Mayịka 4 - BAYỊBURU Ẹzaa

Ẹhu-guu ọwhu Onye-Nwe-Ọha l'e-megee wota l'eli ugvu Záyọnu

¹ Sụa, o -rwua l'oge ikpazụ bẹ l'ee-me t'ugvu ono, a tukoberu eze-ụlo Onye-Nwe-Ọha shihu ike, mee ya t'ọ bụru eze l'iwhe bụ ugvu ọdo, dụ nụ. Ee-me iya t'ọ kakọta ugvu ọdo l'eli. Ndiwhe awụlahaa gụrutuu gụrutuu eje iya.

² Mba ha l'igweligwe l'a-bya ekfulahaa sụ: “Unu bya t'anyi je l'eli ugvu Onye-Nwe-Ọha. Unu t'anyi je l'ụlo Chileke nke Jékọpu. Nke ọwhu l'oo-zhi anyi ụzo nkiya, nggẹ anyi awata otso ụzo ọwhu, ọ tọru.” O noo nkele ọo l'ugvu Záyọnu bẹ iwu Chileke l'e-shi abya, mbụ l'okfu Onye-Nwe-Ọha l'e-shi l'obodo Jerúsalẹmu bya.

³ Ọo ya l'e-kpeshi okfu, dụru ikpoto mba l'ibe iya. Ọ bụru iya l'e-doshiru mba, ọkpehu dụ-gee okfu, dụru whẹ l'ibe whẹ, mbụ ndu bu otẹnya mẹe ndu bu l'ụkfu ntse. Whẹ l'a-kpụkwa ogu-ịgba whẹ ya abụru ọgu, whẹ akpụkwaa arwa whẹ ya abụru nwa mma e gude akọcha iwhe. Mba ta apalihedu ogu-ịgba ejekfu mba ọdo ọgu, whẹ ta abya l'a-nwụbaa g'e shi alwụ ọgu ọdo.

⁴ Ẹhu l'a-bya adụ whẹ guu, onyenọnu erilahaa iwhe shi lẹ vayịnu iya mẹe iwhe shi lẹ figu iya. Ọ tọ dụdu onye l'e-me t'egvu tsụa whẹ. Nkele o noo iwhe Onye-Nwe-Ọha, bụ Onye-ishi-igwe-ọgu gude ọnu iya kfua.

⁵ Mba nọnu bụ agwa nkewhe bẹ whẹ l'abarụ ẹja. Ọle anyịbedua bụ Onye-Nwe-Ọha, bụ Chileke anyi bẹ anyi l'abarụ ẹja, anyi je l'a-baru iyẹ ya jeye lẹ tututu-mịmimi.

Iwhe Onye-Nwe-Ọha chịru nke ememe

⁶ Onye-Nwe-Ọha l'ekfu sụ: “O -rwua nteke ono bẹ mu l'a-chịkobe ndu darụ ngvụru, chịkobe ndu ono a chịfuru achịfu l'alị whẹ mẹe ndu ono, mu meru whẹ jee iwhe-ọtsulanu.

⁷ Ndu ono, bụ ngvụru bẹ mu l'e-me t'ọ bụru whẹ l'e-bekochaa whọdu. Mu emee tẹ ndu ono a chịfuru l'alị whẹ bụru mba, l'a-kpọ adịdaa. Wata nteke ono bẹ Onye-Nwe-Ọha l'a-bụru eze l'achị whẹ nụ l'eli ugvu Záyọnu, o je l'a-bụru iya jeye lẹ gbururu.

⁸ “A bya lẹ gụbe nwada Záyọnu, bụ ụlo-nche nke ndọkobe atụru ono bụ Ízurẹlu, mbụ gụbe agbarara nke ndu Ízurẹlu; ii-bekochaa bụru ishi ẹgube ono i shi bụru iya lẹ mbụ. Gụbe nwada Jerúsalẹmu l'e-megee buwhu eze azụ ọdo.”

⁹ ?Ọo gụnu bẹ l'ịiryaru ntaye ntaye ono? ?Ọ fụtaru l'i tii nwedu onye eze, l'achị ghu nụ tọo? ?Ọ nwụhuwaru mbụ onye mgbazhi-ego ghu meru g'o gude iwhe-ọtsulanu zụ ghu kfụu g'ọo nwanyị ime l'eme nno?

¹⁰ Gụbe nwada Záyọnu, nọdu ghaa gbụrugburu tsụa pụu g'ọo nwanyị ime l'eme, o noo nkele ntaa b'ị bya l'aha mkpụkpu-a je akwaburu l'echi-ẹgu. Ị bya l'a-la alị ndu Bábyilọnu. Ọo l'ẹka ono bẹ l'aa-nọdu nafụta ghu. Mbụ lẹ Onye-Nwe-Ọha l'a-nọdu l'ẹka ono gbafụta ghu l'ẹka ndu ọhogu ghu.

¹¹ Ntaa bẹ ikpoto mba wulihuwaru ripyabe ghu asụje: “T'e merwua Záyọnu! T'anyi chịru ẹnya yeru iya l'ẹka l'eemebyi iya!”

¹² Ọle whẹ ta amadụ iwhe Onye-Nwe-Ọha rịru nke ememe. Iwhe ọ tụberu nke ememe te edodu whẹ ẹnya. Nkele whẹ ta amadụ lẹ Onye-Nwe-Ọha chịkobewaru whẹ g'ọo onye chịkoberu ereshi eje echichi.

¹³ “Gụbe nwada Záyọnu, gbalihu chia ọhogu ghu whukuwhuku g'ọo onye l'echi ereshi, nkele mu l'e-me t'i fua mpu-igwe l'ishi, mee t'akọkpa ghu bụru ope. Gụ egude iya gwee igweligwe mba ryaaryaa. Gụ egwota urwu, whẹ ritaru l'ụzo ẹregede doberu Onye-Nwe-Ọha nsọ; gwota ẹku whẹ nụ Onye-nwe-ọha, nwe mgboko l'owhu.”