Izikẹlu 2 - BAYỊBURU Ẹzaa

Onye-Nwe-Ọha l'eku Izikẹlu t'o jeeru iya ozhi

¹ Ọ sụ mu “Nwa ndiwhe; gbashi agbashi kfụru akfụru. O nweru iwhe mu l'e-kfuru ghu.”

² Gẹ l'ookfu eyeru mu, bẹ Ume Chileke batarụ mu l'ime bya ekulia mu ekuli; mu kfụru l'ọkpa mu labọ. Mu nụa gẹ l'ookfu eyeru mu.

³ Ọ sụ mu: “Nwa ndiwhe; mu l'ezhi ghu t'i jekfu ndu Ízurẹlu, mbụ ndu mba ono, kwefuru mu ike. Whẹ lẹ ndụ-ichee whẹ bẹ kwefuru mu ike byeye ntanụ-a.

⁴ Whẹ bụ ndu obu nmarụ mkpigbi, bụru kpọkponyi. Ọo ya meru mu l'ezhi ghu t'i jekfu whẹ je asụ whẹ l'ọ waa iwhe Nnajị-Ọha bụ Onye-Nwe-Ọha l'ekfu ndọwa.

⁵ Mẹ whẹ ngabẹru iya nchị mẹ whẹ ta angabẹ iya nchị; whẹbe ndu ono, bụ ọzo-ụlo, kwefuru ike amarụ nụ l'onye-nkfuchiru Chileke bẹ whẹ l'iya nọjewaru.

⁶ “Gụbedua, nwa ndiwhe; ba atsụkwa whẹ egvu; ba atsụkwa egvu l'okfu, whẹ l'a-nọ ekfu. A makwarụ-a l'ogvu l'uke bẹ nọ-wheru ghu mgburumgburu, ọ bụru l'ẹka akpị jiru eji b'i bu. Ba atsụkwa okfu, whẹ l'e-kfu egvu; t'ụgbugba whẹ be emekwa t'ẹhu nmajẹ ghu kpakpakpa; a makwarụa lẹ whẹ bụ ọzo-ụlo, kwefuru ike.

⁷ Kfuaru whẹ okfu mu mẹ whẹ ngabẹru iya nchị mẹ whẹ ta angabẹ iya nchị, nkele whẹ bụ ọzo-ụlo, kwefuru ike.

⁸ “Ọle ọbu, nwa ndiwhe; ngabẹ nchị l'iwhe mu l'ekfuru ghu. Be ekwefukwa ike g'ọo ọzo-ụlo ono, kwefuru ike. Saa ọnu asa, ria iwhe mu l'anụ ghu.”

⁹ Mu bya elee ẹnya whụ g'a machịru mu ẹka. Iwhe dụ l'ẹka ono bụru ẹkwo, a gwọru agwọgwo.

¹⁰ Ọ whụshia ẹkwo ono l'iwhu mu; e dee ya iwhe l'iwhu mẹe l'azụ. Iwhe e deru iya bụ: áwhụ atsọru mu-ee; nshọbukwa mu nshọ.