Luku 4 - BAYỊBURU Ẹzaa

Sétanu l'adale Jisọsu

¹ Ume-Dụ-Nsọ bya eji Jisọsu ẹhu. O shi lẹ Jọ́danu lashia. Ume Chileke duta iya, o je anọo l'echi-ẹgu,

² ụkporo abalị ugbo labọ. Oshifutuswe datakọta iya nteke ono. Ọ nọkota ụkporo abalị ugbo labọ ono, t'ọ dụ nri o riru. O nodzugele iya who, ẹgu gụlahaa ya.

³ Oshifutuswe ono sụ iya: “Ọ -bụru l'ị bụ Nwa Chileke, sụadaa ẹwhuru-a t'ọ ghọo nri.”

⁴ Jisọsu sụ iya: “E deru iya ede l'ẹkwo Okfu Chileke sụ: ‘Ọ tọ bụdu nri kpụ bẹ bụ iwhe madzụ l'egudeje nọdu ndzụ.’ ”

⁵ Oshifutuswe ono bya eduta iya je anọdu l'ewhekerewhe. Lẹ njị-ẹnya lanụ b'o goshikotawaru Jisọsu alị-eze ndiwhe swịikpamu,

⁶ sụ Jisọsu: “Ọo ghu bẹ mu l'e-me t'ị bụru onye l'a-nọ achịkota iwhe lile-e mẹe iwhe dụ ree, dụkota iya nụ, o noo l'ọo mu b'e yeru iya l'ẹka, tẹmenu ọ bụru onye dụ mu mma l'obu bẹ mu l'a-nụ iya.

⁷ Ọo ya bụ, ị -bazhiwaru mu ẹja, mu ahakọtaru ghu iwhe lile ono.”

⁸ Jisọsu sụ iya: “E deru iya l'ẹkwo Okfu Chileke sụ: ‘Ọo Onye-Nwe-Ọha, bụ Chileke ghu bẹ bụ onye l'ịi-barụ ẹja, ọ bụkwaru iya whọ kpụ bụ onye l'ịi-nọdu l'ẹka.’ ”

⁹ Oshifutuswe ono bya edulikwaa ya jeshia Jerúsalẹmu, duru iya dobe l'ẹka kakọta l'eli l'eze-ụlo Chileke sụ iya: “Ọ -bụru l'ị bụ Nwa Chileke, shinu l'eli ẹka-a kfụdaada l'alị,

¹⁰ nkele e deru iya l'ẹkwo Okfu Chileke sụ: ‘Chileke l'e-kfuru-a ndu ojozhi-imigwe iya tẹ whẹ leta ghu ẹnya cheje ghu nche.

¹¹ Whẹ l'e-gbobe ẹka wọta ghu nggẹ t'ị kpọpyashi ọkpa l'ẹwhuru.’ ”

¹² Jisọsu sụ iya: “E deru iya l'ẹkwo Okfu Chileke sụ: ‘Be ejekwa ọdata Onye-Nwe-Ọha, bụ Chileke ghu.’ ”

¹³ Oshifutuswe ono datagele iya who, ọ parụ iya haa nke nwa nteke ono.

Jisọsu l'awata oje ozhi lẹ Gálili

¹⁴ Jisọsu nọdu l'ike nke Ume-Dụ-Nsọ lwatashia Gálili. Ọ ngakọta iwhe bụkota alị buwhetaru Gálili mgburumgburu.

¹⁵ L'ọonoje ezhi whẹ iwhe l'ime ụlo-ndzuko ndu Ju g'ọ ha. Madzụ lile tụko jakọta iya ama.

Aajịka Jisọsu lẹ Názaretu

¹⁶ Ọo ya bụ l'ọ bya abahụ lẹ Názaretu, bụ ẹka a nọdu hefuta iya. O rwua mbọku ọtuta-ume ndu Ju, ọ bya abahụ l'ụlo-ndzuko ndu Ju, bụ iwhe l'oomejehawa. Ọ gbashi tẹ ya gụa iwhe.

¹⁷ A bya anụ iya ẹkwo, o deru mbụ Ayizáya onye nkfuchiru Chileke. Ọ bya awhụhaa ẹkwo ono chọta ibe iya ọwhu e deru sụ:

¹⁸ “Ume Onye-Nwe-Ọha dụ mu l'ẹhu, o noo l'ọ họtawaru mu tẹ mu je ezhia ndu ụkpa ozhi-ọma. O zhiru mu tẹ mu je ezhia ndu a kpụtaru lẹ ndzụ l'aa-ha whẹ, mu emee ndu l'atsọ ishi tẹ whẹ whụlahaa ụzo. O zhikwa mu who tẹ mu je eme ndu l'aakpa ẹhu tẹ whẹ nweru onwowhe.

¹⁹ Mẹ tẹ mu bya aryakaa l'awha Onye-Nwe-Ọha l'a-dzọ ndu nke iya rwuakwaru.”

²⁰ Ọ whuchia ẹkwo ono g'a whụhawaru iya pẹwhu iya nwozhi ụlo-ndzuko ono azụ, bya anọdu anọdu. Iwhe bụ ndu nọ l'ụlo-ndzuko ono chị-zhiaruwho ẹnya wụbe iya.

²¹ O kfuderu whẹ sụ: “Ntanụ-a bẹ iwhe lile-e, e deru l'ẹkwo-ọ unu nụru ọwa vụru lẹge e deru iya.”

²² Whẹ tụko zụa mgbede, okfu ọma l'afụshi iya l'ọnu, dụ whẹ biribiri. Whẹ sụ: “?M'ọ tọ nụ-a nwa Jósẹfu-a dụ ẹgube-ẹ?”

²³ Ọ sụ whẹ: “O doru mu ẹnya l'unu l'a-nmarụ mu ẹtu-a sụ: ‘Tẹ gụbe ọwhu l'eme ọgvu metanu onwoghu l'iwhe l'eme ghu nụ. Anyi nụwaru iwhe i mekotaru lẹ Kapániyọmu, menua ya l'alị nke ghu.’ ”

²⁴ Ọ sụ whẹ: “Iwhe mu l'ekfuru unu bụ, e te egbobejekwa ẹka labọ nata onye nkfuchiru Chileke lẹ mkpụkpu iya. ?Unu nụwaru iya.

²⁵ Unu nyatakwa l'ụnwu-mbunu bẹ jikwaru Ízurẹlu ejiji nteke Eláyija nọ, bụ iya bụ nteke ono igweli buchiru mini awha ẹto l'ọnwa ishii, ejo mkpẹgu bya l'alị ono mgburumgburu.

²⁶ Ọle ọ tọ dụkwa ụnwu-mbunu ono m'ọo nnanụ onye ọwhu Chileke zhiru Eláyija to je eyeru ẹka, ọ kwarọo nwa-mbunu ọbu bu lẹ Zárẹfatu l'alị Sáyịdonu b'e zhiru iya t'o je ụlo iya.

²⁷ O nokwawho gẹ ndu njọkirehu jiru alị Ízurẹlu ejiji nteke Eláyisha onye nkfuchiru Chileke nọ. Ọle ọ tọ dụkwa m'ọo onye lanụ, e meru o mehu lẹ njọkirehu nke iya, ọ kwarọo Némanu onye Siriya.”

²⁸ Whẹ nụkobelewho iwhe ono, ẹhu wata oghu iwhe bụ ndu lile nọ l'ụlo-ndzuko ono eghu mebyi shii. Whẹ tangịrihu.

²⁹ Whẹ swolihu chịfu iya lẹ Názaretu. Whẹ duta iya je enyikota ọnunu-swọngu-swọngu ugvu, bụ ẹka mkpụkpu whẹ tukoru, melahaa tẹ whẹ nọdu l'ẹka ono nwukota iya, t'ọ bya asụa ishi isuwhu l'alị.

³⁰ Ọ bya aghajalẹ whẹ-ẹ l'echilabọ tụgbua lụfushia.

Nwoke ọgvu bu l'ẹhu

³¹ Jisọsu gbazeta tụgbua bahụ Kapániyọmu dụ lẹ Gálili. L'oozhi whẹ iwhe lẹ mbọku ọtuta-ume ndu Ju.

³² Iwhe ono l'oozhi whẹ mee whẹ, ẹhu jishihu whẹ oyi nkele okfu l'ookfu goshiru who l'ọo Chileke zhiru iya.

³³ O nweru nwoke ọgvu bu l'ẹhu nọ l'ime ụlo-ndzuko ono. Nwoke ọgvu ono chishia oke mkpu sụ:

³⁴ “Parụ anyi haa. Jisọsu, onye Názaretu! ?Ọo gụnu bẹ anyi lẹ ghu jigba. ?Ịibyawaa t'i kpawhua anyi ọbu? Mu makwarụ-a onye ị bụ. Ọ kwa ghu bụ onye ono, dụ nsọ shi l'ẹka Chileke.”

³⁵ Jisọsu baarụ iya mba sụ: “Dobe ọnu ndoo, fụta nwoke ono l'ẹhu!” Ọgvu ono nwuta nwoke ono zụbe l'alị l'edzudzu-ọha l'ẹka ono fụta iya l'ẹhu, tọ dụkwanu ẹka o mekaru iya iwhe.

³⁶ Ọ dụ ndu lile ono, nọ l'ẹka ono biribiri, whẹ kfulahaa sụ: “Ẹgube okfu ọwa bụkwa ole-e? Onye ọwhu l'egudeje ẹgube nsarasa-ẹnya ọwa mẹe ike sụ ọgvu t'ọ wụfuta, whẹ awụfuta.”

³⁷ Ude Jisọsu dekota l'ẹka lile l'iwhe bụkota mkpụkpu dụ-wheru ẹka ono mgburumgburu.

Jisọsu l'eme igweligwe ndu ẹhu l'eme tẹ whẹ mehu

³⁸ O gbalihu lụfuta-shia l'ụlo-ndzuko ono, ọ bya abahụ ibe Sáyịmonu. Ẹwhoku l'enwu ne nyee Sáyịmonu, whẹ bya aryọo ya t'ọ marụ gẹ l'oo-me nwanyị ono.

³⁹ Ọ bya akfụkube iya, baarụ ẹwhoku ono mba, ẹwhoku ono nwubuhu nwanyị ono. Nwanyị ono zhilihu kwalahaarụ whẹ ẹbyii.

⁴⁰ Ẹnyanwu nyịhudelewho, iwhe bụ onye nweru onye ẹhu l'eme, ẹgube ẹhu ọ bụ-zhiawho, duta whẹ dukfutashia Jisọsu. Ọ byakọta whẹ ẹka, mee whẹ whẹ mehukota.

⁴¹ Ọgvu l'awụfutajekwawho l'ẹhu igweligwe ndu o bu l'ẹhu, echikaa mkpu asụje: “Ọo gụbedua bụ Nwa Chileke!” Ọle ọobajeru whẹ mba. Too kweje tẹ whẹ kfua okfu nkele whẹ marụ l'ọo ya bụ Kuráyisutu ọbu.

Jisọsu l'ekfu okfu Chileke lẹ Judíya

⁴² Chi sahụlewho, o gbashi jeshia l'ẹka l'ọo-nọdu nwẹkiya. Igweligwe madzụ tsoru achọkashi iya, whẹ bya abyakfuta iya. Whẹ melahaa tẹ whẹ sede iya t'ọ bọ hahẹ whẹ ẹka ọdo.

⁴³ Ọ sụ whẹ: “Mu zhifutajekwawho ndu mkpụkpu ọdo ozhi-ọma ono, bụ iya bụ nke ẹka Chileke bụ eze, nkele o noo iwhe e kwoberu zhi mu tẹ mu bya ndono.”

⁴⁴ L'ọorya okfu Chileke aryarya l'ụlo-ndzuko ndu Ju dụ lẹ Judíya.