Nehemaya 1 - BAYỊBURU Ẹzaa

Nehemaya vutaru ivu ẹhu Jerúsalẹmu

¹ Ọ waa bụ okfu Nehemaya nwa Hakaliya. L'ọnwa Kisilevu l'awha kwe mu ụkporo awha gẹ mu nọ l'ibe-eze l'ishi mkpụkpu ono, bụ Susa

² bẹ nwune mu ọwhu, l'aza Hanani yẹle unwoke ọdo shi Juda bya. Mu jịa whẹ ajị ndu Ju ono, wafụru nụ, mbụ ndu ọwhu shi l'alị ono, e shi kpụru whẹ lẹ ndzụ laa ono lwatawhu azụ. Mu bya ajịa whẹ ajị Jerúsalẹmu.

³ Whẹ sụ mu agha: “Ndu ono, e shi kpụa lẹ ndzụ laa alị ọdo, megeeru lwatawhu azụ lẹ Juda bẹ nọkwa l'oke nsogbu; mbụ l'ọnodu, whẹ nọ bẹ iwhere iya dụ. Lẹ mgbodo Jerúsalẹmu bẹ zekposhihuru ezekposhihu mẹe l'eeyeru ọku ọ dzụpyashia ọnu ẹka l'eeshigejee abahụ iya.”

⁴ Nteke mu nụru iwhe ono, whẹ kfuru bẹ mu nọdu anọdu ryaa ẹkwa. Mu gụa áwhụ igweligwe mbọku, swịa ẹgu kfuru nụ Chileke nke imigwe

⁵ sụ: “Gụbe Onye-Nwe-Ọha, bụ Chileke nke imigwe, mbụ Chileke ono, parụ ẹka dụ egvu; ị bụ onye l'edobeje ọgbandzu ghu mẹe n-yemobu ghu l'ẹhu ndu yeru ghu obu mẹe l'ẹhu ndu l'eme iwhe i kfuru.

⁶ Ngabẹnu nchị, nwụbe ẹnya l'ekfukfu, mụbe onye ozhi ghu l'ekfu anụ ghu; mbụ ekfukfu, mu l'anọduje l'iwhu ghu ekfu anụ ghu eswe l'ẹnyashi l'ishi ndu ozhi ghu, bụ ndu Ízurẹlu. Mu l'adụshi iwhe-dụ-ẹji, anyịbe ndu Ízurẹlu megbaberu, mbụ iwhe-dụ-ẹji mbẹdua l'ishi onwomu mẹe ndibe nna mu meru ghu.

⁷ Anyi rwụwaru alị kpaa ntụ l'ẹnya l'ẹka ị nọ, haa ome iwu, ị tụru mẹe iwhe ị tọru ọkpa iya mẹe nsọ, i doberu bụ iya bụ iwhe ị tụru nụ onye ozhi ghu Mósisu t'e meje.

⁸ Nyatanụ okfu ono, i kfuru onye ozhi ghu, bụ Mósisu sụ: ‘Ọ -bụru l'ete egudedu ire unu ẹka bẹ mu l'a-tụkashikwa unu nnanụ nnanụ lẹ mba gẹ mba ha.

⁹ Ọle ọ -bụru l'unu dakọberu lwakfutawhu mu azụ, bya edobe iwu mu, eme iya ememe, e -behuduru ẹka a chịru unu laa bụru l'ọhu ẹka igwe beru alị beru, bẹ mu l'e-shi l'ẹka ono rwukobe unu ọnu, duwhu unu azụ l'ẹka ono, mu họtaru t'ọ bụru ẹka mu l'e-buru eburu.’

¹⁰ “Ọo kwa ndu ozhi ghu bẹ whẹ bụ, bya abụru ndibe ghu, mbụ ndu i gude eze ike ghu mẹe ọkpehu ghu gbata.

¹¹ Gụbe Onye-Nwe-Ọha, ngabẹnu nchị l'ekfukfu onye ozhi ghu l'ekfu anụ ghu mẹe l'ekfukfu ndu ozhi ghu l'ekfu anụ ghu; mbụ ndu ono, bụ ndu l'ọoduje ree tẹ whẹ yeru ghu ẹso. Byiko menua t'iwhe dụru mụbe onye ozhi ghu lẹ ree ntanụ, gụ emee t'imiko mu dụnu nwoke-e, bụ eze.” Nteke ono bẹ bụ mu shi bụru onye l'agbarụ eze mmẹe.