Luku 24 - BAYỊBURU Ẹzaa

Jisọsu shi l'ọnwu teta; nọdu ndzụ

¹ O rwulewho l'ishi ẹnyangge mbọku mbụ l'idzu bụ iya bụ mbọku chọchi, ụnwanyi ono wota mmanụ-mbeleke ono, whẹ kwakọwaru gẹ l'ọo-dụ ono, gude iya jeshia l'ilu Jisọsu.

² Ọo ya bụ, whẹ rwudeshia e swifuwaa ẹwhuru ọbu, e gude swichia ọnu ilu ono.

³ Whẹ bahụ iya l'ime, whẹ ta awhụ iya odzu Onye-Nwe-Ọha, bụ Jisọsu.

⁴ Whẹ kfụru l'ẹka ono arịkashi iwhe ono. Ọ tụfu whẹ ẹhu. Whẹ bya l'eledeshia ẹnya, unwoke labọ yegeeru uwe l'egbu zaa-zaa bya akfụkube whẹ.

⁵ Whẹ tsụlahaa egvu, whẹ wogeeru iwhu kpube l'alị. Unwoke ono sụ whẹ: “Ọo gụnu meru iwhe unu l'achọ onye nọ ndzụ l'ẹka ndu nwụhuru anwụhu nọ?

⁶ Ọ tọ nọhedu l'ẹka-o, o tetaakwaru nọdu ndzụ ọdo. Unu nyatakwa iwhe ono, o kfuru unu nteke ọ nọ lẹ Gálili sụ lẹ

⁷ yẹbe Abụbu-Ndiwhe bẹ l'ee-seru ye l'ẹka ndu l'eme iwhe-dụ-ẹji, whẹ akpọpyabe iya l'oswebe, o belewho ujiku ẹto iya, ya eteta nọdu ndzụ ọdo.”

⁸ Ẹnya rwua whẹ l'okfu ono.

⁹ Whẹ shi l'ilu ono lwatashia bya eje akọoru iya ụmadzu iri lẹ nnanụ whọ mẹwaro ndu ọwhu gẹ whẹ ha.

¹⁰ Ụnwanyi ọbu bụ Méri Mágudala mẹe Jowána mẹe Méri ne Jémusu mẹwaro ụnwanyi ọdo tso whẹ nụ. Whẹ kọoru ndụ-ishi-ozhi iwhe ono.

¹¹ Iwhe ono dụ whẹ lẹ nchị g'ọo okfu eswe, whẹ te ekweta l'ọo ezhi-okfu.

¹² Pyita zhilihu gbagbụa ọso jeshia l'ilu ono. O rwua bya ewhuzeta ewhuzeta nyoo ime ilu ono. Iwhe ọ whụru nwẹkiya bụleruwho ẹkwa-odzu ono. Ọ dakọbe ọ bụru iya ụla. Iwhe ono meru nu kpụbe iya ọnu okfu.

Ndu l'edzu idzu eje Eméyọsu

¹³ Mbọku onowho bẹ ụmadzu labọ lẹ ndu l'etso ụzo iya lị eje mkpụkpu ọbu l'eekuje Eméyọsu. Wata lẹ Jerúsalẹmu jeye l'ẹka ono bụlewho manyịru ẹsaa.

¹⁴ Whẹ l'edzulekwawho idzu nke iwhe lile ono, meru nụ.

¹⁵ Whẹ gudekwadu idzu ono, l'ẹka edzu, aghakashịkwawho iwhe ono, Jisọsu l'onwiya byakfuta whẹ, whẹ l'iya lịchia.

¹⁶ Ọle e kpuchiru whẹ ẹka l'ẹnya, whẹ ta ahụbe iya ama.

¹⁷ Ọ sụ whẹ: “?Ọo ẹgube idzu gụnu bẹ unu l'edzuzhia tsoru echi-ụzo nno?” Whẹ bya akfụshita nkele áwhụ jiru whẹ obu.

¹⁸ Onye lanụ l'ụmadzu labọ ono, ẹwha iya bụ Kulíyopasu sụ iya: “?Ọ zhia ghu whọ bụ onye byarụ abyabya lẹ Jerúsalẹmu, l'ẹte amaa iwhe ono, nwụru l'ẹka-a l'idzudzu-a?”

¹⁹ Ọ sụ whẹ: “?Ọ bụ-zhiaru ẹgube iwhe gụnu?” Whẹ sụ iya: “Mbụ nke Jisọsu onye Názaretu bụ onye nkfuchiru Chileke, mbụ onye shi l'iwhe l'oome eme, mẹe okfu o kfuru l'ọnu goshi l'iwhu Chileke mẹe l'iwhu ọha g'ike nkiya habe shii.

²⁰ Sụ: mẹe gẹ ndu ishi ndu l'agbajẹ ẹja nụ Chileke mẹe ndu ishi anyi whẹ gude seru iya ye nma iya ikpe ọnwu, kpụta iya kpọpyabe l'oswebe.

²¹ Mbụkwa onye-e anyi shi ele ẹnya iya l'ọo ya l'a-bya agbata Ízurẹlu-a. T'a gụfukwaro ono, ntanụ-a kweekwa abalị ẹto iwhe ono meru.

²² Ọwhu kanụ bụru l'ụnwanyi anyi lẹ whẹ l'atụ ọli harụ bya ekfulekwawho iwhe tujiru anyi ẹka. Ụnwanyi ono bẹ gude ọnmewa ụtsu je l'ilu ono.

²³ Whẹ rwua, whẹ ta awhụ odzu iya. Whẹ lwa bya asụ lẹ whẹ whụ-gekwaru whụa awhụ, woo: ọ bụru ndu ojozhi-imigwe bẹ whẹ whụru, woo ojozhi-imigwe ono sụ whẹ lẹ Jisọsu nọduakwa ndzụ.

²⁴ Sụ: tọ dụ iya bụ lẹ ndu anyi lẹ whẹ l'anọje abya aharu jee l'ilu ọbu l'ẹka ono. Whẹ rwua ọ bụleruwho g'ụnwanyi ono kfuru iya bụ lẹge ọ dụ, ọle onye ọbu whẹ chọru jee bẹ whẹ l'ẹte awhụkwa-a nụ.”

²⁵ Jisọsu sụ whẹ: “Oowa! Unu bụbukwa ndu eswe, mbụ unubẹ ndu ono l'akpụ onwunu akpụkpu okweta iwhe ndu nkfuchiru Chileke kfuru.

²⁶ To rwubedu Kuráyisutu erwube l'o jefutaje iwhe-ọtsulanu tẹmenu ya abahụ l'ẹka l'ee-goshi ugvu Chileke kwabẹru iya.”

²⁷ Jisọsu bya eshizhiawho l'ẹkwo Mósisu g'ọ ha mẹe ẹkwo ndu nkfuchiru Chileke, shi iya ishi lanụ tọkashiaru whẹ iwhe e deru l'okfu ẹhu iya l'ẹkwo Okfu Chileke nnanụ nnanụ.

²⁸ Whẹ rwukubedelewho mkpụkpu ono, whẹ l'eje, o melahaa umere gẹ ya l'aghata atụgbubaa.

²⁹ Whẹ sede iya sụ iya: “Byanụ t'anyi radụ g'ọochi l'abyawaa, ike gvụwaa ụboku ẹgube-ẹ.” O tsoru whẹ bahụ tẹ whẹ je aradụ.

³⁰ Ọo ya bụ whẹ byalẹwho l'eri nri, ọ bya ewota buredi ono bya ekele Chileke ekele wajashịa ya nụ whẹ.

³¹ Ẹnya kosahu whẹ nteke ono, whẹ bya ahụbe iya ama. O mihu, whẹ whụ-beru iya.

³² Whẹ kfude l'ime onwowhe sụ: “?Ọ kwa l'iwhe ono, o shi ekfu shi awhụ whẹ sasasa l'obu nteke ono o shi ekfuru eyeru whẹ l'ụzo, mbụ nteke ono l'ọotokashiru anyi iwhe e deru l'ẹkwo Okfu Chileke?”

³³ Whẹ zhilihulekwawho nteke ono, gbawhu azụ lẹ Jerúsalẹmu. Whẹ rwudeshia ndụ-ishi-ozhi ono whẹ iri lẹ nnanụ dọkobewaa l'ẹka lanụ mẹe ndu whẹ lẹ whẹ nọ.

³⁴ A bya ekfuru ụmadzu labọ ono lẹ Onye-Nwe-Ọha tetaakwaru l'ezhi, lẹ Sáyịmonu whụakwaru iya.

³⁵ Whẹbedua bya akọo iwhe meru nụ l'ụzo, kọkwaawho gẹ whẹ gude hụbe iya ama nteke ọ wajarụ buredi.

Jisọsu l'egoshi ndu l'etso ụzo iya onwiya

³⁶ Whẹ kpụkwaduru-a iwhe ono l'ọnu ekfu, Jisọsu ọbu kfụwaru l'echilabọ whẹ sụ whẹ: “Unu buru guu.”

³⁷ Whẹ dabirihu. Meji tọfu whẹ. Whẹ nọdunu g'ọo maa bẹ whẹ whụru.

³⁸ Ọ sụ whẹ: “?Ọo gụnu meru unu l'atsụ egvu? ?Ọo gụnu mekwaruwho iwhe unu l'abọ obu ẹbo.”

³⁹ Woo whẹ: “Unu lee ẹka mu mẹe ọkpa mu. Unu marụ l'ọo mu gẹdegede. Unu mee mu ẹka, unu awhụwaro nkele maa te enwejekwa anụ-ẹhu mẹe ọkpu g'unu l'elenua lẹ mu nweru-a.”

⁴⁰ O kfugelewho nno, ọ bya egoshi whẹ ẹka iya goshi whẹ ọkpa iya.

⁴¹ Ẹhu-ụtso mẹe akpa-jiijii iya mee whẹ, whẹ te ekweta ọkpobe ekweta. Ọ sụ whẹ: “?O nwezhiaru iwhe l'eri eri, unu nweru l'ẹka-a?”

⁴² Whẹ bya alabata ẹma, a hụru ahụ nụ iya.

⁴³ Ọ nata iya nọdu whẹ l'iwhu l'ẹka ono taa.

⁴⁴ O sụ whẹ: “Iwhe-e bẹ bụ-gezhia iwhe mu kfuhawaru unu nteke mu l'unu nọ, sụ unu l'iwhe lile, e deru l'okfu ẹhu mu l'ẹkwo iwu Mósisu mẹe lẹ nke ndu nkfuchiru Chileke mẹe l'ẹkwo Egvu-ọma bẹ vụkotaje lẹge e deru iya.”

⁴⁵ Ọ bya emee ọriri rwua whẹ ọhu-ẹwho nke ọwhu iwhe e deru l'ẹkwo okfu Chileke l'e-do whẹ ẹnya.

⁴⁶ Ọ sụ whẹ: “E deru sụ lẹ Kuráyisutu ọbu jefutaje iwhe-ọtsulanu, ya anwụhu, o -belewho lẹ mbọku nke ẹto, ya eshi l'ọnwu teta nọdu ndzụ,

⁴⁷ sụ l'ee-gude ẹwha iya ryaa ya arya lẹ Chileke l'a-gụru madzụ nvụ l'iwhe-dụ-ẹji onye ọbu metagbaberu mẹe onye ọbu -dakwa onwiya ụta, haa ome iwhe-dụ-ẹji ọbu. Ee-shi iya aryarya lẹ Jerúsalẹmu gudezhia ya who mkpụrudumulanu ryagba iya mgboko-o mgburumgburu.

⁴⁸ Ọo unubẹdua l'e-kfuru ndu ọdo iwhe lile-e, unu gude ẹnya unu whụkota.

⁴⁹ Unu lekwawho lẹ mu l'e-zhilataru unu iwhe ono, Nna mu kweru unu ụkwa iya. Ọle t'unu nọpyabelekwawho l'obodo-o jeye nteke Chileke l'a-tsụ unu ike iya ono, shi l'imigwe atsụtsu l'ẹhu, ya erikputa unu ẹhu.”

Jisọsu l'alawhu azụ l'imigwe

⁵⁰ Ọo ya bụ, Jisọsu bya eduta whẹ dubekwaro Bétani. Ọ bya achilia ẹka iya eli gọlahaaru whẹ ọnu-ọma.

⁵¹ L'ọogoru whẹ ọnu-ọma ono jeye ọ haa whẹ. Chileke wolia ya woba l'imigwe.

⁵² Whẹ baarụ iya ẹja tụgburu lawhushia lẹ Jerúsalẹmu azụ. Ẹhu l'atsọ whẹ ụtso shii.

⁵³ Whẹ rwua bya anọlahaa l'eze-ụlo Chileke mgburumgburu ekele Chileke ekele.