Jona 1 - BAYỊBURU Ẹzaa

Jona l'agbarụ Onye-Nwe-Ọha ọso

¹ O noo ya, Onye-Nwe-Ọha bya ekfuru okfu yeru Jona nwa Amịtayi sụ iya:

² “Gbalihu jeshia eze mkpụkpu Nínive je ekfuru okfu mabẹru whẹ, nkele ejo-ememe whẹ l'emegbabe bẹ rwuwaru ẹka mu nọ.”

³ Ọle Jona gbalihuru vụa ọkpa iya mini ọ bụru iya ọla mkpụkpu Tashishi l'ẹka l'ọogbaru Onye-Nwe-Ọha ọso. O jeshia ọnu-ẹnyimu mkpụkpu Jọpa, ọ whụa ụgbo-mini l'ala Tashishi. Ọ tụa ntụ ụgbo bahụ t'iya tsoru whẹ jeshia mkpụkpu ono, l'ẹka l'ọogbaru Onye-Nwe-Ọha ọso.

⁴ O noo ya bụ lẹ Onye-Nwe-Ọha abya eyefu uburu-aga o je aghaa l'eze-ẹnyimu ono. Oke akpara-mini wata atụtu, nke ọwhu bụ l'ụgbo ono whuduru iwhe ha nwanshị t'ọ zụkashihu.

⁵ Egvu gudeshia ndu nọ l'ụgbo ono. Whẹ wata ochi oroko ekushi ọgvu whẹ l'ẹhu l'ẹhu. Whẹ l'apashi ivu dụ l'ụgbo ono eche lẹ mini nke ọwhu ụgbo ono l'akaba ọgu n-whe. Nteke ono bẹ Jona nọroo l'alị alị ụgbo ono zẹe azẹe ekupyashiru onwiya mgbẹnya.

⁶ Onye ishi ụgbo ono bya ejeta rwua ẹka ọ nọ sụ iya: “?Ọo nwụru ghu agha gụbe edzu-mgbẹnya-a. Gbalihu agbalihu, kpokua ọgvu ghu. O nweru ro gẹ l'ọo-dụ ọgvu ọbu awhụaru anyi imiko, mee t'anyi ba anwụshihu?”

⁷ Ndu nọ l'ụgbo ono bya ekfuru yeru onwowhe sụ: “Unu t'anyi tụada ido marụ onye ejo-iwhe-e shi l'ẹka iya byakfuta anyi.” Whẹ bya atụa ido ọbu, ọ nma Jona.

⁸ Tọ dụ iya bụ, whẹ sụ iya: “Karụ anyi onye ejo-iwhe-e shi l'ẹka iya byakfuta anyi. ?Ọo gụnu bụ ẹka-ọrwu ghu? ?I shi awe? ?Ị bụ onye alị awe? ?Ọo awe b'a nwụru ghu?”

⁹ Ọ sụ whẹ: “Mu bụkwa onye Híburu, onye ya l'abarụ ẹja bụ Onye-Nwe-Ọha, bụ Chileke nke imigwe, onye ono, bụ iya meru eze-ẹnyimu mee eli-mgboko.”

¹⁰ Jona bẹ kọhawaru ndu ono gẹ l'ọonwuru iya, whẹ shi nno marụ l'ọo ọso bẹ l'ọogbaru Onye-Nwe-Ọha. Egvu bya egudeshia ndu ono ike, whẹ sụ iya: “?Ọo gụnu bẹ i mekwanuru nno?”

¹¹ Akpara-mini, eze-ẹnyimu ono l'atụ l'akabaa njọ aka eje eje. Whẹ bya ajịa ya sụ: “?Ọo gụnu bẹ anyi l'e-me ghu tẹ eze-ẹnyimu-a dajia?”

¹² Ọ sụ whẹ: “Unu palia mu imeli tụba l'ime mini, ọo ya bụ, eze-ẹnyimu ono adajia. O doru mu ẹnya l'ọo mu bẹ kpatarụ iwhe oke akpara-mini-a watarụ atụtu.”

¹³ Ndu nọ l'ụgbo ono mekota ikike ọkpehu whẹ tẹ whẹ ngazhia ụgbo ono t'o je akfụru l'ogbigbo ẹnyimu, ọ kpọo whẹ ẹka ememe. O noo nkele akpara, eze-ẹnyimu ono l'atụ kabaa njọ eje eje.

¹⁴ Tọ dụ iya bụ, whẹ chikulahaa Onye-Nwe-Ọha lẹ mkpu ẹkwa asụje: “Jiko Onye-Nwe-Ọha, be ekwekwa t'anyi nwụhu mẹ anyi wofu ndzụ nwoke-e. Be ekwekwa tẹ ọchi onye l'adụa iwhe o meru tukoru anyi l'ishi nkele ọ kwa g'ọ dụ ghu ree bẹ gụbe Onye-Nwe-Ọha meru iya.”

¹⁵ Whẹ bya anmalia Jona tụba lẹ mini ono voo, eze-ẹnyimu ono bụru shọngu lẹ gbukungu gbukungu ono, o shi atụ.

¹⁶ Nteke ono, egvu Onye-Nwe-Ọha wata ọtsu ndu nọ l'ụgbo ono shii. Whẹ gworu ngwo-ẹja nụ Onye-Nwe-Ọha bya eribuaru iya nte lẹ whẹ l'a-bụru nkiya.

¹⁷ Onye-Nwe-Ọha bya ewofuta owhomu-ka-azụ t'o lwee Jona. Jona nọo ujiku ẹto eswe l'ẹnyashi l'ime ẹwho ẹma ono.