Ọ́gú 19 - BAYỊBURU Ẹzaa

Ọturwu iwhe atụrwu

¹ Onye-Nwe-Ọha sụ Mósisu yẹle Érọnu:

² “Ọ waa bụ iwu, Onye-Nwe-Ọha tụru sụ: Kfuru ndu Ízurẹlu tẹ whẹ kpụtaru unu nwada eswi, dụ uswe-uswe, ọwhu l'ẹte enwee ọrwu l'ẹhu, ntụpo ta adụ iya l'ẹhu, t'e gudebua ya rwụa ọrwu.

³ Unu kpụta nwada eswi ono kpẹe Eliyéza, bụ onye l'agbajẹ ẹja nụ Chileke, t'a kpụfu iya l'azụ ẹka ndu Ízurẹlu kpọberu ụlo-ẹkwa ebubu whẹ je egbua ya l'atatiwhu iya.

⁴ Tẹ Eliyéza, bụ onye l'agbajẹ ẹja nụ Chileke tsẹe mkpụshi-ẹka iya lẹ mmee ya whee ya l'ụzo atatiwhu Ụlo-ẹkwa-ndzuko ugbo ẹsaa.

⁵ Nwada eswi ono bẹ l'aa-kpọ ọku l'atatiwhu iya, kpọo akpọ iya ọku, kpọo anụ iya ọku, kpọo mmee ya ọku, kpọo nshị iya ọku.

⁶ Onye l'agbajẹ ẹja nụ Chileke ono ewota oshi sida mẹe ẹwu ịsopu mẹe oghu uswe-uswe tụru chee l'echilabọ ọku ono, e gude akpọ nwada eswi ono ọku.

⁷ Nteke ono bẹ onye ono, l'agbajẹ ẹja nụ Chileke ono l'e-gude mini saa uwe iya asa, gude mini ghụa ẹhu. O -megele iya whọ nno, ya abata l'ime ẹka ono, a kpọberu ụlo-ẹkwa. Ọle ọo-nọdu bụru onye l'aasọ nsọ jeye l'urwẹnyashi mbọku ono.

⁸ Onye bụ iya kpọru nwada eswi ono ọku bẹ l'e-gudekwawho mini saa uwe iya asa; gude mini ghụa ẹhu, ya anọdukwawho bụru onye l'aasọ nsọ jeye l'urwẹnyashi mbọku ono.

⁹ Onye l'ẹte asọ nsọ bẹ l'e-kpota ntụ, shi l'ọku ono, e gude kpọo nwada eswi ono ọku. Oo-kpota iya je awụshi l'ẹka l'ẹte asọ nsọ l'azụ ẹka ono, ndu Ízurẹlu kpọberu ụlo-ẹkwa ebubu whẹ. Ọ bụru l'ẹka ono bẹ l'aa-wụshiru ndu Ízurẹlu ntụ ono tẹ whẹ gude meje nke mini, l'eegudeje atụrwu madzụ mmerwu, gude iya eme nke ọsafu iwhe-dụ-ẹji.

¹⁰ Onye bụ iya kpotaru ntụ ono bẹ l'a-sa uwe iya asa; nọdu bụru onye l'aasọ nsọ jeye l'urwẹnyashi mbọku ono. Iwhe ono l'a-bụ nsọ ndu Ízurẹlu jeye lẹ gbururu. Ọo-dụru ndu Ízurẹlu dụru ndu lwarụ alwa, bu l'echilabọ whẹ.

Odenyi odzu ẹka

¹¹ “Onye denyiru odzu onye nwụhuru anwụhu ẹka bẹ l'a-bụru onye l'aasọ nsọ jeye abalị ẹsaa.

¹² Onye ọbu bẹ l'e-gude mini ono, l'eegudeje atụrwu iwhe tụrwua onwiya mmerwu ono lẹ mbọku nke ẹto iya mẹe lẹ mbọku nke ẹsaa ya, tẹmenu a sọ-buhu iya nsọ. Ọle ọ -bụru l'ọ tọo tụrwudu iya onwiya l'ẹhu mbọku nke ẹto iya ono mẹe lẹ mbọku nke ẹsaa ya ono bẹ l'ẹte asọ-buhudu iya nsọ.

¹³ Iwhe bụ onye meru odzu onye nwụhuru anwụhu ẹka, onye ọbu ta atụrwu iya onwiya l'ẹhu bẹ kwa mkpuumkpu-ẹkwa Onye-Nwe-Ọha bẹ l'oomerwu. Onye ọbu bẹ l'ee-kefu l'oke l'ẹka ndu Ízurẹlu nọ. Ọo-bụru onye l'aasọ nsọ, o noo nkele e teke ewheshidua ya mini ono, l'eegudeje atụrwu iwhe; mmerwu ono bẹ dụkwa iya-a l'ẹhu g'ọ dụ iya.

¹⁴ “Ọ waa bụ iwu, dụ lẹ nke onye nọdu l'ụlo-ẹkwa nwụhu. Iwhe bụ onye bahụru l'ime ụlo-ẹkwa nteke ono mẹe iwhe bụ onye nọdu iya l'ime nteke ono bẹ l'a-bụ onye l'aasọ nsọ jeye abalị ẹsaa.

¹⁵ Iwhe bụ arya, dụ l'ụlo-ẹkwa ono, e gheberu ọnu, t'e kpube iya iwhe bẹ l'aa-sọkwawho nsọ.

¹⁶ Iwhe bụ onye nọ l'ọma ẹgu denyi ẹka l'odzu onye e gburu lẹ mma m'ọ bụ l'odzu onye nwụhuru anwụhu mmaanụ, ọ dụa l'o denyiru ẹka l'ọkpu onye nwụhuru anwụhu m'ọ bụ l'ilu, bẹ l'a-bụ onye l'aasọ nsọ jeye abalị ẹsaa.

¹⁷ “A -bya l'ẹka ndu l'aasọ nsọ nọ, tẹ whẹ kpota ntụ, shi l'ọku, e gude kpọo ngwo-ẹja iwhe-dụ-ẹji ọku ye l'iwhe, whẹ eje l'ẹka mini, l'asọ asọ dụ kuta mini, doru rịsaa ye iya.

¹⁸ Ọo ya bụ, onye l'ẹte asọ nsọ ewota ẹwu ịsopu tsẹe l'ime mini ono whee ya l'eli ụlo-ẹkwa ono mẹe l'eli arya, dụ l'ụlo-ẹkwa ono mẹe l'ẹhu ndu nọ l'ime ụlo-ẹkwa ono. O nokwawho gẹ l'oo-whe iya iwhe bụ onye denyiru ẹka l'ọkpu onye nwụhuru anwụhu mẹe l'iwhe bụ onye denyiru ẹka l'odzu onye e gburu lẹ mma m'ọ bụ onye denyiru onye nwụhuru anwụhu mmaanụ ẹka m'ọ bụ onye denyiru ẹka l'ilu.

¹⁹ Onye ọbu, l'ẹte asọ nsọ l'e-whe onye ono, l'aasọ nsọ mini ono lẹ mbọku nke ẹto mẹe lẹ mbọku nke ẹsaa. O -rwua lẹ mbọku nke ẹsaa ono, ya atụrwu ya mmerwu ono. Onye ono, a tụrwuru mmerwu ono abya asaa uwe iya asa, gude mini ghụa ẹhu, ya abya abụru onye l'ẹte asọhe nsọ l'urwẹnyashi mbọku ono.

²⁰ Obenu l'onye l'aasọ nsọ t'ọ tụrwu iya onwiya l'ẹhu bẹ l'ee-kefu l'oke l'echilabọ ndu Ízurẹlu nkele o merwuwaru ụlo-nsọ nke Onye-Nwe-Ọha. Eshi-ọwhu l'ete ewhee ya mini ono, l'eegudeje atụrwu madzụ mmerwu b'ọ bụ onye l'aasọ nsọ.

²¹ O noo bụ iwu, l'a-dụ jeye lẹ gbururu l'ẹka whẹ nọ. Onye ono, bụ iya l'ewheje mini ono, l'eegudeje asafụ madzụ ntụrwu ono bẹ l'a-sakwawhọ uwe nkiya asa. Onye meru ẹka lẹ mini ono, l'eegudeje atụrwu mmerwu bẹ l'a-bụru onye l'aasọ nsọ jeye l'urwẹnyashi mbọku ono.

²² Iwhe onye l'aasọ nsọ byiru ẹka bẹ bụkwawho iwhe l'aasọ nsọ; onye mekwanuru ẹka l'iwhe ọbu bẹ l'aa-nọ asọ nsọ jeye l'urwẹnyashi mbọku ono.”