Mayịka 3 - BAYỊBURU Ẹzaa

Aabarụ ndu ishi whẹ lẹ ndu nkfuchiru mba

¹ O noo ya, mu bya asụ: “Unubẹ ndu ishi, l'achị ẹpa Jékọpu, unu ngabẹ nchị, mbụ unubẹ ndu l'achị ndu ọzo-ụlo Ízurẹlu. ?Tọ bụdu iwhe gbarụ unu t'unu marụ oome iwhe kfụru nhamụnha tọo?

² Unu bụ ndu kpọru iwhe dụ ree ashị, yee ejo-iwhe obu. Unu l'agbajẹ ndibe mu akpọ l'ọno ndzụ, aswa whẹ anụ l'ọkpu.

³ Unu l'eri anụ ndibe mu, aswa whẹ akpọ l'ẹhu, etsu ọkpu whẹ yọgiri yọgiri. Unu l'ebushije anụ whẹ g'ọo onye bushiru anụ chịru ye l'ite.”

⁴ Whẹ l'e-megee ryaku Onye-Nwe-Ọha, ọle ọ tọo zadụ whẹ oku. Nteke ono bẹ l'oo-woha iwhu ewoha l'ẹka whẹ nọ nkele whẹ l'eme ejo-iwhe.

⁵ Ọ waa iwhe Onye-Nwe-Ọha l'ekfu ndọwa: “A bya l'ishi ndu nkfuchiru ono, l'anọje edusweshi ndibe mu ono, whẹ asụ lẹ whẹ l'ekfuchiru Chileke, mbụ ndu ono l'abụje onye -vuta nri vee whẹ, whẹ akaa l'ẹhu l'a-dụ onye ọbu guu; onye l'adụhee iwhe ọ tsụberu whẹ l'ọnu, whẹ akaa l'ọo ejo ọgu l'a-byakfuta onye ọbu.

⁶ Unubẹ ndu ono bẹ chi l'e-jikfukwa l'ụzo, unu awhụ-buhu ọwhulenya. Ẹkpuroochi l'a-byakfutakwa unu, unu agbabuhu ẹja t'unu marụ iwhe l'a-bya ememe. Ẹnyanwu l'a-nyịhuru ẹgube ndu nkfuchiru ono. Chi ejikfu whẹ l'eswe.

⁷ Ndu l'awhụ ọwhulenya bẹ iwhere l'e-megee gudeshia. Ndu l'agba ẹja abụru ndu e kpuru iwhu l'oguri. Gẹ whẹ ha l'e-kfuchi ẹka l'iwhu nkele Chileke te eyedu ọnu eyeru whẹ.”

⁸ Ọle mbẹdua b'a tsụru ike atsụtsu l'ẹhu. Ume nke Onye-Nwe-Ọha b'e yeru o ji mu ẹhu kpimu, tẹmenu mu nweru uche, mu gude ekpe ikpe kfụru nhamụnha yẹle ọkpehu, mu gude akarụ ẹpa Jékọpu emeswe, whẹ mesweru, akarụ Ízurẹlu iwhe-dụ-ẹji whẹ meru.

⁹ Unubẹ ndu bụ ishi l'achị ọzo-ụlo Jékọpu, mbụ unubẹ ndu l'achị ọzo-ụlo Ízurẹlu, unu ngabẹru mu nchị, unubẹ ndu ono kpọru ikpe-nkfụmoto ashị agwasweshi iwhe kfụru akfụru agwasweshi.

¹⁰ Ndu gude ogbu ọchi atụ obodo Záyọnu, gude ome ẹji atụ Jerúsalẹmu.

¹¹ Ndu ishi l'achị whẹ bụ mẹ a -nụadaru whẹ nnuchi-ọnu tẹmenu whẹ ekpee ikpe. Ndu l'agba ẹja anụ Chileke whẹ bụru mẹ a kfụadaru whẹ ụgwo tẹmenu whẹ ezhia iwhe. Ndu nkfuchiru Chileke whẹ bụru mẹ a naụdaru whẹ okpoga tẹmenu whẹ akarụ whẹ iwhe whẹ whụru. Ọle whẹ tụkokwaru-a dawhube Onye-Nwe-Ọha asụje: “Onye-Nwe-Ọha nọkwa l'echilabọ anyi. Ọ tọ dụdu ejo-iwhe, bya l'a-byakfuta anyi.”

¹² Ọo ya bụ l'ee-gude iswi unu tụpyaa ugvu Záyọnu atụpya g'ọo ogvẹja. Jerúsalẹmu abụru mkpọkoro ọzo-ụlo. Eli ugvu ono, bụ ẹka eze-ụlo Chileke dụ abụru ẹka ẹgbudu zechiru ezechi.