Mayịka 6 - BAYỊBURU Ẹzaa

Chileke l'eku ndu Ízurẹlu ikpe

¹ Unu ngabẹkwa nchị l'iwhe Onye-Nwe-Ọha l'ekfu. Tẹ gụbe Onye-Nwe-Ọha gbashi kfụru l'iwhu eze ugvu doo iwhe ọbu, e meru ghu. T'ụnwu ugvu nshịi nụa iwhe l'iikfu.

² Unubẹ ugvu g'ugvu ha, unu nụkwa iwhe Onye-Nwe-Ọha l'abya edodo. Unubẹ itso, gude mgboko jeyewaro, unu ngabẹ nchị nụa iwhe ọbu, l'ada okfu. Nkele Onye-Nwe-Ọha bẹ whẹ lẹ ndibe iya nweru okfu. Yẹ lẹ ndu Ízurẹlu l'e-kfukahu iya l'ọwhu, l'ọo-la.

Ọnu, Onye-Nwe-Ọha yeru

³ “Oowaa; ndibe mu ?Mu meru unu gụnu? ?Ọo l'ụzo, dụ agha bẹ mu shi bụru unu ivu-ẹrwa? Unu yeedaru mu ọnu.

⁴ Mu dufutaru unu l'alị Íjiputu; bya agbafụta unu l'alị ono, unu shi bụru ohu; zhia Mósisu t'o dua unu; bya eyeru iya Érọnu yẹle Miriyamu.

⁵ Unubẹ ndibe mu, unu nyatakwa ikumu ono, ọ gbarụ, mbụ eze ndu Moabu, bụ Bélaku. Unu anyatakwawhọ ọnu ono, nwa Beyo, bụ Bélamu yeru iya. Unu nyatakwa gẹ ije unu gbarụ wata l'ọdu, nọ lẹ nsụda oshi Shitimu jeye lẹ mkpụkpu Gílugalu. Unu nyata iya gude iya marụ iwhe Onye-Nwe-Ọha meru gude dzọta unu.”

Iwhe Onye-Nwe-Ọha l'achọ

⁶ ?Ọo gụnu bẹ mu l'e-gude bya l'iwhu Onye-Nwe-Ọha bya ewhuzetaru iya l'alị, mbụ Chileke ono, ha shii? ?Ọo anụ ngwo-ẹja ọkpokota-iwhe-ọku bẹ mu l'e-gude byakfuta iya, mbụ nweswi mgbarawha?

⁷ ?Ọo-dụ Onye-Nwe-Ọha ree mẹ mu chịta ụnukurunu ebyila bya anụ iya; nụ iya mmanụ, dọru chịriri g'ọo ẹbonyi ụnukurunu ugbo iri? ?Ọo tẹ mu wota onye bụ ọkpara mu gude gwaa Chileke shi nno kfụa ụgwo emeswe, mu mesweru iya, mbụ mu l'e-wota nwa, shi mu l'ẹhu kfụa ụgwo iwhe-dụ-ẹji, mu meru?

⁸ Onye-Nwe-Ọha goshiakwaru gụbe madzụ iwhe dụ ree, l'ii-meje. ?Ndẹe iwhe ọdo, Onye-Nwe-Ọha chọru l'ẹka ghu l'abụa t'i meje iwhe kfụru nhamụnha, gụ akpọru obu ye l'ome obu-imiko yẹle t'i wozeta onwoghu alị etso Chileke.

Ikpe, nmarụ ndu Ízurẹlu yẹle iwhe l'ee-me whẹ

⁹ Unu ngabẹkwa nchị! Ọ kwa olu Onye-Nwe-Ọha l'ekushi ndu mkpụkpu-a ẹgube whọ. Ọ kwa ọtsu gụbe Onye-Nwe-Ọha egvu bụ ọkpobe mmamagụ. “Unubẹ ndu ono, dọru l'ime mkpụkpu ono, unu gebe nchị l'ụda ẹchachi ono, l'ada yẹle nke onye ono, l'echi ẹchachi ono l'onwiya!

¹⁰ Mu ta azọhakwa l'o nweru ẹku, a kparụ l'ụzo l'akfụaru nhamụnha, dụ l'ụlo ndu ejo-ememe. Mu ta azọha l'o nweru iwhe e bubotaru iwhe ebubota gude atụ iwhe bụ iwhe, Chileke tụru ọnu?

¹¹ ?Ndẹe gẹ mu l'e-shi kpefu onye gude iwhe ụgho dụ atụru madzụ iwhe, mbụ onye meru ẹregede l'iwhe dụ l'ẹkpa parụ nụ madzụ?

¹² Ndu nweru iwhe lẹ mkpụkpu unu bụlewho ọna ndu ụkpa iwhe whẹ bụ ẹhu whẹ. Ọ bụru ndu ntuwhu-ire bukota iya, tẹmenu whẹ l'egudeje ire eduwhu madzụ.

¹³ O noo g'o gude mu gudewa ẹhu-ba-dụ-mma egbushi unu, eme t'unu tọhu, o noo nkele unu l'eme iwhe-dụ-ẹji.

¹⁴ Unu l'e-ri nri, ọle ẹwho te ejidu unu eji. Unu -ria mẹ unu riru gụnu ye l'ẹwho, ẹgu arịle-ẹ unu ụri ẹnya. Unu l'a-bụ akpa aghaka, ọ tọ dụdu iwhe l'a-dụ unu l'ẹka. Ọwhu dụ unu adụ l'ẹka bẹ mu l'e-me t'ọgu ria.

¹⁵ Unu l'a-bụ ọ-kọru-akọ-akpage-akpa. Unu l'a-pyịtaje mmanụ l'akpụru ólivu, ọle ọ tọ gadụru unu mkpa ẹhu unu. Unu adzọshijee mmẹe l'akpụru vayịnu, ọle unu ta angụdu mmẹe ya.

¹⁶ Iwhe meru o je l'a-dụ nno bụ l'unu meru iwhe eze ono, bụ Omiri tọru ọkpa iya, unu yekota ẹka l'ome iwhe ono, ndibe Éhabu shi anọje eme. Unu wọtakotaru ẹka whẹ eme iwhe whẹ meru. Ọo ya meru mu je l'aha tẹ ẹgbara kfụa lẹ mkpụkpu unu, mu emee tẹ ndu bu lẹ mkpụkpu unu bụru ndu l'ee-gude eme iwhe-ọchi, ndiwhe ajalahaa unu ewenu.”