Luku 11 - BAYỊBURU Ẹzaa

Jisọsu l'ezhi gẹ l'eekfujeru nụ Chileke

¹ Ọ bya ebe ujiku lanụ, Jisọsu nọdu l'ẹka lanụ ekfu anụ Chileke. O kfugele iya who, onye lanụ l'ime ndu l'etso ụzo iya sụ iya: “Onye-Nwe-Ọha, zhinua anyi gẹ l'eekfujeru nụ Chileke lẹ gẹ Jọnu zhiru ndu l'etso ụzo nkiya.”

² Ọ sụ whẹ: “Nteke unu l'ekfu anụ Chileke t'unu sụje: “ ‘Nna, t'e dobe ẹwha ghu nsọ. Goshinu l'ọo ghu bụ eze.

³ Nụnu anyi nri mbọku lẹ mbọku, nri l'e-dzu anyi eriri l'ụboku.

⁴ Gụnuaru anyi nvụ l'iwhe-dụ-ẹji, anyi metagbaberu, nkele anyịbedua l'agụjekwaruwho onye mesweru anyi nvụ. Be ekwekwa t'anyi dalahụ l'iwhe l'a-data anyi.’ ”

⁵ Jisọsu sụ whẹ: “T'e wota iya l'onye lanụ lẹge unu ha l'e-je ibe ọnya iya l'echi-abalị je asụ iya: ‘Ọnya-a-e! Jenua mu ụgwo ishi buredi ẹto,

⁶ l'ọnya mu, shi ẹka teru ẹnya bẹ byarụ ibe mu, mu te enwe nri, mu l'a-nụ iya.’

⁷ T'e wokwaru iya who l'ọnya ghu ono l'a-nọdu l'ime ụlo sụ ghu: ‘Be ekfuchishi mu nchị! Mu gụ-chiwaru ụzo, swọbe iya iwhe. Mu l'ụnwu mu zẹwaa azẹe. Tọ hẹ lẹ mu l'agbashikwadu ntaa abya ghu ọnu buredi.’

⁸ Tẹ mu kfuleruwho unu, ọ -bụru l'ọ tọ gbashidu bya anụ iya buredi ono, nkele ọ bụ ọnya iya, ya ekwobenu nkele ookfuchi iya nchị, iwhere ta adụ iya rọ bya anụ iya iwhe ọbu, ọ byarụ t'ọ nụ iya.

⁹ O noo iwhe meru mu sụ unu: Unu kfujee t'a nụ unu iwhe; aa-nụ iya unu! Unu chọjee iwhe; unu l'a-chọta! Unu kụjee ẹka l'ụzo; aa-gụharu iya unu.

¹⁰ O noo l'iwhe bụ onye sụru t'a nụ iya bẹ l'aanụjekwa; onye chọru nụ l'a-chọtaje; onye kụru ẹka bẹ l'aa-gụharu ụzo.

¹¹ Tẹ ?ndẹe g'unu ha, bụru nna, dụ onye ọwhu nwa iya l'a-sụ iya t'ọ nụ iya ẹma, ya achịru agwọ nụ iya.

¹² Ọdua nteke nwata ọbu sụru t'ọ nụ iya ẹkwa-ọku, ya abụru akpị bẹ l'oo-woru dẹe ya l'ẹka?

¹³ Ọo ya bụ, ọ -bụru l'unubẹdua, bụ ndu ejo-iwhe l'amajẹ nụ ụnwu unu iwhe dụ ree ?ọ chianu Nna unu ono, bu l'imigwe ta akabadụanu ama gẹ l'oo-me nụ unu Ume-Dụ-Nsọ, mbụ unubẹ ndu sụru t'ọ nụ iya unu.”

Ẹka ike Jisọsu shi

¹⁴ Ọ byakwa ebe nteke ọdo, Jisọsu l'achịfuta nwoke ọgvu, bu iya l'ẹhu, ọgvu ọbu nmaa nwoke ono nswe to kfu okfu. Ọgvu ono l'ẹte ekfu okfu lụfulewho nwoke ono l'ẹhu, nwoke ono kfulahaa okfu. Ọ kpụbe igweligwe ndu ono ọnu okfu.

¹⁵ O nweru ndu ọwhu sụru l'ọo ike ọgvu Biyélezebọlu, bụ iya bụkota ishi l'iwhe bụkota ọgvu kpamụ-kpamụ b'o gude achịshi ọgvu.

¹⁶ Ndu ọwhu bya agbaarụ iya ọnya okfu eme tẹ whẹ nmata iya. Whẹ sụ iya t'o meeru whẹ iwhe-awhụrulenya l'egoshi l'ọo Chileke zhiru iya l'ezhi.

¹⁷ Jisọsu marụ iwhe whẹ l'arị, ọ sụ whẹ: “Alị-eze -kewaa onwiya ẹbo selahaa okfu, alị-eze ọbu bụakwa iyi. Nteke bụ l'ọo ndu uwhu lanụ keru onwowhe ẹbo sede okfu, uwhu ọbu echihu.

¹⁸ Nteke bụkwawho lẹ Sétanu bẹ kụru okfu ye l'ibe iya ?ndẹkwadu gẹ alị-eze iya l'e-me keru mẹ unu sụ l'ọo Biyélezebọlu bẹ mu gude achịshi ọgvu?

¹⁹ Ọ -bụnuru l'ọo Biyélezebọlu bẹ mu gude ike iya achịshi ọgvu ?ọo onye bẹ ụnwu unu whẹ gude ike nkiya achịshi nke whẹ? Ọ kwa iya bụ l'ọo ụnwu unu ono l'e-goshiwaro l'ikpe nmarụ unu.

²⁰ Nteke bụkwanu l'ọo ike nke Chileke bẹ mu gude achịshi ọgvu ọbu, ọo ya bụ l'o noo iwhe l'egoshi lẹ Chileke bụwaa eze l'ẹka unu nọ.

²¹ “Mkparawa, akwara dụ l'ẹhu -kwaa onwiya ngwọgu kwarwee ya akwarwe, eche ibe iya nche ?tị madụ l'ọ tọ dụdu iwhe l'e-me iwhe iya?

²² Ọle nteke onye ka iya ẹkuku byabya afụru iya lwugbua ya, ya abya atụko ngwọgu ono, mkparawa ono shi tuchobe obu natagee, ya atụko iwhe mkparawa ono gwotakota je ekekashia.

²³ “Onye yẹle mụbe Jisọsu l'ẹte abụa ẹhu, bẹ bụkwa onye ọhogu mu. Onye l'ete etsoo mu achịkobe iwhe achịkobe bẹ l'aakpakashị iya akpakashị.”

Iwhe l'akpatajẹ ọgvu alwawhu azụ

²⁴ “Ọobuje nteke a chịfuru madzụ ọgvu l'ẹhu, ọgvu ono eje etsoru echi-ẹgu, ẹka mini l'ẹte adụa aghawhe, achọ-whe ẹka iya l'a-nmẹe. Nteke o jenyaaru, tọ dụ ẹka ọ whụru, ya asụ lẹ ya l'a-dawhushikwa azụ l'akahụ ụlo iya whọ.

²⁵ Nteke ọ byatashiaru, a zawa iya aza, dozhigee ya ree,

²⁶ ya eje achịta ọgvu ẹsaa ọdo, kabaarọ yẹbedua igiri yeru onwiya, whẹ awụba je eburu l'ẹka ono. Ndzụ onye ono ẹgbeenu bya aka njọ nteke ono, amamẹ g'o shihawaa dụ lẹ mgbe mbụ whọ.”

Ọkpobe iwhe ekweru

²⁷ Jisọsu kfugelewho iwhe ono, nwanyị lanụ l'ime igwe-ọha ono chishia sụ iya: “Iwhe kwekwaru nwanyị ọwhu parụ ẹwho ime ghu, chee ghu ẹra.”

²⁸ Jisọsu sụ iya: “Waawa! Iwhe kwechiaru ndu l'anụje okfu Chileke eme iya eme!”

Eekfu tẹ Jisọsu goshi l'ọo Chileke zhiru iya

²⁹ O be nteke igwe-ọha ono l'akalẹwho shii aka eje, Jisọsu kfulahaa sụ: “Ọgbo elenu-a bẹ panụkakwaru ẹji. Whẹ l'achọ t'e goshi whẹ iwhe-awhụrulenya, l'e-goshi l'ọo whọ Chileke zhiru mụbe Jisọsu tẹ mu bya ọkpobe iya. Ọle ọ tọ dụkwanu iwhe-awhụrulenya ọdo, a bya l'e-goshi whẹ gbahaa iwhe ono, nwụru l'ẹhu Jona.

³⁰ Mbụ ọo gẹ Jona bụje iwhe-awhụrulenya l'ẹhu ndu Nínive bụ gẹ Abụbu-Ndiwhe bụ iya l'ẹhu ọgbo elenu-a.

³¹ Eze-nwanyị ono, l'achị ndu Shiba bẹ l'a-gbalihu mbọku ikpe nma ọgbo elenu-a ikpe, o noo l'o shi l'ẹka ono mgboko sụru ishi bya ọnuta olu-okfu mmamagụ Sólomọnu. Ọle t'unu lenu l'onye ka Sólomọnu nkajishi nọ l'ẹka-a ntaa.

³² Ọdo bụru lẹ ndu Nínive bẹ l'a-gbalihu mbọku ikpe nma ọgbo elenu-a ikpe. O noo lẹ ndu Nínive bẹ darụ onwowhe ụta, haa ome iwhe-dụ-ẹji, whẹ l'emegbabe, lwakfuta Chileke gẹ Jona je ekfuru yeru whẹ. Ọle t'unu lekwawho l'onye, ka Jona nkajishi bẹ nọkwa l'ẹka-a ntaa.”

Oryọku, dụ l'ẹhu bụ ẹnya

³³ “Ọ tọ dụdu onye l'anwụjeru ọku ye l'oryọku parụ iya je edobe l'azụ-ụtsulo, m'ọbukwanu onye ọbu apata ite kpupyabe iya. Oowojechiaru iya tukobe l'eli ẹka l'eedobeje oryọku nke ọwhu iwhe bụ onye batarụ l'ụlo l'a-nọ awhụ iwhoro iya.

³⁴ Ẹnya ghu bẹ bụ oryọku, nọ l'ẹhu ghu. Nteke ẹnya doru ghu edo, ogwẹhu ghu abụkotaru íwhóró nkụchi, nteke bụ l'ẹnya te edodu ghu edo; ogwẹhu ghu abụkotaru ẹkpuroochi nkụchi.

³⁵ Ọo ya bụ, t'i letakwa ẹnya nggẹ iwhoro ono, dụ l'ime ghu ta abụru ẹkpuroochi.

³⁶ Ọ -bụru l'ugwẹhu ghu bụkota iwhoro nkụchi, tọ dụ-zhia ẹka l'ọgba ọochi, ọo-nọlewho echi whorowhoro g'ọo nteke oryọku l'enwu, egoshi ghu ụzo.”

Nshọo ndu Fárisii mẹe ndu o-zhi-iwu

³⁷ Jisọsu kpụkwaduru-a okfu ono l'ọnu ekfu, onye Fárisii bya asụ iya t'ọ bya ibe iya l'eswe bya eria nri-eswe, o kwe tsoru iya je anọdu lẹ nri ono.

³⁸ Ọ kpụbe onye Fárisii ono ọnu okfu g'ọ whụru lẹ Jisọsu te emedu nsọ ọkwo ẹka, tẹmenu ọ bya l'e-ri nri.

³⁹ Onye-Nwe-Ọha sụ iya: “Unubẹ ndu Fárisii l'asajẹ azụ omogo, saa azụ ochi, ọle iwhe doru unu ẹnya bụ ọna ndu ọdo iwhe l'ẹka ike mẹe ome ejo-ememe.

⁴⁰ Unubẹ ndu eswe ?tọ bụhedu ẹka lanụ ono, bụ iya meru azụ iya bẹ bụ iya meru ime iya?

⁴¹ Ọle t'unu wota iwhe dụ l'ime omogo mẹe l'ime ochi gude meeru ndu ụkpa ree, unu awhụwaro lẹ nsọ l'agvụru unu l'iwhe lile.

⁴² “Nshọo unubẹ ndu Fárisii! O noo l'unu l'akfụjeruro akfụru nụ Chileke ụzo-lanụ-l'ụzo-iri l'izhoro mẹe ụtamazhi mẹ-gezhia iwhe lile bụ mkpẹekwo l'eerije eriri, unu gbee haa ọdu-chịriri mẹe oye Chileke obu. O noo iwhe unu gega anọ eme mẹ unu emekwaro ndu ọwhuna, unu shi emehawaa whọ.

⁴³ “Nshọo unubẹ ndu Fárisii! Unubẹ ndu l'ọonoje agụ ẹgu t'unu nọdu l'ishi l'ụlo-ndzuko, l'ọonojekwawho agụ unu ẹgu t'e keleje unu ekele nke iche l'echi ẹka, a ha l'igwe.

⁴⁴ Nshọo unu! Unu dụ g'ọo ilu chihuru echihu l'ẹte awhụa l'ẹnya; l'aanọje adzọ iya ọkpa l'eli, t'a ma l'ime iya rehuru erehu.”

⁴⁵ Onye lanụ, bụ onye o-zhi-iwu sụ iya: “O-zhi-iwhe, nkeshi ọwhu i kfuru nno bẹhunu ị bakọbeekwaru anyịbedua lẹ mba ọbu.”

⁴⁶ Jisọsu sụ iya: “Nshọo unubẹ ndu o-zhi-iwu! Unu l'apatajẹ ivu-ẹrwa, l'atsụ l'anụ evuvu bo ndiwhe, ọle unubẹdua te ebyikwanu ivu-ẹrwa ono ẹka t'ọ kadụ mma l'ọo mkpụshi-ẹka unu nnanụ rwuru iya.

⁴⁷ Nshọo unu, o noo l'ọo unubẹdua gbee atụshije ngguji l'ẹka ndụ-ichee unu whẹ ligeeru ndu whẹ gbushiru, bụ iya bụ ndu nkfuchiru Chileke.

⁴⁸ Ọo ya bụ l'unu l'egoshi l'iwhe ndụ-ichee unu whẹ meru bẹ dụ unu ree shii, tẹmenu ẹka unu dụkwa iya whọ, o noo lẹ whẹbedua gburu whẹ egbugbu, unubẹdua l'onwunu l'atụshi ụlo l'ẹka, e liru whẹ.

⁴⁹ Ọo ya meru iwhe mmamagụ Chileke kfuru sụ: ‘Mu l'e-zhi ndu nkfuchiru Chileke mẹe ndu ozhi tẹ whẹ jekfu whẹ. Ndu ono mu l'e-zhi ono bẹ whẹ l'a-harụ gbua egbu, whẹ aharu kpaa whẹ ẹhu mmaanụ.’

⁵⁰ Ọo ya bụ l'aa-gwatagezhia ọgbo elenu-a ụgwo ọchi iwhe bụ-zhia ndu nkfuchiru Chileke ono, ndụ-ichee whẹ shi eshi nkeshi mgboko dụ gbushita.

⁵¹ Ee-shizhia ya who agwata lẹ mmee Ébelu jeye lẹ nke Zakaráya, bụ onye e megburu lẹ mgbakụ ẹnya-mgbẹja Chileke yẹle eze-ụlo Chileke. Sụa, tẹ mu kfukwaru iya unu, ọ kwa ọgbo elenu-a bẹ l'aa-gwata ụgwo mmee whẹ.

⁵² “Nshọo unubẹ ndu o-zhi-iwu! O noo l'unu wotaru ire igodo ụlo mmamagụ. Unubẹdua l'onwunu ta abahụdu, ndu ọwhu l'eme tẹ whẹ bahụ bẹ unu kpọshiru abahụ.”

⁵³ Jisọsu shilewho l'ẹka ono tụgbua, ndu o-zhi-iwu mẹe ndu Fárisii ono kwata kebe ẹhu tatsolahaa ya okfu, tẹmenu whẹ l'akpasakwa iya whọ ọnu, ajịkashi iya ajị t'o yeeru whẹ ọnu l'iwhe ha l'urwuturwu.

⁵⁴ Whẹ l'egekwa iya who tẹ whẹ gude okfu, shi iya l'ọnu nmata iya l'ọnya.