Makụ 3 - BAYỊBURU Ẹzaa

Jisọsu l'eme t'onye iwhe lọnwuru ẹka lanụ mehu

¹ Tọ dụ iya bụ, Jisọsu bya atụgbua bahụ ọdo l'ụlo-ndzuko ndu Ju. O nweruwho nwoke lanụ ọbu iwhe lọnwuru ẹka lanụ, nọ l'ẹka ono.

² Ndu nọ l'ẹka ono gelahaa Jisọsu ngge tẹ whẹ maadarụ, l'oo-me t'ẹka nwoke ono teta gẹ mbọku ono je agba lẹ mbọku ọtuta-ume ndu Ju, nke ọwhu whẹ l'a-sụ l'o noo ọwhu o meru.

³ Ọ sụ nwoke ono iwhe lọnwuru ẹka lanụ ono: “Gbeshi bya akfụru l'ẹka-a?”

⁴ Jisọsu bya ajị whẹ sụ: “Iwu mbọku ọtuta-ume, ?ọ sụru t'e mejee iwhe-ọma, tọo t'e mejee ejo iwhe? Ọ sụru ?t'a dzọjee ndzụ, tọo t'e gbujee madzụ lẹ mbọku ọtuta-ume?” Whẹ dagelewho shịikfuu.

⁵ O gude ẹhu-eghughu lewhee whẹ ẹnya mgburumgburu, áwhụ jikwa iya who obu lẹ whẹ bụ ndu obu nmarụ mkpigbi. Ọ sụ nwoke ono: “Machịa ẹka ghu amachị.” Ọ machịa ẹka. Ẹka ono bya eteta iya.

⁶ Ndu Fárisii ono wụfuta, tụgbulekwaruwho nteke ono jekfushia ndu nke onye eze, bụ Heródu tẹ whẹ lẹ whẹ chịa idzu gẹ whẹ l'e-shi gbua Jisọsu.

Igweligwe, madzụ nọ l'agụga mini

⁷ Jisọsu yẹle ndu l'etso ụzo iya tụgburu jeshia l'eze-ẹnyimu Gálili. Igwe madzụ shi lẹ Gálili wụru tsoru whẹ, mẹ-gewaro ndu ọwhu shi lẹ Judíya,

⁸ mẹe Jerúsalẹmu, mẹe Idumiya, mẹe ndu shi l'azụ ẹnyimu Jọ́danu azụ iya ọwhu, mẹe ndu shi l'obutobu Taya yẹle Sáyịdonu byakfutageeru iya nteke whẹ nụkota-geeru ẹgube iwhe l'oomekaa.

⁹ Ọ sụ ndu l'etso ụzo iya tẹ whẹ kpụtaru iya nwụgbo tẹ ya bahụ nọdu, t'igweligwe ndu ono ba azugbu iya.

¹⁰ Iwhe meru whẹ l'awụ abyakfuta iya bụkwanuru l'o mewaru igweligwe madzụ ndu ẹhu l'eme, whẹ mehukota, ọ bụru iya meru ndu iwhe l'emekaa l'akpa hụbahuba tẹ whẹ me iya ẹka.

¹¹ L'ọobujelewho nteke ndu ọgvu bu l'ẹhu whụru iya, whẹ ada gbii l'iwhu iya ryangịrihu sụ: “Ọo ghu bụ Nwa Chileke.”

¹² L'ookfujeru whẹ iya kfushiaru whẹ iya ike sụ whẹ: tẹ whẹ ba akọjeshi onye ya bụ l'edzudzu-ọha.

Jisọsu l'ahọta ndụ-ishi-ozhi iri l'ẹbo

¹³ E megee Jisọsu tụgbua je enyikota ugvu, je ekua ndu dụ iya ree whẹ byakfuta iya.

¹⁴ Ọ bya ahọta whẹ ụmadzu iri l'ẹbo mee whẹ tẹ whẹ bụru ndụ-ishi-ozhi iya. Ọ họtaru whẹ tẹ whẹ l'iya nọduje, nke ọwhu l'oozhije whẹ tẹ whẹ je ezhia ozhi-ọma Chileke.

¹⁵ Ya emekwaawho tẹ whẹ dụje ike chịfu ọgvu, bu madzụ l'ẹhu.

¹⁶ Ẹwha ndu ono bụ: Sáyịmonu, onye ọ gụberu Pyita,

¹⁷ Jémusu nwa Zébedi mẹe nwune iya Jọnu nwa Zébedi. Whẹbedua b'ọ gụberu Ụnwu-Ebemu-Igwe.

¹⁸ Ndu ọdo bụ Ánduru, Fílipu, Batólomiyu, Mátiyu, Tọ́mosu, Jémusu nwa Álufiyọsu, Tádiyọsu mẹfua Sáyịmonu onye tso l'ọgbo l'adzọ t'alị ndu Ju dụru ndu Ju,

¹⁹ mẹe Júdasu Isukáriyọtu, bụ iya megeeru nọdu lẹ mgbazhi t'e gude Jisọsu.

Ẹka ike Jisọsu shi

²⁰ E megee Jisọsu yẹle ndu ono lịru bahụ l'uwhu. Igweligwe madzụ wụru wukfuta iya ọdo, nke ọwhu ọ kpọshi-geeru kpọshia whẹ oori nri.

²¹ Ndibe Jisọsu whẹ nụa ya, whẹ tụgbua jeshia tẹ whẹ kpụta iya nkele ndu ono l'ekfu sụ l'iwhu swehuakwaru iya.

²² Ndu o-zhi-iwu, shi Jerúsalẹmu bya bẹ sụru: “Ọ kwa ishi ọgvu Biyélezebọbu bu iya l'ẹhu.” Whẹ sụkwawho: “Iwhe o gude achị ọgvu bụ ike Biyélezebọbu ono, bụ onye ishi l'iwhe bụkota ọgvu swịikpamu.”

²³ Ọ bya ekua whẹ, whẹ byakfuta iya. Ọ bya anmashịaru whẹ ẹtu dụ l'iche l'iche sụ whẹ: “?Ndẹe gẹ unu rịru lẹ Sétanu l'e-me achịfu Sétanu?

²⁴ Iwhe ọdo bụru l'alị-eze kewaa onwiya ẹbo selahaa okfu, alị-eze ọbu l'a-dakpọhukwa.

²⁵ Nteke bụ l'ọo ndu uwhu lanụ bẹ keru onwowhe ẹbo selahaa okfu, uwhu ọbu echihu.

²⁶ Ọo ya bụ, ọ bụru lẹ Sétanu gude ose okfu kee onwiya ẹbo, ọ tọ dụdu gẹ l'ọono-be, ike agvụ iya.

²⁷ Ọ tọ dụdu onye fụru bahụ l'ụlo mkparawa, akwara dụ l'ẹhu, je egwoo iwhe iya nke ọkpu-ẹhu m'ọ bụa l'onye ọbu vuada ụzo kee ya ẹgbu tọgbo, tẹhenu ya egwowaro iwhe l'ụlo onye ono.

²⁸ Sụa, iwhe mu l'emelewho tẹ mu kfuru unu bụ l'iwhe lile bụ iwhe-dụ-ẹji ụnwu-eliwhe l'emegbabe bẹ Chileke l'a-gụkotaru whẹ iya nvụ, ya agụkwaru whẹ whọ nvụ l'ekfubyishi whẹ l'ekfubyishi Chileke.

²⁹ Ọle ọbu, onye kfubyishiru Ume-Dụ-Nsọ bẹ Chileke l'ẹte agụkwaru nvụ iya. Iwhe-dụ-ẹji onye ono meru bẹ l'e-swizhiaru iya who jeyewaro lẹ tututu-mịmimi.”

³⁰ O noo nkele whẹ sụru l'ọo ọgvu bu iya l'ẹhu.

Ne Jisọsu mẹe unwune iya

³¹ Ọo ya bu lẹ ne Jisọsu mẹe unwune iya eshi rwua, whẹ bya akfụru l'etezhi zhia ozhi t'e kuaru whẹ iya tẹ whẹ l'iya whụ.

³² Nteke ono bẹ igwe madzụ dọ-wheru iya mgburumgburu. Whẹ sụ iya: “Gebekwawho, lẹ ne ghu mẹe unwune ghu bẹ kfụkwaru l'etezhi eme tẹ gụ lẹ whẹ whụ.”

³³ Ọ sụ whẹ: “?Ọo ndu ole bụ ne mu yẹle unwune mu ọbu?”

³⁴ Ọ ghaa ẹnya lee ndu ono dọ-wheru iya mgburumgburu ono sụ whẹ: “Lee ndu bụ whẹ bụ ne mu bụru unwune mu.

³⁵ Ọo onye ono l'eme iwhe dụ Chileke ree bẹ bụ nwune mu nwoke bụru nwune mu nwanyị; bụkwaruwho ne mu.”