Mayịka 7 - BAYỊBURU Ẹzaa

Nshọbukwa ndu Ízurẹlu

¹ Nshọbukwa mu nshọ, mu dụakwa g'ọo onye ẹgu l'eme, jeru akpaa l'ọnanwu nteke a kpatagewaru iwhe e meberu l'alị ọ gvụ, tọ dụhe akpụru vayịnu whọdukwaduru l'oshi iya. Mbụ nteke ọjokfutu akpụru vayịnu l'ẹte adụhe tẹ mu wọta iya mịa, akpụru figu ọnumbu ono, l'anọje agụ mu ẹgu ta adụhe.

² Sụa, ntaa bẹ ndu yeru Chileke obu ta awhọduhedu lẹ mgboko-eliwhe-alị. Ọ tọ dụdu onye obu gụkwaduru iwhoro whọduru nụ t'ọ ka mma l'ọo onye lanụ. Iwhe onyenọnu kwageberu akwage iya bụ ogbu ọchi. Onyenọnu gudewaa ụgbu achị nta nwune iya t'ọ nmata iya.

³ Ẹka l'anọje atsụ whẹ nteku l'ome ejo-iwhe. Ndu ishi l'achị nụ bụlewho iwhe l'aa-nụ whẹ bẹ ẹnya l'adụje whẹ. Ndu ikpe bụru ọnawhe nnuchi-ọnu bẹ whẹ dụ l'ọzo iya. Ọwhube ndu a marụ ẹwha whẹ bụru ejo-iwhe, l'awhọ whẹ l'obu bẹ whẹ l'anọje ekfushi l'ọnu. Ndu ono gẹ whẹ ha bẹ idzu whẹ je agbagba nnanụ.

⁴ Onye e gbee sụ l'ọo ya kagezhia mma lẹ ndu ono bụ onye ọwhu l'adzụ g'ọo uke. Onye e gbee sụ l'ọo ya kagezhia ọbu onye obu gụru iwhoro bụru onye ọwhu l'akpọ ikpowhu mkpọ g'ọo amị-ogvu. Oge ọbu, ndu nche unu shi kfuta okfu iya bẹ gbabeekwaru, mbụ nteke ọbu Chileke l'a-gwa unu ndọgolo. Ọ kwa ntaa bụ nteke ọbu, l'aa-tụ ẹyerebeke nụ unu.

⁵ Unu ba adakobekwa madzụ ibe unu! Unu ta azọru onye unu l'iya l'eshi ọnya ẹhu. Unu echekwa ọnu unu l'ẹka nwanyị ono, zẹ-koru unu l'eli ẹhu nọdu.

⁶ Nwa nwoke l'emechijekwa nna, nwụru iya nụ iwhu. Nwa nwanyị l'agbajẹ ne iya okfu. Nyee nwa l'agbajẹ nniko iya okfu. Ọgu, swiru madzụ bụ ndibe iya gẹdegede.

⁷ Ọle mbẹdua l'onwomu bẹ bụ Onye-Nwe-Ọha bẹ mu l'a-chịru ẹnya yeru. Mu l'a-nmẹe anmẹe ngabẹru Chileke ono, bụ Onye ndzọta mu; Chileke mu ono je l'a-nụ olu mu.

Ndu Ízurẹlu l'e-mege gbashi ọdo.

⁸ Unubẹ ndu ọhogu mu, unu be etekwa ẹswa kpua mu! A makwarụ-a lẹ mu darụ ada, ọle mu l'e-megekwa gbalihu ọdo. A makwarụ-a lẹ mu nọ l'ọochi, ọle Onye-Nwe-Ọha l'e-megekwaa bụru iwhoro dụru mu.

⁹ Eshi-ọwhu mu meru Onye-Nwe-Ọha iwhe-dụ-ẹji bẹ mu l'e-tsu ẹka l'obu nọ-kirishia l'ẹhu-eghughu ono ọ tukoshiru mu, jeye nteke l'oo-le ẹnya l'okfu ẹhu mu, meeru mu iwhe rwuberu mu nụ. Oo-kufuta mu bya edobe l'ẹka iwhoro dụ. Mu egude ẹnya mu whụa gẹ l'oo-shi dzọfuta mu.

¹⁰ Nteke ono bẹ ọhogu mu l'e-gude ẹnya iya whụ iya, iwhere eji iya iwhu. Onye ono, shi asụje mu: ?Ọo awe bẹ Onye-Nwe-Ọha ọbu, bụ Chileke ghu nọ? bẹ mu l'e-gude ẹnya mu whụ ẹka l'ọoda bẹbeji. Aa-dzọ iya tọlitoli nmatọo ya anmatọ gẹ l'aanmatọje ẹpoto, dụ l'ọma echi-ụzo.

¹¹ Unubẹ ndu mkpụkpu-a, nteke ọtukwa mgbodo unu l'abyakwa. Mbọku ono bẹ l'ee-me tẹ oge alị unu kpọlibebaaru.

¹² Nteke ono bẹ l'ee-shigeje Asiriya abya nkunu, ndu eshi lẹ mkpụkpu, dụ-gee l'alị Íjiputu abya, ndu eshi l'alị Íjiputu jeye l'ẹnyimu Yufurétisu, ndu eshi l'eze-ẹnyimu ọwa jeye l'eze-ẹnyimu ọwhu, ndu eshi l'ugvu ọwa jeye l'ugvu ọwhu.

¹³ Mgboko kpaa-whuu bẹ ẹgbara l'a-kfụ, ọ bụru iwhe ndu bu iya nụ kpatarụ; iwhe ono abụru iwhe, l'ọo-nwụtaru whẹ mbụ iwhe whẹ l'eme.

Okfu anụ Onye-Nwe-Ọha

¹⁴ Onye-Nwe-Ọha, gudenu mkpụru ghu chee ndibe ghu g'ọo onye l'eche atụru, mbụ ndọkobe atụru ono, bụ oke-iwhe ghu ono. Ndu ono, họfuru je eburu nwẹkinyi whẹ l'ọswa, mbụ l'alị, ẹwu zeru, bụ ẹka élwù l'akpa nri. Tẹ whẹ nọdunu l'alị Báshanu yẹle alị Giledu tajẹ nri gẹ whẹ shihawa ata iya nteke ndụ-ichee.

Onye-Nwe-Ọha l'awhụru ndu Ízurẹlu imiko

¹⁵ “Ọ kwa gẹ mu meru iwhe dụ biribiri nteke ono, unu shi lẹ Íjiputu fụta bụ gẹ mu l'e-me iya goshi whẹ ntaa.”

¹⁶ Mba gẹ mba ha l'e-gude ẹnya whẹ whụ, iwhere egude whẹ. Ọkpehu whẹ g'ọ ha bẹ l'a-nafụkota whẹ. Whẹ eworu ẹka dẹe l'agba. Nchị echihu whẹ echihu, whẹ adalaha nkụchi.

¹⁷ Whẹ egude ire mịchalahaa ẹja, dụ l'alị g'ọo agwọ, mbụ g'ọo iwhe l'awụ l'ẹwho. Whẹ egude ọnma kwekwekwe fụtakota l'ẹka whẹ tụru ọ bụru agbarara. Whẹ egude ọtsu-egvu dakọbe lwakfutashia Onye-Nwe-Ọha, bụ Chileke anyi.

¹⁸ ?Oo onye bẹ dụ g'ọo Chileke, onye l'agụje nvụ l'iwhe-dụ-ẹji, mbụ onye ono l'eleswetaje emeswe whẹ mesweru, mbụ ndu ono, whọduru nụ l'oke-iwhe iya? Ẹhu te eghujedu iya eghu jeyewaro. Iwhe l'adụje iya ree bụ ọwhu imiko.

¹⁹ Ọo-whụru anyi imiko ọdo. Ya egude ọkpa dzogbua iwhe-dụ-ẹji, anyi meru. Woru ejo-iwhe anyi meru nwuru ye lẹ nwẹbonyi foru ẹgu.

²⁰ Ẹpa Jékọpu bẹ gụbe Onye-Nwe-Ọha l'e-goshi l'ị bụ onye gbarụ t'e gude ire ghu ẹka. Mbụ l'ịi-whụru ẹpa Ébirihamu imiko ẹgube ono, i riburu iya nna anyi oche whẹ lẹ nte nteke ndụ-ichee.