Ọ́gú 23 - BAYỊBURU Ẹzaa

¹ Bélamu sụ Bélaku: “Tụaru mu ẹnya-mgbẹja ụzo ẹsaa. Gụ akpụtaru mu oke-eswi ẹsaa mẹe ebyila ẹsaa.”

² Bélaku mee ya ẹgube ono, Bélamu sụru t'ọ mee ya. Bélaku yẹle Bélamu gbua oke-eswi ono mẹe ebyila ono nnanụ nnanụ l'ẹnya-mgbẹja ono whẹ ẹsaa.

³ Bélamu sụ Bélaku: “Kfụru lẹ mgboro ngwo-ẹja ono, a kpọkotaru ọku tẹ mu tụgbua. O nweru gẹ l'ọo-dụ; Onye-Nwe-Ọha abyakfuta mu. Iwhe bụ-zhia iwhe o goshiru mu bẹ mu l'a-kọru ghu.” Ọ tụgburu jeshia l'eli nwugvu ọbu, l'adụa iwhe dụ iya nụ.

⁴ Chileke byakfuta Bélamu. Bélamu sụ Chileke: “Mu dozhiwaru ẹnya-mgbẹja ụzo ẹsaa, mu gbuwa oke-eswi yẹle ebyila nnanụ nnanụ l'ẹnya-mgbẹja ono whẹ ẹsaa.”

⁵ Tọ dụ iya bụ, Onye-Nwe-Ọha ye Bélamu okfu l'ọnu sụ iya: “Jekfuwhu Bélaku azụ je ezhia ya ozhi-a.”

⁶ O jekfushia Bélaku, ọ whụa ya g'ọ kfụru lẹ mgboro ngwo-ẹja ono, a kpọkotaru ọku yẹle ndu ishi Moabu gẹ whẹ ha.

⁷ Bélamu kfulahaa sụ: “Bélaku bẹ bya eduta mu l'alị Arámu. Eze ndu Moabu bẹ bya eduta mu l'ugvu ugvu ụzo ẹnyanwu-awata. Ọ sụru mu: ‘Bya eburu ọnu nụru mu ụnwu Jékọpu. Bya agọ-whuaru mu ụnwu Ízurẹlu agọ-whu!’

⁸ ?Ndẹe gẹ mu l'e-shi buru ọnu nụ ndu Chileke l'ebuaru ọnu nụ? ?Ndẹe gẹ mu l'e-shi gọ-whua ndu Onye-Nwe-Ọha l'agọ-whua agọ-whu?

⁹ Ọo l'elikoro eze-ẹwhuru bẹ mu l'akfụjeru whụ whẹ. Ọo l'eli ugvu bẹ mu l'anọduje ele whẹ ẹnya. Mu l'awhụje ndu ono, buru onwowhe iche. Whẹ ta agụjedu onwowhe yeru ndu ọha ọdo.

¹⁰ ?Ọo onye bẹ l'a-dụ ike gụta ụnwu Jékọpu l'ọgu, mbụ ndu ha g'ọo nvẹja. ?Ọo onye l'a-dụ m'ọo ike agụta nkere ẹno ụnwu Ízurẹlu l'ọgu? Tẹ mu nwụkwa ọnwu onye dụ chịriri! Tẹ mu lakwa lẹ gẹ ndu dụ chịriri larụ!”

¹¹ Bélaku sụ Bélamu: “?Ọo gụnu b'i meru mu ẹgube ono? Mu sụru ghu t'ị bya eburu ọnu nụ ndu ọhogu mu; ọ bụru ọnu b'i gbee agọru whẹ.”

¹² Bélamu sụ: “?Ọo tẹ mu be ekfushi iwhe Onye-Nwe-Ọha yeru mu l'ọnu tẹ mu kfua?”

Okfu nke ẹbo, Bélamu natarụ l'ẹka Onye-Nwe-Ọha

¹³ Bélaku sụ Bélamu: “Tsoru mu t'anyi je ẹka ọdo, l'ịi-nọdu whụ whẹ. Ọo ụwhodu l'ime whẹ bẹ l'ịi-harụ whụ, ị tịi whụkotadu whẹ gẹ whẹ ha. Gụ eshi l'ẹka ono buaru whẹ ọnu.”

¹⁴ Bélaku duta Bélamu whẹ jeshia lẹ mgboko-ẹgu Zofimu, dụ l'eli ugvu Pisiga, ọ tụa ẹnya-mgbẹja ụzo ẹsaa. Whẹ gbua oke-eswi yẹle ebyila nnanụ nnanụ l'ẹnya-mgbẹja ono whẹ ẹsaa.

¹⁵ Bélamu sụ Bélaku: “Kfụkwaru lẹ mgboro ngwo-ẹja, a kpọkotaru ọku tẹ mu jekfu Onye-Nwe-Ọha l'ẹka whọ.”

¹⁶ Onye-Nwe-Ọha byakfuta Bélamu, bya eye iya okfu l'ọnu sụ iya: “Jekfu Bélaku ọdo je ezhia ya ozhi-a.”

¹⁷ Bélamu jekfushia Bélaku, ọ whụa ya g'ọ kfụru lẹ mgboro ngwo-ẹja ono, a kpọkotaru ọku ono yẹle ndu ishi Moabu, whẹ l'iya nọ. Bélaku sụ Bélamu: “?Ọo gụnu bẹ Onye-Nwe-Ọha kfuru?”

¹⁸ Bélamu kfushilahaa sụ: “Gụbe Bélaku; gbalihu agbalihu ngabẹ nchị. Nụa iwhe mu l'ekfu, gụbe nwa Zipo.

¹⁹ Chileke ta abụkwa madzụ, nke t'ọ bya adzụa ejire. T'ọ dụ g'ọo ụnwu eliwhe, nke t'ọ gbanwee uche iya. ?O kfujewaru okfu, t'o me lẹ g'o kfuru iya? ?O kwejeru ụkwa, t'o medzu ụkwa ọbu?

²⁰ Sụa, iwu, mu natarụ bụkwa tẹ mu gọoru ndu ono ọnu. Chileke gọwaru ọnu-ọma nụ whẹ. Mu ta ahakwa tẹ mu ba agọru whẹ ọnu-ọma ọbu.

²¹ Ọ tọ dụdu ejo-iwhe, o levuru l'ẹhu ụnwu Jékọpu. Tọ dụ iwhe l'adụa ree, ọ whụru l'ẹhu ụnwu Ízurẹlu. Onye-Nwe-Ọha, bụ Chileke whẹ swiru whẹ ọkpobe eswiru. Whẹ l'atụ orooroo asụje l'ọ ya bụ eze whẹ.

²² Chileke bẹ dufutaru whẹ l'alị Íjiputu, bya emee whẹ, whẹ nweru ọkpehu g'ọo atsụ.

²³ A ta abyadụ l'e-keta ụnwu Jékọpu l'oswe. T'a bya l'e-meta ụnwu Ízurẹlu l'ọgvu. Ntaa bẹ l'ee-kfu okfu ẹhu ụnwu Jékọpu, kfua okfu ẹhu ụnwu Ízurẹlu sụ: ‘Ledaanu iwhe Chileke meshiru whẹ!’

²⁴ Sụa, ndu Ízurẹlu l'angalihuje angalihu g'ọo ne oduu. Whẹ l'anọje ebu gadagada g'ọo oduu-gburu-agụ, mbụ oduu, l'ete etsukfujeru ike etsukfuru jeye ya eria anụ, o gburu, mbụ jeye ya angụa mmee iwhe o guderu.”

²⁵ Ọo ya bụ, Bélaku sụ Bélamu: “Be ebuhekwaru whẹ ọnu lẹ whuu; gụ agọhekwaru whẹ ọnu ilile. Ba adụhekwaro ọwhu l'ii-je ememe ilile.”

²⁶ Bélamu sụ Bélaku: “?Mu ta adụdu mbụ kfuru ghu l'ọo iwhe Onye-Nwe-Ọha sụru tẹ mu mee bẹ mu l'e-me?”

Okfu nke ẹto, Bélamu natarụ l'ẹka Onye-Nwe-Ọha

²⁷ Tọ dụ iya bụ, Bélaku sụ Bélamu: “Bya tẹ mu duru ghu jee ẹka ọdo. O nweruwho gẹ l'ọo-dụ Chileke eme t'i shi l'ẹka ono buru ọnu nụ whẹ.”

²⁸ Bélaku duta Bélamu, whẹ nyihu ugvu Peyọ, mbụ ugvu ono, dụ chee iwhu l'alị mgbegere.

²⁹ Bélamu sụ Bélaku: “Tụaru mu ẹnya-mgbẹja uzhi ẹsaa l'ẹka-a, gụ akpụtaru mu oke-eswi ẹsaa mẹe ebyila ẹsaa.”

³⁰ Bélaku mee ya lẹge Bélamu sụru t'o mee ya. Whẹ gbua oke-eswi ono yẹle ebyila ono nnanụ nnanụ l'ẹnya-mgbẹja ono whẹ ẹsaa.