Jowelu 1 - BAYỊBURU Ẹzaa

¹ Ọ waa bụ okfu Onye-Nwe-Ọha kfuru yeru Jowelu nwa Petuwẹlu.

Igube byarụ ọgu

² Unu nụkwa iwhe-e, unubẹ ndu bụ ọgurenya. Unu ngabẹkwa nchị, unubẹ ndu bu l'alị-a l'owhu. Ụdu iwhe ọwa, ?o mejebuwaru l'oge nke unu? ?T'o mejehawaru l'oge nke nna unu oche whẹ?

³ Unu kọkwaaru iya ụnwu unu. T'ụnwu unu kọoru iya ụnwu nke whẹbedua. Ụnwu nkewhe akọoru iya ọgbo ọwhu l'eje abya l'ụzo iwhu.

⁴ L'iwhe igube, l'etsu dududu tawhodoru bẹ oke igube zebataru bya ataa. Ọwhu oke igube tawhodoru bẹ ụnwu ọgbolanu igube zebataru bya ataa. Ọwhu ụnwu ọgbolanu igube tawhodoru bẹ mkpakparatsụ zebataru bya ataa.

⁵ Unu tehu nwụru ẹnya, unubẹ ndu angụruma ono. Unu wata ọrya ẹkwa. Unu chia mkpu, unubẹ ndu ono l'angụtaje mmẹe mehu eswe, nkele mmẹe ọ̀whúú, unu gege angụ b'a nyịswotawaru unu l'ọnu.

⁶ O nweru mba, zebataru bya ọgu l'alị mu-a. Ndu ono bẹ ọkpehu dụ shii, whẹ bụru a gụta agụta. Eze, dụ whẹ l'ọnu bẹ bụ eze oduu-gburu-agụ. Ẹpyi, dụ whẹ l'ọnu bụru ẹpyi ne oduu-gburu-agụ.

⁷ Whẹ tapyashị-gewaru vayịnu mu bya akakwoshiwa figu mu wụshi. Ụgbo iya bẹ whẹ swashị-gewaru tuwha, mekota ẹkali iya l'ọocha kpalakpala.

⁸ Unu gụa áwhụ g'ọo nwamgbọko, yeru uwe-mkpe agụ áwhụ ji iya, ọnwu gburu, mbụ ji lụru iya lẹ nwamgbọko.

⁹ Ngwo-ẹja nri yẹle ngwo-ẹja mmẹe bẹ l'eete ewotajehedu gude bya l'ụlo Onye-Nwe-Ọha. Ndu l'agbajẹ ẹja nụ Chileke nọ lẹ ntsọmawhu mbụ ndu ono, l'ejeru Onye-Nwe-Ọha ozhi.

¹⁰ Okfu, a kọru akọko bẹ lakọtawaru l'iyi. Alị l'agụkawaa áwhụ nkele akpụru iwhe a kụru iya bẹ mebyishihuru nụ. Mmẹe ọ̀whúú bẹ l'ẹte adzọtajehedu; t'a pyịtajehe mmanụ ólivu.

¹¹ T'ọnu kpọkwa unu okfu, unubẹ ndu l'akọ okfu. Unu ryakwa ẹkwa, unubẹ ndu l'akọ vayịnu. Unu gụa áwhụ witi unu yẹle balị unu, nkele iwhe e meberu l'alị bẹ yifukotawaru nụ.

¹² Vayịnu bẹ kpọnwushihuwaru nụ. Oshi figu nwụkotawaa lwaa. Oshi itorokuma yẹle nkfụ, mẹe ụdara, mẹe oshi, dụkota l'ẹgu bẹ kpọkotawaru nkụ. O noo ya, iwhe l'emeje madzụ ẹhu-ụtso bẹ shiwa nno lakọta swịikpamu.

Eeku oku nzhimanụ ọlwa azụ

¹³ Unu yee uwe áwhụ wata ọgu áwhụ, unubẹ ndu l'agbajẹ ẹja nụ Chileke. Unu kpọo mkpu, unubẹ ndu ono l'eje ozhi l'ẹnya-mgbẹja. Unubẹ ndu ono, l'ejeru Chileke mu ozhi, unu bya eyee uwe áwhụ nwụa ẹnya abalị, nkele ngwo-ẹja-nri yẹle ngwo-ẹja-mmẹe bẹ l'ete egudejehedu abya l'ụlo Chileke unu.

¹⁴ Unu ryaa ya aryarya t'a swịaru Chileke ẹgu. Unu atụa ndzuko dụ nsọ. Unu kpakodzua ndu bụ ọgurenya mẹe iwhe bụ ndu bu l'alị-a l'owhu tẹ whẹ dzukobe l'ụlo Onye-Nwe-Ọha, bụ Chileke unu, ryaarụ Onye-Nwe-Ọha ẹkwa.

¹⁵ Ha-e! Gẹ mbọku ono l'a-dụbukwaa. O noo nkele mbọku nke Onye-Nwe-Ọha dụakwa ntse. Ọo-bụ mbọku Ọkalibe-kakọta-ike l'a-tụko iwhe lile mebyishikota.

¹⁶ Tọ gbadụ anyi l'iwhu nteke nri bataberu l'ụlo Chileke? Tẹ t'ọ gbadụ anyi l'iwhu nteke ẹhu-ụtso yẹle ote ẹswa gvụru l'ụlo Chileke anyi?

¹⁷ Mebyi iwhe a kụru l'alị bẹ l'anọduje l'ime alị laa ẹhu. Ụlo, l'aakwakọbe nri bẹ dabukotaru iwhoro. Ọba nọnu dakashịhu adakashịhu, nkele iwhe e meberu l'alị bẹ mebyishihuru l'ẹgu.

¹⁸ Unu leenu gẹ eswi l'aryakaa muu muu. Élwù l'arya nmaa nmaa, nkele whẹ te enwedu nri whẹ l'a-ta, je akpaa l'ụnwu atụru bẹ iwhe-ọtsulanu ọbu rwubegeeru.

¹⁹ Ọ kwa gụbe Onye-Nwe-Ọha bẹ mu l'akpoku, nkele ọku dzụkotawaru ẹka élwù l'atajẹ nri l'echi-ẹgu; iwhe bụ oshi, dụ l'ẹgbudu nwukotawa ọku.

²⁰ Anụ-ẹgbudu l'atụkakwaa hẹe hẹe aryaku ghu, nkele ọnu-iyi g'ọnu-iyi ha bẹ tashịhuwaru, ọku dzụkotawaa ẹka élwù l'atajẹ nri l'echi-ẹgu.