Izikẹlu 6 - BAYỊBURU Ẹzaa

Nke omebyishi ẹka l'aagwajẹ iwhe

¹ Onye-Nwe-Ọha bya ekfuru okfu yeru mu sụ:

² “Nwa ndiwhe; ghaa iwhu l'ugvu g'ugvu ha lẹ Ízurẹlu; gude nkfuchiru kfua gẹ l'ọo-dụ whẹ.

³ Sụ whẹ agha: ‘Unubẹ ugvu g'ugvu ha lẹ Ízurẹlu, unu nụkwaa okfu, Nnajị-Ọha, bụ Onye-Nwe-Ọha l'ekfu. Ọ waa iwhe Nnajị-Ọha bụ Onye-Nwe-Ọha l'ekfuru eze ugvu, mẹe ụnwu ugvu nshịi, mẹe ọnu-iyi, mẹe nsụda ndọwa: Unu lekwa lẹ mu byakwa l'eworu ogu-ịgba dobe t'ọ bụru ọgu swiru unu, mu byakwa l'emebyishi ẹka unu l'agwajẹ iwhe.

⁴ Ẹnya agwa unu bẹ l'ee-nwukposhi enwukposhi, gwee ẹka unu l'akpọje isẹnsu ọku ryaaryaa, mu awhụa ndibe unu tẹrii tọgbo l'iwhu agwa unu.

⁵ Odzu unubẹ ndu Ízurẹlu bẹ mu l'a-pata tọgbo l'iwhu agwa unu, tụkaa ọkpu unu nnanụ nnanụ l'ẹnya agwa unu mgburumgburu.

⁶ Ẹka unu bu, ẹka unu bu, bẹ mkpụkpu iya l'a-bụru ẹka ẹgbudu fuchiru. Ẹka unu l'agwajẹ iwhe bẹ mu l'e-me t'ọ dakpọshihu, mu emee ẹnya agwa unu t'ọ dakpọshihu bụru ẹka a gbarụ ọso. Mu l'e-tsupyashi agwa unu laa ya l'iyi. Ẹka unu l'akpọje ụ̀nwù-isẹnsu ọku abụru ẹka e gweru ryaaryaa, iwhe unu meru l'ẹka unu abụru iwhe yifuru eyifu.

⁷ Ndu a whụru tẹrii bẹ l'a-dashị gbaagbaa l'echilabọ unu, unu amarụ l'ọo Mu bụ Onye-Nwe-Ọha.

Uwhudu l'e-whudu

⁸ “ ‘Ọle o nweru ndu mu l'a-ha tẹ whẹ nọdu ndzụ, mbụ ndu l'a-nahụ ogu-ịgba; whẹbedua bẹ l'aa-chịkashi je edobe lẹ mba gẹ mba ha mẹe l'alị dụ iche iche.

⁹ Ndu ono wafụru nụ l'a-nọdu lẹ mba ono, a kpụ whẹ lẹ ndzụ laa nyata mu. Whẹ l'a-bya anyata g'o dụ-be mu ẹji lẹ whẹ bụ ndu dụ ghẹle-ghẹle-ghẹle l'obu whẹ, shi nno haa mu etsotso; woru ẹnya swọbe l'agwa, gwalahaa. Whẹ l'a-dụ onwowhe ashị l'ejo-iwhe, whẹ meru mẹe ahụma, whẹ megbaberu.

¹⁰ Nteke ono bẹ whẹ l'a-marụ l'ọo Mu bụ Onye-Nwe-Ọha; l'okfu ono mu kfuru sụ lẹ mu l'e-wokfuta whẹ ejo-iwhe bẹ l'abụdua nke mmaka.

¹¹ “ ‘Ọ waa iwhe Nnajị-Ọha, bụ Onye-Nwe-Ọha l'ekfu ndọwa: Kụa ẹka pyamụ, dzọo ọkpa gidimu, chia mkpu sụ: “Alịkwa mu iya!” L'iswi ejo ahụma ono, ndu ọzo-ụlo Ízurẹlu l'emegbabe. Ọ kwa ogu-ịgba, mẹe mkpẹgu, mẹe ejo ẹhu-ba-dụ-mma l'a-ta ishi whẹ.

¹² Ndu nọ otẹnya bẹ bụ ejo-ẹhu-ba-dụ-mma l'e-gbu whẹ, ndu nọ ntse abụru ogu-ịgba l'a-ta ishi whẹ, ndu wafụru nụ nọdu ndzụ abụru ẹgu l'e-gbu whẹ. O noo gẹ mu l'e-shi zụpyabe whẹ oghu-damụdamu nkemu ndono.

¹³ Nteke ono, unu amarụ l'ọo Mu bụ Onye-Nwe-Ọha, mbụ nteke l'aa-whụ-gbushi ndibe unu tụkaa odzu whẹ l'ẹka agwa whẹ nọ, mẹe l'ẹnya agwa whẹ mgburumgburu, mẹe l'eli ugvu hakọta l'eli, mẹe l'ọnunu eze ugvu, mẹe lẹ mkpula oshi jakashịhuru ajakashịhu, mẹe lẹ mkpula achị nweru ẹkwo, mbụ-zhia l'ẹka lile, whẹ l'akpọje ụ̀nwù-isẹnsu, l'eshi kwẹkwekwe ọku nụ agwa whẹ.

¹⁴ Mu l'a-tụchi ẹka dabẹ whẹ l'ẹhu; mee alị ono t'ọ bụru ẹka ẹgbara kfụru mẹe ẹka daburu iwhoro, watalẹwho l'echi-ẹgu byeye lẹ Ribula je akpawarọ l'ẹka whẹ bukota. Nteke ono whẹ amarụ l'ọo Mu bụ Onye-Nwe-Ọha.’ ”