Ọ́gú 15 - BAYỊBURU Ẹzaa

Nke ngwo-ẹja, ndu Ízurẹlu l'a-gbajẹ

¹ Onye-Nwe-Ọha bya asụ Mósisu

² t'o kfuru yeru ndu Ízurẹlu sụ whẹ agha: “Unu -lwalẹwho je eburu l'alị ono, mu l'eme tẹ mu nụ unu,

³ unu -gbadẹlewho ẹja anụ Onye-Nwe-Ọha, unu eshi l'igwe élwù unu họta anụ gbua kpọo ọku gude gbaa ẹja ọbu t'ọ bụru ngwo-ẹja, mkpọ iya dụ Onye-Nwe-Ọha ree. Unu l'e-meje iya nno l'ẹja ọkpokota-iwhe-ọku mẹe nteke unu l'anụ mu iwhe gude emedzu ụkwa, unu kweru mu mẹe nteke unu l'anụ mu iwhe shi unu l'obu m'ọ bụ nteke unu l'agba ẹja l'ori oge.

⁴ Onye wotaru ngwo-ẹja ono l'e-yekobeje iya ngwo-ẹja nri bya anụ Onye-Nwe-Ọha, mbụ nkere iri nkwẹka witi, e gweru egwegwe gwọkobe iya nkerẹno ekpemu mmanụ.

⁵ “Iwhe bụ nwatụru, e gude agba ẹja ọkpokota-iwhe-ọku m'ọ bụ ẹja mmaanụ ọdo bẹ unu l'e-yekobeje ngwo-ẹja mmẹe, mbụ nkerẹno ọvara mmẹe.

⁶ “A bya l'iwhe bụ ebyila, e gude agba ẹja, unu eyekobeje iya ngwo-ẹja nri, mbụ ụzo labọ l'ime nkere iri nkwẹka witi, e gweru egwegwe gwọkobe iya nkerẹto ekpemu mmanụ.

⁷ Ngwo-ẹja mmẹe ono bẹ unu l'e-gude nkerẹto ọvara mmẹe gwoo. T'unu meje iya t'ọ bụru ngwo-ẹja, mkpọ iya dụ Onye-Nwe-Ọha ree.

⁸ “Nteke bụ l'unu gude nwa oke-eswi agbarụ Onye-Nwe-Ọha ẹja ọkpokota-iwhe-ọku m'ọ bụ ẹja mmaanụ ọdo, shi nno medzua ụkwa, unu kweru Onye-Nwe-Ọha m'ọ bụ gude iya gbaa ẹja ẹhu-guu,

⁹ t'onye l'agba ẹja ono yekobekwa iya ngwo-ẹja nri, mbụ ụzo ẹto l'ime nkere iri nkwẹka witi, e gweru egwegwe gwọkobe iya ugvu ekpemu mmanụ.

¹⁰ O nokwawho g'unu l'e-wotaje ugvu ọvara mmẹe gude gwoo ngwo-ẹja mmẹe. Ngwo-ẹja ono bẹ l'a-bụru ngwo-ẹja, a kpọru ọku, mkpọ iya dụ Onye-Nwe-Ọha ree.

¹¹ “Ọ bụru nno bẹ unu l'e-megbaru iya l'iwhe bụ oke-eswi m'ọ bụ ebyila m'ọ bụ nwatụru m'ọ bụ nwa-eghu, unu gude agba ẹja.

¹² O noo g'unu l'e-megbarụ iya l'iwhe bụ ẹja, unu l'agba agba, m'ọ ha agha m'ọ ha agha.

¹³ Iwhe bụ onye a nwụru anwụnwu lẹ Ízurẹlu bẹ bụ l'ụzo, dụ nno bẹ l'oo-meje ngwo-ẹja, l'oogwo anụ Onye-Nwe-Ọha, mbụ ngwo-ẹja, a kpọru ọku shi nno mee tẹ mkpọ iya dụ Onye-Nwe-Ọha ree.

¹⁴ E shi l'ọgbo nkunu je akpaa lẹ ndu ọwhu l'a-bya l'atatiwhu, onye bụ onye lwarụ alwa, bu l'echilabọ unu -wota ẹja bya tẹ ya gbaarụ Onye-Nwe-Ọha, mbụ ẹja, a kpọkotaru ọku, shi nno mee tẹ mkpọ iya dụ Onye-Nwe-Ọha ree, t'ọ bụkwaru ẹgube unu l'emeje bẹ onye ọbu l'e-me.

¹⁵ Ọo nsọ lanụ ono dụru unubẹ ndu Ízurẹlu l'owhu mẹe iwhe bụ ndu lwarụ alwa, bu l'echilabọ unu. Nsọ ono l'a-nọlewho shi l'ọgbo nkunu rwua l'ọgbo ọdo jeye lẹ gbururu. Ọo g'unu dụ l'atatiwhu Onye-Nwe-Ọha bụ gẹ ndu lwarụ alwa dụkwawho.

¹⁶ Ọ bụru iwu lanụ yẹle nsọ lanụ dụru unu lẹ ndu lwarụ alwalwa, bu l'echilabọ unu.”

Ọnu Onye-Nwe-Ọha iwhe mbụ

¹⁷ Onye-Nwe-Ọha bya asụ Mósisu

¹⁸ t'o kfuru ndu Ízurẹlu sụ whẹ agha: “Unu -rwulewho alị ono, mu l'edu unu eje ono,

¹⁹ unu ridelewho nri, shi l'alị ono, unu wofukwa oke iya nke Onye-Nwe-Ọha bya anụ iya.

²⁰ Unu gude ụturutuu-iwhe, shi l'akpụru iwhe mbụ, unu metaru l'alị ono gheta buredi nụ Onye-Nwe-Ọha t'ọ bụru ngwo-ẹja, shi l'ẹka l'eechije witi.

²¹ Ngwo-ẹja ụturutuu-iwhe mbụ, unu metaru l'alị ono bẹ unu l'a-nụje Onye-Nwe-Ọha jeyewaro, shi l'ọgbo rwua l'ọgbo.

Ngwo-ẹja iwhe-dụ-ẹji, e meru l'amaga ama

²² “Ọ -bụru l'unu ta amadụ ama haa odobekota iwu-a, Onye-Nwe-Ọha tụshiru ye Mósisu l'ẹka,

²³ mbụ iwu ono g'ọ ha, Onye-Nwe-Ọha shi l'ẹka Mósisu nụkota unu t'ọ nọwaro shi l'ọgbo rwua l'ọgbo; watalẹwho mbọku, Onye-Nwe-Ọha tụru iya nụ unu.

²⁴ Ọ -bụru lẹ ndu Ízurẹlu l'owhu ta amadụ ama, mbụ lẹ whẹ ta akwabẹdu ẹnya mebyia iwu ono, ọo ya bụ, unubẹ ndu Ízurẹlu ewota nwa oke-eswi gude gbaa ẹja ọkpokota-iwhe-ọku, mbụ ngwo-ẹja e meru, mkpọ iya dụ Onye-Nwe-Ọha ree. Unu eyekobe iya ngwo-ẹja nri mẹe ngwo-ẹja mmẹe, l'etsoje iya nụ yẹle mkpi, l'ee-gude gbaa ẹja iwhe-dụ-ẹji.

²⁵ T'onye l'agbajẹ ẹja nụ Chileke gbaa ẹja ono gude kfụa ụgwo iwhe-dụ-ẹji ndu Ízurẹlu ono l'owhu; ndụge a gụaru whẹ nvụ l'iwhe-dụ-ẹji ono, whẹ meru, o noo nkele whẹ ta amadụ ama mee ya; bya egwowaru ngwo-ẹja nụ Onye-Nwe-Ọha l'iswi iwhe-dụ-ẹji ono, whẹ meru, mbụ ngwo-ẹja, a kpọru ọku mẹe ngwọ-ẹja iwhe-dụ-ẹji.

²⁶ Ndu Ízurẹlu l'owhu mẹe ndu lwarụ alwa, bu l'echilabọ whẹ bẹ l'aa-gụkotaru nvụ, o noo nkele whẹ ta amadụ ama mee iwhe-dụ-ẹji ono.

²⁷ “Ọle ọ -bụru l'ọo onye lanụ ta amadụ ama mee iwhe-dụ-ẹji, onye ọbu ewota nwada eghu, gbarụ awha t'e gude gbaa ẹja iwhe-dụ-ẹji ọbu, o meru.

²⁸ Onye l'agbajẹ ẹja nụ Chileke bẹ l'a-nọdu l'iwhu Onye-Nwe-Ọha kfụa ụgwo iwhe-dụ-ẹji, onye ọbu meru l'amaga ama. A -kfụlewho ụgwo iwhe-dụ-ẹji ono, onye ono meru, a gụaru iya nvụ.

²⁹ Iwu lanụ ono bụ iya dụru iwhe bụ onye l'amaa ama mee iwhe-dụ-ẹji m'ọ bụ onye a nwụru anwụnwu lẹ Ízurẹlu m'ọ bụ onye lwarụ alwa.

Ngwo-ẹja iwhe-dụ-ẹji, a marụ ama mee

³⁰ “Obekwanu l'onye marụ ama mee iwhe-dụ-ẹji, m'a nwụru onye ọbu anwụ lẹ Ízurẹlu m'ọ bụ onye lwarụ alwa bẹ onye ọbu kfubyiakwaru ẹwha Onye-Nwe-Ọha. Onye dụ nno bẹ l'ee-kefu l'oke l'echilabọ ndibe whẹ.

³¹ Nkeshi ọwhu onye ono l'adụa iwhe ọ gụberu okfu Onye-Nwe-Ọha, o mebyiwa iwhe iwu Onye-Nwe-Ọha kfuru b'e kefuje onye ọbu l'oke, iwhe-dụ-ẹji o metaru atukoru iya l'ishi.”

Onye dosweru nsọ mbọku-ọtuta-ume bẹ l'ee-gbu

³² Nteke ndu Ízurẹlu nọkwadu l'echi-ẹgu b'o nweru nwoke ọbu, e guderu gẹ l'ọokpa nkụ lẹ mbọku-ọtuta-ume.

³³ Ndu whụru iya l'ẹka l'ọokpa nkụ ono kpụta iya kpụ-kfu Mósisu yẹle Érọnu mẹe ndu Ízurẹlu l'owhu.

³⁴ Whẹ kpụta iya tụ-chia atụ-chi nkele e teke ekfukahudua iwhe l'ee-me iya ekfukahu.

³⁵ Ọo ya bụ, Onye-Nwe-Ọha sụ Mósisu: “Nwoke ono bẹ l'ee-gbu egbu. Tẹ ndu Ízurẹlu l'owhu kpụfu iya azụ ẹka whẹ kpọberu ụlo-ẹkwa ebubu whẹ je atụ-gbua ya l'ẹwhuru.”

³⁶ Tọ dụ iya bụ, ndu Ízurẹlu bya kpụta iya kpụfu azụ ẹka ono, whẹ kpọberu ụlo-ẹkwa ebubu whẹ ono tụ-gbua ya l'ẹwhuru gẹ Onye-Nwe-Ọha kfuru Mósisu.

Iwhe a kparụ akpakpa dzụgbabe l'uwe

³⁷ Onye-Nwe-Ọha bya asụ Mósisu

³⁸ t'o kfuru ndu Ízurẹlu sụ whẹ agha: “Unu kpaa iwhe-akpakpa l'ogboromọnu uwe unu. Unu adzụru oghu, dụ urwukpu-urwukpu ye l'eli oghu ono, unu kpangashịru dzụpyabe l'uwe ono. O noo g'unu l'e-meje iya shi l'ọgbo rwua l'ọgbo.

³⁹ Iwhe-akpakpa ono bẹ unu l'eleje ẹnya gude nyata iwu mụbe Onye-Nwe-Ọha, nke ọwhu unu l'a-nọje eme iya ememe haa ụrwu-alị ono, ọlolikpakpa ejo-iwhe, l'anọje agụkaa obu unu mẹe ẹnya unu l'enwujeru unu ye t'unu mee.

⁴⁰ Ọo ya bụ, nke ọwhu unu l'a-nyatajẹ iwhe lile, iwu mu kfuru eme iya ememe, shi nno, unu edobe onwunu nsọ l'ẹka Chileke unu nọ.

⁴¹ Ọo Mu bụ Onye-Nwe-Ọha bụru Chileke unu, mbụ onye ono, dufutaru unu l'alị Íjiputu; tẹ mu bụru Chileke unu. Ọo Mu bụ Onye-Nwe-Ọha bụru Chileke unu.”