Ọ́gú 22 - BAYỊBURU Ẹzaa

Bélaku zhiru t'e je ekua Bélamu

¹ Ndu Ízurẹlu palihu tụgbua, whẹ rwua whorokoto alị ndu Moabu, whẹ kpọbe ụlo-ẹkwa ebubu whẹ l'agụga ẹnyimu Jọ́danu, dụ chee iwhu lẹ mkpụkpu Jériko.

² Bélaku nwa Zipo whụa iwhe lile, ndu Ízurẹlu meru ndu Amọru.

³ Ẹhu rwụrwushihu ndu Moabu l'okfu ẹhu ndu Ízurẹlu nkele whẹ hanụka l'igwe. Egvu ndu Ízurẹlu gudeshia ndu Moabu.

⁴ Ndu Moabu jekfu ndu bụ ọgurenya ndu Midiyanu je asụ whẹ: “Ntaa bẹ ikpoto ndu Ízurẹlu-a l'a-tụko iwhe gbarụ anyi mgburumgburu lwụkota g'eswi, l'atụkoje ẹwu, dụ l'ẹgu lwụkota.” Ọo ya bụ, Bélaku nwa Zipo, bụ eze, l'achị ndu Moabu nteke ono

⁵ bya ezhia t'e je ekua Bélamu nwa Beyo, onye nọ lẹ mkpụkpu Petọ l'alị Amawu, dụ lẹ mgboro ẹnyimu Yufurétisu. Bélaku zhiru iya sụ: “O nweru ndu shi l'alị Íjiputu fụta bya atụko mgboko l'owhu dzuru. Ntaa bẹ whẹ nọkwa mu lẹ mgboro.

⁶ Iwhe mu l'aryọ ghu ntaa bụkwa t'ị bya atụaru mu ndu ono ọnu, o noo nkele whẹ ka mu ẹkuku. O nwekwaru gẹ l'ọo-dụ, mu alwụ-gbua whẹ chịa whẹ l'alị-a. Mu marụ l'onye ị gọru ọnu-ọma nụ bẹ ọnu-ọma l'etsoje; onye ị tụru ọnu bẹ ejo ọnu l'etsoje.”

⁷ Ọo ya bụ, ndu bụ ọgurenya ndu Moabu mẹe ndu bụ ọgurenya ndu Midiyanu gude ụgwo, l'aakfụje t'a gbaa ẹja tụgbua jekfushia Bélamu, je ezhia ya ozhi, Bélaku zhiru iya.

⁸ Bélamu sụ whẹ: “Unu radụ aradụ l'ẹka-a l'ẹnyashi-a nke ọwhu mu l'a-karu unu iwhe Onye-Nwe-Ọha l'e-kfuru yeru mu.” Ọo ya bụ, Bélamu whẹ lẹ ndu ishi Moabu ono tụko nọdu.

⁹ Chileke byakfuta Bélamu bya ajị iya sụ: “?Ọo ndu ole bẹ gụ lẹ whẹ nọdu nno?”

¹⁰ Bélamu sụ Chileke: “Bélaku nwa Zipo, bụ eze ndu Moabu bẹ zhiru mu ozhi sụ

¹¹ l'o nweru ndu shi l'alị Íjiputu fụta bya atụko mgboko l'owhu dzuru. Tẹ mu bya eburu ọnu nụru iya ndu ono, l'o nweru gẹ l'ọo-dụ, ya alwụ-gbua whẹ chịshia whẹ l'alị whẹ.”

¹² Chileke sụ Bélamu: “Be etsobukwaa whẹ jee, be ebukwaru ọnu nụ ndu ono nkele whẹ bụkwa ndu a gọru ọnu-ọma nụ.”

¹³ O rwua l'ụtsu iya, Bélamu fụta bya ekfuru ndu ishi ono, l'ejeru Bélaku ozhi sụ whẹ: “Unu lashia alị unu lẹ Onye-Nwe-Ọha te ekwedu tẹ mu tsoru unu jee.”

¹⁴ Ọo ya bụ, ndu ishi Moabu tụgbua lashia je asụ Bélaku: “Bélamu jịkakwaru lẹ ya te etsodu anyi abya.”

¹⁵ Bélaku bya ezhifu ndu ishi ọdo, kabaa l'igwe, mbụ ndu a ka ọkwabe ugvu amamẹ ndu nke mbụ whọ.

¹⁶ Whẹ byakfuta Bélamu sụ iya: “Ọ waa bụ iwhe Bélaku nwa Zipo kfuru: T'ọ bọ dụkwa iwhe l'ii-kwe t'ọ kpọshia ghu ọbya nkemu.

¹⁷ Nkele mu l'a-kwabẹ ghu ugvu, parụ ẹka, mu emeeru ghu iwhe ị sụru tẹ mu meeru ghu. Byarọ bya ebuaru ndu-a ọnu.”

¹⁸ Bélamu sụ ndu ozhi Bélaku ono: “O -beru Bélaku je l'a-nụ mu ụlo iya ono, mkpọla-ododo mẹe mkpọla-ọcha jiru eji, mu te emeghatadu iwhe Onye-Nwe-Ọha, bụ Chileke mu kfuru. Mu te ewofudu iya iwhe ewofu, mu te eyekwa iya iwhe eyekwa.

¹⁹ Ngwa, t'unu radụ l'ẹka-a lẹ gẹ ndu nke ọwhua radụru tẹ mu marụ mẹ o nweru iwhe Onye-Nwe-Ọha l'e-kfubaaru yeru mu.”

²⁰ Chileke byakfuta Bélamu l'ẹnyashi bya asụ iya: “Ọ -bụru l'ọo oku bẹ ndu-a byarụ ghu ekuku, gbalihu tsoru whẹ, ọle ọo iwhe mu sụru t'i mee bẹ l'ii-me kpụ.”

Nkakfụ-ịgara Bélamu l'ekfu okfu

²¹ Bélamu gbalihu l'ụtsu dozhia nkakfụ-ịgara iya tsoru ndu ishi Moabu ono, whẹ tụgburu.

²² Ọle ẹhu ghuru Chileke eghu shii g'ọ tụgburu jeshia. Ojozhi-imigwe, shi l'ẹka Onye-Nwe-Ọha je akfụru kwachia ya ụzo. Nteke ono bẹ Bélamu nọdu l'eli nkakfụ-ịgara iya agba eje yẹle ndu ozhi iya ụmadzu labọ lịru.

²³ Nkakfụ-ịgara ono whụa ojozhi Onye-Nwe-Ọha ono g'ọ kfụru l'echi-ụzo, mịfuta ogu-ịgba iya gude l'ẹka, ọ ghakọbe l'ụzo swịba l'ẹgbudu. Bélamu chia nkakfụ-ịgara ono iwhe t'ọ gọ-zhia ya batawhu azụ l'echi-ụzo.

²⁴ Ojozhi-imigwe, shi l'ẹka Onye-Nwe-Ọha ono je akfụru lẹ nwẹswara ụzo, dụ lẹ mgbakụ mgbabu vayịnu labọ ọbu, mgbodo dụ ibẹka ẹbo-ẹbo.

²⁵ Nteke nkakfụ-ịgara ono whụru ojozhi Onye-Nwe-Ọha ono, o nwuta onwiya je gbabẹ lẹ mgbodo ono, nwuta Bélamu ọkpa hua lẹ mgbodo ono; Bélamu chia ya iwhe ọdo.

²⁶ Ojozhi-imigwe, shi l'ẹka Onye-Nwe-Ọha ono tụgbukwaru je akfụru l'ẹka ọbu, dụ kpagụu. Ẹka ono te enwedu ụzo, l'ee-shi swịa l'ẹka-ụtara, t'o nwe ụzo, l'ee-shi swịa l'ẹka-ịcha.

²⁷ Nteke nkakfụ-ịgara ono whụleruwho ojozhi Onye-Nwe-Ọha ono; ọ nmakpuru lẹ mkpula Bélamu, iwe bya Bélamu l'ẹhu, o chilahaa ya mgbọro iya.

²⁸ Onye-Nwe-Ọha kụhaa nkakfụ-ịgara ono ọnu, o kfuru okfu yeru Bélamu sụ iya: “?Ọo gụnu bẹ mu meru ghu, meru g'o gude i chia mu iwhe ugbo ẹto?”

²⁹ Bélamu sụ nkakfụ-ịgara ono: “Iwhe mu kwoberu echi ghu iwhe bụ l'iime mu eswe. Ọ -bụ lẹ mu gude ogu-ịgba l'ẹka mẹ mu egbugbua ghu ntaa.”

³⁰ Nkakfụ-ịgara ono sụ Bélamu: “?Mu ta abụdu nkakfụ-ịgara, i nwe enwe tọo? I shi eshi bụ gụnu gbata mu jeye ntanụ. ?Mu mejehawaru ghu ẹgube umere-e?” Bélamu sụ iya: “Waawa.”

³¹ O noo ya, Onye-Nwe-Ọha bya emee tẹ Bélamu saa ẹnya, ọ whụa ojozhi Onye-Nwe-Ọha ono g'ọ kfụru l'echi-ụzo mịfuta ogu-ịgba iya gude l'ẹka. Bélamu whuzeta ishi ewhuzeta daa kfube iwhu l'alị.

³² Ojozhi-imigwe, shi l'ẹka Onye-Nwe-Ọha ono jịa ya sụ: “?Ọo gụnu meru iwhe i chiru nkakfụ-ịgara ghu iwhe ugbo ẹto? Mu byarụ tẹ mu kwachia ghu ụzo nkele ụzo, i cheberu bẹ gbagọru agbagọ l'ẹnya nkemu.

³³ Ugbo ẹto bẹ nkakfụ-ịgara-a whụru mu tọchakotaru mu l'ụzo. Ọ -bụ l'ọ tọ tọcharu mu l'ụzo mẹ mu egbuwa ghu tọgbo nteke onowho, haa yẹbedua t'ọ nọdu ndzụ.”

³⁴ Bélamu sụ ojozhi ono, shi l'ẹka Onye-Nwe-Ọha: “Mu mewaru iwhe-dụ-ẹji nkele mu ta amadụ l'i kfụru kwachia mu ụzo. Ọo ya bụ, ọ -bụru l'ọ tọ dụdu ghu ree tẹ mu je, mu adawhu azụ.”

³⁵ Ojozhi-imigwe, shi l'ẹka Onye-Nwe-Ọha ono sụ Bélamu: “Tsoruro ndu ono jeshia, ọle t'ọ bụkwaru iwhe mu sụru t'i kfua bẹ l'ii-kfu nwẹkiya.” Ọo ya bụ, Bélamu yẹle ndu ishi ono, l'ejeru Bélaku ozhi tụgburu, ọ bụru whẹ ejeje.

Bélamu nọ l'ibe Bélaku

³⁶ Nteke Bélaku nụru lẹ Bélamu l'abyawaa, ọ lụfu gbaje iya ndzuta lẹ mkpụkpu, dụ l'alị Moabu l'oge ẹnyimu Anọnu, mbụ l'ẹka oge-alị ono beru.

³⁷ Bélaku sụ Bélamu: “Mu zhiru ozhi t'a bya ekua ghu ọku-ọku t'ị bya. ?Ọo hụnu gụnu meru t'ị bya eshi ono? ?Ọo lẹ mu ta adụdu ike ebu ghu obunggo ha shii tọo?”

³⁸ Bélamu sụ Bélaku: “Ọ dụ ree, mu byawaru-a. ?O nweru iwhe mu l'adụ ike ekfu ntaa ọwhulabukwa? Ọo okfu, Chileke yeru mu l'ọnu bẹ mu l'e-kfu.”

³⁹ Ọo ya bụ, Bélamu tsoru Bélaku, whẹ jeshia Kiriyatu Huzotu.

⁴⁰ Bélaku gbushia eswi mẹe atụru gude gba ẹja, bya aharu nụ Bélamu yẹle ndu ishi ono, whẹ l'iya lị.

Okfu mbụ, Bélamu natarụ l'ẹka Onye-Nwe-Ọha

⁴¹ O bẹ l'ụtsu echile iya, Bélaku duta Bélamu, whẹ tụgbua jeshia Bamotu-bálu. Bélamu shi l'ẹka ono harụ ndu Ízurẹlu ụwhodu whụ.