Luku 13 - BAYỊBURU Ẹzaa

Daa onwoghu ụta iwhe-dụ-ẹji, l'iimegbabe

¹ O nweru ndu nọ l'ẹka ono nteke ono, kfuru Jisọsu nke ndu Gálili ono Páyileti gbushiru l'ẹka whẹ nọdu agba ẹja Chileke, mmee whẹ gwakọbe lẹ mmee iwhe e gburu Chileke.

² Ọ sụ whẹ: “?Unu doberu sụ lẹ ndu Gálili ono, e gburu nno bẹ kakọta ndu Gálili ọdo ome iwhe-dụ-ẹji kpatarụ iwhe e meru whẹ nno?

³ Mu sụru unu: Waawa-o! Lẹ nteke ọ bụ l'unu ta adadụ onwunu ụta haa ome iwhe-dụ-ẹji, unu l'emegbabe, lwakfuta Chileke, bẹ unubẹdua l'a-lakọtakwawho l'iyi nno.

⁴ Tọo ụmadzu iri l'ẹsato ọwhu ụlo-eli, ha l'eli shi dụ lẹ Sayilówamu zeshihuru bya atugbushia who, unu nọdu sụ lẹ whẹ ka ndu Jerúsalẹmu ndu ọwhu ome ejo-iwhe?

⁵ Mu sụru unu: Waawa-o! Lẹ nteke ọ bụ lẹ unu ta adadụ onwunu ụta haa iwhe-dụ-ẹji, unu l'emegbabe lwakfuta Chileke, bẹ unubẹdua l'a-lakwawhọ l'iyi nno.”

Ẹtu oshi, l'ẹte amịa mebyi

⁶ Ọ bya anmaarụ whẹ ẹtu-a sụ: “Ọo nwoke lanụ bẹ nweru figu, o yeru lẹ mgbabu vayịnu iya. Nwoke ono l'abyajẹ iya agbawhe tẹ ya marụ, ọ mịtaru mebyi. Ya aadụ iwhe l'ọo-whụ iya.

⁷ Ọ sụ onye ozhi mgbabu vayịnu ono: ‘Ị whụnua lẹ mu byawaru awha ẹto owhu bya elee ẹnya mebyi l'oshi figu-a, ọle ọ tọ dụdu iwhe ọ mịtaru. Gbutsua ya! ?Ndẹe iwhe l'oo-kwobehunu nọdu ndzụ, emebyishiru mu alị?’

⁸ Onye ozhi mgbabu ono sụ iya: ‘Onye-Nwe-Ọha, byiko hafụa ya rọ awha lanụ-a tẹ mu tsovua ukfu iya atsovu, yewhee ya ọzu mgburumgburu.

⁹ Nteke bụ l'o -beru akele ọ -myịa mebyi, ọo ya bụ l'ọ dụ ree, nteke l'ọoto mịa, ọo ya bụ gụ egbutsuwa iya ro.’ ”

Jisọsu l'eme tẹ nwanyị họru akfụ mehu lẹ mbọku ọtuta-ume

¹⁰ O be nteke Jisọsu nọ l'ụlo-ndzuko ndu Ju ono nnanụ, ezhi iwhe lẹ mbọku ọtuta-ume ndu Ju,

¹¹ o nweru nwanyị ọbu, nọ l'ẹka ono, ọgvu mewaru awha iri l'ẹsato, o mewaa nwanyị ono ọ họo akfụ nke bụ l'ọ tọo dụjehedu ike machịa onwiya amachị.

¹² Jisọsu bya awhụlewho nwanyị ono, ọ gbaku iya oku sụ iya: “Nwanyị! I nwewaru onwoghu l'iwhe ono, l'eme ghu nụ.”

¹³ Ọ bya ebyibe iya ẹka, nwanyị ono machịa onwiya nteke ono kfụru nhamụnha. O kelelahaa Chileke ekele.

¹⁴ Ẹhu ghulahaa onye ishi ụlo-ndzuko eghu lẹ Jisọsu meru t'onye ẹhu l'eme mehu mbọku ọtuta-ume. Onye ishi ono sụ ndu ono: “Abalị ishii b'e doberu t'e jejee ozhi, unu byajẹ t'e mee unu t'unu mehu l'iwhe l'eme unu nteke ono, unu ba abyajẹshi mbọku ọtuta-ume.”

¹⁵ Onye-Nwe-Ọha sụ iya: “Iwe-l'obu-ọchi-l'ọnu-eze whẹ! ?Unu ta atụfujedu eswi unu l'ẹhu l'ẹhu, ọdua l'ọo nkakfụ-ịgara unu l'ụwoko iya chịru iya jeshia ẹka l'ọonguta mini mbọku ọtuta-ume?

¹⁶ Sụa, nwanyị-a bụkwa onye ọzo-ụlo Ébirihamu, Sétanu keru ẹgbu eshi awha iri l'ẹsato-ọ ?tọ gbadụ t'a tọfu iya l'ẹgbu ono mbọku ọtuta-ume?”

¹⁷ O kfugelewho nno iwhere gude ndu ono l'atatso iya okfu ono. Ndu ono, dọru l'ẹka ono tụko telahaa ẹswa eze-iwhe-ọma ono, Jisọsu l'emekaa.

Iwhe e gude a tụberu ẹka Chileke bụ eze

¹⁸ Jisọsu sụ: “?Ọo gụnu bẹ abụbu, Chileke bụ eze dụ g'ọo ya? ?Ọo gụnu bẹ mu l'a-tụru iya yeru?

¹⁹ Ọ dụ g'ọo akpụru iwhe-akụ mọsutadu, nwoke wotaru je akụa lẹ mgbabu iya. O fua vuta, bya abụru oshi ẹka iya nke ọwhu ụnwu-ẹnu l'ewhe l'eli bya bya akpalahaa ẹkfunu l'ẹkali iya.”

²⁰ Ọ sụkwa whẹ ọdo: “?Ọo gụnu bẹ mu l'a-tụru yeru abụbu, Chileke bụ eze?

²¹ Ọ dụ g'ọo iwhe-l'ekoje-buredi, nwanyị hatarụ nwanshị gwakọbe l'ụturutuu-iwhe l'eegudeje eme buredi, mbụ ụturutuu-iwhe, jiru efere nkwẹka ẹto. O wota iya dobe jeye ọ tụko koo eko.”

Ụzo dụ wẹrere

²² Jisọsu l'ejelekwawho ụzo Jerúsalẹmu l'ooje. L'ọoghatakaa l'obodo mẹe lẹ mkpụkpu lẹ mkpụkpu ezhikaa iwhe.

²³ Ọo ya bụ, o nweru onye sụru iya: “Onye-Nwe-Ọha-e! ?Ndu ọwhu l'aa-dzọta, whẹ l'a-ha nwanshị?” Ọ sụ whẹ:

²⁴ “Unu kpata ụzo shia ụzo ọwhu dụ nwa wẹrere bahụ, o noo l'aa-dụ l'igwe eme t'a bahụ, ọle whẹ ta adụdu ike.

²⁵ A nọnya-zhiwaa onye nwe ụlo gbashi je agụ-chia ụzo, bẹ unu l'a-kfụru l'etezhi akụ ẹka l'ụzo sụ: ‘Onye-Nwe-Ọha, gụhaaru anyi ụzo.’ “Ya asụ unu: ‘Mu ta amakwa ndu unu bụ, mu ta ama ẹka unu shi-o!’

²⁶ “Unu awata anọ ekfu sụ: ‘Mẹ anyi rikwaru, ngụa l'iwhu ghu, tẹmenu i zhia iwhe lẹ nggamgbo anyi.’

²⁷ “Ọle ọo-sụkwawho unu: ‘Mu sụru lẹ mu ta amadụ ẹka unu shi eshi bya, unu gbashikwa mu l'iwhu g'unu ha, unubẹ ọ-karia-ẹka whẹ ono!’

²⁸ “O noo ẹka unu l'a-nọdu ryaa ejo ẹkwa, taa ikireze nteke unu l'a-nọlewho ele Ébirihamu ẹnya mẹe Áyiziku mẹe Jékọpu mẹwaro ndu nkfuchiru Chileke gẹ whẹ nọ l'ẹka Chileke bụ eze, unubẹdua abụru ndu ọwhu a chịfuru achịfu.

²⁹ Ndu madzụ l'e-shi l'ụzo ẹnyanwu-awata mẹe l'ụzo ẹnyanwu-arịba mẹe l'ụzo isheli mẹe l'ụzo ọhuda bya l'eriri l'ẹka Chileke bụ eze.

³⁰ Unu whụlewho l'o nweru ndu bụ ikpazụ l'ee-mekochaa bụru ivurụzo, o nwekwaruwho ndu bụ ivurụzo l'ee-mechakwanua bụru ndu ikpazụ.”

Jisọsu yeru Jerúsalẹmu obu

³¹ Nteke onowho b'o nweru ndu Fárisii bya bya asụ Jisọsu: “Shilekwawho l'ẹka-a tụgbua ntaa lụfu lẹ Hẹ́rodu l'achọkwa tẹ ya gbua ghu.”

³² Ọ sụ whẹ: “Unu je akarụ awuru ono lẹ mu l'a-chịfu ọgvu, mekwaawho tẹ ndu ẹhu l'adụa mma mehuada ntanụ-a yẹle echile, o be lẹ mbọku ọwhu kwe iya ẹto, ozhi mu agvụ.

³³ Ọle g'ọ dụle-zhia bẹ mu l'a-nọlewho eje iwhe mu l'eje ntanụ mẹe echile yẹle nwarechi, o noo l'ọ tọ dụdu ẹka ọdo onye nkfuchiru Chileke l'a-nwụhu gbahaa lẹ Jerúsalẹmu.

³⁴ “Oowa! Gụbe Jerúsalẹmu! Ị tụkoru ndu nkfuchiru Chileke egbugbushi, gudekwawho ẹwhuru atugbushi ndu lile, e zhiru tẹ whẹ byakfuta ghu. Ugbo olemole bẹ mu mewaru tẹ mu chịkobe ụnwu ghu ẹka lanụ lẹge nukfu-ọku l'achịkobeje ụnwu iya l'ime ẹba iya kpupyabe, ti kwe ekwe!

³⁵ Lelewho l'ibe ghu bẹ l'aa-parụ haa, ẹgbara akfụa ya. Tẹ mu kfuleru ghu iya whọ l'unu ta abyadụ l'a-whụ mu ọdo jeye nteke unu l'a-sụ: ‘Chileke gọbukwaaru ọnu-ọma nụ onye ono, gude ẹwha Onye-Nwe-Ọha abya ono.’ ”