Híburu 13 - BAYỊBURU Ẹzaa

Ome iwhe dụ Chileke ree

¹ Unu ba ahakwa oye obu ono, unu kwoberu l'unu shiwaa l'ẹka Kuráyisutu bụru ụnwunna, ye ibe unu ono.

² Unu ba azọhakwa ọkwajeru ndu byarụ abya ẹbyii ọkpobe akwakwa, l'o nwekwaru ndu gudewaa lẹ whẹ l'akwarụ ndu byarụ abya ẹbyii jeye whẹ kwaarụ ndu ojozhi-imigwe ẹbyii whẹ ta amarọo.

³ T'unu nyatajẹkwa ndu mkpọro, t'ọ dụje unu g'ọo unubẹdua nọ lẹ mkpọro ọbu. Unu nyatajẹkwawho ndu l'eje iwhe-ọtsulanu, t'ọ dụjekwawho unu g'ọo unu l'eje iwhe-ọtsulanu ọbu.

⁴ T'iwhe bụ-zhia unwoke, l'alụ nwanyị mẹe ụnwanyi, l'alụ ji bụru ẹhu l'alụlu whẹ ono nke ọwhu l'ẹte anọ ama alụlu whẹ ono ejo ẹka. Tẹ nwoke yẹle nyee ya ba adụkwa onye ọwhu l'eri ogori, shi nno merwua onwowhe. Lẹ nwoke l'akpa lẹ nwanyị mẹe nwanyị l'akpa nwoke mẹe ndu l'eri ogori bẹ Chileke l'e-kpekwa ikpe.

⁵ Unu be eyenukakwa ẹnya l'okpoga. T'iwhe unu nweru tsụjee unu l'ẹnya. Lẹ Chileke kfuakwaru iya l'onwiya sụ: “Mu ta agbahakwa ghu ẹka, mu ta abya l'eweha ghu.”

⁶ Ọo ya bụ, unu t'anyi kfụshijenua ike kfuje okfu-a, t'anyi ba atsụje egvu ekfukfu iya. T'anyi kfuje sụ: “Ọo Onye-Nwe-Ọha bụ onye l'eyejeru mu ẹka, Mu ta abyadụ l'atsụ egvu. Madzụ ta adụdu iwhe l'oo-mebata mu.”

⁷ Unu nyatajẹ ndu ono bụ whẹ vu ụzo goshi unu ụzo, bụ iya bụ ndu ono, zhiru unu ozhi-ọma Chileke. Unu kpọlataada égò azụ, nyata gẹ whẹ shi anọje eme nteke ono, whẹ nọ ndzụ jeye whẹ nwụhu, tẹ ekwekwe, unu kweru nke Chileke dụkwa g'ọo nke whẹ.

⁸ Jisọsu Kuráyisutu: bụ onye ono ọ bụ, b'ọ bụ ụnyawhu, bụru iya ntanụ-a, o je l'a-bụ iya jeye lẹ tututu-mịmimi.

⁹ Unu be ekwekwa t'iwhe l'ezhi ezhi dụ-gee l'iche l'iche shi uswe bya akposwee unu ụzo. Ọ dụ ree t'anyi gude eze-iwhe-ọma ono, Chileke l'eme shihu obu ike. Omewhe nsọ nsọ, tso nri te emekwa t'obu shihu anyi ike, ọ tọko dụbudua onye tsojeru iya nno, o yejeru ẹka.

¹⁰ Anyi nweru ẹnya-mgbẹja ẹka Kuráyisutu gbarụ ẹja nụ Chileke, mbụ ọwhu ndu l'agbakwadụru-a Chileke ẹja l'ụlo ono, e gude ẹkwa mee l'afụa ria iwhe shi iya nụ.

¹¹ Onye ishi ndu l'agbajẹ ẹja nụ Chileke nke whẹbedua, bẹ l'egudeje mmee ụnwu anụ, e gburu egbu gude bahụ l'ẹka-kakọta-ọdu-nsọ l'ime eze-ụlo Chileke, tẹ ya je egude iya gbaa ẹja gbafụ iwhe-dụ-ẹji, ọle anụ, ono a whụ-gburu awhụ-gbu ono bẹ l'eewotaje lụfu je l'ẹka l'ebua ebu je akpọo ya ọku.

¹² Ọ bụkwanuru iwhe ono meru g'o gude Jisọsu nọdukwanu l'azụ obodo, jee iwhe-ọtsulanu, nwụhu, nnta gẹ l'ee-shi tẹ ya gude mmee ya safụ iwhe-dụ-ẹji ndiwhe metagbaberu.

¹³ Ọo ya bụ, unu t'anyi jekfu iya l'azụ obodo t'a tụko anyi l'iya mee iwhe iwhere.

¹⁴ O noo l'ọ tọ dụdu obodo, anyi nweru l'eliwhe-e, bụ obodo ọwhu l'a-dụgburu jeye lẹ tututu-mịmimi, iwhe gbechia mee nụ bụ l'anyi l'achọ obodo ọwhu l'abya nụ.

¹⁵ Ọo ya bụ, tọ bọ dụkwa nteke anyi l'ahajẹ otu Chileke ẹwha. T'ẹwha ono bụru mgbẹja, anyi shi l'ẹka Kuráyisutu agba. Ọo ẹwha ono, anyi l'etu iya l'a-bụ iwhe shi anyi l'ọnu, l'egoshi l'anyi bụwaa nkiya.

¹⁶ Unu ba ahakwa omeje iwhe dụ ree, unu ta ahahụnu ogudeje iwhe unu nweru eyeru ibe unu ẹka, nkele o noo ẹgube mgbẹja ọwhu dụ Chileke ree.

¹⁷ Unu mejee iwhe ndu ishi unu sụru t'unu mee, mbụkwa e behuduru l'ọotsu unu m'ọo l'ẹhu ememe. L'ọ kwa ndu ono, bụ ndu ishi ono bẹ l'anọje eche ndzụ unu, eshi-ọwhu whẹ l'ee-megee kfụru l'iwhu Chileke doo gẹ whẹ jetaberu ozhi ẹhu unu. Unu l'e-mezhiwaa iwhe whẹ sụru t'unu meje bẹ whẹ l'e-gudekwa ẹhu-ụtso jee ozhi whẹ ono. Ọdumeka bẹ whẹ l'e-gbekwa eme iya atsụ ude, o noo ta adụkwa urwu, l'ọo-bẹru unu.

¹⁸ Unu kfujekwaru nụru anyi Chileke. L'ọwhu doru anyi ẹnya bụ l'obu ta anmadu anyi ikpe, mbụkwa to nwezhia nteke l'ọ tọ bụlewho t'anyi mee iwhe dụ ree l'iwhe lile, anyi l'eme eme bẹ anyi l'anọje achọ ụzo iya.

¹⁹ Iwhe mu kwatarụ aryọshi-zhia unu ike iya, ụnwunna mu bụ: t'unu kfuje nụ Chileke tẹ Chileke kwe tẹ mu byakfuta unu ẹgwegwa.

Okfu anụ Chileke

²⁰ Tẹ Chileke ono bụ iya l'emeje t'ẹhu dụ guu yekwaru unu ẹka. Ọo ya meru tẹ Onye-nwe-anyi Jisọsu Kuráyisutu shi l'ọnwu teta, nọdu ndzụ, bụ iya bụ onye shi l'anwụhu ono, ọ nwụhuru bụru eze onye l'eche anyi gẹ l'eecheje atụru. Ọ bụru mmee, ọ gbashịru nteke ono, ọ nwụhuru b'o gude mee ụkwa iwhe ono, Chileke kweru tukobe l'ọgbandzu yẹle madzụ, o vuru ire jeyewaro lẹ tututu-mịmimi.

²¹ Tẹ Chileke ono mee t'unu nweru iwhe lile, bụ iwhe dụ ree, ya emee t'unu meje iwhe bụ uche iya. Tẹ Chileke shikwawho l'ẹka Jisọsu Kuráyisutu mee iwhe bụ iwhe dụ iya ree l'obu anyi. T'ọja-ama bụru nke Kuráyisutu jeye lẹ tututu-mịmimi. O noo g'ọ dụ.

Ekele, e gude akpochi ẹkwo-ozhi-a ishi

²² Ọ kwa aryọryo bẹ mu l'aryọ unu, ụnwunna mu sụ: t'unu takwaa nshi nụa ozhi-a, l'ẹkwo-ọ, mu deru unu-a ta adụkwa ogologo. Ọo ya bụkwanu nke ọwhu l'oo-me unu t'obu shihu unu ike.

²³ Iwhe mu l'eme t'unu marụ bụ lẹ nwune anyi bụ Tímoti, e shi tuchia, b'a hawarụ. Ọ -bụru l'ọ byarụ ẹgwa bẹ mu l'iya l'a-tụkokwa lịru mẹ mu -byadẹ unu agbawhe.

²⁴ Unu jịaru mu iwhe bụkota ndu ishi unu mẹe iwhe bụkota ndu bụ ndu nke Chileke. Ụnwunna anyi ndu Ị́tali l'ajịkwaro unu.

²⁵ Tẹ Chileke meeru unu eze-iwhe-ọma g'unu hakọta.