Jona 4 - BAYỊBURU Ẹzaa

Ẹhu l'eghu Jona eghu

¹ Ọle Jona bẹ yẹbe iwhe dụ-zhiawho ejo ẹji, iwe bya iya l'ẹhu.

² O kfulahaa nụ Onye-Nwe-Ọha sụ iya: “Gụbe Onye-Nwe-Ọha, ?tọ bụdu iwhe ọbu mu kfuru nteke ono, mu nọ l'ibe anyi ndọwa? Ọ kwa iya kpatarụ iwhe mu mekeberu ẹgwegwa gbarụ lashia mkpụkpu Tashishi. Nkele mu mahawarụ l'ị bụ Chileke l'emenuka eze-iwhe-ọma, ị bụru onye l'awhụnuka imiko; tẹmenu ẹhu te eghukebeje ghu eghu, n-yemobu ghu nyịbe anyịbe, ị bụru onye l'ejizetaje obu haa ome madzụ ejo-iwhe, i gege eme iya.

³ Eshi ọ dụ nno kwa iya bụ tẹ gụbe Onye-Nwe-Ọha wota ndzụ mu ntaa, nkele ọ kakwarụ mu mma lẹ mu nwụhuru anwụhu karụ lẹ mu nọdu ndzụ.”

⁴ Onye-Nwe-Ọha bya asụ iya: “?Ọo gbarụ nke t'ẹhu l'eghu ghu eghu?”

⁵ Tọ dụ iya bụ, Jona swịkfuruhu lụfu l'obodo ono je akpogoru l'ẹka ọbu, dụ l'ụzo ẹnyanwu-awata obodo ono. Ọ tụaru onwiya mkpuumkpu l'ẹka ono je anọdu lẹ mkpula iya t'iya leberu iwhe l'e-bekochaa nwụaru obodo ono.

⁶ Onye-Nwe-Ọha, bụ Chileke bya adzabẹ nwooshi ụgba-nshi l'eli mkpuumkpu ono Jona nọdu; o futa bakashịhu, bya emee t'aguguru dụ l'ẹka ono, nke ọwhu Jona l'ẹte anọhe agha gbụrugburu. Oshi ụgba-nshi ono mee ẹhu tsọo Jona pyoo.

⁷ Ọle a fụtaru l'ụtsu echile iya, Chileke yee nwa-ẹhu o je atanwụa oshi ụgba-nshi ono, ọ nwụa lwaa.

⁸ Anwụ chitalewho, Chileke bya eyefu o-kpo wharawhara nke whẹrewhere, shi l'ụzo ẹnyanwu-awata, anwụ keru Jona l'ishi echi gbaagbaa nke ọwhu bụ l'ume l'ebuhu iya ebuhu. Ọ dụ-gezhia ya nke t'iya nwụhu anwụhu. Ọ sụ: “Ọ kakwarụ mu mma lẹ mu nwụhuru anwụhu karụ lẹ mu nọdu ndzụ.”

⁹ Onye-Nwe-Ọha bya asụ Jona: “?Ọo gbarụ nke t'ẹhu l'eghu ghu eghu l'ẹka oshi ụgba-nshi ono nọ?” Jona sụ iya: “Ee, ọ gbarụ nke t'ẹhu l'eghu mu eghu, mbụ l'ẹhu l'eghukwa mu damụdamu nke anwụhu.”

¹⁰ Onye-Nwe-Ọha sụ iya: “?Ọ wabụkwaa gẹ nke oshi ụgba-nshi ọbu rwuberu ghu l'ẹhu l'ẹbe ọbu ghu dzarụ iya, t'ọ bụ ghu meru iya o vuta? Oshi ono bẹ chi bya l'asahụ-deshiwaa o futawa, chi ọdo bya l'asahụ-deshiwaa ọ nwụwa lwaa.

¹¹ ?Iwhe l'iikfunu bụ, t'okfu ẹhu oke obodo ono bụ Nínive be erwushi mu l'ẹhu, mbụ ẹka ono, ndu bu iya nụ ka ụkporo ụnu madzụ ugbo iri l'ise yẹle ikpoto élwù, whẹ nweru, whẹ ta ama onwowhe ẹka-ụtara, whẹ ta ama onwowhe ẹka-ịcha?”