Ọ́gú 24 - BAYỊBURU Ẹzaa

¹ Bélamu whụlewho l'iwhe dụ Onye-Nwe-Ọha ree bụ tẹ ya gọru ọnu-ọma nụ ndu Ízurẹlu, to jehewaro njịta gẹ l'oojejehawa. Iwhe o meru bụ l'ọ gharụ iwhu l'ụzo echi-ẹgu.

² Bélamu bya apalia ẹnya imeli whụ ndu Ízurẹlu gẹ whẹ kpọbe-geeru ụlo-ẹkwa ebubu whẹ l'ikfu whẹ l'ikfu whẹ. Ume Chileke bya iya l'ẹhu,

³ o kfushilahaa sụ: “Ọ waa bụ iwhe Bélamu nwa Beyo l'ekfu. Ọ kwa onye ono, e meru ẹnya doo rịsaa l'ekfu okfu onoya.

⁴ Ọ waa bụ okfu, onye ono, l'anụje okfu, shi l'ẹka Chileke l'ekfu, mbụ onye ono, l'anọje awhụ iwhe Ọkalibe-Kakọta-Ike l'egoshi, mbụ onye ono, l'adajẹ kpurumu l'alị, bya abụru onye ono, e meru nsarasa-ẹnya nụ.

⁵ Ọ waa g'ụlo-ẹkwa gụbe Jékọpu l'amabe ụma, mbụ ẹka gụbe Ízurẹlu bu ebubu!

⁶ Ọo gẹ nsụda nsụda l'adụje bụ g'ọ daburu gbadaa. Ọ dụ g'ọo mgbabu, a gbarụ l'agụga ẹnyimu. Ọ dụ g'ọo oshi alowe, Onye-Nwe-Ọha yeru l'onwiya, bya adụ g'ọo oshi sida, gvuru l'agụga ẹnyimu.

⁷ Mini l'e-shije l'ite-mini Ízurẹlu asọshi asọshi. Ẹpa whẹ l'e-nwe mini nweru nke etsutsu iya. Eze whẹ l'a-ka eze Agagu shii. Alị-eze whẹ bẹ l'aa-nọje ekutse ekutse.

⁸ Chileke dufutaru whẹ l'alị Íjiputu, bya emee whẹ, whẹ nweru ọkpehu g'ọo atsụ. Whẹ l'e-ripya mba gẹ mba ha, whẹ dụ ashị, tsua ọkpu whẹ yọgiri-yọgiri. Whẹ l'e-gude arwa whẹ nmafushia whẹ anmafushi.

⁹ Ízurẹlu nmakpuru anmakpuru, bya azẹe l'alị g'ọo oduu-gburu-agụ. Whẹ dụ g'ọo ne oduu, ?ọo onye l'a-dụ ike kpatsua whẹ? T'iwhe bụ ndu gọru ụnwu Ízurẹlu ọnu-ọma bụkwaru ndu a gọru ọnu-ọma nụ. T'iwhe bụ ndu l'atụ ụnwu Ízurẹlu ọnu bụkwaruwho ndu a tụru ọnu.”

¹⁰ Tọ dụ iya bụ, iwe bya Bélaku l'ẹhu l'ẹka Bélamu nọ, ọ kụa ẹka pyamụ. Ọ sụ Bélamu: “Ntaa bẹ mu kuru ghu t'ị bya eburu ọnu nụ ndu ọhogu mu-a, ọ bụ-chiaru ọnu-ọma b'ị gọkotaru nụ whẹ ugbo ẹto-ọ ya nụ.

¹¹ Ngwa, vụta ọso gbagbụru lashia ibe unu ntaantaa! Mu shi rịa lẹ mu g'ebu ghu obunggo parụ ẹka apaa, obenu lẹ Onye-Nwe-Ọha bẹ nafụwaru ghu obunggo ono.”

¹² Bélamu sụ Bélaku: “Mu dụkwa mbụ sụ ndu i zhiru tẹ whẹ bya mu ekuku sụ whẹ:

¹³ ‘Ọ -bụru m'ọo lẹ Bélaku l'a-nụ mu ụlo iya ono, mkpọla-ododo mẹe mkpọla-ọcha jiru pyịmu bẹ mu te emeghatadu iwhe Onye-Nwe-Ọha sụru tẹ mu mee, ndụge t'ọ bụru lẹ mu meru ree m'ọ bụ lẹ mu meru ẹji l'uche nkemu. Ọo zhiawho iwhe Onye-Nwe-Ọha kfuru bẹ mu l'e-kfu.’

¹⁴ Ntaa bẹ mu l'alwakfuwa ndibe anyi. Ọle bya tẹ mu nmaa ọkwa iwhe ndu-a l'e-bekochaa mee ndibe unu lẹ mgbe l'iwhu ye ghu l'ẹka.”

Okfu nke ẹno, Bélamu natarụ l'ẹka Onye-Nwe-Ọha

¹⁵ Ọo ya bụ, Bélamu kfushilahaa sụ: “?Ọ waa bụ iwhe Bélamu nwa Beyo l'ekfu, mbụ okfu onye e meru ẹnya doo rịsaa l'ekfu.

¹⁶ Ọ waa bụ okfu, onye ono, l'anụje okfu, shi l'ẹka Chileke l'ekfu, mbụ onye marụ iwhe shi Ọkalibe-Kangokotaru-Nu l'ẹka, mbụ onye ono, l'awhụje iwhe Ọkalibe-kakọta-ike l'egoshi, onye ono, darụ kpurumu, bya abụru onye, e meru nsarasa-ẹnya nụ.

¹⁷ Mu whụru onye ọbu, ọle ọ tọ dụ ntaa. Mu l'ele onye ọbu ẹnya, ọle ọ tọ nọdu ntse. Onye l'a-nọ echi g'ọo kpokponde l'e-shi l'ọzo-ụlo Jékọpu fụta, onye eze eshi Ízurẹlu l'ẹhu lụfuta. Moabu bẹ l'ọo-tụko egedege iwhu gwee ryaaryaa. Mu atụko ụnwu Shetu l'owhu lakọta l'iyi.

¹⁸ Ndu Edọmu bẹ l'aa-lwụta l'ọgu, O nokwawho gẹ l'aa-lwụta ndu Siye, bụ ndu ọhogu Ízurẹlu. Ọle ọwhube ndu Ízurẹlu l'a-nọ aka ike aka eje eje.

¹⁹ Ọchi-ọha l'e-shi l'ọzo-ụlo Jékọpu fụta, bya alaa ndu wafụru nụ lẹ mkpụkpu ono l'iyi.”

²⁰ Bélamu bya awhụ ndu Amalẹ́ku, o kfushilahaa sụ: “Ndu Amalẹ́ku bụ mba ivurụzo lẹ mba gẹ mba ha, ọle whẹ l'a-bụru kpurupyata l'ikpazụ.”

²¹ Ọ whụ ndu Kenu, o kfushilahaa sụ: “Ẹka unubẹ ndu Kenu bu ebubu b'e meru o shihu ike nke gbagbaradị. Ekfuke unu bẹ unu tụru l'elikoro ẹwhuru.

²² Ọle unubẹ ndu Kenu bẹ l'ee-melekwaa t'unu bụru kpukpuru-swoo. Ndu Asiriya l'a-kpụ-zhiawho unu lẹ ndzụ jeye ike dụ ẹbo agvụ.”

²³ Tọ dụ iya bụ, o kfushilahaa sụ: “Oowa, ?ọo onye l'a-nọdu ndzụ nteke Chileke l'e-me iwhe ono?

²⁴ Ụgbo-mini l'e-shi l'alị ndu Kítu bya, bya emeshia ndu Asiriya yẹle ndu Iba ike. Ọle whẹbedua l'a-bụkwaruwho kpurupyata.”

²⁵ Tọ dụ iya bụ, Bélamu kfugee nno ọ gbalihu, ọ bụru iya ọla ibe iya, Bélaku tụgbua shi ọwhu o shi lashia.