Luku 12 - BAYỊBURU Ẹzaa

Iwhe-l'ekoje-buredi ndu Fárisii

¹ Nteke onokwawho bẹ ụnukurunu madzụ zakọru l'ẹka ono nke ọwhu bụ mkpẹekwo daa, ya adakoru l'eli madzụ. Ọ bya evuru ụzo kfuru yeru ndu l'etso ụzo iya sụ whẹ: “Unu kwachafụkwa ẹnya zelajeeru iwhe-l'ekoje-buredi ndu Fárisii, bụ iya bụ iwe-l'obu-ọchi-l'ọnu-eze ono, whẹ bụ.

² Ọ tọ dụkwa iwhe bụ iwhe e kpuchiru ekpuchi l'eete emekochaa kpuhaa, tọ hẹ l'ọ dụ-zhia iwhe e domiru edomi l'eete emekochaa madzuru.

³ Ọo ya bụ l'iwhe lile, unu kfuru l'ẹkpuroochi bẹ l'aa-nụkota l'iwhoro, iwhe unu dzụru lẹ ndzụdzuka l'ọhulo unu bẹ l'aa-rya aryarya t'onyenọnu nụ-dzuru.”

Onye unu l'a-tsụje egvu

⁴ “Tẹ mu karụ unubẹdua, bụ ndu ọnya mu iwhe: Unu ba atsụkwa ndu bụ ogwẹhu mmaanụ bẹ whẹ l'a-dụ ike gbua egvu, mbụ ndu bụ whẹ gbugewaa ogwẹhu, ya abụru ẹka ono bụ ẹka ike whẹ beru.

⁵ Tẹ mu karụ unu onye unu l'a-nọ atsụ egvu: Onye unu l'atsụje egvu bụ onye ono, bụ o -gbugee egbu, ya enwekwaruwho ike l'oo-gude nwuru ghu chee l'ọku-alị-maa. Ee! O noo gẹ mu kfuru. O noo onye unu l'a-nọ atsụje egvu ndono.

⁶ “?Tọ bụnua peni l'abọ bẹ l'eereje ọchi-l'igwe ise? Ọle Chileke ta adụkwa ọchi-l'igwe m'ọo nnanụ l'ọonyohaje.

⁷ Mbụkwa, ẹgbushi dụ unu l'ishi b'ọ gụkotakwaru ọgu nnanụ nnanụ. Unu ba atsụshi egvu. Unu ka mkpa karia igweligwe ọchi-l'igwe.”

Ọnodu l'edzudzu-ọha ekfu lẹ a bụ onye nke Kuráyisutu

⁸ “Ọdo bụ tẹ mu karụ unu; iwhe bụ onye kfụru l'edzudzu-ọha kfua ya hoohaa lẹ ya bụ nke mụbe Jisọsu bẹ mụbe Abụbu-Ndiwhe l'e-kfukwawho l'iwhu l'edzudzu-ọha ojozhi-imigwe l'onye ono bụ nke mu.

⁹ Ọle onye kfụru l'edzudzu-ọha kfua lẹ ya ta amadụ onye mu bụ, onye ono bẹ mu l'e-kfukwawho lẹ mu ta amadụ onye ọ bụ l'iwhu edzudzu ọha ndu ojozhi-imigwe.

¹⁰ “Iwhe bụ onye l'ekfuru Abụbu-Ndiwhe ejo okfu bẹ Chileke l'a-gụru iyẹ ya nvụ, ọle onye kfubyiru Ume-Dụ-Nsọ bẹ Chileke l'ẹte agụkwaru nvụ.

¹¹ “Nteke bụ lẹ whẹ kpụtaru unu je edobe l'ụlo-ndzuko, ọdua l'ọo l'iwhu ndu ishi, ọdua l'ọo l'iwhu ndu govumenti, t'unu ba achịkwa uche l'ẹka sụ ?ndẹ-zhia g'unu l'e-shi gọfu, ọdua l'ọo iwhe unu l'e-kfu, ọdua l'ọo g'unu l'e-dobe ọnu kfua ya kpefu onwunu.

¹² O noo lẹ Ume Chileke l'e-goshia unu iwhe unu l'e-kfu nteke ono.”

Ẹtu onye eswe barụ eze

¹³ Onye lanụ l'ime igweligwe ndu ono sụ iya: “O-zhi-iwhe, ryọnua nwune mu nke nwoke tẹ mu l'iya kee iwhe rwuberu anyi l'iwhe nna anyi setaru doberu anyi.”

¹⁴ Jisọsu sụ iya: “Nwoke ?ọo onye meru mu tẹ mu bụru onye l'ekpejeru unu ikpe, ọdua l'ọo tẹ mu bụru onye l'a-nọ ekeru unu iwhe unu?”

¹⁵ Jisọsu sụ ọha ono: “Unu tọkwa nwẹhu zelaaru iwhe bụ-zhia iwhe l'aakpatajẹ ooye ẹnya l'ẹku mgboko-o, l'ọkpobe ndzụ madzụ te eshikwa l'ẹku, ọ kparụ kụbe ebehuduru ẹku ọbu ha agha.”

¹⁶ Ọ nmaarụ whẹ ẹtu sụ: “Ọo nwoke lanụ, nweru iwhe bẹ je akọo okfu, ọ kpata iwhe ha shii l'ẹka ono.

¹⁷ Ọ bya arịlahaa l'ego sụ: ‘?Ndẹnua iwhe mu l'e-me ntaa gẹ l'abụhedua lẹ mu nweru ẹka mu l'a-kụbekota iwhe-e?’

¹⁸ Ọ sụ: ‘Mu mawarụ iwhe mu l'e-me: Mu l'e-gbukashi ọba mu kpọlibebaaru iya t'ọ kabaa ọsa, ya abụwaruro ẹka mu l'e-kpoko mebyi iwhe mu mẹe iwhe mu nwe enwe kụbe.

¹⁹ Ọo ya bụ mu asụ: Ndzụ mu, iwhe kwewaru ghu. Iwhe ọwa zhiawho iwhe l'e-dzu ghu eriri l'awha ha l'igweligwe, dzuta ike ntaa rijezhiawho iwhe eriri, gụ angụ nke angụngu t'ẹhu tsọje ghu ụtso.’

²⁰ Ọle Chileke sụru iya: ‘Onye eswe! Ẹnyashi-a bẹ l'aa-nata ghu ndzụ ghu ono. Iwhe lile ọbu i dokoberu onwoghu-a, ?ọo onye l'e-ri iya ntaa?’

²¹ “O noo g'onye l'akparụ onwiya ẹku tọ dụkwanu iwhe ọ bụ l'iwhu Chileke dụ ndono.”

Oye Chileke iwhe lile l'ẹka

²² Jisọsu sụ ndu l'etso ụzo iya: “O noo iwhe meru mu sụ unu t'unu ba achịkwa uche l'ẹka l'okfu ndzụ unu mẹe iwhe unu l'e-ri. Unu eje achịje uche l'ẹka l'okfu uwe, unu l'e-yeje l'ẹhu.

²³ O noo lẹ ndzụ ka mkpa karụ nri, ogwẹhu ka mkpa karụ uwe.

²⁴ Lewaro egbe-nwọku; o too mebejekwa iwhe l'alị, whẹ te ejeje akpata l'ẹka e meberu iya, whẹ te enwe ụlo ẹku, whẹ ta agba ọba; ọle Chileke l'anọjelekwaa azụ whẹ. Unu ta amadụ l'unubẹdua ka ọbu ọkpobe iwhe, amamẹ ẹnu ugbo ụkporo l'ụnu?

²⁵ Tẹ ?ndẹe onye ọwhu ọbu lẹge unu ha bụ: ?o chịnyaaru uche l'ẹka, ya eyekwa ujiku owhu lẹ ndzụ iya.

²⁶ Ọo ya bụ, ọ -bụru l'unu ta adụdu ike emebe nwiwhe habe nwanshị nno, ?ọo gụnu meru unu chịru uche l'ẹka l'iwhe ọdo warọ?

²⁷ Unu lewaro nkashị-iyi gẹ l'ọonoje evu; o too sebejekwa anya, tọ gbajẹ oghu gude kwaa uwe. Ọle iwhe mu l'ekfuru unu bụ l'ọ tọ dụkwa m'ọo Sólomọnu whọ, bụ iya kagezhia oyetaru uwe l'ama ụma, yeru ọwhu l'amabe ụma g'ọo nke nkashị-iyi lanụ.

²⁸ Ọ -bụru lẹ Chileke letaberu ẹswa, dụ l'ẹgbudu ẹnya nno, nke anọ eyeje iya uwe t'ọ ma ụma, l'iwhe bụ: ọ -nọdu ndzụ l'ẹgbudu ntanụ, echile e tsebe iya l'ọku, ?too gbechiduanu ka unu oleta ẹnya, akwa unu ngwa? mbụ unubẹdua, ekwekwe, unu kweru l'ẹte abaa nwishi-a?

²⁹ Ọo ya bụ, t'unu ba anọjeshi kuwhe walaa l'okfu iwhe unu l'e-ri mẹe iwhe unu l'a-ngụ.

³⁰ O noo l'ọo iwhe lile ono bẹ bụ iwhe ndu l'ẹte amaa Chileke l'eli-mgboko-o tụkoru achọkaa. Nna unu makwarụ-a lẹ mkpa iwhe lile ono dụkota unu.

³¹ Unu chọodaa gẹ l'ee-shi tẹ Chileke bụru eze lẹ ndzụ unu, ọo ya bụ iwhe lile ono abụkotaru iwhe l'ee-yekwaru unu eyekwaru.

Ẹku imigwe

³² “Unu ba atsụshi egvu unubẹ ụnwu ndọkobe atụru l'ẹte ahaa l'igwe, o noo l'ọ dụ Nna unu ree ọkpobe adụdu t'iya mee t'unu l'iya tụko bụru eze.

³³ Unu reshigezhia iwhe bụ iwhe unu nweru gude meeru ndu l'adụa g'ọ harụ whẹ iwhe-ọma. Unu metaru onwunu nwẹkpa peni ọwhu bụ akahụ akahụ, kpaa ẹku unu dobe l'imigwe, bụ ẹka l'ọo-byaa l'alwa alị nkele ndu oshi te ejedu iya, ẹka-mkpu ta abya l'a-tapyashị iya.

³⁴ O noo l'ọo ẹka ẹku unu, kakọta unu mkpa dụ bẹ bụ ẹka obu unu l'adụjekwawho.

Ndu ozhi, nwụ ẹnya

³⁵ “Unu lishia anụma unu ike l'ukfu, t'ọku nwukwawho enwu l'oryọku unu.

³⁶ Unu dụ g'ọo unwokoro, nwụ ẹnya ngabẹru onye-nwe-whẹ-nụ t'ọ lwa ẹswa-nwanyị, o jeru nggẹ whẹ gụhakeberu iya ụzo mẹ ọ bya bya akụa ẹka l'ụzo.

³⁷ Ẹhu-ụtso bụ nke ndu ozhi ono bụ nteke onye-nwe-whẹ-nụ l'a-byatashia, whẹ anwụru ẹnya. Tẹ mu kfukwaa ya t'o doo ẹnya, ọo-rwụkota onwiya bya edobe whẹ gẹ whẹ bụ ẹbyii, yẹbedua abya bya akwashịderu whẹ nri l'ishi onwiya, whẹ eria.

³⁸ Ẹhu-ụtso bụ nke ndu ozhi ono m'ọ -bụru l'echi-abalị b'ọ byakfutaru whẹ, whẹ nwụkwaduru ẹnya ono, ọ bụ l'okọku-ọha-ẹnu b'ọ byakfutaru whẹ nno.

³⁹ Ọle iwhe ọdo, unu l'a-ma bụ lẹ-a: nggẹ l'ọo iwhe oke-nwe-uwhu dụ mbụ marụ nteke iwhuru l'a-bya ibe iya mẹ ya eche nche. Ọ tọgo hakwa t'iwhuru ono tsufua ụlo iya bata.

⁴⁰ Unubẹdua l'onwunu, unu kwachafụkwawho ẹnya, o noo lẹ Abụbu-Ndiwhe l'a-bya l'oge nteke unu l'ete ele ẹnya iya.”

Ozhi, e yeru ghu l'ẹka bẹ l'a-jị ghu ajị iya

⁴¹ Pyita sụ iya: “Onye-Nwe-Ọha ?ọo anyịbedua bẹ l'ịinma ẹtu ono anmaturu, tọo ọha?”

⁴² Onye-Nwe-Ọha sụ: “?Ọo onye bẹ bụ onye ono l'eletaru madzụ ẹnya l'uwhu, mbụ onye goshiru lẹ ya gbarụ t'e gude ire iya ẹka, tẹmenu ọ bụkwaruwho onye marụ ágụ? Ọo ya bẹ bụ onye ono onye-nwe-iya-nụ doberu t'o letaru iya ibe iya ẹnya, nụje ndibe iya nri whẹ lẹ mgbe iya.

⁴³ Ẹhu-ụtso bụ nke onye ono, m'ọ -bụru l'onye-nwe-iya-nụ ono l'a-lwa, bya awhụ iya gẹ l'oome iwhe ono, e zhiru iya.

⁴⁴ Iwhe mu l'ekfuru unu bụ l'onye-nwe-uwhu ono l'e-wota iwhe lile o nwe enwe yekota onye ono l'ẹka.

⁴⁵ Ọle ọ -bụru lẹ nwozhi ono rịru sụ: ‘Ha! Ha! Ha! Onye-nwe-mu-nụ l'anọokwaa ọdu shii tọ lwa’ ọ bya awata anọ echikashi ndu ozhi nwoke ono iwhe, unwoke mẹe ụnwanyi, eri iwhe eriri angụkwawho iwhe angụngu g'ẹhu ha iya; angụshi mmẹe ike.

⁴⁶ Onye-nwe-iya-nụ l'a-lwa mbọku l'ooto ole ẹnya iya mẹe nteke l'ọoto maa bya asakahụ iya ẹbo, gụru iya yeru ndu ọwhu bụ ekfu-ba-anụ.

⁴⁷ “Iwhe ọdo bụru; onye ono magerua uche-obu onye-nwe-iya-nụ, tọ kwakọbe, ọdua t'o me iwhe bụ obu onye-nwe-iya-nụ ono, bẹ l'ee-gudekwa ẹchachi nụa ya áwhụ.

⁴⁸ Ọle onye l'ẹte amaa uche-obu onye-nwe-iya-nụ, o -meta iwhe ẹchachi bẹ l'aa-tụswi ẹchachi nwa atụswi l'ẹhu. Onye a nụru iwhe ha shii bẹ l'ee-le ẹnya iwhe ha shii l'ẹka, onye e yeru iwhe ha shii l'ẹka t'ọ kwakọbe bẹ l'aa-jịkwawho ajị iwhe kabaanụ shii.”

Ọ tọ dụ nchị-ọdu-ndoo, ọo ọbokahu ndiwhe

⁴⁹ “Mu byarụ ọto ọku l'eli-mgboko, mbụ ọ dụkwa mu nke t'a sụ l'ọku ono l'adzụwaa adzụ ntaa.

⁵⁰ O nweru baputizimu, e mefutaje mu, bụ iya bụ lẹ mu jefutaje iwhe-ọtsulanu. Obu ta anmakfukwaru mu anmakfuru ilile jeye nteke l'ee-medzuada iya.

⁵¹ ?Unu nọdu gẹ mu byarụ ome tẹ nchị dụ ndiwhe ndoo lẹ mgboko. Awakwa, mu l'ekfuru unu l'iwhe mu byachiaru bụ tẹ mu bya abọkahu madzụ yẹle ibe iya.

⁵² O noo lẹ shitalewho ntaa bẹ uwhu a dụ ise buru bẹ l'a-ghakahụlewho, ụmadzu ẹto l'a-bụ ọgu ụmadzu l'abọ, ụmadzu labọ abụru ọgu ụmadzu ẹto.

⁵³ Whẹ l'a-lịkahu, nna abụru ọgu swiru nwa iya, nwa abụru ọgu swiru nna iya. Ne abụru ọgu swiru nwa iya nke nwanyị, nwa iya nwanyị abụru ọgu swiru ne iya. Niko nwamgbọko abụru ọgu swiru nyee nwa iya, nyee nwa abụru ọgu swiru niko iya.”

Ọma gẹ ụboku dụ

⁵⁴ Ọ sụ ndu ono gẹ whẹ ha: “Ọobuje nteke unu whụru igweli, l'oorwu erwu, shi l'ụzo ẹnyanwu-arịba erwu abya, unu ahabuhulekwawho l'igweli byakwa l'e-me nwa tẹshiteshi mini. Ya erelekwaruwho unu.

⁵⁵ Nteke unu whụru lẹ whẹrewhere shi l'ụzo ọhuda ewhe abya, unu asụkwa l'okpomọku l'abyaakwaa, ya erekwaaru unu.

⁵⁶ Unubẹ ọka l'iwe-l'obu-ọchi-l'ọnu-eze! Unu l'amajẹ gẹ unu l'e-shi chịkaa ẹnya lee l'alị, lee l'igweli, unu akọta gẹ mbọku dụ dụ ?ọo gụnu meru unu ta adụje ike kọo gẹ ntaa elenu-a dụ dụ?

Tẹ gụ l'onye gụ l'iya l'ese okfu doshijee

⁵⁷ “Mbụ ?ọo gụnu meru unu ta achịje idzu l'ime obu họta iwhe dụ chịriri mee.

⁵⁸ Nteke onye gbarụ ghu ẹkwo kpụ ghu eje kọtu, kebekwa ẹhu tẹ gụ l'iya doshia l'echi-ụzo nggẹ onye ono ta akpụru ghu je anụ onye ikpe, onye ikpe akpụru ghu ye l'ẹka ndu ọgbogu; ọgbogu akpụta ghu je atụa ghu mkpọro.

⁵⁹ Tẹ mu karụ ghu: Ị tịi fụtakwa l'ẹka ono jeye nteke l'ịi-kfụkotaadaa iwhe e gbeberu ghu iwu iya, i -kfuwhodo iya m'ọo afụ bẹ l'aata ahakwa ghu.”