Jọnu 4 - BAYỊBURU Ẹzaa

Jisọsu yẹle nwanyị Samériya

¹ Ndu Fárisii nụa lẹ ndu l'awụ etso Jisọsu bụwaro ndu l'etso ụzo iya, l'oomeshi whẹ baputizimu bẹ ka mebyi shii, amamẹ ndu ọwhu l'awụ etso Jọnu bụwaro ndu l'etsoje iya l'oomeshi whẹ baputizimu.

² Ọle ọ tọ dụ-zhikwaa onye Jisọsu gude ẹka iya mee baputizimu, gbahaa ndu l'etso ụzo iya l'emeje iya.

³ Onye-Nwe-Ọha, bụ Jisọsu nụlewho lẹ ndu Fárisii nụwaru nke baputizimu ono, ọ gbalihu lẹ Judíya tụgbua dawhushia azụ lẹ Gálili.

⁴ Ụzo ọwhu o shiru eje Gálili ono bẹ l'ọoghaja lẹ Samériya.

⁵ O noo ya, Jisọsu jenyaa, o rwua lẹ mkpụkpu lanụ ọbu, l'eekuje Sáyika lẹ Samériya. Mkpụkpu ono bẹ dụkube ẹgu ono, Jékọpu nụru nwa iya Jósẹfu.

⁶ O nwekwaruwho wẹlu, Jékọpu tụru, dụ l'ẹgu ono. Nteke Jisọsu rwuru ẹka ono bụru g'ẹnyanwu l'alwawaa l'ishii. O rwudeshia ẹka ono, ike ije gvụwa iya mebyi ree. O je anọdu lẹ mgboro wẹlu ono.

⁷ O nweru nwanyị, byarụ oseta mini lẹ wẹlu ono. Nwanyị ono bụ onye Samériya. Jisọsu sụ iya: “Nwanyị kee mu nụ mini tẹ mu ngụa.”

⁸ Nteke ono bẹ ndu l'etso ụzo Jisọsu tụgbuwaru bahụ-shia l'ime mkpụkpu jeshia ọkpata nri, whẹ l'e-ri.

⁹ Nwanyị Samériya ono sụ iya: “?Ọ dụ-zhia ọdu agha meru iwhe ọ bụ gụbe onye Ju gbee sụ mụbe nwanyị Samériya tẹ mu kee ghu mini t'ị ngụa?” Iwhe nwanyị ono kwoberu kfua nno bẹ bụ lẹ ndu Ju whẹ lẹ ndu Samériya te erigbaduru.

¹⁰ Jisọsu sụ iya: “Ha! Nggẹ l'ọo iwhe l'ị marụ iwhe-ọma ono, Chileke l'emejeru madzụ, mbụ ọ -bụru l'ị makwanụru onye-e sụru t'i kee ya nụ mini-a amama owhu mẹe ya ẹgbee bụru gụbedua gẹga aryọ iya mẹe ya anụ ghu mini, l'anụje ndzụ t'ị ngụa.”

¹¹ Nwanyị ono sụ iya: “Onye-Nwe-Ọha, gẹ l'ọodukwanua iwhe i gude, l'ii-gude seta mini ọbu, wẹlu-a b'ị marụ-a l'ọ dụ omilomi. ?Ọ hụnu awe bẹ mini ọbu, l'anụje ndzụ shi ghu?

¹² ?T'ị bya aka nnajị ochee anyi Jékọpu shii, bụ iya tụru anyi wẹlu-a, tụ-gee ya, ngụa ya mini, ụnwu iya ngụa ya mini, élwù lile, o nweru ngụkwaa ya whọ mini?”

¹³ Jisọsu sụ iya: “Ọ tọ dụkwa onye ngụru mini wẹlu-a, mini l'ẹte agụle-ẹ ọdo.

¹⁴ Ọle onye, ngụru mini ọwhu ọ bụ mbẹdua l'a-nụ iya bẹ mini l'a-byadụa l'agụbaa agụgu owhu jeyewaro lẹ tututu-mịmimi. O noo lẹ mini ọwhu mu l'a-nụ onye ono l'a-dụwa iya rọ l'ẹhu bụru iya ishi ngele l'anọje anwụshi mini, l'anụje ndzụ tututu-mịmimi.”

¹⁵ Nwanyị sụ iya: “Onye-Nwe-Ọha, byiko, nụnu mu ẹgube mini ono tẹ mu ngụ-a nke ọwhu bụ mu -ngụ-gee ya, mini ta abyahẹwaro l'agụbaa ya ọdo, ya ahakwanụa nke ọbyaje okuta mini l'ẹka-a.”

¹⁶ Jisọsu sụ iya: “Lanụ je ekua ji ghu tẹ gụ l'iya lịru bya ẹka-a.”

¹⁷ Nwanyị ono sụ iya lẹ ya ta alụkwa ji. Jisọsu sụ iya: “Ọo ghu ezhi-okfu. Ị -sụ l'ị tị lụdu ji b'ọ bụ ghu ọkpobe-okfu.

¹⁸ Iwhe meru mu sụ l'ọo ọkpobe-okfu b'i kfuru bụ l'ị bụ nwanyị mgbawhe ji. Ị lụwaru unwoke ise, tẹmenu onye ọwhu gụ l'iya bu ntaa ta abụkwanu m'ọo ji ghu. Ọo ire-lanụ b'i kfuru nno.”

¹⁹ Nwanyị ono sụ iya: “Onye-Nwe-Ọha, ntaa bẹ mu marụ l'ị bụ onye nkfuchiru Chileke.

²⁰ Nna anyi whẹ bụ l'ugvu-a bẹ whẹ shi anọduje abarụ Chileke ẹja. Ntaa bẹ unubẹ ndu Ju bya asụ l'ọolewho lẹ Jerúsalẹmu bẹ l'aanọduje abarụ Chileke ẹja.”

²¹ Jisọsu sụ iya: “Nwanyị, kwetalee iwhe mu l'ekfuru ghu, oge l'agbabeekwa nteke l'adụhee onye bya l'anọdu l'ugvu-a baarụ Chileke bụ Nna ẹja, ta anọduhe lẹ Jerúsalẹmu abarụ iyẹ ya.

²² Unubẹ ndu Samériya bẹ bụ iwhe unu l'ẹte amaa bẹ unu l'abarụ ẹja, anyịbedua, bụ ndu Ju bụ iwhe anyi marụ bẹ anyi l'abarụ ẹja nkele ọo l'echilabọ ndu Ju bẹ ndzọta ono shi.

²³ Ọle oge l'agbabekwaa mbụ o gbee rwuakwanu erwu, mbụ nteke ndu l'abarụ Chileke, bụ Nna ẹja ọkpobe abarụ l'e-gude Ume-Dụ-Nsọ mẹe obu whẹ g'ọ ha abarụ iyẹ ya lẹge ọ gbarụ. O noo ẹgube ndu ọ dụ Chileke, bụ Nna ree tẹ whẹ bajẹru iya ẹja ndono.

²⁴ Chileke bụ Ume. Ọo ya bụ lẹ ndu l'abarụ iya ẹja gudefutaje Ume-Dụ-Nsọ abarụ iya ẹja ono ọkpobe abarụ.”

²⁵ Nwanyị ono sụ iya: “Mu makwarụ-a lẹ Mezáya ọbu l'a-bya bụ iya bụ onye ọbu, l'eekuje Kuráyisutu, l'ọ -byalẹwho bẹ l'ọo-tụko iwhe g'iwhe ha kọkotaru whẹ.”

²⁶ Jisọsu sụ iya: “Ọo mbẹdua, l'ekfu eyeru ghu bụ iya bụ Kuráyisutu ọbu.”

²⁷ Whẹ l'ekfukwadu-a nno, ndu whọ l'etso ụzo iya shi rwua. Ọ tụfu whẹ ẹhu gẹ whẹ bya awhụa gẹ Jisọsu yẹle nwanyị l'edzu idzu. Ọle ọ tọ dụdu onye ọwhu jịru nwanyị ono sụ iya: “?Ọo gụnu bẹ l'ịicho?” Whẹ ta ajị Jisọsu: “?O kwoberu gụnu ekfuru eyeru nwanyị ono?”

²⁸ Tọ dụ iya bụ lẹ nwanyị ono agbaghaa ite-okumini iya ono l'ẹka ono, gbagbụa gbaba l'ime mkpụkpu ono je echiaru ndu ọdo mkpu sụ whẹ:

²⁹ “Unu byadụwho bya awhụ nwoke, tụkoru iwhe bụ-zhia iwhe mejeru kọshiaru mu. Mu ta amakwa ?ọo-bụ iya bụ Kuráyisutu ọbu, Chileke kweru ụkwa l'ọo-bya?”

³⁰ Whẹ wụfuta l'ime mkpụkpu ono wụ-kfuta Jisọsu.

³¹ Nteke ono, nwanyị ono tụgburu bẹ ndu l'etso ụzo Jisọsu ryọru iya sụ iya: “O-zhi-iwhe, kabẹro ria nri.”

³² Ọ sụ whẹ: “Mu nwerua nri, mu l'e-ri, unu l'ẹte amaa.”

³³ Ọo ya bụ ndu ono, l'etso ụzo iya kfude l'ime onwowhe sụ: “?O nweru onye kabẹ wotaru iya nri?”

³⁴ Jisọsu sụ whẹ: “Iwhe bụ nri mu bụ tẹ mu mee iwhe dụ onye ono, zhiru mu nụ mma l'obu mẹe tẹ mu jekota ozhi, o zhiru mu g'ọ ha jefu iya l'ishi.

³⁵ Tọ dụ unu l'anmajẹ ẹtu sụ: ‘Mbẹ ọ bụwa-a ọnwa ẹno ntaa; ya erwua nteke l'aakpatajẹ iwhe e meberu l'alị.’ Ọle mu l'ekfukwaruwho unu sụ: Unu paliadawho ẹnya leedawho l'okfu, a kọru akọko, gbua ya nke whụduwho l'iwhe e meberu l'alị kashịwaru dụwaa nke akpata.

³⁶ Onye ono, l'akpa iwhe ono, e meberu l'alị bẹ l'aakfụjekwa ụgwo ozhi, o jeru. Onye ono, l'achịkobekwawho mebyi iwhe, l'a-nọdu l'ẹka lanụ ngabẹru ndzụ tututu-mịmimi. Ọ kwanụ iya bụ nke ọwhu ndu ono, l'akụ iwhe ono akụku mẹe ndu ọwhu l'akpa iya akpakpa l'a-tụko swaa ẹswa.

³⁷ O noo ẹka iwhe ọbu, e kfuru gude bụru ọkpobe-okfu, mbụ iwhe ono, e kfuru sụ: ‘Onye lanụ l'emebeje iwhe l'alị, onye ọdo eje akpata iya akpata.’

³⁸ Mu zhiru unu t'unu je akpata iwhe e meberu l'ẹgu l'ẹka unu l'ete ejee ozhi. Ọo ndu ọdo jeru ozhi l'ẹgu ono, ọle ntaa bẹ unubẹdua jewaa je erilahaa urwu, dụ l'anya ono, whẹ seru.”

³⁹ Igweligwe ndu Samériya, shi lẹ mkpụkpu ono bya bya eworu onwowhe ye Jisọsu l'ẹka nke l'ọo lẹ nwanyị ono sụru whẹ: “Ọ kọshikotaru mu iwhe bụ-zhia iwhe mu mejeru.”

⁴⁰ Tọ dụ iya bụ lẹ ndu Samériya ono abyakfuta Jisọsu, whẹ ryọo ya tẹ whẹ l'iya nọtabaa. O kwe, whẹ l'iya nọo abalị labọ lẹ mkpụkpu ono.

⁴¹ A dụbaa l'igwe kwobe okfu, shi iya l'ọnu kweta.

⁴² Whẹ sụ nwanyị ono: “Ntaa ta ahẹkwa iwhe i kfuru anyi kpatarụ iwhe anyi kwetaru. Iwhe meru anyi kweta bụkwa l'anyi gudewaa nchị anyi anụ iya l'onwanyi marụ l'ọo ọkpobe-okfu l'ọo onye-e bụ onye ọbu bụ iya bụ Onye Ndzọta mgboko-o l'ezhi.”

Jisọsu meru nwa onye ishi alị; o mehu

⁴³ Ọ nọ-gelewho abalị labọ ono l'ẹka ono, ọ tụgbua jeshia Gálili.

⁴⁴ O noo nkele ọo Jisọsu ọbu l'onwiya gude ọnu iya kfuhawaro sụ, l'onye nkfuchiru Chileke bẹ l'ẹte akwabẹjedu ugvu l'alị, a nwụru iya.

⁴⁵ Tọ dụ iya bụ l'o rwulewho Gálili, ndu bu lẹ Gálili ono gbobe ẹka labọ nata iya nkele whẹ whụkotaru iwhe lile ono, o meshiru lẹ Jerúsalẹmu nteke ono, l'eeri oge l'ẹka ono nkele whẹbedua jekwaruwho ori-oge ono lẹ Jerúsalẹmu.

⁴⁶ Ọo ya bụ, Jisọsu bya atụgbua dawhushia azụ lẹ Kena Gálili bụ iya bụ ẹka ono, o mejeru mini ọ ghọo mmẹe. O nweru onye ọrwu mbeke lanụ, ẹhu l'adụa nwa iya mma lẹ Kapániyọmu.

⁴⁷ Nwoke ono nụlewho lẹ Jisọsu shiwaa Judíya bya Gálili; o jekfu iya je aryọo ya t'ọ bya emee nwa iya t'o mehu l'ọonwuhukwa anwụhu.

⁴⁸ Ọo ya bụ, Jisọsu sụ iya: “Ọ -bụdua-a l'unu gude ẹnya unu whụa iwhe-awhụrulenya, dụ biribiri bẹ unu l'ẹte abyakwa l'e-kweta.”

⁴⁹ Onye ọrwu mbeke ono sụ iya: “Onye-ukfu-l'ọha, byiko byarọ t'anyi je, a nọnyaanu, nwa iya ọbu nwụhu.”

⁵⁰ Jisọsu sụ: “Tụgbua lashia lẹ nwa ghu ono l'a-nọduru ghu-a ndzụ.” Nwoke ono kweta iwhe ono, Jisọsu kfuru iya ono, tụgbua lashia.

⁵¹ Nwoke ono nọdukwadu-a l'ụzo ala, ndu l'ejeru iya ozhi gbata iya ndzuta bya asụ iya lẹ nwa iya ono mehuakwaru.

⁵² Ọ bya ajị whẹ: “Ọo ẹgube oge nteke ole bẹ nwata ono beberu wata ọka mma?” Whẹ sụ iya: “Ọlekwawho l'orifu nri-eswe l'eswe ụnyawhu bẹ ẹwhoku ono nwubuhuru iya.”

⁵³ Nna nwata ono nyata l'ọolewho oge nteke ono gẹdegede bẹ Jisọsu sụru iya tẹ ya lashia lẹ: “Nwa ghu l'a-nọduru ghu-a ndzụ.” Tọ dụ iya bụ lẹ nwoke ono mẹe ndu ibe iya atụko gẹ whẹ ha woru onwowhe ye Jisọsu l'ẹka.

⁵⁴ O noo bụru iwhe-awhụrulenya nke ẹbo, Jisọsu meru g'o shi lẹ Judíya bya Gálili.