Luku 17 - BAYỊBURU Ẹzaa

Ome iwhe-dụ-ẹji

¹ Jisọsu sụ ndu l'etso ụzo iya: “O doru ẹnya l'o nwegeeru iwhe dụ l'iche l'iche l'ee-bekochaa mee tẹ madzụ shiswee ụzo Chileke, ọle nshọkwanu onye ono, l'oo-shi l'ẹka iya.

² Ọ gọgo karụ onye ono mma nggẹ l'ọo iwhe a patarụ ẹwhuru uswe nyabẹ iya l'olu je aparụ iya chee l'eze-ẹnyimu, amamẹ l'o meru t'onye lanụ l'ime ụnwegirima-a shiswee ụzo.

³ Unu kwachafụru onwunu ẹnya! “Ọ -bụru lẹ nwanna ghu mesweru ghu, kfuru iye ya, ọ daa onwiya ụta haa ome iwhe ọbu, gụ agụaru iya nvụ.

⁴ Nteke bụ l'o mesweru ghu ugbo ẹsaa l'ujiku lanụ, ọ byakfutakota ghu ugbo ẹsaa ono bya asụ ghu lẹ ya daakwaru onwiya ụta, gụ agụkotaru iyẹ ya nvụ.”

Ekwekwe

⁵ Ndụ-ishi-ozhi sụ Onye-Nwe-Ọha: “Nna, menua t'anyi kabaa okweshi ike.”

⁶ Ọ sụ whẹ “Nggẹ l'ekwekwe unu kweru nke Chileke habenu m'ọo g'ọo nwa ọrikirikwekwe akpụru mọsutadu mẹ unu adụjekwa ike sụ eze oshi sịkamayinu: ‘Whọfu onwoghu l'ẹka-a je akpọbe onwoghu l'ime eze-ẹnyimu;’ mẹ ya emee iwhe unu kfuru.

Iwhe gbarụ nwozhi l'ememe

⁷ “T'e woru iya l'onye lanụ lẹge unu ha bẹ nweru ohu, l'akọru iya ọkoro, ọdua ọ bụru onye l'echeru iya atụru. Nteke bụ l'ohu ono shi l'ẹgu lwa, ?Ịi-sụ iya t'ọ bya anọdulekwawho ria nri?

⁸ ?Iwhe l'ii-gbechia kfuru iya ta abụdu: ‘Shiaru mu nri ẹnyashi mu ẹgwegwa, gụ eyee uwe ghu gwofutaru mu nri tẹ mu riada, tẹmenu gụbedua eria nke ghu.’

⁹ ?L'oo-kele nwohuta ono ekele nkele o meru iwhe o zhiru iya?

¹⁰ O nokwawho gẹ unubẹdua dụ. Unu megelewho iwhe e zhiru unu, unu asụ: ‘Anyi bụ ndu ozhi, l'ẹte adụa iwhe anyi bụ, ọlewho iwhe gbarụ anyi l'ememe bẹ anyi meru.’ ”

Jisọsu l'eme tẹ ụmadzu iri njọkirehu l'eme mehu

¹¹ Gẹ Jisọsu l'eje Jerúsalẹmu ono bẹ l'ọoghata l'oge Samériya yẹle Gálili.

¹² Ọ bahụlewho l'ọma mkpụkpu lanụ, ụmadzu iri njọkirehu l'eme wụ-kfuta iya.

¹³ Whẹ nọdu otẹnya chia mkpu sụ: “Jisọsu! Onye-Nwe-Ọha! Whụnuaru anyi imiko!”

¹⁴ Jisọsu whụa whẹ, ọ sụ whẹ: “Unu je tẹ ndu l'agbajẹ ẹja nụ Chileke lelee unu.” Whẹ tụgbua jeshia, jenyaa l'ụzo njọkirehu ono mishihu whẹ l'ẹhu. Whẹ mehukota.

¹⁵ Onye lanụ whụlewho lẹ ya mehuwaru, ọ bya adakọbe dawhushia azụ, echi mkpu aja Chileke ajaja.

¹⁶ Ọ byarwulewho mgboro ọkpa Jisọsu, ọ bya adaa kpube iwhu l'alị wata iya okele ekele. Onye lanụ ono bẹ bụ onye Samériya.

¹⁷ Ọo ya bụ Jisọsu sụ: “?Tọ bụnua ụmadzu iri b'e meru whẹ mehu? ?Ndẹhunu ụmadzu tete ọwhuna?

¹⁸ ?Tọ dụ-zhihedua onye o rwuru l'ẹhu tẹ ya dawhu azụ bya ekele ekele, gbahalẹwho onye-e, shi alị ọdo-o?”

¹⁹ Jisọsu sụ nwoke ono: “Gbalihu jeshia iwhe l'iije. Ọo ekwekwe, i kweru nke Chileke meru t'ẹhu dụ ghu mma.”

Nteke Chileke l'e-goshi l'ọo ya bụ eze

²⁰ Ndu Fárisii jị Jisọsu sụ: “?Ọ hụnu nteke ole bẹ Chileke l'e-goshi l'ọo ya bụ eze ọbu?” Ọ sụ whẹ: “Chileke -bya l'egoshi l'ọo ya bụ eze bẹ l'oo-to mekwa iya nke ọwhu l'aa-whụ iya l'ẹnya.

²¹ Ọdua l'ọo t'a sụ: Lee ya l'ẹka-a, ọdua l'ọ whụ iya! O noo lẹ Chileke bụakwa eze ọbu l'ẹka unu nọ ntaa.”

²² Ọ sụ ndu l'etso ụzo iya: “Oge nọwho abya nteke l'ọo-dụje unu nggẹ l'ọ dụ g'e shi unu nọonu m'ọo ujiku lanụ l'ẹka Abụbu-Ndiwhe bụ eze, ọle unu ta anọdu iya.

²³ O nweru ndu ọwhu l'a-sụ unu: Unu lekwa iya l'ẹka whọ, ọdua t'unu lee ya l'ẹka-a. Unu be ejekwa, unu te etsohunuru whẹ.

²⁴ O noo l'ọo gẹ ebemu-igwe l'emeje whoo l'akpamigwe, shi l'ishi lanụ lọjaa je asụ l'ishi iya ọwhu bụ gẹ Abụbu-Ndiwhe l'e-me mbọku l'ọo-bya.

²⁵ Ọle o vufutaje ụzo jeeda iwhe-ọtsulanu ha l'igweligwe lẹge ọ gbarụ iya, tẹmenu ndu ọgbo elenu-a ajịkakwa iya whọ.

²⁶ Ọo g'ọ dụ l'ọgbo Nowa whẹ lẹ bụ gẹ l'ọo-dụ nteke Abụbu-Ndiwhe l'a-bya.

²⁷ Nteke ono bẹ whẹ nọdu eri angụ; alụwhe nwanyị; ekee ụnwanyi ji jeye mbọku Nowa whẹ bahụru l'eze ụgbo, ọ kụru. Utso bya agbaa rigbushia ndu ọwhu gẹ whẹ hakọta.

²⁸ O nokwawho g'ọ dụ l'ọgbo nke Lọtu. Whẹ l'eri angụ agba nghọ ere, emebekaa iwhe l'alị, atụshi ụlo.

²⁹ Obenu mbọku Lọtu lụfuru lẹ Sódomu, ore whuruwhuru ọku yẹle nshị-egbe shi l'igweli chịa g'ọo mini bya ekegbushikota ndu Sódomu gẹ whẹ ha.

³⁰ O noo gẹ l'ọo-dụ mbọku Abụbu-Ndiwhe l'e-he.

³¹ “Mbọku ono rwulewho, t'onye nọ l'ọkpoku iya, iwhe iya dụ l'ụlo, be ejekwa iya egwofuta. T'onye ọwhu nọ l'ẹgu be ejehekwa ọla l'uwhu.

³² Nyata g'ọ nwụru nyee Lọtu.

³³ Iwhe bụ onye l'eme tẹ ndzụ iya bụru iya urwu lẹ mgboko-o l'e-tuwhakwa ọkpobe ndzụ iya. Iwhe bụ onye tuwharu ndzụ iya lẹ mgboko-o bẹ l'a-nọdu ndzụ tututu-mịmimi.”

³⁴ Jisọsu sụkwa whẹ whọ: “Iwhe mu l'ekfuleruwho unu bụ l'ẹnyashi mbọku ono bẹ unwoke labọ l'a-zẹe l'okpo lanụ, e zhikota onye lanụ haa onye ọwhu.

³⁵ Ụnwanyi labọ l'a-nọ atsụ nri, a bya ezhikota onye lanụ haa onye ọwhu.

³⁶ Ụmadzu labọ l'a-nọdu l'ẹgu, e zhikota onye lanụ, onye ọwhu akwaa.”

³⁷ Ndu l'etso ụzo iya sụ: “Onye-Nwe-Ọha ?ọo l'awee bẹ iwhe ono l'e-me?” Ọ sụ whẹ: “Ọo ẹka odzu daburu, o noo ẹka udele l'e-dzukobeje.”