósisu yẹle Érọnu ike, mbụ nteke ono, whẹ kwefujeru Onye-Nwe-Ọha ike.

¹⁰ Alị saa ọnu tụko whẹ lẹ Kora lwekota, ndu otu iya whẹ nwụshihu. Ọ bụru nteke ono bẹ ọku kegburu ụkporo ụmadzu ugbo iri l'ẹbo l'ụmadzu iri. Iwhe ono bụru ọlo-ẹka-lẹ-nchị.

¹¹ Ọle ụnwu Kora ta anwụhudu.

¹² Ẹpa Símiyọnu l'ẹnya-uwhu whẹ l'ẹnya-uwhu whẹ bụ: Nemẹlu, onye metaru ẹnya-uwhu Nemẹlu mẹe Jaminu, onye metaru ẹnya-uwhu Jaminu mẹe Jakinu, onye metaru ikfu Jakinu

¹³ mẹe Zera, onye metaru ẹnya-uwhu Zera mẹe Shawulu, onye metaru ẹnya-uwhu Shawulu.

¹⁴ Ẹnya-uwhu ono kpaa-whuu bẹ bụkota ẹnya-uwhu Símiyọnu. Ndu ọwhu, a gụru ọgu dụ ụkporo ụnu ụmadzu ugbo labọ l'ụnu iri l'ise l'ụkporo ụmadzu ugbo iri.

¹⁵ Ẹpa Gadu l'ẹnya-uwhu whẹ l'ẹnya-uwhu whẹ bụ: Zefonu, onye metaru ẹnya-uwhu Zefonu mẹe Hagi, onye metaru ẹnya-uwhu Hagi mẹe Shuni, onye metaru ẹnya-uwhu Shuni

¹⁶ mẹe Ozuni, onye metaru ẹnya-uwhu Ozuni mẹe Eri, onye metaru ẹnya-uwhu Eri

¹⁷ mẹe Arodi, onye metaru ẹnya-uwhu Arodi mẹe Areli, onye metaru ẹnya-uwhu Areli.

¹⁸ Ẹnya-uwhu ono kpaa-whuu bẹ bụkota ikfu Gadu. Ndu ọwhu a gụru ọgu dụ ụkporo ụnu madzụ ugbo ise l'ụnu madzụ l'ụkporo ise.

¹⁹ Juda bẹ nwụtaru unwoke labọ, ẹwha whẹ bụ Ẹru mẹe Onanu. Ọle whẹ labọ bẹ nwụshihuru l'alị Kenanu.

²⁰ Ẹpa Juda l'ẹnya-uwhu whẹ l'ẹnya-uwhu whẹ bụ: Shela, onye metaru ẹnya-uwhu Shela mẹe Pẹ́rezu, onye metaru ẹnya-uwhu Pẹ́rezu mẹe Zera, onye metaru ẹnya-uwhu Zera.

²¹ Ẹpa nke Pẹ́rezu bụ: Hẹzuronu, onye metaru ẹnya-uwhu Hẹzuronu mẹe Hamulu, onye metaru ẹnya-uwhu Hamulu.

²² Ẹnya-uwhu ono kpaa-whuu bẹ bụkota ikfu Juda. Ndu ọwhu, a gụru ọgu bẹ dụ ụkporo ụnu madzụ ugbo tete l'ụnu iri lẹ nnanụ l'ụkporo ụmadzu ugbo ise.

²³ Ẹpa Ísaka l'ẹnya-uwhu whẹ l'ẹnya-uwhu whẹ bụ: Tola, onye metaru ẹnya-uwhu Tola mẹe Puwa, onye metaru ẹnya-uwhu Puwa

²⁴ mẹe Jashubu, onye metaru ẹnya-uwhu Jashubu mẹe Shimurọnu, onye metaru ẹnya-uwhu Shimurọnu.

²⁵ Ẹnya-uwhu ono kpaa-whuu bẹ bụkota ikfu Ísaka. Ndu ọwhu a gụru ọgu dụ ụkporo ụnu madzụ ugbo ẹsato l'ụkporo madzụ ugbo iri l'ise.

²⁶ Ẹpa Zébulọnu l'ẹnya-uwhu whẹ l'ẹnya-uwhu whẹ bụ: Sẹredu, onye metaru ẹnya-uwhu Sẹredu mẹe Elọnu, onye metaru ẹnya-uwhu Elọnu mẹe Jahulẹlu, onye metaru ẹnya-uwhu Jahulẹlu.

²⁷ Ẹnya-uwhu ono kpaa-whuu bẹ bụkota ikfu Zébulọnu. Ndu ọwhu a gụru ọgu dụ ụkporo ụnu madzụ ugbo ẹsaa l'ụnu ugbo iri lẹ nnanụ l'ụkporo ụmadzu ugbo ise.

²⁸ Ẹpa Jósẹfu l'ẹnya-uwhu whẹ l'ẹnya-uwhu bụ Manáse mẹe Ífuremu.

²⁹ Ẹpa Manáse bụ: Makiru, onye metaru ẹnya-uwhu Makiru. Makiru bụ nna Giledu. Giledu meta ẹnya-uwhu Giledu.

³⁰ Ẹpa Giledu bụ: Iyeza, onye metaru ẹnya-uwhu Iyeza mẹe Helẹku, onye metaru ẹnya-uwhu Helẹku

³¹ mẹe Asurẹlu, onye metaru ẹnya-uwhu Asurẹlu mẹe Shékemu, onye metaru ẹnya-uwhu Shékemu

³² mẹe Shemida, onye metaru ẹnya-uwhu Shemida mẹe Hefa, onye metaru ẹnya-uwhu Hefa.

³³ Hefa bụkwa iya whọ nwụru Zelofehadu. Ọle Zelofehadu ta anwụtadu unwoke. Ọo ụnwanyi b'ọ nwụshiru. Ẹwha ụnwu iya ụnwanyi bụ Mahula, Nowa, Họgula, Milika mẹe Tiza.

³⁴ Ẹnya-uwhu ono kpaa-whuu bẹ bụkota ikfu Manáse. Ndu ọwhu a gụru ọgu dụ ụkporo ụnu ụmadzu ugbo ishii l'ụnu ugbo iri lẹ nnanụ l'ụkporo ụmadzu ugbo iri l'ise.

³⁵ Ẹpa nke Ífuremu l'ẹnya-uwhu whẹ l'ẹnya-uwhu whẹ bụ: Shutela, onye metaru ẹnya-uwhu Shutela mẹe Beka, onye metaru ẹnya-uwhu Beka mẹe Tahanu, onye metaru ẹnya-uwhu Tahanu.

³⁶ Ẹpa Shutela bụ Eranu, onye metaru ẹnya-uwhu Eranu.

³⁷ Ẹnya-uwhu ono kpaa-whuu bẹ bụkota ikfu Ífuremu. Ndu ọwhu a gụru ọgu dụ ụkporo ụnu madzụ ugbo ẹno l'ụnu madzụ l'ụkporo madzụ ugbo ise. Ndu ono gẹ whẹ ha bẹ bụkota ẹpa Jósẹfu l'ẹnya-uwhu whẹ l'ẹnya-uwhu whẹ.

³⁸ Ẹpa Bénjaminu l'ẹnya-uwhu whẹ l'ẹnya-uwhu whẹ bụ: Bela, onye metaru ẹnya-uwhu Bela mẹe Ashibẹlu, onye metaru ẹnya-uwhu Ashibẹlu mẹe Ahiramu, onye metaru ẹnya-uwhu Ahiramu

³⁹ mẹe Shefufamu, onye metaru ẹnya-uwhu Shefufamu mẹe Hufama, onye metaru ẹnya-uwhu Hufamu.

⁴⁰ Ẹpa Bela bụ: Arudu mẹe Némanu. Arudu, bụ iya metaru ẹnya-uwhu Arudu, Némanu bụru iya metaru ẹnya-uwhu Némanu.

⁴¹ Ndu ono gẹ whẹ ha bẹ bụkota ẹpa Bénjaminu l'ẹnya-uwhu whẹ l'ẹnya-uwhu whẹ. Ndu ọwhu a gụru ọgu dụ ụkporo ụnu madzụ ugbo ise l'ụnu madzụ iri l'ẹno.

⁴² Ẹpa Danu l'ẹnya-uwhu whẹ l'ẹnya-uwhu whẹ bụ: Shuhamu, onye metaru ẹnya-uwhu Shuhamu. Ẹnya-uwhu ono kpaa-whuu bẹ bụkota ikfu Danu.

⁴³ Ndu ono bụkota ẹnya-uwhu ụnwu Shuhamu gẹ whẹ hakọta. Ndu ọwhu a gụru ọgu dụ ụkporo ụnu madzụ ugbo ẹsato l'ụnu madzụ.

⁴⁴ Ẹpa Asha bụ: Imuna, onye metaru ẹnya-uwhu Imuna mẹe Ishivi, onye metaru ẹnya-uwhu Ishivi mẹe Beríya, onye metaru ẹnya-uwhu Beríya.

⁴⁵ Ẹpa Beríya bụ: Heba, onye metaru ẹnya-uwhu Heba mẹe Malikẹlu, onye metaru ẹnya-uwhu Malikẹlu.

⁴⁶ Ọo nwa nwanyị lanụ bẹ Asha nwụtaru, ẹwha iya bụ Séra.

⁴⁷ Ẹnya-uwhu ono kpaa-whuu bẹ bụkota ikfu Asha. Ndu ọwhu a gụru ọgu dụ ụnu ụkporo ugbo ishii l'ụnu ugbo iri l'ẹto l'ụkporo madzụ ugbo iri.

⁴⁸ Ẹpa Náfutali l'ẹnya-uwhu whẹ l'ẹnya-uwhu whẹ bụ: Jahuzẹlu, onye metaru ẹnya-uwhu Jahuzẹlu mẹe Guni, onye metaru ẹnya-uwhu Guni

⁴⁹ mẹe Jeza, onye metaru ẹnya-uwhu Jeza mẹe Shilemu, onye metaru ẹnya-uwhu Shilemu.

⁵⁰ Ẹnya-uwhu ono kpaa-whuu bẹ bụkota ikfu Náfutali, a gụa whẹ l'ẹnya-uwhu l'ẹnya-uwhu. Ndu ọwhu a gụru ọgu dụ ụkporo ụnu madzụ ugbo ise l'ụnu ugbo iri l'ẹto l'ụkporo ụmadzu ugbo iri.

⁵¹ O noo ya, iwhe ndu Ízurẹlu dụkota bụ ụkporo ụnu madzụ ugbo ụkporo ẹto l'ụkporo ụnu ugbo iri l'ise l'ụnu madzụ ẹno l'ụkporo ugbo ishii l'ụmadzu iri.

Gẹ Ízurẹlu l'e-shi washịa alị ono, whẹ l'ala

⁵² Onye-Nwe-Ọha sụ Mósisu:

⁵³ “Ọo ndu-a bẹ l'aa-washịru alị ono t'ọ bụru oke-iwhe, whẹ ketaru. Ndu nọnu l'e-keta lẹ gẹ whẹ ha l'ọnogu.

⁵⁴ Ndu ha shii bẹ l'ịi-wẹe alị ha shii, ndu ọwhu ha nwanshịi gụ awẹe whẹ alị, ha nwanshịi. Ndu nọnu l'e-keta lẹ gẹ whẹ ha l'ọnogu.

⁵⁵ Alị ono bẹ bụ ido bẹ l'aa-tụ gude washịa ya. Aa-wa iya l'ikfu l'ikfu, ndu nọnu eketa oke iya nkewhe l'ikfu ẹka whẹ shi.

⁵⁶ Ọo ido bẹ l'aa-tụ gude waa alị ono nụ ndu nọnu mẹe ndu ha shii mẹe ndu ha nwanshịi.”

Aagụ ikfu Lívayi ọgu

⁵⁷ Ọ waa bụ ẹpa Lívayi ndọwa mẹe g'e gude gụa whẹ ọgu l'ẹnya-uwhu whẹ l'ẹnya-uwhu whẹ: Geshọnu, onye metaru ẹnya-uwhu Geshọnu mẹe Kohatu, onye metaru ẹnya-uwhu Kohatu mẹe Merari, onye metaru ẹnya-uwhu Merari.

⁵⁸ Ẹnya-uwhu o-shi-l'ẹpa Lívayi ọdo bụ: Ẹnya-uwhu Libyini mẹe ẹnya-uwhu Hiburọnu mẹe ẹnya-uwhu Mahuli mẹe ẹnya-uwhu Mushi mẹe ẹnya-uwhu Kora. Kora bụ nna Amụramu.

⁵⁹ Amụramu bẹ lụru nwada Lívayi, ẹwha iya bụ Jokebẹdu. Jokebẹdu bụ nwa nwanyị, a nwụru Lívayi l'alị Íjiputu. Ndu ọ nwụtaru Amụramu bụ Érọnu mẹe Mósisu mẹe Miriyamu. Miriyamu bụru nwune whẹ nwanyị.

⁶⁰ Érọnu bụ nna Nedabu, Abyihu, Eliyéza mẹe Itama.

⁶¹ Nedabu yẹle Abyihu bẹ nwụhuru nteke whẹ gude ọku, l'adụa nsọ kpọoru Onye-Nwe-Ọha ngwo-ẹja ọku.

⁶² Ndu a gụru ọgu l'ikfu Lívayi, mbụ unwoke whẹ, gbarụ ọnwa lanụ tụgbua bẹ dụkota ụkporo ụnu ụmadzu ugbo labọ l'ụnu ugbo iri l'ẹsaa l'ụkporo ụmadzu ugbo iri. A ta agụdu whẹ nteke a gụru ndu Ízurẹlu ọwhua nkele ẹ te eketaduru whẹ oke l'echilabọ ndu Ízurẹlu.

⁶³ O noo ya, ndu ono bụ ndu Mósisu yẹle Eliyéza, bụ onye l'agbajẹ ẹja nụ Chileke gụru ọgu, mbụ ndu ono, gụru ndu Ízurẹlu ọgu lẹ whorokoto alị Moabu l'agụga ẹnyimu Jọ́danu lẹ mgboro Jériko.

⁶⁴ Ndu ono ta adụdu gẹ whẹ ha, tso lẹ ndu ọwhu Mósisu yẹle Érọnu, onye l'agbajẹ ẹja nụ Chileke gụru ọgu nteke ono, whẹ gụhawaru ndu Ízurẹlu ọgu l'echi-ẹgu Sáyinayi.

⁶⁵ Nkele Onye-Nwe-Ọha sụru ndu Ízurẹlu ono lẹ whẹ nwụhufutaje l'echi-ẹgu ono. Ọ tọ dụdu t'ọ ka mma l'ọo onye lanụ, whọduru nụ l'ime ndu ono, t'a gụfulewho Kálẹbu nwa Jefune yẹle Jóshuwa nwa Nunu.