Luku 7 - BAYỊBURU Ẹzaa

Jisọsu l'eme tẹ ẹhu dụ nwozhi onye ishi ojọgu mma

¹ Jisọsu kfushigelewho iwhe ono, l'ookfu, ndu ono kụru l'ẹka ono nụkota, ọ bahụ-shia Kapániyọmu.

² O nweru onye ishi ojọgu ndu Romu iwhe l'eme nwozhi iya nke ọwhu l'ọobya anwụhu. Nwozhi ono b'o yeru obu shii.

³ Onye ishi ojọgu ono nụlewho nke Jisọsu, ọ bya ezhia ndu bụ ọgurenya ndu Ju tẹ whẹ je aryọo Jisọsu t'ọ bya bya adzọo nwozhi iya ono ndzụ.

⁴ Whẹ byakfuta Jisọsu bya akwatazhia ryọshia ya ike sụ iya: “Byiko jero je eme t'o mehu, l'ọ kwa onye gbarụ nke t'i meeru iya iwhe ono,

⁵ o noo l'o yeru ndu alị anyi obu, tẹmenu ọ bụru iya tụru anyi ụlo-ndzuko anyi-a.”

⁶ Jisọsu tsoru whẹ jeshia. Ibe nwoke ono dụkubele iya whọ ntse, onye ishi ojọgu ono zhi ndu ọnya iya tẹ whẹ byakfuta Jisọsu bya asụ iya: “Onye-Nwe-Ọha, be erihewaro awhụ je abyabya, o noo lẹ mu ta adụkwa nke l'ịi-bata ibe mu.

⁷ O nokwawho gẹ mu l'adụa nke tẹ mu byakfuta ghu l'onwomu. Iwhe mu l'ekfu kwaa t'i kfua okfu-ọnu mmaanụ, i kfuwa iya bẹ nwozhi mu ono l'e-mehulekwawho.

⁸ Lẹ mbẹdua bụkwa onye nọ madzụ l'ẹka, o nwekwaruwho ndu ojọgu, nọ mbẹdua l'ẹka. L'ọobuje, mu -sụ onye ọwa: ‘Jee ọwa’ onye ọbu ejee ya. Mu -sụ onye ọdo: ‘Bya’ ya abya. Mu abya asụ nwozhi mu ọwa: ‘Mee ọwa’ ya eme ya.”

⁹ Jisọsu nụlewho iwhe ono, ọ tụfu iya ẹhu; ọ bya aghachi sụ igwe ndu ono l'awụ etso iya: “Mu sụru agha, ọ tọ dụkwanu m'ọo l'alị Ízurẹlu bẹ mu l'ẹte awhụjekwaa onye kwetaberu g'ọo nwoke-e ya.”

¹⁰ Ndu ono, e zhiru bya alwawhushia azụ l'uwhu, nwozhi ono mehugewaa ree-ree-ree.

Jisọsu l'eme tẹ nwa nwa-mbunu teta

¹¹ Lẹ ntsulọhu nteke ono, b'e megeeru Jisọsu tụgbua jeshia obodo ọbu l'eekuje Nenu. Ndu l'etso ụzo iya mẹe igweligwe ndu ọdo tsoru iya jeshia.

¹² O rwukubedelewho ọnu ẹka l'eeshije abahụ obodo ono ntse, ọ whụa gẹ l'aapafụtawaa odzu nwoke ọbu, bụ ne iya nwa lanụ eje elili, tẹmenu ne iya ọbu bụru nwa-mbunu. Igweligwe madzụ shi l'ime mkpụkpu ono, l'awụ etso nwanyị ono.

¹³ Ọo ya bụ, Onye-Nwe-Ọha whụlewho nwanyị ono, imiko iya dụ iya. Ọ sụ nwanyị ono: “Gbeluma; ba aryahẹ ẹkwa.”

¹⁴ Jisọsu bya ejekube ndu ono pa odzu ono bya emee ẹka l'igbe odzu, e vu odzu ono. Ndu vu iya nụ keshita. Ọ sụ: “Nwokorọbya, mu sụru ghu t'i teta nọdu ndzụ.”

¹⁵ Onye ono, nwụhuru anwụhu ono bya agbashi, kfulahaa okfu, Jisọsu duru iya dee ne iya.

¹⁶ Ndu ono, dọru l'ẹka ono gẹ whẹ ha tsụlahaa egvu. Whẹ jalahaa Chileke sụ: “Ọkalibe onye nkfuchiru Chileke afụtaru anyi-o! Chileke kpakfutaakwaru ndu nkiya-o!”

¹⁷ E kfukota nke Jisọsu l'alị Judíya mgburumgburu mẹwaro ndu buwheru whẹ mgburumgburu.

Ndu ozhi Jọnu baputizimu

¹⁸ Ndu l'etso ụzo Jọnu bya atụko iwhe g'iwhe ha ono kọkotaru Jọnu.

¹⁹ Jọnu bya ekua ụmadzu labọ lẹ ndu l'etso ụzo iya zhi whẹ tẹ whẹ je ajịta Onye-Nwe-Ọha sụ iya: “?Ọo gụbedua bụ onye ọbu, l'abyanụ ọbu, tọo t'anyi leje ẹnya onye ọdo?”

²⁰ Ndu ono byakfuta Jisọsu bya asụ iya: “Jọnu baputizimu zhiru anyi t'anyi bya ajịta ghu: ‘?Ọo gụbedua bụ onye ọbu l'abyanụ ọbu, tọo t'anyi leje ẹnya onye ọdo?’ ”

²¹ Nteke ono bẹ Jisọsu l'eme t'igweligwe ndu ẹhu l'eme mehukota mẹe ndu oke ẹhu dụ l'iche l'iche l'emekaa mẹe ndu ọgvu bu l'ẹhu mẹwaro igweligwe ndu ọwhu l'atsọ ìshì b'o mekotakwaruwho whẹ whụlahaa ụzo.

²² Ọ sụ ndu ono, Jọnu zhiru ono: “Unu je akọoru Jọnu iwhe lile unu whụru mẹe ọwhu unu nụru lẹ nchị unu. Unu sụ iya lẹ ndu l'atsọ ishi b'e meru, whẹ l'awhụwaa ụzo, ndu ngvụru l'ejewaa ije, e mewaa ndu njọkirehu l'eme, whẹ mehukotawaa, ndu l'ada nkụchi l'anụwaa iwhe lẹ nchị; ndu nwụhuru anwụhu b'e mewaru whẹ teta nọdu ndzụ. L'eezhi ndu ụkpa ozhi-ọma.

²³ Sụa, ẹhu-ụtso bụ nke onye ono mụbe Jisọsu l'ẹte abụa ụkfu akpọpyashi ọkpa.”

²⁴ Ndu ono, Jọnu zhiru ono tụgbulewho lashia, Jisọsu kfulahaaru igwe-ọha ono okfu ẹhu Jọnu, sụ whẹ “?Ọo gụnu bẹ unu jeru awhụwhu l'echi-ẹgu. ?Ọo ogọwa whẹrewhere l'enwunga enwunga.

²⁵ ?Ọ bụkwanuru gụnu bẹ unu jeru awhụwhu. ?Unu jeru t'unu je awhụ nwoke, gbakụru onwiya ẹkwa l'ama ụma. Unu lee lẹ ndu l'egudeje ọkpobe uwe, l'amanụka ụma kwaa onwowhe ngwa, eriji ẹwho, angụ-jikwawho ẹwho bụ ndibe ndu eze.

²⁶ Mbụ ?ọ hụnu gụnu ọdo bẹ unu jeru awhụwhu. ?Unu jeru t'unu je awhụ onye nkfuchiru Chileke tọo gụnu. Ee! O noo iwhe unu jeru ndono. Ọle mu sụru unu: onye ono, unu whụru bẹ gbekwa ka onye nkfuchiru Chileke nkajishi.

²⁷ Ọo ya bụ onye ono, Chileke kfuru okfu ẹhu iya l'ẹkwo Okfu Chileke sụ: ‘Lee onye ozhi mụbe Chileke, mu l'ezhi iya t'o vuru ghu ụzo jee emechaaru ghu ụzo.’

²⁸ Iwhe mu l'eme tẹ mu kfuru unu bụ: l'ọ tọ dụkwa onye kabaa Jọnu baputizimu shii l'iwhe bụkota iwhe nwanyị nwụru anwụ. Ọle t'unu lenuwho l'onye e gbee sụ l'ọo ya bẹ ẹnya iya kagee alwalwa lẹ ndu Chileke bụ eze whẹ bẹ ka Jọnu shii.”

²⁹ Ndu ono gẹ whẹ ha mẹe ndu akịriko nụa iwhe ono, Jisọsu kfuru, whẹ jaa Chileke l'ọ bụ onye dụ chịriri, eshi ọbu Jọnu megeeru whẹ baputizimu.

³⁰ Ọle ọwhube ndu Fárisii mẹe ndu o-zhi-iwu bẹ jịkaru uche Chileke l'onwowhe, bụru ndu Jọnu l'ete mee baputizimu.

³¹ Jisọsu sụ whẹ “?O zhia gụnu bẹ mu l'a-tụru ọgbo elenu-a yeru? ?Ọo gụnu bẹ mu l'a-sụ lẹ whẹ dụ g'ọo ya?

³² Whẹ dụlewho g'ọo ụnwegirima, dọru l'ọma nggamgbo, ekuje ibe whẹ oku sụ: ‘Anyi whụru unu opu, unu te ekwe ote egvu, anyi gụa ọgu-ẹkwa, unu te ekwe tsọo áwhụ.’

³³ O noo lẹ Jọnu baputizimu bẹ byarụ nụ, tọ dụ iwhe l'ookweje eriri, t'ọ ngụje mmẹe, unu sụ: ‘Ọgvu bukwa nwoke-e ebu l'ẹhu.’

³⁴ Mbẹdua, bụ Abụbu-Ndiwhe bya abyakwanụ, bya eride eri, ngụde angụ, unu sụ te eleedawho lẹ nwoke-e bụ o-ri-nri, bụru angụngu-anyị-g'anyị, bụru ọnya ndu akịriko mẹe ndu l'eme iwhe-dụ-ẹji.

³⁵ Ọle iwhe mmamagụ Chileke l'eme b'e gude marụ lẹ mmamagụ Chileke ono kfụru nhamụnha.”

Jisọsu l'akpafụ ibe Sáyịmonu onye Fárisii

³⁶ Tọ dụ iya bụ l'onye lanụ lẹ ndu Fárisii ezhia Jisọsu t'ọ bya lẹ nri l'ibe iya. Ọ bya ejeshia ibe nwoke Fárisii ono, je anọdu lẹ nri ono.

³⁷ Nwanyị ọbu bụ nwanyị ọkpara, shi l'ime mkpụkpu ono nụlewho lẹ Jisọsu nọ lẹ nri l'ibe onye Fárisii, o gude ite, mmanụ-mbeleke, l'ere ire shii jiru eji gude byatashia.

³⁸ Ọ bya akfụru iya lẹ mgboro ọkpa wata anọ akwashị ẹnya-mini. L'ọokwashi Jisọsu ẹnya-mini ono l'ọkpa iya whẹ ẹbo, gude ẹgbushi dụ iya l'ishi ehucha iya, etsutsu iya ọnu l'ọkpa, awụ iyẹ ya mmanụ ono.

³⁹ Onye Fárisii ono, kuru Jisọsu oku nri whụle iya whọ, ọ rịlahaa sụ: “Nggẹ lẹ nwoke-e bụ onye nkfuchiru Chileke l'ezhi, m'ọ gọgo makwaa ẹgube onye nwanyị-a l'eme iya ẹka-a bụ, mbụ marụ gẹ l'oomebe iwhe-dụ-ẹji.”

⁴⁰ Jisọsu sụ iya: “Sáyịmonu, tẹ mu kfuduru ghu whọ iwhe.” Sáyịmonu sụ iya: “?Ọ kwa ole O-zhi-iwhe?”

⁴¹ Jisọsu sụ iya: “O nweru nwoke lanụ l'agbẹje madzụ mkpu. Nwoke ono bya ejee ụmadzu labọ ụgwo. Onye ọwhu b'o jeru ụgwo ụkporo pọngu labọ lẹ pọngu iri. O jee onye ọwhu ụgwo pọngu ise kpụ.

⁴² A nọnyaa whẹ ta adụ ike kfụa ya ụgwo ono, ọ haarụ whẹ okpoga ono tẹ whẹ ria whẹ whẹ ẹbo ono. ?Ọo onye ole l'a-ka iya oye obu l'ẹka ụmadzu labọ ono?”

⁴³ Sáyịmonu sụ iya: “Ọ dụkwa mu g'ọo onye ọwhu ọ harụ ọwhuna ka shii whọ.” Jisọsu sụ: “I kfuzhiru.”

⁴⁴ Ọ bya aghaa ẹnya l'ẹka nwanyị ono nọ sụ Sáyịmonu: “Ị whụwaru-a nwanyị-a? Mu batarụ ụlo ghu, ti kee mu mini tẹ mu kwọchaa ọkpa, ọle nwanyị-a bẹ gudewaa ẹnya-mini kwọo mu ọkpa, gude ẹgbushi iya huchaa ya.

⁴⁵ Ti tsutsu mu ọnu ekele, ọle eshi mu batarụ ụlo ghu bẹ nwanyị-a l'esefudua ẹka l'anọ etsutsu mu ọnu l'ọkpa.

⁴⁶ Tị wụ mu mmanụ l'ishi gude kwarụ mu ẹbyii, ọle yẹbedua gudewaa mmanụ-mbeleke l'ere ire shii wụa mu l'ọkpa.

⁴⁷ Ọo ya bụ, tẹ mu kalẹru ghu-a: A gụkotawaru nwanyị-a nvụ l'iwhe-dụ-ẹji ono, o metagbaberu ono, ha l'igweligwe ono. O noo iwhe meru o ye mu obu shii. Ọle onye a gụru nvụ l'iwhe ha nwanshị bẹ l'eyeje obu nwanshị.”

⁴⁸ Ọ sụ nwanyị ono: “A gụwaru ghu nvụ l'iwhe-dụ-ẹji, i metagbaberu g'ọ ha.”

⁴⁹ Ndu whẹ l'iya tụkoru eri nri ono kfulahaa sụ: “?Ọo onye dụ ẹgube-ẹ? Onye ọwhu l'agụjefuaru madzụ nvụ l'iwhe-dụ-ẹji o meru?”

⁵⁰ Ọ sụ nwanyị ono: “Ekwekwe, i kwetaru nke mu dzọwaru ghu, lashia je eburu guu.”