Ọ́gú 25 - BAYỊBURU Ẹzaa

Ndu Moabu dusweru ndu Ízurẹlu

¹ A nọnyaa nteke ọbu gẹ ndu Ízurẹlu bu lẹ nsụda oshi Shitimu, whẹ l'ụnwu-ada ndu Moabu wata anọ awharwụshi onwowhe.

² Ụnwanyi Moabu ono l'ekuje ndu Ízurẹlu tẹ whẹ tsoru whẹ jee agwaa agwa whẹ. Ndu Ízurẹlu l'anọje eri iwhe e shiru l'agwa ono; abaarụ agwa ndu Moabu ẹja.

³ O noo ya, ndu Ízurẹlu woru onwowhe tụgbabe l'agwa Bálu, dụ lẹ Peyọ. Eshi nno; iwe bya Onye-Nwe-Ọha l'ẹhu l'ẹka ndu Ízurẹlu nọ.

⁴ Onye-Nwe-Ọha sụ Mósisu: “Chịtakota ndu bụ ishi, l'achị ndu Ízurẹlu je anọdu lẹ mbarachacha gbushia whẹ, gụ etsebegee whẹ etsebe l'oshi kpọbe l'iwhu Onye-Nwe-Ọha nke ọwhu Onye-Nwe-Ọha l'e-wofu ọta-chịchichi ẹhu-eghughu iya l'ẹhu ndu Ízurẹlu.”

⁵ Mósisu bya asụ ndu ọgbo-ikpe ndu Ízurẹlu: “T'onyenọnu lẹge unu ha l'ẹhu l'ẹhu gbushia ndu nkiya, bụ ndu woru onwowhe tụgbabe l'agwa Bálu, dụ lẹ Peyọ.”

⁶ Gẹ ndu Ízurẹlu wụshiru l'ọnu Ụlo-ẹkwa ndzuko aryakaa ẹkwa, bẹ nwoke Ízurẹlu lanụ dutaru nwanyị Midiyanu dubata iya l'ẹnya Mósisu mẹe l'ẹnya ndu Ízurẹlu l'owhu.

⁷ Nteke Fínihasu nwa Eliyéza, mbụ nwanwa Érọnu, onye l'agbajẹ ẹja nụ Chileke whụru iwhe ono; ọ gbalihu l'ẹka igwe-ọha ono dọru je adụchata arwa iya.

⁸ O tsopyabe nwoke Ízurẹlu ono bahụ l'ime mkpu dụ l'ụlo-ẹkwa iya; woru arwa ono nmaa yẹle nwanyị ono, o shi l'ẹhu nke nwoke fo nke nwanyị ono l'ẹhu nkiya. Ọo ya bụ, nchịkarehu ono haa ndu Ízurẹlu.

⁹ Ọle ndu nchịkarehu ono gburu egbu bẹ dụ ụkporo ụnu madzụ ugbo ẹto.

¹⁰ Onye-Nwe-Ọha sụ Mósisu:

¹¹ “Fínihasu nwa Eliyéza, mbụ nwanwa Érọnu, bụ onye l'agbajẹ ẹja nụ Chileke bẹ mewaru, mu wofu ẹhu-eghughu mu l'ẹka ndu Ízurẹlu nọ. O noo nkele o wotaru okoowhoo, mu g'ekoru ndu Ízurẹlu kooru whẹ, shi nno mee mu te egudehe okoowhoo laa ndu Ízurẹlu l'iyi.

¹² Ọo ya bụ t'i kfuru Fínihasu lẹ mu l'iya bẹ gbawarụ ndzụ ẹhu-ọdu-guu.

¹³ Ọgbandzu ono l'a-bụ nkiya mẹe nke ẹpa iya whẹ, bụ ndu ọwhu l'etso iya etso. Ọgbandzu ono bụ lẹ whẹ l'a-nọ agbarụ mu ẹja jeye lẹ gbururu nkele o gude iswi ẹhu Chileke iya koo okoowhoo, shi nno kfụa ụgwo iwhe-dụ-ẹji, ndu Ízurẹlu meru.”

¹⁴ Ẹwha nwoke Ízurẹlu ono, e gburu yẹle nwanyị Midiyanu bẹ bụ Zimiri nwa Salu. Nna iya, bụ Salu onye ishi l'ẹnya-uwhu, dụ l'ikfu Símiyọnu.

¹⁵ Ẹwha nwanyị Midiyanu ono, e gbukwaruwho bụ Kozubyi nwada Zuru. Nna iya, bụ Zuru onye ishi l'ẹnya-uwhu ndu Midiyanu.

¹⁶ Onye-Nwe-Ọha sụ Mósisu:

¹⁷ “Kpaa ndu Midiyanu ẹhu, gụ egbushia whẹ.

¹⁸ O noo nkele whẹ gude ẹregede kpaa unubẹdua ẹhu, whẹ shi nno duswee unu l'okfu agwa Bálu ono, dụ lẹ Peyọ mẹe l'okfu ẹhu Kozubyi, bụ nwada onye ishi ndu Midiyanu, bya abụru nwune ndu Midiyanu nke nwanyị; onye e gburu nteke ono nke Peyọ meru nchịkarehu bya.”