Jọnu 9 - BAYỊBURU Ẹzaa

Jisọsu l'emeta nwoke, shi ọtso ishi l'ẹwho ne iya

¹ Jisọsu l'aghata ejekwaro ẹka l'ooje, ọ whụa nwoke ọbu, shi ọtso ishi l'ẹwho ne iya.

² Tọ dụ iya bụ lẹ ndu l'etso ụzo iya ajị Jisọsu sụ iya: “O-zhi-iwhe ?ọo onye mesweru? ?Ọo nwoke-e metaru iwhe-dụ-ẹji, tọo ndu nwụru iya nụ, mbụ kpatakwanụru iwhe a bya l'anwụdeshia ya, l'ọotsowaa ishi?”

³ Jisọsu sụ whẹ: “Ọ tọ bụkwa lẹ nwoke-e mesweru, ndu nwụru iya nụ te emeswe, bẹ meru iwhe l'ọotso ishi. Iwhe kparụ iya nụ bụ t'e shichia l'ẹhu iya goshi g'ike Chileke l'erebe ire.

⁴ Anyi jefutajekwa ozhi nke onye ono, bụ iya zhiru mụbe Jisọsu nteke iwhoro dụkwadu. O noo l'ẹnyashi l'abyawaa, nteke l'adụhee onye l'adụkwadu ike eje ozhi.

⁵ Lẹ ntaa mu nọkwadu l'eli mgboko-o bẹ bụ mu bụ iwhoro nke ndu mgboko-o.”

⁶ O kfugelewho iwhe ono, ọ gbụru ọnu-mini tọgbo l'alị, gude ọnu-mini ono gwọ-whube ẹja, meta ẹja ono tee nwoke ono l'ẹnya,

⁷ sụ iya: “Tụgbua je aswaa iwhu l'okpuru Sayilówamu.” Iwhe Sayilówamu fụtaru bụ: “Onye e zhiru”. Ọo ya bụ, ọ tụgbua je aswaa iwhu l'okpuru ono. Ọ dawhushia azụ l'ọowhuwaa ụzo.

⁸ Ndu obutobu ono mẹe ndu shi awhụje iya l'ẹka l'ọoryo aryọ jịlahaa sụ; “?Tọ bụnu-a nwoke-e shi anọduje l'alị aryọ aryọ-ọ?”

⁹ Ndu sụ: “Ọ kwa iya-a!” Ndu sụ: “Ọo ejire, ọ tọ dụ iya, onye ọwa bụ onye shiru iya nụ.” Nwoke ono sụ: “Ọ kwa mu-a-o!”

¹⁰ Whẹ jị iya: “?Ndẹe g'e meru ị whụlahaa ụzo?”

¹¹ Ọ sụ whẹ: “Ọo nwoke ọbu, l'eeku Jisọsu gwọru ẹpoto tee mu l'ẹnya labọ, sụ mu tẹ mu tụgbua je aswaa iwhu lẹ Sayilówamu. Ọo ya bụ, mu tụgbua je aswaa iwhu, mu whụlahaa ụzo.”

¹² Whẹ jị iya: “?Ndẹe ẹka ọ nọ?” Ọ sụ whẹ: “Mu ta amahẹkwa.”

Ndu Fárisii l'ajị onye ono, shi atsọ ishi ono ajị

¹³ Whẹ duta nwoke ono, shi dụ mbụ atsọ ishi dukfuta ndu Fárisii.

¹⁴ Mbọku ono, Jisọsu gwọru ẹpoto ono tee nwoke ono l'ẹnya ọ whụlahaa ụzo bẹ bụ mbọku ọtuta-ume.

¹⁵ Ndu Fárisii bya ajịkwa nwoke ono ọdo t'ọ kọo g'o shiru ọ bụ l'ọ whụde ụzo. Ọ sụ whẹ: “O metaru ẹja tee mu l'ẹnya mu whẹ ẹbo, mu je aswaa iwhu, mu whụlahaa ụzo.”

¹⁶ Ndu Fárisii harụ sụ: “Nwoke ono te eshikwa l'ẹka Chileke, nggẹ l'o shi l'ẹka Chileke mẹe ya edobejekwa nsọ, dụ lẹ mbọku ọtuta-ume.” Ndu ọwhu sụ: “?Ndẹ-zhia g'onye l'eme iwhe-dụ-ẹji l'e-me emekota ẹgube iwhe-awhụrulenya ọwhu dụ-gee nno?” Whẹ bọkahu onwowhe ẹbo.

¹⁷ A nọnyaa, ndu Fárisii ono bya ajịkwa nwoke ono ọdo sụ iya: “?Ndẹe ọnu ọwhu gụbedua yeru l'okfu ẹhu nwoke ono eshi-ọwhu ọ bụ iya meru ghu, ị whụlahaa ụzo?”

¹⁸ Ndu Ju ono te ekwetadu ilile lẹ nwoke ono shi atsọ ishi, a bya emee ya, ọ whụlahaa ụzo ntaa, jeye nteke whẹ je ekua ndu nwụru nwoke ono, e meru ọ whụlahaa ụzo,

¹⁹ jị whẹ: “?Ọo onye ọwa bụ nwa unu ọbu, unu shi sụ l'a bya l'anwụ-deshia, l'ọotsowaa ishi? ?Ndẹhunu g'e meru ọ bya awhụlahaa ụzo ntaa?”

²⁰ Ndu nwụru nwoke sụ: “Iwhe anyi mabeleruwho bụ l'onye-e bụ nwa anyi. Iwhe ọdo bụru l'o shi ọtso ishi l'ẹwho ne iya.

²¹ G'e meru mee ọ bya awhụde ụzo ntaa bẹ anyi l'amahẹkwaa. Tọ hẹkwa l'anyi marụ onye ọbu, meru iya ọ whụlahaa ụzo. Unu jịtakwa iyẹ ya t'o kfua l'ọnu iya eshi-ọwhu ọgurenya iya dụwaa shii.”

²² Iwhe ndu nwụru nwoke ono kwoberu kfua nno bụ lẹ whẹ l'atsụ ndu Ju egvu, o noo lẹ ndu Ju chịhawaru iya sụ l'ọ -bụ l'o nweru onye gude ọnu iya sụ l'edzudzu-ọha l'ọo Jisọsu bụ Kuráyisutu ọbu, whẹ ekefu onye ọbu l'oke, sụ t'o bọ batahẹkwa ụlo-ndzuko whẹ ọdo.

²³ O noo iwhe meru, ndu nwụru iya nụ sụ: “Unu jịtakwa iya, o meruroo ree, ọ bụwaru ọgurenya.”

²⁴ Ọo ya bụ, whẹ byakwa ekua nwoke ono, shi atsọ ishi nke ugbo labọ sụ iya: “Kwabẹ Chileke ugvu kfuaru anyi ire-lanụ, l'anyịbedua l'onwanyi bẹ makwarụ-a lẹ nwoke ono bụ onye l'eme iwhe-dụ-ẹji.”

²⁵ Nwoke ono sụ whẹ: “Ọ -bụru lẹ nwoke ono bụ onye l'eme iwhe-dụ-ẹji bẹ mu l'amakwaa, iwhe lanụ, mu ka ogude ẹka bụ lẹ mu shi atsọ ìshì, ọle ntaa bẹ mu l'awhụwaa ụzo.”

²⁶ Whẹ jị iya: “?Ndẹe g'o nwụru gụ l'iya? ?Ndẹe g'o meru mee ghu ọbu, ị whụlahaa ụzo?”

²⁷ Ọ sụ whẹ: “Ọ kwaa iwhe lanụ-a, mu kfuhawaru unu, unu te egbebe iya nchị. ?Unu kwoberu gụnu achọ tẹ mu kfua ya ọdo t'unu nụa? ?Unubẹdua l'achọfua t'unu bụru ndu l'etso ụzo iya?”

²⁸ Whẹ kpọderu iya iwhu sụ iya: “Ọ kwarọo gụbedua bụ onye l'etso ụzo iya, anyịbedua bụkwa ụzo Mósisu bẹ anyi l'etso.

²⁹ Ọ bụru Mósisu bẹ anyi marụ lẹ Chileke kfuru okfu nụ. Ọ bụru onye ọwa bẹ anyi l'ẹte amakwaa ẹka, o shi.”

³⁰ Nwoke ono, shi atsọ ishi bua sụ: “Ha-e! ?Ọ bụru gụnu? Ọ waa dụkwa mbẹdua biribiri! Unu ta amadụ ẹka, o shi, ọle o mewarunu mu saa ẹnya mu whẹ ẹbo whụlahaa ụzo.

³¹ Iwhe doru ẹnya bụ lẹ Chileke ta angajẹduru ndu l'eme iwhe-dụ-ẹji nchị. Obekwanu l'onye bụa onye l'abarụ Chileke ẹja, eme iwhe dụ Chileke ono ree l'obu bẹ Chileke ono l'angajẹru nchị.

³² Eshi nkeshi mgboko-o dụ bẹ l'ọ tọko dụbukwaa onye nụjeru l'ọ dụ onye mejeru onye shi l'ẹwho ne iya ọtso ishi, ọ bya awhụlahaa ụzo.

³³ Nggẹ l'ọo iwhe nwoke-e l'ete eshia Chileke l'ẹka, m'ọ tọ dụkwa iwhe ọ gọgo dụ ike mee.”

³⁴ Whẹ vụ iya pyịi; sụ iya: “?L'ịibya anyi ozhi iwhe lẹ gụbe onye ngụpyaberu ejo ememe l'ẹra?” Whẹ chịfu iya.

Ọtso ìshì nke ndu Fárisii

³⁵ Jisọsu nụa lẹ whẹ chịfuru nwoke ono, ọ bya eje achovu iya sụ iya: “I kweru nke Abụbu-Ndiwhe?”

³⁶ Nwoke ono sụ Jisọsu: “?Ọ hụnu onye bụ Abụbu-Ndiwhe ọbu? Kanụru mu iya nggẹ mu kweta nkiya.”

³⁷ Jisọsu sụ iya: “I gudekwa-a ẹnya ghu whụa onye ọbu. Mbụ ọ kwa iya l'ekfu eyeru ghu ntaa.”

³⁸ Nwoke ono sụ iya: “Oowo, Onye-Nwe-Ọha, lẹ mu kwetaakwaru.” Nwoke ono bya ebua iwhu l'alị baarụ iya ẹja.

³⁹ Jisọsu sụ iya: “Iwhe mu kwoberu bya l'eli-mgboko bụ tẹ mu kpee ikpe nke ọwhu ndu l'atsọ ishi l'a-whụlahaa ụzo, ndu l'awhụ ụzo ekpukota ishi.”

⁴⁰ Ndu Fárisii, harụ nọkube iya nụa iwhe ono, whẹ sụ iya: “?L'iikfu l'anyịbedua l'atsọfua ishi tọo gụnu?”

⁴¹ Jisọsu sụ whẹ: “Nggẹ l'ọo iwhe l'unu l'atsọ ishi m'ọ tọ dụkwa iwhe-dụ-ẹji, gẹge adụ unu l'ẹhu. Obenu ntaa, unu sụru l'unu l'awhụ ụzo-ọ bẹ unu vukwawho iwhe-dụ-ẹji, unu metaru g'unu vu iya.”