Jọnu 8 - BAYỊBURU Ẹzaa

¹ Ọo ya bu, ọwhube Jisọsu tụgburu jeshia ugvu Ólivu.

² O rwulewho l'ọnma-ẹwa ụtsu echile iya, ọ tụgburu ọdo byatashia l'eze-ụlo Chileke. Igweligwe madzụ zakọo l'ẹka ono bya adọ-whe iya mgburumgburu. Ọ bya anọdu anọdu wata whẹ ozhi iwhe.

³ Tọ dụ iya bụ lẹ ndu l'ezhije iwu mẹe ndu Fárisii kpụru nwanyị, whẹ gudejeru l'ẹka l'oori ogori kpụfutaru iya. Whẹ kpụta iya bya edobe l'echilabọ whẹ l'ẹka ono.

⁴ Whẹ sụ Jisọsu: “O-zhi-iwhe, nwanyị-a b'e guderu l'ẹka yẹle nwoke zẹe.

⁵ Lẹ iwu whẹ bẹ Mósisu sụru t'e gudeje ẹwhuru tugbua onye a whụru l'oome ẹgube iwhe dụ nno. ?Ndẹe g'ọ dụ ghu t'e me iya ntaa?”

⁶ Iwhe ono whẹ l'ekfu nno bẹ bụ ọ́nyà okfu bẹ whẹ gbabẹru iya tẹ whẹ marụ; ọ dụ iwhe whẹ l'e-gude nmata iya, l'o noo ọwhu o mesweru. Jisọsu bya etsukfuru etsukfuru gude mkpụshi-ẹka iya delahaa iwhe l'alị.

⁷ Whẹ jịnya-zhia ya whọ ajị t'o ye ọnu. A nọnyaa, ọ gbalihu sụ whẹ: “Ọ -bụru l'ọ dụ onye ono lẹ g'unu ha l'ẹka-a, l'ẹteke emebua iwhe-dụ-ẹji, t'onye ono vuru ụzo wota ẹwhuru tụ nwanyị-a.”

⁸ O tsukfukwaru ọdo gude mkpụshi-ẹka iya delahaa iwhe l'alị ọdo.

⁹ Whẹ nụlewho iwhe ono, whẹ hahụde nnanụ nnanụ alụfukaa. O noo ya, whẹ shizhiawho ahahụ lẹ ndu bụ ọgurenya alụfu jeye ọ warụa Jisọsu kemoru nwẹkiya yẹle nwanyị ono, kfụru iya l'atatiwhu.

¹⁰ Jisọsu bya agbalihu sụ iya: “Nwanyị ?ndẹhunu whẹ? ?Tọ dụhedu onye ọwhu kfụru anma ghu ikpe ọbu?”

¹¹ Nwanyị ono sụ iya: “Ọ tọ dụkwa, Onye-Nwe-Ọha.” Jisọsu sụ iya: “O nokwawho gẹ mbẹdua l'ẹte anma ghu ikpe. Tụgbukwaa lashia, ọle be emehekwa iwhe-dụ-ẹji ọdo.”

Jisọsu bụ iwhoro nke ndu mgboko

¹² Jisọsu kfuru yeru whẹ ọdo sụ: “Ọo mbẹdua bụ iwhoro nke ndiwhe, onye bụ onye l'etso mu nụ ta abyadụ l'eje ije l'ẹkpuroochi gbahaa iwhoro ndzụ l'a-dụ iya l'ẹhu.”

¹³ Ọo ya bụ, ndu Fárisii sụ iya: “Ntaa b'ọ gbee bụru gụbedua l'onwoghu bya atụlahaa ọnu onwoghu, iwhe ono, l'iikfu ta adụkwa ọwhu bụ ire-lanụ.”

¹⁴ Jisọsu sụ whẹ: “Wawa, mu l'atụhudu m'ọo ọnu onwomu, unu marụ amarụ l'iwhe mu l'ekfu bụkotakwa ire-lanụ. O noo nkele mu marụ ẹka mu shi, makwarụwho ẹka mu l'ala, ọle unubẹdua ta amadụ ẹka mu shi, unu ta ama ẹka mu l'ala.

¹⁵ Unubẹdua l'ekpe ikpe gẹ madzụ l'ekpeje. Mbẹdua ta adụdu onye mu l'ekpe ikpe.

¹⁶ Tẹmenu ọ -bụhuduru m'ọo l'ọo tẹ mu kpee ikpe bẹ ikpe nkemu bụ ikpe, kfụru nhamụnha. O noo nkele ọ tọ dụ mbẹdua nwẹka mu l'ekpe ikpe ono. Onye mu l'iya l'ekpe iya bụ Nna ono, bụ iya zhiru mu tẹ mu bya.

¹⁷ Ọle e dekwaru iya l'ẹkwo iwu unu sụ lẹ nteke ụmadzu labọ l'agbawa ẹka-ebe l'iwhe bẹ iwhe ono bụnuwho ọkpobe-okfu.

¹⁸ Mu l'atụwaa ọnu onwomu, tẹhenu Nna mu ono, bụ iya zhiru mu tẹ mu bya l'atụkwawho ọnu mu.”

¹⁹ Ọo ya bụ, whẹ jị iya: “?Ndẹnu Nna ghu ọbu?” Jisọsu sụ whẹ: “Unu ta amakwa mu, unu ta ama Nna mu. Nggẹ l'ọo iwhe l'unu marụ mbẹdua mẹ unu amakwarụwho Nna mu.”

²⁰ Okfu ono b'ọ nọdu l'ẹka l'eedobeje okpoga, a tụkotaru Chileke kfushia nteke ọ nọ l'eze-ụlo Chileke ono ezhi iwhe. Ọle ọ tọ dụkwa onye chiru iya ẹhu nke egude nkele oge nteke l'ee-gude iya teke erwudua.

Unu ta abyadụ ẹka ya l'ala

²¹ Jisọsu sụ-whu whẹ azụ: “Mu l'a-la, unu l'a-chọ mu nta chọo imo, ọle unu ta achọ-vukwa mu. Unu l'e-vu iwhe-dụ-ẹji, unu meru, unu l'e-vu iya l'ishi g'unu vu iya nwụshihu. Ẹka ọbu, mu l'ala bẹ unu l'afụdua bya.”

²² Ọo ya bụ ọwhube ndu Ju sụ: “?Ọo kabẹhunu gbua onwiya meru g'o gude ọ sụ: ‘Ẹka mu l'ala bẹ unu l'a-fụdua bya’?”

²³ Ọ sụ whẹ: “Unubẹdua shi l'ẹka lwarụ alị, ọle mbẹdua shi l'imeli. Unu bụ ndu nke mgboko-o, ọle mbẹdua ta abụdu onye nke mgboko-o.

²⁴ Mu sụru unu l'o noo iwhe meru iwhe unu l'e-vu iwhe-dụ-ẹji, unu meru, unu l'e-vu iya l'ishi g'unu vu iya nwụshihu, mbụ unu jekwa l'a-nọduwaro l'iwhe-dụ-ẹji ọbu, unu metaru ọbu nwụshihu t'a gụfulewho l'unu bya bya ekweta l'ọo mu bụ onye mu bụ.”

²⁵ Whẹ jị iya: “?Ọo onye b'ị bụ?” Jisọsu sụ whẹ: “Ọo onye ono, mu shizhiawho lẹ mbụlembu kfutaru unu lẹ mu bụ ono bẹ mu bụ.

²⁶ O nwegekwaaru igweligwe iwhe mu l'e-kfu kfukuta unu mẹkwawho igweligwe iwhe mu l'e-kpe unu ikpe iya, ọle onye ono, zhiru mu nụ bẹ bụ onye ire-lanụ, tẹmenu ọ bụru iwhe mu nụru l'ọnu onye ono, zhiru mu nụ bẹ mu l'aryajẹ aryarya tẹ ndiwhe nụ-dzuru.”

²⁷ Ndu ono ta ama l'ọo Chileke, bụ Nna bẹ l'ookfu ama ẹka.

²⁸ Ọo ya bụ, Jisọsu sụ whẹ: “Nteke unu l'ewolilewho Abụbu-Ndiwhe kpọpyabe l'oswebe, o noo nteke unu l'a-ma l'ọo ‘Mu bụ onye mu bụ.’ O noo nteke unu l'a-makwawhọ l'ọ tọ dụdu iwhe mu l'egudeje ike ẹka mu mee, l'ọolewho iwhe Nna zhiru mu bẹ mu l'anọje ekfu.

²⁹ Tẹmenu mẹ onye ono, bụ iya zhiru mu ono kfụkwaruwho swiru mu, ọ tọ wehakwa mu, o noo l'o zhiawho iwhe dụ Nna mu ono mma l'obu bẹ mu l'anọje eme nteke nteke.”

³⁰ Igweligwe ndu nụru nteke Jisọsu l'ekfu iwhe ono kweta nkiya.

Ohu lẹ amadụ

³¹ Ọo ya bụ, Jisọsu sụ ndu Ju ono, kwetaru nkiya: “Ọ -bụru l'unu l'emezhiwaa iwhe-e, mu l'ekfua, mu amarụ l'unu bụwhoo ọkpobe ndu l'etso ụzo mu.

³² Unu amakwanụru ọkpobe-okfu, ya bụru ọkpobe-okfu ono l'a-tọ unu l'uli, mee t'unu ba abụhe ohu.”

³³ Whẹ sụ iya: “Mẹ anyi shikwa l'eri Ébirihamu, tẹmenu tọ bụ l'ọ dụje onye gbajẹru anyi ohu iya-e! ?Ọ hụnu ole bụ nke ọto unu l'uli, mee unu t'unu ba abụhe ohu ọwhu l'iikfu?”

³⁴ Jisọsu sụ whẹ: “Unu gebenu tẹ mu karụ unu iwhe mu l'ekfu, l'iwhe bụ onye l'eme iwhe-dụ-ẹji bẹ bụakwa ohu iwhe-dụ-ẹji.

³⁵ Ohu te ebugbujekwaru l'ibe onye-nwe-iya-nụ jeye lẹ tututu-mịmimi. Ọo nwa, a nwụru anwụ l'uwhu l'ebugbujeru iya jeye nteke madzụ nọ-beru.

³⁶ Ọo ya bụ, ọ -bụru lẹ Nwa ono meru t'unu ba abụhe ohu, ọo ya bụ l'unu l'a-bụkwanu ndu a tọru l'uli ọkpobe atọto.

³⁷ Mu makwarụ-a l'unu shi l'eri Ébirihamu, ọle lenu l'unu l'achọ g'unu l'e-shi gbua mu, nke l'ọo l'unu te ekwetadu haa okfu mu t'ọ bata unu l'ẹhu.

³⁸ Iwhe mu l'ekfu okfu mu bụ iwhe mu gudewaa ẹnya mu whụa l'ẹka Nna nọ, iwhe unubẹdua l'emekwanu bụru iwhe unu nụru l'ọnu nna unu whẹ.”

³⁹ Whẹ sụ iya: “M'ọ kwa Ébirihamu bụ nna anyi.” Jisọsu sụ whẹ: “Nggẹ l'ọo iwhe unu bụ ụnwu Ébirihamu mẹ unu emekwaa iwhe Ébirihamu meru.

⁴⁰ Ọle ntaa bẹ unu l'a-chọ ụzo, unu l'e-shi gbua mu, lẹ mụbe onye bụ ire-lanụ, mu nụru Chileke l'ọnu bẹ mu kfuru unu. Ọ tọ kwa ẹgube iwhe dụ nno bẹ Ébirihamu meru.

⁴¹ Ọo iwhe nna unu meru bẹ unu l'eme. ?Unu nụwaru iya?” Whẹ sụ iya: “Ọ tọkwa l'ọkpara b'a gbatarụ anyịbedua, m'ọ kwa Nna lanụ bẹ anyi nwe bụ iya bụ Chileke.”

⁴² Jisọsu sụ whẹ: “Nggẹ l'ọo Chileke bụ Nna unu mẹ unu eyekwa mụbe Jisọsu obu, o noo nke l'ọo l'ẹka Chileke nọ bẹ mu shi gbalihu byatashia. Mu ta anọnyalekwawho gude ike nke onwomu byatashia. Ọ kwa Chileke zhiru mu tẹ mu bya.

⁴³ ?Ndẹe g'e meru iwhe mu l'ekfu te edoje unu ẹnya? Iwhe meru iya nụ bụ l'unu te ekwetadu l'unu l'a-nụ okfu mu.

⁴⁴ Unu bụ ụnwu Oshifutuswe. Ọ bụru Oshifutuswe ono bụ nnajị unu. Iwhe dụ unu ree l'obu bụru g'unu l'e-shi mee iwhe dụ nnajị unu ono ree. Nnajị unu ono bẹ shizhiawho lẹ mbụlembu bụtaru onye mgbugbu madzụ. Ẹka iya ta adụjeru l'ire-lanụ nkele ọ tọ dụdu ire-lanụ, dụ iya l'ọnu. Nteke ọ dzụru ejire b'a mawarụ l'ọo iwhe gbarụ ẹgube onye ono, ọ bụ bẹ l'oome, o noo l'ọ bụ ejire maa, tẹmenu ọ bụru iya bụ nnajị ejire l'onwiya.

⁴⁵ Ọle mbẹdua, bụ Jisọsu l'ekfu ire-lanụ, ọ bụru iwhe ono meru unu te ekwetaje lẹ nkemu bụ iya.

⁴⁶ Ndẹe g'unu ha onye ọwhu l'afụta bya agbaa ọku l'iya whụjeru iwhe-dụ-ẹji, mụbe Jisọsu mejeru? Nteke bụ l'ọo ire-lanụ be mu l'ekfu ?ọo gụnu kpatarụ unu te ekwetaje lẹ nkemu bụ iwhe?

⁴⁷ Onye bụa Chileke bẹ bụ Nna iya l'anụje okfu Chileke. Iwhe meru iwhe unu l'ẹte anụje okfu Chileke bụ l'unu ta abụdu ụnwu Chileke.”

Jisọsu yẹle Ébirihamu

⁴⁸ Ndu Ju sụ iya: “?I cheru sụ l'ọ tọ bụdu anyi ọkpobe-okfu mẹ anyi sụ l'ị bụ onye Samériya, ọgvu dụ l'ẹhu?”

⁴⁹ Jisọsu sụ whẹ: “Ọ tọ dụkwa ọgvu, dụ anyi l'ẹhu, ọ kwa Nna mu bẹ mu l'akwabẹ ugvu, unu gbee agwọ mbẹdua l'ẹja.

⁵⁰ Lẹ ba abụ lẹ mu l'adzọ ọja-ama nke ẹka mu. O nweru onye lanụ ọdo, l'achọ t'a jajẹ mụbe Jisọsu ajaja, ọ bụru onye ono l'e-kpe ikpe.

⁵¹ Mbụ-a, tẹ mu kanụru unu, l'iwhe bụ onye l'eme iwhe mu l'ekfu ta abyadụ l'a-nwụhu anwụhu jeye lẹ tututu-mịmimi.”

⁵² Ndu Ju sụ iya: “Ntaa bẹ anyi kabẹ marụ l'ọgvu dụ ghu l'ẹhu l'ezhi. Ébirihamu nọru eli nọo alị, ọ nwụhulee. Iwhe bụkota ndu nkfuchiru Chileke gẹ whẹ ha nwụhukotakwawho, m'ọo ya b'ị bya asụ anyi l'iwhe bụ onye l'eme iwhe i kfuru ta afụdu nwụhu anwụhu jeye lẹ tututu-mịmimi.

⁵³ ?Ị bya aka nnajị anyi Ébirihamu shii, bekochakwaaruro nwụhu anwụhu? Ọwhube ndu nkfuchiru Chileke nwụhukwawho anwụhu. ?O zhia onye bẹ l'iikfu l'ị bụ?”

⁵⁴ Jisọsu sụ whẹ: “Ọ -bụ l'ọo tẹ mu bya ajajẹ onwomu ntaa mẹ ajaja ono, mu l'aja onwomu ta adụ iwhe ọ gọgo abụ. Ọo Nna mu ono, unu sụru l'ọo Chileke unu l'aja mu ajaja.

⁵⁵ Ọle unu tẹke amadụa ya. Mbẹdua mawarụ iya. Nggẹ l'ọo iwhe mu sụru lẹ mu ta amadụ iya mẹ ya abụru ejire bẹ mu l'adzụ g'ọo unubẹdua. Ọle mu marụ iya, mu l'anọje eme iwhe o kfuru.

⁵⁶ Nnajị unu Ébirihamu bẹ ẹhu tsọru ụtso l'o gude ẹnya iya whụa mbọku mụbe Jisọsu l'a-bya. Ọ whụa ya, ẹhu tsọo ya ụtso.”

⁵⁷ Ọo ya bụ, ndu Ju sụ iya: “?G'ị tịki nọ-bee awha ụkporo ugbo labọ l'awha iri-a, b'i gbee whụwanu Ébirihamu?”

⁵⁸ Jisọsu sụ whẹ: “Iwhe mu l'eme t'o doo unu ẹnya bụ lẹ: a byakwa l'anwụdeshia Ébirihamu mu bụwaru onye mu bụ.”

⁵⁹ Ọo ya bụ, whẹ kwakọlahaa ẹwhuru tẹ whẹ bya atụa ya, Jisọsu domia onwiya lụfushia l'eze-ụlo Chileke ono.