Luku 23 - BAYỊBURU Ẹzaa

Jisọsu nọ l'iwhu Páyileti

¹ Ọo ya bụ igwe-ọha ono, dọru l'ẹka ono zalihu kpulia Jisọsu kpukfushia Páyileti.

² Whẹ rwulewho ẹka ono, whẹ wata okfushi iwhe ọbu whẹ sụru l'o meru sụ: “Anyi whụkwaru nwoke-e ya, gẹ l'ooduwhushi ndibe anyi. Ọ jịkakwaru t'anyi ba atụjeshi akịriko nụ Siza, l'ookfukwawho l'ọo yẹbedua bụ Kuráyisutu, bụru eze.”

³ O noo ya, Páyileti jị Jisọsu: “?Ọo gụbedua bụ Eze ndu Ju ọbu?” Ọ sụ iya: “Ọ kwa ghu whọ b'o shi l'ọnu.”

⁴ Páyileti sụ ndu ishi ndu l'agbajẹ ẹja nụ Chileke mẹe igwe-ọha ono: “Ọ tọ dụkwa ejo iwhe mu whụru nwoke-e meru.”

⁵ Whẹ kabaa okfushi ike sụ: “Iwhe o tsoru ezhiwhe bẹ bụlewho iwhe l'egbuka mkpụkpu anyi egbuka, mbụ o zhikotaakwaru iya alị Judíya mgburumgburu, ntaa ọ bya awata iya ezhizhi lẹ Gálili zhitawa iya rwua ẹka.”

Jisọsu nọ l'iwhu Hẹ́rodu

⁶ Páyileti nụlewho iwhe ono ndu Ju kfuru, ọ bya ajị sụ: “?Ọo onye Gálili?”

⁷ Ọ malẹruwho lẹ Jisọsu bẹ shi l'ibiya ọwhu Hẹ́rodu l'achị, ọ sụ whẹ tẹ whẹ kpụtakwa iya kpụ-kfu Hẹ́rodu. Nteke ono bẹ Hẹ́rodu nọ lẹ Jerúsalẹmu.

⁸ Hẹ́rodu whụlewho Jisọsu, ẹhu tsọo ya ụtso, o noo l'o shihawaa nteke teru ẹnya chọta tẹ ya whụ iya, o noo l'ọ nụnukawaru ọtu ọnu iya. L'ọogukwa iya whọ tẹ ya gude ẹnya iya harụ whụa iwhe-awhụrulenya, l'ọo-harụ mee.

⁹ O noo iwhe meru ọ jịa ya ajị nọo nwọdu, ọle Jisọsu ta adụdu ọnu, o yeru iya.

¹⁰ Ndu ishi ndu l'agbajẹ ẹja nụ Chileke mẹe ndu o-zhi-iwu bya akfụkube iya ọnwuu ọnwuu whube iwhu ekfushi iwhe ọbu, whẹ sụru l'o meru.

¹¹ Hẹ́rodu yẹle ndu ojọgu iya whẹ tụko aja Jisọsu ewenu emekwa iya who iwhe iwhere. A nọnyaa, Hẹ́rodu bya achịta uwe l'ama ụma amashị iya ike, bụ uwe oke-amadụ bya eyee Jisọsu, zhi t'a kpuwhuru iya Páyileti azụ.

¹² Páyileti yẹle Hẹ́rodu bya abụru ọkpobe ọnya eshi mbọku ono nkele whẹ shi karụ ogvu yeru ibe whẹ l'ẹnya nteke mbụ iwhe ono l'ẹteke emee.

Eekpe Jisọsu nkfugbu

¹³ Ọo ya bụ lẹ Páyileti abya ekukobe ndu ishi ndu l'agbajẹ ẹja nụ Chileke mẹe ndu l'achị ọha mẹe ọha ono l'owhu sụ whẹ:

¹⁴ “Unu dutaru mu nwoke-e bya asụ mu l'ọo eduwhu bẹ l'ooduwhushi ndibe unu, mu byakwa ajịa ya ajị l'iwhu unu, tọ hẹkwa l'ọ dụ iwhe lile ono, unu sụru l'ọo iwhe o meru, ọwhu mu whụru ẹka ikpe iya nmarụ iya.

¹⁵ O nokwawho gẹ Hẹ́rodu l'ẹte awhụa, meru g'o gude ọ sụ t'a kpuwhuru iya anyi azụ. Unu awhụkwa l'ọ tọ dụdu iwhe nwoke-e metaru nke t'a kfugbua ya.

¹⁶ O noo iwhe meru mu je l'e-chi iya ẹchachi parụ iya haa.”

¹⁷ Iwhe bụ-zhia oge O-je-ghata l'eeri awha g'awha ha b'a sụru tẹ Páyileti wefujeru whẹ onye mkpọro lanụ.

¹⁸ Igwe-ọha ono tụko gẹ whẹ ha chishia sụ: “Wofuru anyi nwoke-e hachia Barábasu t'o jeru onwiya!”

¹⁹ Nwoke ọbu bụ Barábasu bẹ bụ onye nọ mkpọro ọchi, o gburu mẹe nke ùtsú ọ kụjeru lẹ mkpụkpu kwefuru govumenti ike.

²⁰ Páyileti bya ekfuru yeru whẹ ọdo nkele oosebazhiawho gẹ l'ee-shi tẹ ya haa Jisọsu.

²¹ Whẹ chishia ọdo sụ: “Kpọpyabe iya l'oswebe! Kpọpyabe iya l'oswebe!”

²² Páyileti sụkwa whẹ ọdo nke ugbo ẹto: “?Ọo gụnu bụ ishi iya? ?Ọo ẹgube ejo iwhe gụnu b'o meru? Ọ tọ dụkwa ejo iwhe mbẹdua whụru, o meru, l'ikpe ọnwu ta anmakwa iya. Iwhe l'e-me nụ bụkwa lẹ mu l'e-chi iya ẹchachi parụ iya haa.”

²³ Whẹ l'atawarọ wọkowoko ekfushi ike t'a kpogbua ya l'oswebe. Whẹ ryaa ryata.

²⁴ Páyileti bya ebua ikpe sụ t'o me lẹ nke whẹ ọbu.

²⁵ Ọ bya ewefu nwoke ono, nọ mkpọro ọchi, o gburu mẹe nke ùtsú, ọ kụru, bụkwa nụ onye whẹ sụru t'ọ haarụ whẹ. Ọ sụ t'a kpọpyabe ọwhube Jisọsu l'oswebe, bụ iwhe dụ whẹ ree.

Aakpọpyabe Jisọsu l'oswebe

²⁶ Ọo ya bụ, whẹ bya akpụta Jisọsu tụgbua. Whẹ lụfu echi-ụzo, whẹ bya akpachịa nwoke Sayiríni, shi l'ẹgu alwa ẹwha iya bụ Sáyịmonu. Whẹ bo iya oswebe ono, Jisọsu vu sụ iya t'o vuru iya tsoje Jisọsu ọbu l'azụ.

²⁷ Ikpoto igweligwe ọha ono l'awụ gidigidi etso iya l'azụ mẹwaro ụnwanyi l'arya ẹkwa, atsọ áwhụ iya.

²⁸ A nọnyaa; Jisọsu bya aghaa ẹnya lee whẹ sụ: “Ụnwu-ada Jerúsalẹmu, unu ba aryashi ẹkwa mu, unu ryaa ẹkwa onwunu mẹe ẹkwa ụnwu unu.

²⁹ Ishi iya bụru lẹ mbọku ọbu nọwho abya nteke unu l'a-sụ: ‘Ẹhu atsọkwanua ụnwanyi, ẹhu whẹ keru ekeru ụtso l'ẹteke atsụbua ime, nwa ta angụbua whẹ ẹra l'obu.’

³⁰ O noo nteke unu l'a-sụje ugvu g'ugvu ha: ‘Ugvu dapyabẹ anyi!’ Unu asụje ọwhube mgbogidi: ‘Domia anyi!’

³¹ Sụa ọ -bụru l'ọ waa gẹ whẹ l'eme oshi ntaa ọ dụ oyii ?ndẹ-zhia gẹ l'ee-metabezhia ya nteke ọ kpọru nkụ?”

³² Whẹ kpụkwaruwho ụmadzu labọ ọdo etso iya. Ụmadzu labọ ono meru ejo iwhe. A chịta whẹ jeshia akfugbushi.

³³ Whẹ rwulewho ẹka ọbu l'eekuje “Okpokoro-Ishi”. Whẹ kpọpyabe iya l'oswebe l'ẹka ono mẹe ndu ejo iwhe labọ whọ, onye lanụ l'ẹka-ụtara; onye ọwhu l'ẹka-ịcha.

³⁴ Jisọsu sụ: “Nna, gụaru ndu-a meru iwhe-e nvụ nkele whẹ ta amadụ iwhe whẹ l'eme.” Whẹ tụa ido gude kee uwe iya.

³⁵ Igwe-ọha ono kfụkwaruwho l'ẹka ono ele iya ẹnya. Ọwhube ndu l'achị ọha l'aja iya ewenu asụje iya: “Ọodzoje ndu ọdo, t'ọ dzọnua onwiya m'ọ -bụru l'ọo ya bụ Kuráyisutu ọbu, shi l'ẹka Chileke, bụ iya bụ onye ọ họtaru.”

³⁶ Ndu ojọgu l'ajakwa iya whọ ewenu. Whẹ byakfuta iya bya anụ iya mmẹe oshihu ụka t'ọ ngụa,

³⁷ sụ iya: “Ọ -bụru l'ọo ghu bẹ bụ Eze ndu Ju, dzọnua onwoghu!”

³⁸ O nwekwaruwho iwhe e deru kpube l'eli oswebe ono sụ: “ỌO ONYE-E BỤ EZE NDU JU.” E deru iya l'okfu Giríku, dee ya l'okfu Látinu, dee ya l'okfu Híburu.

³⁹ Onye lanụ l'ime ndu ono, a kpọpyabekotaru whẹ l'iya kọkwaa ya whọ ọnu sụ iya: “?Ọ dụnu mu-a g'ọo ghu bụ Kuráyisutu ọbu? Dzọnua onwoghu, dzọo anyịbedua.”

⁴⁰ Onye ọwhu gbochia ya nchị sụ iya: “?Tị tsụfudua Chileke egvu l'ẹka a nmarụ gụ lẹ nwoke-e ọga ikpe lanụ, bụ iya bụ ikpe ọnwu.

⁴¹ Ikpe ọwhu a nmarụ anyịbedua kfụru nhamụnha l'ọo iwhe anyi meru bẹ anyi l'eri urwu iya, obenu lẹ nwoke-e ta adụdu iwhe-dụ-ẹji o metaru.”

⁴² Ọ bya asụ Jisọsu nteke ono: “Jisọsu, byiko nyatakwa mu nteke l'ịi-bụlewho eze.”

⁴³ Jisọsu sụ iya: “Ee! Iwhe mu l'ekfuleru ghu who bụ: Ntanụ-a bẹ mu lẹ ghu l'a-nọ l'ogboduwhu Chileke.”

Anwụhu Jisọsu

⁴⁴ Ẹnyanwu keleruwho l'ishi; chi jihu l'alị ono, ẹka lile tụko gbakọta tsụurii, jeye o rwua l'oke-eswe-urwẹnyashi.

⁴⁵ Iwhu ẹnyanwu gbakọta ọchi, ẹkwa, e gude gechia ime mkpu ẹka ẹnya ẹka eze-ụlo Chileke dụ, gbajahụ ẹbo tarakata.

⁴⁶ Jisọsu chia mkpu sụ: “Nna, mu yeru ghu ume mu l'ẹka.” O kfugelewho nno, ọ tubuhu ume.

⁴⁷ Onye ishi ndu ojọgu l'achị ndu ojọgu ụkporo ugbo ise whụlewho iwhe meru nụ, ọ jalahaa Chileke ajaja sụ: “Haa! Ọkpobe okfu, nwoke-e bụkwa onye dụ chịriri!”

⁴⁸ Iwhe bụ-gezhia igweligwe ndu ono kụru l'ẹka ono byarụ tẹ whẹ bya awhụ iwhe l'eme nụ, whụlewho iwhe meru nụ, whẹ tsulahaa ẹka l'obu ebu mkpu eje ala.

⁴⁹ Iwhe bụ ndu marwetaru Jisọsu; lụfuchaa l'ụnwanyi ono, shi lẹ Gálili tsoru iya, kfụru otẹnya elekota iwhe lile ono l'eme nụ.

Eeli Jisọsu

⁵⁰ O nweru nwoke ẹwha iya bụ Jósẹfu; onye Ju, shi Arimatíya. Nwoke ono bẹ tso l'ọgbo-ikpe, bụru ezhigbo madzụ; bụkwaruwho onye dụ chịriri.

⁵¹ Ọ tọ dụdu nteke ọ dụ-zhia l'idzu iwhe ono whẹ chịru mẹe iwhe ono, whẹ meru. Yẹbedua shiwaa nteke teru ẹnya leta ẹnya nteke Chileke l'e-goshi l'ọo ya bụ eze.

⁵² Nwoke ono bya ejekfu Páyileti je aryọo ya t'ọ haa tẹ ya pata odzu Jisọsu je elia.

⁵³ E megee, ọ bya eje apazeta iya bya egude ọkpobe ẹkwa ọcha kwaa ya, bya eje enyebe iya l'ilu, a tụhawaru l'eli eze-ẹwhuru, ilu ono tẹke adụbudua onye e lijeru l'ime iya.

⁵⁴ Mbọku ono bụru mbọku nkwakọbe, bụ chi iya sahụ ya abụru mbọku ọtuta-ume, ebebenu mbọku ọtuta-ume ono l'aagbabewaa.

⁵⁵ Ụnwanyi ono whẹ lẹ Jisọsu shi lẹ Gálili lịru tsokwaruwho Jósẹfu jee. Whẹ gbua ilu ono nke; hụbe iya ama; whụkwawho lẹge e nyeberu odzu Jisọsu.

⁵⁶ Whẹ lwa bya egwokoo iwhe l'eshi mkpọ mẹe mmanụ-mbeleke nke ote l'odzu ono. O rwua mbọku ọtuta-ume, whẹ tuta ume lẹge iwu whẹ sụru tẹ whẹ mejee ya.