Ọ́gú 13 - BAYỊBURU Ẹzaa

E yeru ụmadzu iri l'ẹbo tẹ whẹ jee ngge l'alị Kenanu

¹ Onye-Nwe-Ọha sụ Mósisu:

² “Yee ndu l'e-je alị Kenanu je egee ya ngge, mbụ alị ono, mu l'eme tẹ mu nụ ndu Ízurẹlu. Shi l'ikfu g'ikfu ha, bụ ikfu ndụ-ichee whẹ họta-gee onye lanụ, l'e-je nụ. Ndu l'ịi-họta bẹ bụ unwoke, bụ ishi l'ikfu nọnu.”

³ Mósisu bya eyefu whẹ ẹgube ono Onye-Nwe-Ọha kfuru, whẹ shi l'echi-ẹgu Paranu tụgburu jeshia. Ndu ono, o yeru bụkota ndu ishi lẹ Ízurẹlu.

⁴ Ọ waa ẹwha whẹ ndọwa: Onye shi l'ikfu Rúbẹnu bụ Shamuwa nwa Zakuru,

⁵ onye shi l'ikfu Símiyọnu bụru Shafatu nwa Hori,

⁶ onye shi l'ikfu Juda bụru Kálẹbu nwa Jefune,

⁷ onye shi l'ikfu Ísaka bụru Igalu nwa Jósẹfu,

⁸ onye shi l'ikfu Ífuremu bụru Hoshiya nwa Nunu,

⁹ onye shi l'ikfu Bénjaminu bụru Paluti nwa Rafu,

¹⁰ onye shi l'ikfu Zébulọnu bụru Gadíyelu nwa Sodi.

¹¹ Onye shi l'ikfu Manáse bụ iya bụ ikfu Jósẹfu bẹ bụ Gadi nwa Susi,

¹² onye shi l'ikfu Danu bụru Amiyẹlu nwa Gemali,

¹³ onye shi l'ikfu Asha bụru Setu nwa Máyikelu,

¹⁴ onye shi l'ikfu Náfutali bụru Nahubi nwa Vofusi,

¹⁵ onye shi l'ikfu Gadu bụru Geyuwẹlu nwa Maki.

¹⁶ O noo ẹwha unwoke ono, Mósisu yeru tẹ whẹ jeshia ngge l'alị Kenanu ndono. Mósisu gụ-nwee Hoshiya nwa Nunu ẹwha gụa ya Jóshuwa.

¹⁷ Mósisu bya ezhia whẹ tẹ whẹ jeshia ngge l'alị Kenanu sụ whẹ: “Unu tsogburu echi-ẹgu, dụ l'ọhuda bahụ l'alị ugvu ugvu ẹka ono.

¹⁸ Unu je awhụ g'alị ono dụ dụ mẹe gẹ ndu bu iya nụ dụ dụ, mbụ t'unu marụ mẹ ọkpehu dụ ndu bu iya nụ, tẹ whẹ bụ ndu ume-ngvụ, unu amarụ mẹ whẹ ha l'igwe, tẹ whẹ dụa nwolemole.

¹⁹ Unu amarụ ẹgube alị whẹ bu ebu, unu marụ m'ọo alị dụ ree, tọo alị, dụ ẹji. Unu amarụ ẹgube mkpụkpu, whẹ bugee, unu marụ m'ọo mkpụkpu, l'ẹte atụa mgbodo mgburumgburu; tọo mkpụkpu, a tụru mgbodo mgburumgburu.

²⁰ Unu amarụ g'alị whẹ dụ, unu marụ m'ọo alị l'emehuje iwhe e meberu iya, tọo alị, ụchi gbarụ, unu amarụ m'ọo alị oshi oshi, tọo tọ dụ iya. T'obu shihu unu ike, unu egude akpụru oshi, shi alị ono lwa.” Nteke ono bụ nteke, akpụru vayịnu ọnumbu l'anọje achashịka.

²¹ O noo ya, whẹ tụgbua jeshia je egekotagezhia alị ono l'owhu ngge, shizhiawho l'echi-ẹgu Zinu je akpaa lẹ Rehobu, m'a nọdu eje Hámatu.

²² Whẹ tsogburu echi-ẹgu, dụ l'ọhuda jeye whẹ rwua Hiburọnu, bụ ẹka Ahimanu mẹe Sheshayi mẹe Talumayi, bụ ndu shi l'eri Anaku bu ebubu. A tụru mkpụkpu Hiburọnu, ọ nọo awha ẹsaa tẹmenu a tụa mkpụkpu Zowanu ọwhu dụ l'alị Íjiputu.

²³ Nteke whẹ byarwuru nsụda Ẹshukolu, whẹ gbukwota ẹkali vayịnu lanụ, akpụru jọkfuru ajọkfuru. Whẹ pyokafu iya l'oshi, dụ ogologo, ụmadzu labọ parụ iya; onye lanụ parụ iya l'ishi lanụ, onye ọwhua parụ iya l'ishi lanụ. Whẹ wọkokwaawho akpụru itorokuma mẹe akpụru figu wolata.

²⁴ A gụbe ẹka ono nsụda Ẹshukolu, nkele ọo ẹka ono bẹ ndu Ízurẹlu gbukwotaru ẹkali vayịnu, akpụru jọkfuru ajọkfuru vulata.

²⁵ Whẹ nọru ụkporo abalị ugbo labọ gẹ whẹ jeru ngge l'alị ono tẹmenu whẹ lwa.

²⁶ Whẹ lwakfuta Mósisu mẹe Érọnu mẹe ndu Ízurẹlu l'owhu l'echi-ẹgu Paranu, dụ lẹ mkpụkpu Kádẹshi. Whẹ bya edooru Mósisu mẹe Érọnu mẹe ndu Ízurẹlu l'owhu edo ije whẹ, goshi whẹ akpụru oshi, shi alị ono.

²⁷ Ọ waa iwhe whẹ kfuru Mósisu ndọwa: “Anyi jewaru je awhụ alị ọbu ị sụru t'anyi je awhụ. Alị ono bẹ mini-ẹra eswi yẹle mmanụ-ẹnwu jiru ejiji. Ọ waa akpụru oshi shi l'alị ono ndọwa.

²⁸ Ọle ndu bu l'alị ono bẹ ọkpehu dụ, mkpụkpu, dụ iya nụ hagee shii bụru mkpụkpu, a tụ-wheru mgbodo mgburumgburu. Anyi whụ-gekwaaru whụa ndu shi l'eri Anaku l'ẹka ono.

²⁹ Ndu Amalẹ́ku bu l'echi-ẹgu, dụ l'ọhuda, ndu Hetu mẹe ndu Jebusu mẹe ndu Amọru buru l'alị ugvu ugvu ẹka ono, ọwhube ndu Kenanu bua kụbe ẹhu l'eze-ẹnyimu, bukwaruwho l'agụga ẹnyimu Jọ́danu.”

³⁰ Tọ dụ iya bụ, Kálẹbu bya emee; ndu Ízurẹlu daa shịikfuu l'iwhu Mósisu sụ whẹ: “Unu t'anyi je alwụta alị ono t'ọ bụru nke anyi nkele anyi l'a-dụ ike lwụta iya.”

³¹ Obenu lẹ ndu ono, whẹ lẹ Kálẹbu lị jee ije ono bẹ sụru: “Anyi ta adụkwa ike eje ọlwushi ndu ono ọgu, o noo nkele ọkpehu, dụ whẹ nụ bẹ kakwa nke anyịbedua shii.”

³² Ozhi ono bụru ejo ozhi bẹ whẹ bya agbasaaru ndu Ízurẹlu lẹ nke alị ono, whẹ jeru ngge iya ono. Iwhe whẹ kfuru bụ l'alị ono, whẹ jeru ngge iya ono bẹ l'egbushikwa ndu bu iya nụ. Lẹ ndu lile, whẹ whụru l'ẹka ono bẹ hagee gagvu gagvu.

³³ Lẹ whẹ whụru ndu mkparawa l'ẹka ono. Ndu shi l'eri Anaku bụ l'ẹhu ndu mkparawa ono bẹ whẹ shi fụta. Mbụ lẹ whẹ darwehugeeru ndu ono adarwehu l'ẹnya dụ-gee whẹ g'ọo ụnwu ogu. Ọ bụru nno bẹ whẹ dụ-gee l'ẹnya ndu ono nke bụ ezhi-okfu.