Jọnu 2 - BAYỊBURU Ẹzaa

Okee nwanyị lẹ Kena

¹ A nọlewho ujiku labọ, o be lẹ nke ẹto iya, o nweru nwanyị, l'eekee lẹ mkpụkpu Kena ọwhu dụ lẹ Gálili. Ne Jisọsu nọdukwawho l'ẹka ono.

² Jisọsu yẹle ndu l'etso ụzo iya jee ẹka ono, l'eekee nwanyị ono, nkele e kukwanuru whẹ tẹ whẹ bya.

³ Ọ bya ebe nteke a ngụ-geeru mmẹe, a gataru ọ gvụ, ne Jisọsu jekfu iya je asụ iya: “Ndu-a te enwehekwa mmẹe.”

⁴ Jisọsu sụ iya: “Ha! Nwanyị-a; ?ọo mbẹdua b'ọ dụru? Oge nteke mu l'e-me iwhe ono, ẹnya dụ ghu teke erwudua-o.”

⁵ Ọle ne iya sụlekwaru-a ndu l'akwashị nri l'ụlo ono: “Iwhe bụ iwhe ọ sụ-zhiaru t'unu mee, t'unu melekwawho iwhe ọbu.”

⁶ O nweru whọ mgbaja ishii, e gude ụrwa kpụa gvugeeru l'ẹka ono, ndu Ju l'egudeje eme nsọ ọsafu mmerwu. Iwhe l'alajẹ lẹ mgbaja ono nnanụ bụ galọnu ụkporo je l'ụkporo l'iri.

⁷ Jisọsu sụ ndu nkwashị nri ono: “Unu kujishia mgbaja ono lẹ mini g'ọ hakọta.” Whẹ kujishikota iya ọ kpaa l'ogboromọnu mgbaja ono.

⁸ Ọ sụ whẹ: “Ngwa, unu gbatawa iya rọo ntaa je anụ onye ono bụ iya bụ ishi l'eriri-a.” Whẹ gbata iya je anụ iya.

⁹ Onye ishi l'eriri ono bya etsua ọnu lẹ mini ono ghọwaru mmẹe. Ọ tụfu iya ẹhu mbụ ẹka ẹgube mmẹe ono shihunu. Ọlewho ndu ono, l'akwashị nri, bụ whẹ kuru mini ono marụ ẹka o shi. Ọo ya bụ, ọ bya agbaku nwoke ono, byarụ ọlu nwanyị ono oku

¹⁰ sụ iya: “Ibe ghu l'evujeedaa ụzo pashịa mmẹe ọwhu dụ ree a ngụada, nteke mmẹe dụlewho madzụ l'ẹnya tẹmenu a pashịde ọjogvu ọjogvu mmẹe. Ọ waa bẹ i gbee kpacha mmẹe ọwhu dụ ree byeye ntaa!”

¹¹ Jisọsu meru iwhe-awhụrulenya mbụlembu ono, o meru lẹ Kena Gálili, mee ya gude goshi ọdu-biribiri nkiya. Ndu l'etso ụzo iya kweta nkiya.

¹² E megelewho iwhe ono, Jisọsu, mẹe ne iya, mẹe unwune iya nke nwoke, mẹe ndu l'etso ụzo iya tụgbua jeshia Kapániyọmu. Whẹ je anọo nwidzudzu ono l'ẹka ono.

Jisọsu l'achịshi ndu l'agba nghọ l'eze-ụlo Chileke

¹³ Oge ono, ndu Ju l'erije, bụ O-je-ghata dụwaa ntse, Jisọsu tụgbua jeshia Jerúsalẹmu.

¹⁴ O rwua, ọ bya abahụ l'ime eze-ụlo Chileke dụ lẹ Jerúsalẹmu. Ọ whụa ndu nọ l'ẹka ono ere eswi mẹe atụru mẹe ndo, whụkwaawho ndu l'agbanwe okpoga gẹ whẹ nọkwawho l'ẹka ono agbanweshi okpoga l'eli teburu whẹ.

¹⁵ Ọ bya achịta ụdo meta ẹchachi gude chịkashikota whẹ gẹ whẹ ha l'ime eze-ụlo Chileke ono, chịkashigee, mẹe atụru, mẹe eswi ono. Ọ bya aghakashịa okpoga ono, ndu ono l'agbanweshi, kpubegee teburu whẹ iwhu l'alị.

¹⁶ Ọ bya abaarụ ndu ọwhu l'ere ndo mba sụ whẹ: “Unu chịfu iwhe ono l'ẹka-a. Ọ tọ dụ ụlo Nna mu bẹ unu l'e-dobe ụlo aswa.”

¹⁷ Ndu l'etso ụzo iya bya anyata iwhe ono e deru l'ẹkwo-okfu Chileke, sụru: “Obu, mu yeru ụlo ghu l'enwu whuruwhuru g'ọo ọku, ọ bụru n-yemobu ono l'e-ri ishi mu.”

¹⁸ Ọo ya bụ, ndu Ju sụ iya: “?Ndẹnu iwhe l'iimeru goshi anyi, anyi l'e-gude marụ l'iwhe ono, i meru b'i meru l'orwuberu iya?”

¹⁹ Jisọsu sụ whẹ: “Unu kutsushia eze-ụlo Chileke-e, ọo ujiku ẹto kpụ bẹ mu l'e-gude tụkwaa ya, ya adụ-whu azụ lẹge o shihawaa dụ.”

²⁰ Ọo ya bụ, ndu Ju ono sụ iya: “?Ị sụru l'ọo ujiku ẹto bẹ l'ii-gude tụ-whu eze-ụlo-ọ azụ, mbụ eze-ụlo, a tụru ụkporo awha labọ l'awha ishii-a b'ị sụru l'ịi-tụ ujiku ẹto?”

²¹ Ọle eze-ụlo Chileke, Jisọsu l'ekfu okfu iya ọbu bẹ bụ onwiya gẹdegede.

²² O noo iwhe meru ọ nwụhu-gee, Chileke mee ya o shi l'ọnwu teta nọdu ndzụ, ndu l'etso ụzo iya nyata l'ookfujehawaru iwhe ono. Ọ kwa iya bụ lẹ whẹ ekweta iwhe e deru l'ẹkwo-okfu Chileke, kwetakwawho iwhe Jisọsu kfuru.

Jisọsu marụ onyemonye

²³ Nteke ono, Jisọsu nọ lẹ Jerúsalẹmu gẹ l'eerikwadu oge O-je-ghata ono bẹ igweligwe madzụ kwetakwaru nkiya. Iwhe meru iya bụkwaru lẹ whẹ whụkotaru iwhe-awhụrulenya l'oomegbabe.

²⁴ Ọle Jisọsu te egudedu ire whẹ ẹka nke l'ọ makọtaru gẹ onyenọnu dụ dụ.

²⁵ Ọ tọ bụdu nke woo t'a bya akọodaru iya gẹ madzụ dụ dụ, eshi-ọwhu yẹbedua l'onwiya makọtaru iwhe dụ madzụ l'obu.