Jobu 1 - BAYỊBURU Ẹzaa

Akọ ẹhu Jobu

¹ O nweru nwoke ọbu, bụ onye alị Uzu, ẹwha iya bụ Jobu. Nwoke ono bụ onye, l'ẹte amarụ ejo ẹka, ọ bụru onye obu gụru iwhoro. Ọ bụ onye l'anọje atsụ Chileke egvu gbẹeru ome ejo-iwhe azụ.

² Iwhe a nwụtaru iya bụ unwoke ẹsaa l'ụnwanyi ẹto.

³ O nweru ẹku. Atụru iya dụ ụnu iri l'ẹsaa l'ụkporo iri. Ịnya-kamẹlu iya dụ ụnu ẹsaa l'ụkporo iri. Eswi iya, a tụru njịgba ẹbo-ẹbo dụ ụnu l'ụkporo ise. Ne nkakfu-ịgara iya dụ ụnu l'ụkporo ise. O nweru igweligwe ndu, l'ejeru iya ozhi. Ọo lẹwho l'ọo ya bụ onye shi kakọta shii l'iwhe bụ madzụ, a nwụru anwụnwu l'ụzo ẹnyanwu-awata kpaa-whuu.

⁴ Ụnwu Jobu unwoke l'anọje aha eriri ahaha l'ibe whẹ l'ẹhu l'ẹhu. E -jeeru onye ọwa l'ọgiya ọwa, o -rwua l'ọgiya ọdo e jeeru onye ọdo. Whẹ l'ezhije unwune whẹ ndu nke nwanyị tẹ whẹ bya etsoru whẹ ria ngụa

⁵ L'ọobuje, eriri ono gbadzugele whẹ whọ, Jobu ekua whẹ mee whẹ tẹ whẹ nsọ. Ọogba-lihuje l'ọnmewa ụtsu gbaa ẹja ọkpokota-iwhe-ọku gude gwaa Chileke l'ishi ụnwu iya ono l'ẹhu l'ẹhu. Nkele ọorije sụ: “Mu marụ, ?ụnwu mu te emeduanu iwhe-dụ-ẹji? A marụ ?whẹ te egudedaunu obu whẹ whua Chileke iwhu?” Ọ bụru ẹgube ono bẹ Jobu l'emeje iya ntekenteke.

Chileke l'aha Sétanu t'ọ data Jobu

⁶ Obe ujiku lanụ, ụnwu Chileke bya tẹ whẹ goshi onwowhe l'iwhu Onye-Nwe-Ọha. Sétanu tsoru whẹ bya.

⁷ Onye-Nwe-Ọha sụ Sétanu: “?Ọo awe b'i shi bya?” Sétanu sụ Onye-Nwe-Ọha: “Mu l'eje eje alwa alwa l'eliwhe. Mu tsoru ọma mgboko aghawhe ririri.”

⁸ Onye-Nwe-Ọha bya asụ Sétanu: “?Ẹnya rwuwaru ghu l'ẹka onye ozhi mu Jobu nọ? O to nwedu madzụ, dụ g'ọo ya lẹ mgboko l'owhu. Ọ bụ nwoke obu gụru iwhoro, bụru onye ụta l'adụa lẹ ndzụ iya, bụru onye l'atsụ egvu mụbe Chileke gbẹeru ome ejo-iwhe azụ.”

⁹ Tọ dụ iya bụ, Sétanu bya eyeeru Onye-Nwe-Ọha onu sụ iya: “Ọ byanụ; Jobu ọbu, ?ọ nọnyaaru wata ọotsu gụbe Chileke egvu?

¹⁰ ?Tọ dụ ghu gude agbarara tuwheta yẹle ndibe iya mẹe iwhe lile o nweru mgburumgburu ibẹka ibẹbo? Iwhe lile, l'oome eme b'i meru l'ọogbaru iya bẹrebere, nke ọwhu bụ l'ẹku iya tụkoru alị ono l'owhu dzuru.

¹¹ Machịnua ẹka ntaa denyi l'iwhe lile, o nweru, gụ awhụ l'ọo-kfụru l'atatiwhu ghu whua ghu iwhu.”

¹² Tọ dụ iya bụ, Onye-Nwe-Ọha sụ Sétanu: “Ọ dụ ree. Iwhe lile o nweru dụwaa ghu l'ẹka. Ọo lẹwho t'i be edenyi yẹbedua ẹka.” Ọo ya bụ, Sétanu tụgburu ọ bụru iya alụfu l'iwhu Onye-Nwe-Ọha.

¹³ O be ujiku lanụ, ụnwu Jobu ndu nke nwoke mẹe ndu nke nwanyị dọkobe l'ibe nwune whẹ nke ọgurenya eri iwhe angụ mmẹe.

¹⁴ Onye ozhi bụleruwho whẹreketeke l'iwhu Jobu bya asụ iya: “Oke-eswi, l'eegudeje eje ozhi l'ẹgu b'e gude eje ozhi l'ẹgu, nkakfụ-ịgara dọkwaruwho l'agụga ẹka ono ata nri,

¹⁵ ndu Sabe bya afụru whẹ tụko whẹ rwuta. Whẹ gudekwawho mma gbugbushia ndu l'ejeru ghu ozhi. Ọ bụru mbẹdua kpụ bụ onye gbalaru nụ, mu sụ tẹ mu bya ekfuru ghu iya.”

¹⁶ G'onye onona kpụkwadua okfu ono l'ọnu ekfu bẹ onye ozhi ọdo zhibataru bya asụ: “Ọku, shi l'ẹka Chileke bẹ shilewho l'imigwe bya ekegbushia atụru ghu g'ọ ha; kegee kee ndu ozhi ghu kechafu. Ọ bụru mbẹdua kpụ bụ onye gbalaru nụ; mu sụ tẹ mu bya ekfuru ghu iya.”

¹⁷ G'onye onona kpụkwadua okfu ono l'ọnu ekfu bẹ onye ozhi ọdo zhibataru bya asụ: “Ndu Kaludiya buru ọgbo ẹto tụa lẹ mkpa lẹ mkpa bya awụpyabe ịnya-kamẹlu ghu g'ọ ha rwuta; gude ogu-ịgba gbugbushia ndu l'ejeru ghu ozhi. Ọ bụru mbẹdua kpụ bụ onye gbalaru nụ, mu sụ tẹ mu bya ekfuru ghu iya.”

¹⁸ G'onye onona kpụkwadua okfu ono l'ọnu ekfu bẹ onye ozhi ọdo zhibataru bya asụ: “Ụnwu ghu unwoke mẹe ụnwu ghu ụnwanyi dọkwaru eri iwhe angụ mmẹe l'ibe nwune whẹ nke ọgurenya.

¹⁹ A bya l'eledeshia ẹnya, oke whẹrewhere shilewho l'echi-ẹgu wheru whukuwhuku rwua bya enwungaa ụlo, whẹ nọ mgburẹku ẹno, ụlo zee zepyabe ụnwu ghu ono gẹ whẹ ha, whẹ nwụshihu. Ọ bụru mbẹdua kpụ bụ onye gbafụtaru nụ, mu sụ tẹ mu bya ekfuru ghu iya.”

²⁰ Tọ dụ iya bụ, Jobu gbalihu gude iwe-l'ọnuma zhijaa uwe yẹbe Jobu tarara, bya erwushia ẹgbushi l'ishi. Nteke ono, ọ bya adaa kpupyabe iwhu l'alị baarụ Chileke ẹja

²¹ sụ: “Ọo ọto bẹ mu gba fụta l'ẹwho ne mu. Ọ bụru ọto bẹ mu l'a-gba lashia. Ọo Onye-Nwe-Ọha nụru, ọ bụru iya bẹ natarụ nụ. T'a jakwaa ẹwha Onye-Nwe-Ọha ajaja.”

²² Iwhe lile ono mekotaru Jobu, t'o me iwhe-dụ-ẹji l'ẹka Chileke nọ, too gudebua ọnu iya sụ lẹ Chileke meru iya ẹji.