Makụ 5 - BAYỊBURU Ẹzaa

Jisọsu l'eme tẹ nwoke ọgvu jiru ẹhu mehu

¹ Tọ dụ iya bụ lẹ Jisọsu mẹe ndu l'etso ụzo iya adafụlewho azụ eze-ẹnyimu azụ iya nke ndu Gérasa.

² Alụfuta Jisọsu l'alụfuta l'ụgbo ono yẹle nwoke ọgvu bu l'ẹhu dzuda. Nwoke ono bụ l'ẹka l'eelije madzụ b'o shi fụta.

³ Nwoke ono bu ebu l'ẹka ono, l'eelije madzụ; ẹngiringaa nwoke ono l'anọje eme ha shii nke bụ l'ọ tọ dụhedu onye l'adụje ike ketsua ya l'ẹgbu, mbụkwa e behuduru ọ bụru m'ọo mkpọro b'a tụru iya.

⁴ Nteke nteke bẹ l'aatụjehawa iya mkpọro l'ọkpa tụa ya l'ẹka, ya azubushilee mkpọro nke ẹka ono chikashia nke ọkpa nwịrinwiri. Tọ dụhe onye ike agọta iya dụkwadu.

⁵ Nteke nteke! Mbụ eswe mẹe ẹnyashi bẹ l'ọonoje aghawhe l'echilabọ ẹka ono l'eelije madzụ mẹe l'echi ẹka ugvu dụ-gee abọ erwumu. Ya egude ẹwhuru eyijashi onwiya.

⁶ Ọ whụlewho Jisọsu l'ẹka tekwadururoo ẹnya, o gude ọso gbakfu iya je ada l'alị l'iwhu iya,

⁷ chia mkpu sụ: “Jisọsu Nwa Chileke, mbụ Chileke ono, bụ Ọkalibe-Kangokotaru-Nu! ?Ọo gụnu bẹ mu lẹ ghu jigba? Mu l'aryọkwa ghu whọ, Chileke l'anụkwa iya whọ, ba abyakwa mu whọ ọnu áwhụ.”

⁸ Iwhe meru iya nụ bụkwanuru lẹ Jisọsu dụhawaa mbụ sụ ọgvu ono t'ọ fụta nwoke ono l'ẹhu.

⁹ Jisọsu bya ajị iya: “?Ẹwha ghu bụ gụnu?” Ọ sụ iya: “Ẹwha mu bụ Ụnu-kpụku nkele anyi ha l'igweligwe.”

¹⁰ Ọ ryọo Jisọsu sụ: “Byiko ẹkalali ọwaa ikpere, ba achịfushi nụ anyi l'alị-a.”

¹¹ O nweruwho ikpoto ezhi dọru l'agụga ugvu ono l'ẹka ono akpa nri.

¹² Ọgvu ono gẹ whẹ ha ryọlahaa Jisọsu sụ byiko t'ọ hanụa whẹ tẹ whẹ wụba l'ikpoto ezhi ono.

¹³ Jisọsu kweta. Ọgvu ono zefuta l'ẹhu nwoke ono, wụba ikpoto ezhi ono l'ẹhu. Tọ dụ iya bụ l'ikpoto ezhi ono g'ọ ha, rwukwaru l'iwhe beru l'ụnu ise, tụkolewho chapuhaa ọso gburugburugburu, gbazeta lẹ kperekpere ẹka ono je awụba l'eze-ẹnyimu. Mini rigbushikota iya g'ọ ha.

¹⁴ Ndu l'eche ezhi ono gbakashịhu je edokoshia iwhe lile ono, meru nụ l'ime mkpụkpu ono, dooru iya ndu ọwhu bu l'ẹgu. Ọo ya bụ, whẹ gbashịa jeshia tẹ whẹ je awhụada iwhe ọbu meru nụ.

¹⁵ Whẹ byakfuta Jisọsu. Whẹ whụa nwoke ono ọgvu shi buru l'ẹhu g'o yewaru nụ uwe nọdu anọdu, ẹnya dowa iya edo. Whẹ tsụlahaa egvu.

¹⁶ Ndu ono, nọ l'ẹka ono whụkwanua iwhe nwụru nụ, bya ewota iwhe meru nwoke ono ọgvu shi buru l'ẹhu yẹle ezhi who kọoru ndu ono, byarụ nụ.

¹⁷ Whẹ ryọlahaa Jisọsu t'ọ gbashi lụfuru whẹ l'alị whẹ.

¹⁸ Jisọsu bahụdelewho l'ụgbo, nwoke ono ọgvu shi buru l'ẹhu ryọlahaa ya tẹ yẹ l'iya lịru.

¹⁹ Jisọsu jịka sụ iya: “Lashia ibe ghu, je ekfukashiaru ndu nke ghu eze iwhe Onye-Nwe-Ọha meru ghu mẹe lẹ g'o whụta-beru ghu imiko.”

²⁰ Ọ tụgburu lashia, je aryakashịa eze iwhe Jisọsu meru iya aryakashị lẹ Obodo-iri. Iwhe ono Jisọsu meru dụkota madzụ lile biribiri.

Nwa Jáyirọsu mẹe nwanyị nsọ l'eme

²¹ Jisọsu whẹ gude ụgbo ono daghalẹkwawho mini ono, jeshia azụ mini azụ iya ọwhu. Igweligwe madzụ zakọo bya anọ-whe iya mgburumgburu. Yẹbedua nọdu l'agụga mini.

²² Onye lanụ l'ime ndu ishi ụlo-ndzuko ndu Ju byakfuta iya, ẹwha onye ono bụ Jáyirọsu. Jáyirọsu whụlewho Jisọsu, ọ daa l'alị lẹ mgboro ọkpa iya,

²³ ryọlahaa ya, eyeru iya ẹkalali sụ: “Nwatibe mu nke nwanyị l'anwụ-nyihuakwa ẹnya, byiko byanụ bya ebyia ya ẹka ghu whẹ ẹbo, dzọo ya t'ọ nọduru mu ndzụ.”

²⁴ Jisọsu tsoru iya jeshia. A ha l'igweligwe awụ etso Jisọsu nke ọwhu whẹ gbee akpa iya nụ mkpa.

²⁵ O nweruwho nwanyị, nọ l'ẹka ono, nsọ ụnwanyi mewaru awha iri l'ẹbo t'o buhuje iya ebuhu.

²⁶ O jetashiwaru iwhe-ọtsulanu l'ẹka igweligwe ndu l'eme ọgvu. Ọ tụkowaa iwhe bụ iwhe o nwe enwe mewhushikotaru whẹ tọ dụroo ọwhu l'eme nụ, ọ gbee akanụ njọ aka eje.

²⁷ Nwanyị ono nụkotawaa iwhe Jisọsu l'emeje, o pyobata l'ime igweligwe ọha ono shia Jisọsu ụzo azụ bya emee ẹka l'ogboromọnu uwe Jisọsu.

²⁸ O noo lẹ gụbe nwanyị sụkwanuru: “Ẹka mu rwuzhiwaa mbụkwa m'ọo l'uwe Jisọsu bẹ mu l'e-mehulekwawho.”

²⁹ Ẹka iya bebelewho erwu l'uwe Jisọsu, nsọ nwanyị ono mebuhu iya. O rwua ya l'ẹhu lẹ Jisọsu mewaru tẹ ya mehu l'iwhe l'eme iya nụ.

³⁰ Jisọsu marụ l'ime onwiya l'o nweru ike shi iya l'ẹhu lụfu. Ọ bya aghachi l'echi igweligwe ọha ono sụ: “?Ọo onye meru ẹka l'uwe mu?”

³¹ Ndu l'etso ụzo iya sụ iya: “?Ị whụ-geeru g'igwe ọha-a l'akpagbu ghu lẹ mkpa, l'ịijikwawho ?onye meru uwe ghu ẹka?”

³² Jisọsu bya achịkaa ẹnya tẹ ya marụ, ya l'a-whụ onye meru iwhe ono.

³³ Nwanyị tsụlahaa egvu nkele ọ mawarụ iwhe o meru iya. O gude ẹhu-anmanma bya adaa l'alị l'iwhu iya kfukotaru iya iwhe lile bụ ọkpobe-okfu.

³⁴ Jisọsu sụ iya: “Nwada mu, ekwekwe, i kweru bẹ mewaru ghu i mehu ọbu. Lashia je eburu guu, l'iwhe l'eme ghu nụ b'e mewaru o mehu.”

³⁵ Jisọsu kpụkwaduru-a okfu ono l'ọnu ekfu, ndu shi l'ụlo onye ishi ụlo-ndzuko who bya bya asụ Jáyirọsu: “Nwa ghu nwanyị nwụhuakwaru. ?Ọo gụnu meru l'iikfuchikwadua Onye-Nwe-Ọha nchị?”

³⁶ Jisọsu te eyeroo ọnu l'okfu ono, ndu ono l'ekfu. Ọ sụ onye ishi ụlo-ndzuko ono: “Ba atsụkwa egvu, ọlewho t'obu shihu ghu ike.”

³⁷ Tọ dụhe onye Jisọsu kwekwaduru t'o tsoru iya gẹ l'oje ibe onye ishi ụlo-ndzuko ono gbaha Pyita mẹe Jémusu mẹe Jọnu nwune Jémusu.

³⁸ Whẹ rwua ibe onye ishi ụlo-ndzuko ono, ọ bya akpolwu igwe-ọha, nọ l'ẹka ono atụ ụzu. Ọ whụa gẹ whẹ l'atsọ áwhụ akwagbushi onwowhe l'ẹkwa.

³⁹ Jisọsu bya abahụ sụ whẹ: “?Ọo gụnu kpatarụ unu l'atụ ụzu, arya ẹkwa. Nwata ono ta anwụhukwa anwụhu, m'ọ kwa mgbẹnya bẹ l'ooku.”

⁴⁰ Whẹ nma iya ụzu nchịchochi. Ọ chịshi-gelewho ndu ono gẹ whẹ ha etezhi. Ọ bya eduta nna nwata ono mẹe ne iya mẹfua ndu yẹle iya lị bya abahụ l'ẹka nwata nwamgbọko ono daburu.

⁴¹ Ọ bya alọta nwata ono l'ẹka sụ iya: “Talita kumi,” bụ iya bụ: “Nwata nwamgbọko nshịi, mu sụru t'i teta.”

⁴² Nteke onowho nwamgbọko ono teta gbalihu jewhelahaa. Nwamgbọko ono nọwaru awha iri l'ẹbo eshi a nwụru iya. Iwhe ono kpụbe ndu ono ọnu okfu nke ba ama gẹ l'e-me iya.

⁴³ Jisọsu sụ whẹ t'ọ bọ dụkwa onye whẹ l'e-me t'ọ marụ. Ọ sụ whẹ tẹ whẹ nụ nwata ono nri t'o ria.