Ọ́gú 12 - BAYỊBURU Ẹzaa

Miriyamu yẹle Érọnu l'ekfulwu Mósisu

¹ Tọ dụ iya bụ, Miriyamu yẹle Érọnu wata okfulwu Mósisu l'okfu nwanyị Kushi, ọ lụru. Nkele Mósisu bẹ lụru onye Kushi.

² Whẹ sụ: “?Ọ fụtaru l'ọolewho Mósisu bẹ Onye-Nwe-Ọha l'eshije l'ọnu iya ekfu okfu kpụ? ?T'o shijedu l'ọnu nke anyịbedua ekfu okfu tọo?” Onye-Nwe-Ọha nụa iwhe ono, whẹ kfuru.

³ Sụa, nwoke ono, bụ Mósisu bẹ bụnuka onye odoo. Ọo ya kagezhia ome odoo lẹ ndu mgboko l'owhu.

⁴ E jia ekfu, Onye-Nwe-Ọha sụ Mósisu mẹe Érọnu mẹe Miriyamu sụ whẹ: “Unu ẹto tụko lụfuta byatashia lẹ Ụlo-ẹkwa-ndzuko.” Whẹ ẹto ono bya afụta tụgbua jeshia.

⁵ Ọo ya bụ, Onye-Nwe-Ọha nọdu l'urwukpu, kpụru orogbodo nyizeta bya akfụru l'ọnu ụlo-ẹkwa ndzuko ono, gbakushi Érọnu yẹle Miriyamu oku. Nteke whẹ labọ tụgburu eje ọza oku ono bẹ

⁶ Onye-Nwe-Ọha sụru whẹ: “Unu ngabẹ nchị nụ iwhe-e, mu l'ekfuru unu: Ọobuje, onye nkfuchiru Onye-Nwe-Ọha -nọdu l'echilabọ unu, mụbe Onye-Nwe-Ọha egoshi iya onwomu l'ọwhulenya bya ekfu yeru iya lẹ nrọ.

⁷ Obenu l'ọ tọ dụdu nno l'ẹka onye ozhi mu Mósisu nọ. Ọo ya b'e yeru ndibe mu gẹ whẹ ha l'ẹka.

⁸ Mu l'iya l'ekfugbaje okfu l'iwhu l'iwhu, mbụ l'anyi l'ekfuje okfu doru ẹnya yeru onwanyi, ọ tọ bụdu okfu-ẹtu. Ọowhuje gẹ mụbe Onye-Nwe-Ọha gbarụ ụgbugba. Ọo ya bụ, ?ọo gụnu meru g'o gude egvu ta atsụ unu nke t'unu kfulwua nwozhi mu ono, bụ Mósisu?”

⁹ Onye-Nwe-Ọha bya atukoshi whẹ ẹhu-eghughu iya swịhaa ije haa whẹ.

¹⁰ Nteke urwukpu ono shi l'eli ụlo-ẹkwa ono palia imeli imeli, a bya l'eledeshia ẹnya, njọkirehu tụkowaa Miriyamu ẹhu nata, ẹhu nwuhule iya whọ whoo. Érọnu ghachi bya elee Miriyamu ẹnya whụ gẹ njọkirehu tụkoru iya ẹhu.

¹¹ Érọnu sụ Mósisu: “Gụbe onye-nwe-mu nụ, ba anụshinu anyi áwhụ l'ọo l'anyi gude ome eswe mee iwhe-dụ-ẹji.

¹² Be ekweshinu tẹ nwanyị-a dụ g'ọo nwata, bya l'afụta-deshia l'ẹwho ne iya, ọ nwụhuwa anwụhu; ibe ẹhu iya rekashihuwa erekashihu.”

¹³ Tọ dụ iya bụ, Mósisu bya aryaku Onye-Nwe-Ọha sụ: “Byiko gụbe Chileke, menua t'o mehu.”

¹⁴ Onye-Nwe-Ọha sụ Mósisu: “Ọ -bụ lẹ nna nwanyị-a vụru ọnu-mini koo ya l'iwhu, ?iwhere iya g'ekwee t'ọ fụta afụta jeye abalị ẹsaa? Nwuru iya ye l'azụ ẹka ono, ndu Ízurẹlu kpọru ụlo-ẹkwa ebubu whẹ gbaburu iya ye t'ọ nọo ujiku ẹsaa; ọ -nọ-gelewho ujiku ẹsaa ono e dufutawhu iya azụ.”

¹⁵ Tọ dụ iya bụ, a bya enwufu Miriyamu gbaburu iya ye l'azụ ẹka ono ndu Ízurẹlu kpọberu ụlo-ẹkwa ebubu whẹ ono, ọ nọo ujiku ẹsaa. Ndu Ízurẹlu ta ahalịbejeru ọkpa jeye nteke e duwhutaru iya azụ.

¹⁶ E megee, whẹ shi lẹ Hazerotu l'ẹka ono lụfu je akpọbe ụlo-ẹkwa ebubu whẹ l'echi-ẹgu Paranu.