Mayịka 2 - BAYỊBURU Ẹzaa

Iwhe l'e-me ndu l'ana alị madzụ l'ọkpehu

¹ Áwhụ l'a-tsọkwaru ndu l'agba ejo-ikumu, mbụ ndu ono, l'azẹje azẹe nwụa ẹnya abalị l'ẹka whẹ l'achị idzu ejo-iwhe, whẹ l'e-me. Chi sahụlewho, whẹ emee iwhe ono, whẹ gbarụ ikumu iya ono nkele whẹ kpatarụ ụzo ememe iya.

² Whẹ l'egudeje oke-ẹnya naa alị madzụ mẹe ụlo madzụ. Nwoke bu l'uwhu bẹ whẹ l'anatajẹ ndibe iya nata oke-alị iya.

³ Ọo ya bụ l'ọ waa iwhe Onye-Nwe-Ọha l'ekfu ndọwa: “Mu l'achị idzu tẹ mu wokfuta unubẹ ndu ono ejo-iwhe, mbụ ejo-iwhe, unu l'ẹte abyaa l'adụ ike whafụta ishi unu. Etsetse l'a-rụhu unu l'ẹhu, o noo nkele nteke ono l'a-dụru unu ejo ẹji.

⁴ Nteke ono bẹ eliwhe l'e-kfurwushi unu ẹhu ekfurwushi, kpọru unu ye l'egvu nggụmawhu sụ: “ ‘E meekwaru anyi ọzara-l'ukpo. Alị ndibe anyi b'a natawaru kekashia. Onye-Nwe-Ọha natawaru iya anyi woru keshiaru ndu ono, lwụtaru anyi l'ọgu.’ ”

⁵ Ọ tọ dụdu onye l'aa-whụ lẹ ndibe Onye-Nwe-Ọha, bụ onye l'a-nọ-chi ẹnya unu, mbụ onye l'a-tụ ido gude waaru unu alị.

Ndu l'abụa ọkpobe ndu nkfuchiru Chileke

⁶ Iwhe whẹ l'ekfuje bụ: “Be edoshiru anyi nwogodorigodo ono. Be ekfushiru anyi ụdu iwhe ono; a ta abyakwa l'e-me anyi ẹgube iwhe-iwhere ono.

⁷ Unubẹ ọzo-ụlo Jékọpu ?ọo dụ ree t'a sụ lẹ Ume Onye-Nwe-Ọha bẹ ẹhu l'eghu eghu ?Oomeje ẹgube iwhe ono ?Ọo l'okfu mu te emejedu iwhe dụ ree tọo?

⁸ “Ụboku gbee agvụada agvụ tẹmenu ndibe mu bya aghọo ndu ọhogu. Ndu zọru ẹhu aghata ejeru onwowhẹ bẹ unu kwachiru ụzo yeshia whẹ uwe-mkpẹelanu, whẹ yeru, mbụ ndu l'abụa lẹ whẹ gbarụ ẹnya ọgu.

⁹ Unyomu ndu nkemu bẹ unu l'anọje achịfu achịfu l'ụlo, whẹ bu ọ dụ whẹ ree. Unu nafụwaa ụnwegirima whẹ ugvu ono, mu kwabẹru whẹ jeye lẹ gbururu.

¹⁰ Unu gbalihu lụfu, ẹka-a ta abụdu ẹka unu l'a-tụta ume nkele mmerwu, dụ iya nụ mebyishiwaru iya, to nwehe emekota ọdo.

¹¹ “Nggẹ l'ọo iwhe t'onye ejire mẹe onye nduswe -fụta bya asụ: ‘Iwhe mu l'ekfu bụkwa t'a ngụje mmẹe yẹle iwhe-angụngu ọdo l'atsụ atsụtsu.’ O noo ẹgube onye nkfuchiru ndu ono gege egbobe ẹka labọ nata.

E kweru ụkwa ndzọta

¹² “Unubẹ ẹpa Jékọpu, ọwhu bụ ezhi-okfu bụ lẹ mu l'a-tụko g'unu ha chịkobe l'ẹka lanụ. Ọwhu bụ ezhi-okfu bụ lẹ mu l'a-chịkobe unubẹ ndu ono, whọduru l'ọzo-ụlo Ízurẹlu l'ẹka lanụ. Mu l'e-rwukobe unu ọnu g'ọo atụru e rwukoberu ọnu l'ọdu, mbụ g'ọo élwù e rwukoberu ọnu whẹ l'ata nri. Unu abya eji alị unu pyịtikomu atụ wọwowo nkele unu l'apa l'igwe.

¹³ Onye l'e-gbusaru whẹ ụzo ọsa l'e-vutaru whẹ ụzo. Whẹ l'a-zụkafu ọnu ẹka l'eeshije abahụ lẹ mkpụkpu fụshia. Onye l'e-vutaru whẹ ụzo bụ onye eze whẹ, mbụ l'ọo Onye-Nwe-Ọha l'a-nọru whẹ l'ishi ije ono.”