Luku 20 - BAYỊBURU Ẹzaa

Aajị Jisọsu onye ọ dẹru ike l'ẹka

¹ Obe ujiku lanụ gẹ Jisọsu nọdu ezhi ọha iwhe l'eze-ụlo Chileke, arya ozhi-ọma ono arya, ndu ishi ndu l'agbajẹ ẹja nụ Chileke mẹe ndu o-zhi-iwu mẹe ndu bụ ọgurenya wukfuta iya, bya asụ iya:

² “?Ọo onye b'ị dẹru ike l'ẹka eme iwhe ọwa, l'iime? ?O zhia onye zhiru ghu t'ị bya iya ememe?”

³ Ọ sụ whẹ: “Mbẹdua l'a-jịkwawho unu ajị, unu karụ mu:

⁴ ?Ọo onye zhiru Jọnu t'ọ bya emee baputizimu ?ọo Chileke zhiru iya tọo madzụ?”

⁵ Whẹ ghakashịde iya l'ime onwowhe sụ: “Anyi -sụ l'ọo Chileke zhiru iya, ya asụ anyi: ‘?Ọ bụhunuru gụnu meru unu te ekweta iwhe o kfuru.’

⁶ Nteke bụ l'anyi sụkwanuru l'ọo madzụ zhiru iya, bẹ ọha l'a-tugbushikwa anyi l'ẹwhuru nkele ọha sụkwanuru l'anyi marụ lẹ Jọnu bụ onye nkfuchiru Chileke.”

⁷ O noo iwhe meru whẹ sụ iya lẹ whẹ ta amadụ onye zhiru iya nụ.

⁸ Jisọsu sụkwanu whẹ: “Mu ta afụnua karụ unu onye mu dẹru ike eme iwhe lile ono.”

Ẹtu e gude ndu e butaru ye lẹ mgbabu vayịnu anma

⁹ Ọ bya anmaarụ ndu ono ẹtu-a sụ: “L'ọo nwoke bẹ gbarụ mgbabu vayịnu woru iya ye l'ẹka ndu-n-nwamụ, o butaru ebuta tẹ whẹ letajeru iye ya ẹnya. Yẹbedua tụgbua jeshia alị ọdo je anọo nwọdu.

¹⁰ Ọ bya erwulewho nteke l'aawọje akpụru iya, nwoke ono bya ezhi nwozhi iya t'o jekfu ndu-n-nwamụ ono tẹ whẹ wẹe ya akpụru vayịnu ono oke iya nkiya. Ndu ono gude nwozhi ono chia ya iwhe gbabẹ iya ẹka ọto, nwufu iya ọ lashia.

¹¹ Nwoke ono byakwa ezhi onye ozhi ọdo, whẹ chikwaawho onye onona iwhe, mee ya iwhe iwhere gbabẹ iya ẹka ọto, nwufu iya ọ lashia.

¹² Ọ bya ezhi onye nke ẹto, whẹ merukwaawho onye ononalanụ ẹhu chịfu iya.

¹³ Onye ono nwe mgbabu vayịnu ono sụ: ‘Ọ dụ-a ree, lẹ mu marụ-a iwhe mu l'e-me ntaa. Mu l'e-yelewho nwa mu nwoke, mu yeru obu sụ: ọ dụkwa mu gẹ whẹ l'a-kabẹe kwabẹ yẹbedua ugvu.’

¹⁴ O be nteke ndu ono l'eche mgbabu ono whụleruwho onye onona, whẹ zụa mgbede sụ: ‘Ẹhee! Ọo onye ọwa bụ iya l'ee-mekochaa nweru alị-a mẹe nna iya nwụhu, unu t'anyi gbua ya nke ọwhu alị ono l'a-bụ nke anyi.’

¹⁵ Whẹ kpụta iya kpụfu l'azụ mgbabu ono je egbua ya. “Sụa ?ọ dụ-zhia unu g'ọo gụnu bẹ onye nwe mgbabu vayịnu ono l'e-me whẹ?

¹⁶ Ọo-bya egbushikota ndu ozhi mgbabu vayịnu ono, wota mgbabu vayịnu ono ye ndu ọdo l'ẹka.” Ndu ono nụlewho ẹtu ono, whẹ tụko sụ: “Tụswekwa! Tẹ njọ gbakwaa ẹgbudu.”

¹⁷ Ọ bya elee whẹ ẹnya sụ: “?Ọ hụnu gụnu ọdo bẹ bụ iwhe ọbu e deru l'ẹkwo sụ: “ ‘Ọo ẹwhuru ono gẹdegede, ndu l'atụ ụlo jịkaru, l'ọo ọ-ga-lẹ-mkpa, bẹ bekochaaru bya bụru ẹwhuru, gude ụlo.’

¹⁸ Iwhe bụ onye ngabuhukwanuru daa l'eli ẹwhuru ono bẹ l'e-tsu onwiya ngworingwo, nteke bụ l'ọo madzụ b'ọ dapyabẹru, ya egwee onye ọbu aryaka eryune.”

Okfu akịriko

¹⁹ Ndu o-zhi-iwu mẹe ndu ishi ndu l'agbajẹ ẹja nụ Chileke mee tẹ whẹ gude iya nteke ono nkele whẹ marụ l'ọo whẹ b'ọ nmaturu ẹtu ono, ọle whẹ l'atsụkwanu igwe-ọha ono egvu.

²⁰ Whẹ gelahaa ya ngge. Whẹ bya ezhi ndu ngge tẹ whẹ mejelekwawho gẹ whẹ bụ ndu ọkpobe madzụ, tẹ whẹ tụbe nvọ l'iwhe Jisọsu kfuru gude iya nke ọwhu whẹ l'a-kpụru iya ye l'ẹka onye bụ iya bẹ ike dụ l'ẹka, bụ iya bụ ọ-chị-ọha shi Romu.

²¹ Whẹ jekfu iya je asụ iya: “O-zhi-iwhe, anyi makwarụ-a l'ọo nhamụnha okfu bẹ l'iikfu, ọ bụru iwhe kfụru nhamụnha bẹ l'ịinoje ezhi, tọ dụ onye l'iile ẹnya l'iwhu ekfu, gbahalẹwho ụzo nke Chileke b'i gude ire-lanụ ezhi.

²² ?Tọ bụdunu omebyi iwu Chileke mẹ anyi -tụjee akịriko nụ Siza, bụ ishi ọ-chị-ọha Romu?”

²³ Ọ malẹruwho ẹregede whẹ gbabẹru iya, ọ sụ whẹ:

²⁴ “Unu goshiada mu nụ akpụru okpoga. ?Ọo ishi onye yẹle ẹwha onye b'e deru iya nno?” Whẹ sụ iya: “Ọo nke Siza.”

²⁵ Ọ sụ whẹ: “Ọo ya bụ t'unu woru iwhe ọwhu bụ iwhe Siza nụ Siza, unu eworu iwhe ọwhu bụ nke Chileke nụ Chileke.”

²⁶ Whẹ ta adụhe ike kfụru l'edzudzu-ọha l'ẹka ono gude okfu, shi iya l'ọnu gude iya. G'o gude kfua iwhe ono kpụbe whẹ ọnu okfu, whẹ te ekfuhewaro okfu.

Nke oshi l'ọnwu teta nọdu ndzụ

²⁷ O nweru ndu Sádusii byakfutaru Jisọsu, bụ whẹ bụ ndu ono sụru l'ete eshidu l'ọnwu eteta anọdu ndzụ.

²⁸ Whẹ bya ajị iya ajị sụ: “Mósisu deru l'ẹkwo iwu sụ: ‘Nteke ọ bụ lẹ madzụ nwụhuru, nyee ya ta anwụtaru iya nwa tẹ nwune onye ono lụpyabe nyee nwune iya ono nwụtaru iya nwa.’

²⁹ O nweru unwune ẹsaa, onye nke ọgurenya je alụa nwanyị, lụa ya jeye ọ nwụhu, to dobe akọ,

³⁰ onye nke ẹbo lụpyabe nwanyị ono, ọ nwụkwaawho nno.

³¹ Onye nke ẹto nno, jeye whẹ ẹsaa ono lụkota nwanyị ono l'ẹhu l'ẹhu nwụshihukota. Tọ dụ onye ọwhu nwụtaru nwa.

³² E megee l'ikpazụ nwanyị l'onwiya nwụhukwawho.

³³ O -rwua nteke l'ee-shi l'ọnwu teta nọdu ndzụ ?ọo onye bẹ nwanyị ono l'a-bụ nyee ya. Gẹ whẹ ẹsaa ono lụkotaru iya l'ẹhu l'ẹhu?”

³⁴ Jisọsu sụ whẹ: “Ụnwu ọgbo elenu-a l'alụtakaa nwanyị, ụnwanyi l'alụtakaa ji,

³⁵ ọle ndu a gụtaru lẹ whẹ gbarụ tẹ whẹ shi l'ọnwu teta nọdu ndzụ buru lẹ mgboko ọwhu l'a-byanụ ta alụkwa nwanyị, ụnwanyi ta alụ ji.

³⁶ Whẹ ta abyabahẹdua l'a-nwụhu anwụhu ọdo, o noo lẹ whẹ lẹ ndu ojozhi-imigwe l'a-bụlewho nnanụ. Eshi-ọwhu whẹ bụwaa ndu shi l'ọnwu teta nọdu ndzụ, bẹ whẹ bụwaa ụnwu Chileke.

³⁷ Mósisu bẹ goshikwaruwho lẹ Chileke l'emeje ndu nwụhuru anwụhu whẹ eshi l'ọnwu teta nọdu ndzụ. L'ẹkwo iya l'ẹka ono, Mósisu ono kfuru nke nwooshi l'enwu ọku b'o kuru Chileke: Chileke nke Ébirihamu mẹe Chileke nke Áyiziku mẹe nke Jékọpu.

³⁸ Bụ iya bụ lẹ Chileke ta abụdu Chileke ndu nwụhuru anwụhu, ọo Chileke ndu nọ ndzụ, o noo lẹ madzụ lile bẹ nọkota ndzụ l'ẹnya Chileke.”

³⁹ Ndu o-zhi-iwu ono harụ sụ iya: “O-zhi-iwhe, i kfukwaru ree.”

⁴⁰ Iwhe meru whẹ kfua nno bụ lẹ whẹ ta atụheduro ama nke tẹ whẹ jịa ya ajị ọdo.

Kuráyisutu: ?Ọo bụ Nwa Dévidi tọo Nwa Chileke?

⁴¹ Jisọsu bya asụ ndu Fárisii ono: “?Ndẹhunu g'e meru a sụ lẹ Kuráyisutu bụ Nwa Dévidi?

⁴² Gẹ Dévidi ọbu l'onwiya kfukwaru l'ẹkwo Egvu-ọma sụ: “ ‘Onye-Nwe-Ọha sụru Onye-nwe mụbe Dévidi: Nọdu anọdu l'ẹka-ụtara mu,

⁴³ jeye nteke mu l'e-me ndu ọhogu ghu, whẹ abụru ghu iwhe l'ịi-dzọpyabe l'ọkpa.’

⁴⁴ Dévidi kuru iya Onye-nwe-iya-nụ, ọo ya bụ ?ndẹhunu g'o gude ọ bụru nwa iya?”

Jisọsu l'ekfu t'a kwachafụkwaru o-zhi-iwu whẹ ẹnya

⁴⁵ Jisọsu nọdu l'iwhu edzudzu-ọha l'ẹka ono sụ ndu l'etso ụzo iya:

⁴⁶ “Unu kwachafụjekwaru onwunu ẹnya l'ẹka ndu o-zhi-iwu nọ, mbụ ndu bụ iwhe l'adụje whẹ ree bụ tẹ whẹ yee adawurukutu uwe ghawheje, t'e keleje whẹ ekele ugvu ugvu g'ọo oke-amadụ whẹ l'ẹka a dọru adọru, mẹe t'oshi ọwhu bụ iya kakọta ree l'ụlo-ndzuko ndu Ju bụru nke whẹ, mẹe t'ọ bụru whẹ l'a-nọdu l'ẹka l'aa-ka whẹ ọkwabe ugvu l'ẹka eriri darụ.

⁴⁷ Mbụ ndu l'ejeje eripyabe ụlo ụnwu-mbunu. Whẹ egude ẹregede ekfulewho ogologo okfu anụ Chileke. Ọo whẹbedua bẹ l'aa-ka ọnmashi ikpe ike.”