Mayịka 5 - BAYỊBURU Ẹzaa

Ụkwa onye l'e-shi Bẹ́tulehemu chịa

¹ Sụa, unu doo onwunu l'itsutsu l'itsutsu, gụbe mkpụkpu ono, ikpoto madzụ kụru, nkele ndu ọhogu anyi yebutawaru anyi ibẹka ibẹbo. Onye ishi ndu Ízurẹlu bẹ whẹ chị mgbọro-igwe echipyashi ishi-agbagba-nchị.

² “Ọle gụbedua, bụ Bẹ́tulehemu, dụ l'alị Ifurata. A makwarụ-a l'ị bụ nwa mkpụkpu nshịi, nọ l'echilabọ ikfu Juda. Ọle ọo l'ime ghu bẹ onye ishi Ízurẹlu l'e-shi lụfuta. Onye ono shiro eshi ndụ-ichee nọduta, mbụ l'o shi l'edenwede nọduta.”

³ Ọo ya bụ lẹ Onye-Nwe-Ọha l'a-parụ ndu Ízurẹlu haa jeye nteke nwanyị ono, ime l'eme l'e-zeda. Nteke ono, ụnwunna whẹ ọwhu alwakfuta ndu Ízurẹlu ono.

⁴ Onye ono byalẹwho bẹ l'ọo-kfụru l'ike ọwhu Onye-Nwe-Ọha l'a-nụ iya mẹe l'ọdu-biribiri nke Onye-Nwe-Ọha, bụ Chileke iya chee ndibe iya g'ọo onye l'eche atụru. Ndibe iya ono eburu guu nkele nteke ono bẹ ẹwha iya l'e-degbakota mgboko mgburumgburu.

⁵ Oo-mee tẹ nchị dụ whẹ doo. Nteke onye Asiriya ono l'a-byakfuta anyi ọgu l'alị anyi bya adzọo ẹka anyi tụshiru ike fụtu-fụtu, bẹ anyi l'e-yefu ndu ẹka shihuru ike, bụ ndu l'eche anyi g'ọo ndu l'eche atụru, mbụ ndu ishi anyi tẹ whẹ bya echia onye Asiriya ono ọnu l'alị.

Ndzọfuta yẹle ọla-l'iswi

⁶ Whẹ l'e-gude ogu-ịgba hụa alị Asiriya ọbu lẹ mkpaba-nkụ. Whẹ amịfuta nkogo l'atsụ nteku gude saa ndu alị Nimurọdu ọsa ẹkfu. Ọo-nafụta anyi l'ẹka onye Asiriya ono mẹ ọ byalẹwho alị anyi, bya adzọlahaa ije g'ọ dụ iya ree l'oge alị anyi.

⁷ Ndu whọduru nụ l'ẹpa Jékọpu l'e-me t'ẹhu jia ndiwhe l'owhu oyi g'ọo ndu iji, shi l'ẹka Onye-Nwe-Ọha dashịru l'ẹhu. Whẹ adụ g'ọo ẹgube-ẹ tẹshiteshi mini l'emeshi l'eli irwu ẹwu nkele ẹka ẹnya whẹ dụ ta abụdu l'ẹka madzụ nọ, tọ dụ iwhe whẹ l'ele ẹnya iya t'ụnwu-eliwhe meeru whẹ.

⁸ Ndu whọduru nụ l'ẹpa Jékọpu l'a-tụko mba ọdo dzuru. Whẹ l'a-kparwube l'echilabọ ndiwhe. Ọ bụru gẹ ọkpehu l'anya oduu-gburu-agụ kfụukfuu l'ẹka anụ-ẹgbudu ọdo nọ bụ g'ọkpehu l'a-nọ anya whẹ kfụukfuu, mbụ lẹ whẹ l'a-dụ g'ọo nwa oduu, nọ l'echilabọ atụru, bụ: ọo -ghata, ya adzọ-gbushi iwhe ọ whụru, alajashị iya nwịrinwiri, tọ dụ onye l'anafụje iya iwhe ọ kpachịru.

⁹ Ẹka nke unubẹ Ízurẹlu bẹ l'a-ka nke ndu ọhogu unu nke ọwhu bụ l'unu l'a-lwụ-gbu tụru okoo kpua whẹ, mbụ lẹ ndu ono whụru unu ẹhenu bẹ l'ee-me tẹ whẹ tọhu.

¹⁰ Onye-Nwe-Ọha l'ekfu sụ: “O -rwua mbọku ono bẹ mu l'e-gbushi ịnya-ọgu unu mebyishia ụgbo-ịnya unu.

¹¹ O nokwawho gẹ mu l'e-mebyishi mkpụkpu, dụkota l'alị unu nwutsushia ẹka lile, unu tụru ọ bụru agbarara unu.

¹² Mu l'e-me t'ẹnya-maa ono, unu l'eme l'alị unu rwụhu, unu ta abya l'enwebaa ndu jibya ọdo.

¹³ Mu l'e-mebyishi ntẹkpe ono, unu pyịshiru agwa agwagwa, mebyishikwawho ẹwhuru alobu ono, unu doberu onwunu agwa. Nke ọwhu bụ l'ọ tọ dụdu iwhe unu gude ẹka unu mee, dụ ọwhu unu bya l'ewhuzetaru baarụ ẹja ọdo.

¹⁴ Agwa Ashera ono, unu doberu agwa bẹ mu l'a-vụ l'ọgbaragbu mee tẹ mkpụkpu unu l'owhu bụru kpurupyata.

¹⁵ Mu l'e-gude iwe l'ọnuma melata mba ono, jịkaru ome iwhe mu sụru tẹ whẹ meje.”