Luku 2 - BAYỊBURU Ẹzaa

Anwụnwu Jisọsu

¹ Ọ bụru nteke ono bẹ ishi ọ-chị-ọha bụ Siza Ọgósutosu tụru iwu sụ t'e deshia ẹwha madzụ kpamụ kpamụ l'ẹkwo, mbụ iwhe bụ-zhia onye bu lẹ mba gẹ mba ha dụkota l'alị-eze iya.

² O noo ọgu mbụlembu, e vugezhia ụzo gụa. Nteke a gụru ọgu ono bẹ bụ Kwịríniyosu bụ ọ-chị-ọha ndu Siriya.

³ Ọo ya bụ l'onyenọnu alashigee ẹka a nwụru iya, jeshia t'e dee ẹwha iya l'ẹkwo.

⁴ Jósẹfu shikwawho lẹ Názaretu, dụ l'alị Gálili lashia Bẹ́tulehemu dụ l'alị Judíya, bụ obodo Dévidi, nkele Jósẹfu bẹ shi l'ẹnya ikfu Dévidi, bụkwaruwho onye uwhu ono gẹdegede.

⁵ Jósẹfu yẹle nwanyị ono, e kwehawaru l'ọolu ono, bụ Méri lịru jeshia t'e dee ẹwha whẹ. Nteke ono bẹ Méri dụwaa ime.

⁶ Ọ bụru nteke Méri whẹ nọ lẹ Bẹ́tulehemu b'ọ gbaberu iya l'ezeda.

⁷ Ọ bya ezeda nwụa nwata nwoke bụ iya bụ ọkpara iya. Ọ bya ewota nwa mpete ẹkwa gude whukpua ya, kuru iya nyebe l'iwhe l'eeyejeru élwù nri nkele ọ tọ dụdu ẹka whẹ whụru ụzo nọdu l'ụlo-ndụ-ije.

Ojozhi-imigwe l'ezhi ndu l'eche atụru ozhi-ọma

⁸ L'ẹka ono b'o nweru ndu l'eche atụru, nọ l'ẹgbudu eche igwe atụru whẹ l'ẹnyashi ono.

⁹ Ojozhi-imigwe ono, shi l'ẹka Onye-Nwe-Ọha see whẹ l'iwhu; o-gbu-zaazaa nke Onye-Nwe-Ọha nwuwhe whẹ mgburumgburu. Whẹ tsụlahaa egvu.

¹⁰ Ojozhi-imigwe ono sụ whẹ: “Unu ba atsụshi egvu! Unu ngabẹ nchị, mu byarụ tẹ mu bya ezhia unu ozhi-ọma, l'eme t'ẹhu tsọo ndiwhe l'owhu ụtso shinene.

¹¹ O noo l'ọo ntanụ-a b'a nwụru unu Onye Ndzọta l'obodo Dévidi, bụ iya bụ Kuráyisutu ọbu, bụ Onye-Nwe-Ọha.

¹² Ọ waa iwhe unu l'e-gude marụ ndọwa: Unu l'a-whụ nwata, a whukpuru nwa mpete ẹkwa, nyebe l'iwhe l'eeyejeru élwù nri.”

¹³ A bya l'eledeshia ẹnya, igweligwe ojozhi-imigwe wukfuta ojozhi-imigwe ono, whẹ tụko aja Chileke ajaja asụje:

¹⁴ “Chileke ono, nọ l'imigwe gbarụ t'a kwabẹ iya ugvu. Amadụ, nọ l'alị, bụ ndu kweru l'o yeru whẹ obu bẹ ẹhu l'a-dụ guu.”

¹⁵ Ndu Ojozhi-imigwe ono wụfulewho l'ẹka whẹ nọ, wụba l'imigwe, ndu nche atụru ono kfulahaa sụ: “T'anyi jezhiadaa Bẹ́tulehemu je awhụ iwhe ọbu meru nụ, Onye-Nwe-Ọha meru t'anyi marụ.”

¹⁶ Whẹ gude ntụtu-ọso jeshia. Whẹ rwua, whẹ whụa Méri yẹle Jósẹfu, whụkwaawho nwata ọbu, e nyeberu l'iwhe ọbu l'eeyejeru élwù nri.

¹⁷ Whẹ whụ-gele iya whọ, whẹ bya ewota iwhe ono, e kfuru l'okfu ẹhu nwata ono bya akọoru ndu nọ l'ẹka ono.

¹⁸ Ọ tụfukota iwhe bụ ndu nụru iya nụ ẹhu, mbụ iwhe ono ndu l'eche atụru kfuru.

¹⁹ Méri tụko-gezhia iwhe lile ono g'ọ ha kwakọbe l'obu iya, tụko iya arịkashikwawho.

²⁰ Ndu ono, l'eche atụru lashia. Whẹ l'ala whẹ l'etu Chileke ẹwha, aja iya ajaja iwhe lile ono, whẹ nụru lẹ nchị, whụa ya l'ẹnya; ọ bụleruwho g'e kfuru whẹ iya bụ g'ọ dụ.

Eebu Jisọsu ugvu

²¹ A nọlewho abalị ẹsato, e bua nwata ono ugvu, gụa ya Jisọsu bụ iya bụ ẹwha ojozhi-imigwe kfuhawaruro l'aa-gụ iya tẹmenu a tsụta ime iya.

Eeye Jisọsu l'ẹka Chileke l'ime eze-ụlo Chileke

²² O rwua nteke ọ gbarụ whẹ l'ome nsọ nsachafụ lẹge iwu, shi l'ẹka Mósisu kfuru, whẹ kuru iya byatashia Jerúsalẹmu tẹ whẹ bya eye iya Onye-Nwe-Ọha l'ẹka.

²³ Bụ iya bụ iwhe e deru l'ẹkwo iwu Onye-Nwe-Ọha sụ: “Iwhe bụ nwata nwoke vu ụzo waa ne iya ẹkpa-nwa bẹ l'ee-dobejeru Onye-Nwe-Ọha nsọ.”

²⁴ Whẹ jekwaruwho tẹ whẹ je anụ ngwo-ẹja t'e gude gbaarụ Chileke ẹja, bu iya bụ lẹge e deru iya l'iwu Onye-Nwe-Ọha: Ndukfu labọ, ọdua ya abụru kparakụ labọ.

²⁵ O nweru nwoke lanụ ọbu, bu lẹ Jerúsalẹmu, ẹwha iya bụ Símiyọnu. Nwoke ono bụ onye dụ chịriri, bụkwaruwho onye l'atsụ egvu Chileke, elekwawho ẹnya onye ono, l'a-dụ Ízurẹlu obu. Ọ bụ onye Ume Chileke jiru ẹhu.

²⁶ Ebebenu Ume Chileke ono mehawaro, ọ marụ l'ọnwu te eshitadu ẹka ọ nọ jeye nteke l'ọo-whụadaa Kuráyisutu ọbu, shi l'ẹka Onye-Nwe-Ọha.

²⁷ Ume Chileke duta iya duba l'eze-ụlo Chileke. O rwua nteke ndu nwụru Jisọsu ku nwata ono, bụ Jisọsu bata tẹ whẹ meeru iya lẹge iwu whẹ kfuru,

²⁸ Símiyọnu bya ekuta iya heru jalahaa Chileke sụ:

²⁹ “Onye-Nwe-Ọha, hawarọ ntaa tẹ mụbe onye ono, nọ ghu l'ẹka lashia maa l'ẹhu-guu, bụ iya bụ iwhe i kfuru.

³⁰ O noo l'ẹnya mu whụwaru Onye Ndzọta,

³¹ ọwhu i kwakọberu t'iwhe bụ mba lile whụ-dzuru,

³² Iwhoro, e gude eme tẹ ndu mba lile marụ ghu, mẹe iwhe l'a-bụ iwhe ọja-ama nke ndibe, bụ Ízurẹlu.”

³³ Iwhe ono tụfu ne lẹ nna nwata ono ẹhu, mbụ iwhe ono Símiyọnu kfuru l'ẹka nwa whẹ.

³⁴ Símiyọnu bya agọru ọnu-ọma nụ whẹ sụ Méri, bụ ne nwata ono: “Nwata-a bẹ Chileke họtaru t'ọ bụru a -kpokuta a daa, bụkwaruwho a -kụbe ẹka a gbashi dụru igwe madzụ lẹ Ízurẹlu; ọ bụkwaruwho onye l'aa-ha l'igweligwe jịka nkiya,

³⁵ e shikwanu nno madzuru iwhe whẹ l'arị l'obu whẹ. Gụbedua, bụ ne iya bẹ áwhụ l'a-nọ agbajashị obu l'okfu ẹhu iya g'ọo ogu-ịgba b'e gude nmafua ghu obu ono.”

³⁶ O nwekwaruwho nwanyị ọbu, l'aza Ana, bụ onye nkfuchiru Chileke. Nwanyị ono, bụ nwa Fánuwẹlu. O shi l'ẹnya ikfu Asha. Ọ waa nwanyị nochee, kahụwaru akahụ. Ji iya lụru iya lẹ nwamgbọko, whẹ lụa awha ẹsaa, ji iya ono nwụhu, t'ọ lụtahe ji ọdo.

³⁷ Ọ bụru nwa-mbunu jeye ọ nọwaa ụkporo awha ugbo ẹno l'awha ẹno, ọkpa iya ta ahajẹru ẹja l'eze-ụlo Chileke ono. L'ọonoduje abarụ Chileke ẹja, aswị ẹgu ekfu anụ iya eswe l'ẹnyashi.

³⁸ Ọ byakwawhọ nteke ono bya ekele Chileke ekele. Ọ bya ekfua nke nwata ono ye lẹ nchị iwhe bụ ndu l'ele ẹnya tẹ Chileke gbata Jerúsalẹmu.

Ndu nwụru Jisọsu du iya adawhu azụ lẹ Názaretu

³⁹ Tọ dụ iya bụ lẹ ndu nwụru nwata ono emekotagelewho iwhe lile lẹge iwu Onye-Nwe-Ọha dụ, whẹ lwawhu azụ l'ibe whẹ, bụ Názaretu dụ lẹ Gálili.

⁴⁰ Nwata ono l'evulekwawho ivu eshihu ike, ẹka l'akakwa iya whọ l'ọma agụ. Chileke l'emeru iya eze-iwhe-ọma.

Nwata ono, bụ Jisọsu nọ l'eze-ụlo Chileke

⁴¹ Awha g'awha ha bẹ ndu nwụru nwata ono l'ejeje Jerúsalẹmu m'o rwulewho l'oge O-je-ghata.

⁴² O rwua gẹ Jisọsu gbarụ awha iri l'ẹbo, whẹ tụko jeshia Jerúsalẹmu lẹge whẹ l'ejejehawaa.

⁴³ E rigelewho oge ono whẹ tụgbua lwatashia. Nwata ono, bụ Jisọsu nọshia lẹ Jerúsalẹmu, ndu nwụru iya nụ ta amarọo.

⁴⁴ Whẹ tụgbua ala, jeekwaa ije ujiku owhu, tẹ whẹ wata iya achọcho nkele whẹ shinu arịle-ẹ l'ootso l'igbudu ndu ono, l'awụ l'echi-ụzo. Whẹ chọlahaa ya l'ẹka abụbu whẹ nọ mẹe l'ẹka ndu whẹ marụ nọ.

⁴⁵ Whẹ chọ-gee ya, whẹ ta awhụ iya, whẹ chọru iya dawhushia azụ lẹ Jerúsalẹmu.

⁴⁶ Whẹ chọo ya ujiku labọ, o belewho lẹ mbọku ọwhu kwe iya ẹto, whẹ whụa ya l'eze-ụlo Chileke l'ẹka yẹle ndu l'ezhije ndu Ju iwhe nọdukota. Ọ ngabẹ nchị l'iwhe whẹ l'ezhi, ajịkwa whẹ whọ ajị.

⁴⁷ Ọ dụkota iwhe bụ ndu l'anụ iwhe l'ookfu biribiri lẹge iwhe l'edobeje iya ẹnya mẹe lẹge o gude asa okfu ree.

⁴⁸ Ndu nwụru iya nụ whụle iya whọ, ọ kpụbe whẹ ọnu okfu. Ne iya sụ iya: “Nwa mu ?ndẹnu g'o gude i mee ya anyi ẹgube-ẹ? ?Ị marụ-a lẹ mu lẹ nna ghu gudekwa ẹnya-mini achọ ghu?”

⁴⁹ Ọ sụ whẹ: “?Ọ bụru gụnu bẹ unu l'achọru mu? ?Unu ta amahaada l'o rwuberu mu l'ọnodu l'ụlo Nna mu?”

⁵⁰ Okfu ono, o kfuru whẹ te edo whẹ ẹnya ilile.

⁵¹ O tsoru whẹ lashia Názaretu. L'ọonoje-zhiawho eme iwhe whẹ kfuru iya. Ne iya tụkokwawho iwhe g'iwhe ha ono pyachia l'ime obu iya.

⁵² Jisọsu l'ama agụ eje eje, evukwawho ivu eje eje, ọ dụ Chileke ree l'obu, dụ iya ndiwhe.