Ọ́gú 20 - BAYỊBURU Ẹzaa

Anwụhu Miriyamu

¹ Tọ dụ iya bụ, o rwua l'ọnwa mbụ l'awha, ndu Ízurẹlu l'owhu jerwua echi-ẹgu Zinu. Whẹ je anọdu lẹ Kádẹshi. Miriyamu nọdu l'ẹka ono nwụhu; e lia ya l'ẹka onokwawhọ.

Mini, shi l'ẹwhuru

² Nteke onoya bẹ l'adụdua mini, dụ nụ, ndu Ízurẹlu l'a-ngụ; whẹ chịkobe onwowhe tatso Mósisu yẹle Érọnu okfu.

³ Whẹ wata ọbaru Mósisu mba sụ: “Ọ gẹge akarụ anyi mma, ọ bụ l'anyi nwụshihuru nteke whọ, ndibe anyi nwụshihuru l'iwhu Onye-Nwe-Ọha.

⁴ ?Ọo gụnu meru g'o gude ị chịta anyịbe ndu nke Onye-Nwe-Ọha bya awụshi l'echi-ẹgu l'ẹka-a t'anyi l'élwù anyi nwụshihu?

⁵ ?Ndẹe iwhe meru g'o gude i dufuta anyi l'alị Íjiputu bya eduru dobe lẹ mkpọkoro ẹka-a, l'adụa witi, dụ iya nụ, figu ta adụ iya, vayịnu ta adụ iya, itorokuma ta adụ iya, t'ọ dụ iya mbụ mini, anyi l'a-ngụ?”

⁶ Tọ dụ iya bụ, Mósisu yẹle Érọnu lụfushia l'ẹka ono, ndu Ízurẹlu dọru tụgburu jeshia l'ọnu Ụlo-ẹkwa-ndzuko je adaa kpupyabegee iwhu l'alị. O-gbu-zaazaa Onye-Nwe-Ọha nwuaru whẹ.

⁷ Onye-Nwe-Ọha sụ Mósisu:

⁸ “Wota mgbọro whọ tẹ gụ lẹ nwune ghu Érọnu chịkobe ndu Ízurẹlu ọnu. Gụ ekfuru okfu yeru ẹwhuru l'ẹka whẹ l'anọ ele ghu ẹnya tẹ mini shi iya gbafụta. O noo ụzo, l'ii-shi mee t'ẹwhuru ono gbafụtaru whẹ mini ndono. Ọ bụkwaruwho nno bẹ l'ii-shi mee tẹ ndu Ízurẹlu mẹe élwù whẹ ngụa mini.”

⁹ Tọ dụ iya bụ, Mósisu bya ewota mgbọro ono l'atatiwhu Onye-Nwe-Ọha g'o kfuru iya.

¹⁰ Mósisu yẹle Érọnu bya achịkobe ndu Ízurẹlu l'iwhu ẹwhuru ono, Mósisu sụ whẹ: “Unu ngabẹ nchị ntaa unubẹ ndu okwefu ike ono. ?Unu l'ekfu t'anyi kuta mini l'ẹwhuru-a nụ unu?”

¹¹ Ọo ya bụ, Mósisu halia ẹka imeli chia mgbọro ono ugbo labọ l'eli ẹwhuru ono. Mini shi l'ẹwhuru ono nwushihu agbọ jọjojo, ndu Ízurẹlu mẹe élwù whẹ ngụa ya.

¹² Ọle Onye-Nwe-Ọha bẹ sụru Mósisu yẹle Érọnu: “Eshi-ọwhu unu l'enwee ekweta l'ẹka mu nọ nke t'unu dobe mu nsọ l'ẹnya ndu Ízurẹlu bẹ unu l'ẹte edurwuhekwa whẹ l'alị ono, mu nụru whẹ.”

¹³ Mini ono bụ mini Meriba, nkele ọo l'ẹka ono bẹ ndu Ízurẹlu nọdu swọoru Onye-Nwe-Ọha ụswo, Onye-Nwe-Ọha goshi whẹ lẹ ya dụ nsọ.

Ndu Edọmu te ekwedu tẹ ndu Ízurẹlu ghata l'alị whẹ

¹⁴ Mósisu bya eshi lẹ Kádẹshi zhia ozhi t'e je zhia eze ndu Edọmu sụ: “Ọ waa iwhe Ízurẹlu, bụ nwune ghu l'ekfu ndọwa: Unu mawarụ ẹgube iwhe-ọtsulanu lile, byakfutaru anyi.

¹⁵ Unu mawarụ gẹ nna anyi ochee whẹ gude jeshia alị Íjiputu, anyi bua lẹ Íjiputu nọo ọdu. Ndu Íjiputu kpaa nna anyi whẹ ono ẹhu shii, bya akpakwaawhọ anyịbedua.

¹⁶ Obenu lẹ nteke anyi ryakuru Onye-Nwe-Ọha b'ọ nụru olu anyi, bya ezhia ojozhi, ọ bya edufuta anyi lẹ Íjiputu. Ntaa bẹ anyi nọwa lẹ Kádẹshi, bụ mkpụkpu, unu lẹ whẹ narụ ọnu ẹgu.

¹⁷ Byiko hanụa t'anyi shi l'alị unu ghata. Anyi te eshidu l'ẹgu unu aghata, anyi te eshi l'ẹka unu meru mgbabu vayịnu aghata, tọ dụ wẹlu unu, anyi bya l'e-kuta mini ngụa. Anyi l'e-tsoleruwho ogborogbo echi-ụzo ghata. Anyi ta abyadụ l'a-swịba aswịba l'ụzo ẹka-ụtara m'ọ bụ l'ụzo ẹka-ịcha jeye anyi aghatagezhia ree l'alị unu.”

¹⁸ Ọle eze ndu Edọmu yeru iya ọnu sụ: “Unu ba abyakwa ọgha l'alị anyi; ọdua bẹ mu l'e-gudekwa ogu-ịgba byakfutashia unu ọgu.”

¹⁹ Ndu Ízurẹlu sụ iya: “Anyi l'e-shia ogborogbo echi-ụzo ghata, ọ -bụru l'anyi ngụru mini unu, ọdua l'ọo élwù anyi bẹ ngụru mini unu, anyi akfụa unu ụgwo iya. Haarọ t'anyi gude ọkpa ghata, ọ tọ dụkwa iwhe ọdo.”

²⁰ Ọle eze ndu Edọmu bẹ sụru tẹ whẹ ba aghatashị. Ọo ya bụ, ndu Edọmu chịta igweligwe unwoke whẹ, bụ ndu ọkpehu dụ jekfushia ndu Ízurẹlu ọgu.

²¹ Eshi-ọwhu ndu Edọmu jịkaru tẹ ndu Ízurẹlu ba aghatashị l'alị whẹ, ndu Ízurẹlu kwe ghachi l'ẹka whẹ nọ.

Anwụhu Érọnu

²² Ndu Ízurẹlu l'owhu gbalihu lẹ Kádẹshi tụgburu jeye whẹ jerwua l'ugvu Họru.

²³ Ọo l'ugvu Họru dụkube oge alị ndu Edọmu bẹ Onye-Nwe-Ọha nọdu sụ Mósisu yẹle Érọnu:

²⁴ “Érọnu bẹ bya l'anwụhu lakfu ndụ-ichee ya whẹ. Oo-to jerwudu alị ono, mu nụru ndu Ízurẹlu nkele unu kwefuru ike l'iwu, mu tụru lẹ nke mini Meriba.

²⁵ Duta Érọnu yẹle Eliyéza, bụ nwa iya t'unu nyihu eli ugvu Họru,

²⁶ gụ eyeshia Érọnu uwe iya yee Eliyéza, bụ nwa iya nkele Érọnu l'a-nọdu l'ẹka ono nwụhu lakfu ndụ-ichee ya whẹ.”

²⁷ Mósisu mee iwhe Onye-Nwe-Ọha sụru t'o mee. Ndu Ízurẹlu l'ele whẹ ẹnya; whẹ nyihu eli ugvu Họru ono.

²⁸ Mósisu yeshia Érọnu uwe iya yee Eliyéza, bụ nwa iya. Érọnu nwụhu l'eli ugvu l'ẹka ono. Mósisu yẹle Eliyéza shi l'eli ugvu ono nyizeta.

²⁹ Ndu Ízurẹlu l'owhu whụlewho lẹ Érọnu bẹ nwụhuwaru, iwhe bụ ọzo-ụlo Ízurẹlu ryakọta ẹkwa iya ụkporo abalị l'abalị iri.