Ẹsuta 9 - BAYỊBURU Ẹzaa

Ndu Ju l'alwụ-gbu ndu ọhogu whẹ

¹ O be l'ọnwa nke iri l'ẹbo, bụ iya bụ ọnwa Ada, lẹ mbọku ọnwa ono gbarụ abalị iri l'ẹto, bụ mbọku, e doberu nke ome iwhe ono, eze tụru l'iwu ono. Mbọku ono bụ mbọku, ndu ọhogu ndu Ju shi gbaa ẹnya lẹ whẹ l'a-kakputa ndu Ju ono l'ẹnya. E megee, ọ ghaa ịgharawhu, ndu Ju kakputachia ndu ono, kpọru whẹ ashị ono l'ẹnya.

² Ndu Ju bya edzukobe lẹ mkpụkpu gẹ mkpụkpu ha, whẹ bu l'obodo lile, eze Áhazerusu l'achịkota, tẹ whẹ lwụshi ndu ono, l'achọ ụzo whẹ l'eshi kpanyia whẹ ẹnya ọgu. Ọle ọ tọ dụdu onye dụ ike kpọ ndu Ju ono iwhu, nkele egvu whẹ byarụ ndiwhe l'ẹhu.

³ Ndu bụ ishi l'obodo ono l'owhu mẹe ndu nnọ-chi ẹnya eze mẹe ndu ọchi-ọha mẹe ndu l'ejeru eze ozhi bẹ yetaru ndu Ju ẹka nkele whẹ l'atsụkota Mọdekayi egvu.

⁴ O noo lẹ Mọdekayi b'a ma ama g'ọo oke madzụ l'ibe eze. Ude iya ngakọta obodo ono l'owhu. Ọkpehu l'aka iya shii eje eje.

⁵ Ndu Ju gbugbushia ndu ọhogu whẹ gẹ whẹ ha lakọta whẹ l'iyi. Mbụ lẹ whẹ meru ndu ono, kpọru whẹ ashị ono g'ọ dụ whẹ ree.

⁶ Lẹ Susa, bụ ishi mkpụkpu alị-eze ono bẹ ndu Ju gburu ụnu madzụ l'ụkporo ise.

⁷ Ndu tso lẹ ndu whẹ gburu bụ Pashandata, Dalụfonu, Asụpata,

⁸ Porata, Adalaya, Aridata,

⁹ Pamashụta, Arisayi, Aridayi ọwaa Vayịzata.

¹⁰ Ụmadzu iri ono bụ ụnwegirima ibe Hemanu nwa Hamedata, onye ono, bụ ọhogu ndu Ju. Ọle whẹ te egwotadu arya whẹ.

¹¹ Mbọku ono gẹdegede b'e je edooru eze ụmadzu ole, e gburu lẹ Susa, bụ ishi alị-eze ono.

¹² Eze sụ eze-nwanyị, bụ Ẹsuta: “Ndu Ju bẹ nọdukwa l'ishi mkpụkpu alị-eze-e, bụ Susa gbua ụnu madzụ l'ụkporo ise, ọwaa ụnwegirima ibe Hemanu whẹ iri. ?Oo onye marụ gẹ whẹ meberu l'obodo ọwhu? ?Ọo gụnu bụ mkpa ghu tẹ mu meeru ghu iya? ?Ọo gụnu b'ọ dụ ghu nke tẹ mu meeru ghu? Mu l'e-meru ghu iwhe ọbu.”

¹³ Ẹsuta sụ iya: “Ọ -bụru l'ọ dụ gụbe eze ree, nụnu ndu Ju, nọ lẹ Susa ike tẹ whẹ woru iwhe ono, whẹ meru ntanụ mefua echile. T'e woru odzu ụnwu Hemanu ono whẹ iri je ekobe l'eli oswebe ono, l'aaswị-gbuje madzụ.”

¹⁴ Ọo ya bụ, eze tụa iwu t'e mee ya nno. A tụa ya, ọ bụru iwu lẹ Susa. A pata odzu ụnwu Hemanu ono whẹ iri je ekobe l'eli oswebe ono.

¹⁵ Ndu Ju, nọ lẹ Susa dzukobe l'abalị iri l'ẹno l'ọnwa Ada. Whẹ gbua ụkporo unwoke ugbo iri l'ise lẹ Susa. Ọle whẹ te edenyidu ẹka l'iwhe whẹ nke a sụ lẹ whẹ jeru iya egwota.

¹⁶ A bya bya lẹ ndu Ju ọwhu bugee l'obodo ọwhu dụ l'alị-eze Áhazerusu, whẹbedua bẹ dzukobekwaruwho tẹ whẹ dzọo ishi onwowhe, nke ọwhu whẹ l'a-kparụ nkụ hụbe ogu l'ẹka ndu ọhogu whẹ nọ. Ndu whẹ gburu egbu bẹ dụ ụkporo ụnu madzụ ugbo tete l'ụnu madzụ ẹsaa l'ụkporo iri. Ọle whẹ te edenyidu ẹka l'iwhe whẹ nke a sụ lẹ whẹ jeru iya egwota.

¹⁷ Mbọku, iwhe ono nwụru bụ g'ọnwa Ada gbarụ abalị iri l'ẹto. O be mbọku nke iri l'ẹno iya, whẹ tụta ume. Whẹ mee mbọku ono t'ọ bụru mbọku eriri mẹe mbọku ẹhu-ụtso.

¹⁸ Ọle ndu Ju ọwhu bu lẹ Susa bẹ dzukoberu lẹ mbọku, ọnwa Ada gbarụ abalị iri l'ẹto mẹe l'abalị iri l'ẹno. Ọ bụru l'abalị iri l'ise iya bẹ whẹ tụtaru ume, mee mbọku ono t'ọ bụru mbọku eriri mẹe mbọku ẹhu-ụtso nkewhe.

¹⁹ Ọo iwhe ono meru iwhe ndu Ju ọwhu bu l'ime ime obodo meru abalị iri l'ẹno l'ọnwa Ada t'ọ bụru mbọku ẹhu-ụtso mẹe mbọku eriri mẹe mbọku onyenọnu l'eshije nri jeeru ibe iya ẹbyii.

Ori-oge Purimu

²⁰ Mọdekayi tụko iwhe ono nwụru nụ g'ọ ha dekota l'ẹkwo. Ọ bya edee ẹkwo-ozhi keshiaru iwhe bụ ndu Ju, bu l'obodo lile, dụ l'alị-eze Áhazerusu, ndu bu otẹnya mẹe ndu bu l'ụkfu ntse

²¹ sụ whẹ tẹ whẹ rijee oge mẹ ọnwa Ada gbaa abalị iri l'ẹno mẹe abalị iri l'ise, awha g'awha ha.

²² Ishi oge ono bụ l'o noo mbọku, ndu Ju kparụ nkụ hụbe ogu l'ẹka ndu ọhogu whẹ nọ, ọ bụru ọnwa ono bẹ áwhụ whẹ ghọru whẹ ẹhu-ụtso, ẹkwa whẹ ghọoru whẹ eriri. O deeru whẹ ẹkwo sụ tẹ whẹ mee mbọku ono t'ọ bụru eriri l'ẹhu-ụtso mẹe t'ọ bụru mbọku, onyenọnu l'eshije nri jeeru ibe iya ẹbyii, bụru mbọku, whẹ l'emejeru ndu l'adụa g'ọ harụ whẹ iwhe-ọma.

²³ Ọo ya bụ, ndu Ju kweta lẹ whẹ l'a-nọ eri oge ono gẹ whẹ watawaru iya, ẹgube ono Mọdekayi deru whẹ iya l'ẹkwo tẹ whẹ rije iya.

²⁴ O noo nkele Hemanu nwa Hamedata, onye shi l'eri Agagu, bụ ọhogu ndu Ju l'owhu gbajẹru ejo-ikumu gẹ l'oo-shi lakọta ndu Ju l'iyi. Ọo mbọku ono b'ọ tụru puru, bụ iya bụ l'ọoturu ido gude marụ mbọku ọbu, l'ee-gwe whẹbe ndu Ju aryaka eryune tẹ whẹ bụru kpurupyata.

²⁵ Obenu lẹ nteke ejo idzu ono rwuru eze lẹ nchị b'ọ tụru iwu dee ya l'ẹkwo sụ t'e wota iwhe ono, Hemanu chịru idzu iya t'e mee ndu Ju, mechia Hemanu ọbu l'onwiya. T'a chịta yẹle ụnwu iya je ekobe l'eli oswebe, l'aaswị-gbuje madzụ.

²⁶ Ọ bụru iya meru whẹ kua ujiku labọ ono Purimu. Ẹka okfu ono futaru bụ l'ishi-okfu ono, bụ Puru. Ọ bụru iwhe ono, Mọdekayi deru l'ẹkwo-ozhi whọ mẹe iwhe whẹ gudewaa ẹnya whẹ whụ, bụ iwhe nwụru whẹ nụ,

²⁷ bẹ ndu Ju gude mee ya, ọ bụru omelalị, dụru whẹ nụ, dụru ẹpa whẹ mẹe ndu lwakfutaru whẹ nụ, mbụ l'ujiku labọ ono bẹ whẹ l'e-dobekota t'ọ bụru mbọku, whẹ l'eri oge g'e deru iya l'ẹkwo nụ whẹ, ọ bụru mbọku, a tụ-buru whẹ atụ-bu.

²⁸ Shi l'ọgbo rwua l'ọgbo bẹ l'aa-nyatajẹ ori oge ono l'ime ujiku labọ ono. Ee-rije iya l'uwhu l'uwhu mẹe l'obodo l'obodo mẹe lẹ mkpụkpu lẹ mkpụkpu. T'ọ bọ dụkwa iwhe l'a-kpọshi ndu Ju ori oge Purimu ono gude nyatajẹ ujiku labọ ono.

²⁹ Tọ dụ iya bụ, eze-nwanyị, bụ Ẹsuta nwada Abyihelu yẹle Mọdekayi onye Ju bya edee ẹkwo nke ẹbo gude mee t'ori oge purimu ono kabaa oshihu ike.

³⁰ Whẹ dee ẹkwo-ozhi ono kekotaru ndu Ju l'owhu, bụ ndu bukota l'ụkporo obodo ugbo ishii l'obodo ẹsaa, dụ l'alị-eze Áhazerusu. L'ẹkwo-ozhi ono bẹ whẹ kfuru whẹ okfu ọma, karụ whẹ t'ọ bọ dụ iwhe whẹ l'e-je ọtsu egvu iya,

³¹ tẹ whẹ dobeje mbọku purimu ono lẹ mgbe iya, ẹgube ono, Mọdekayi, bụ onye Ju mẹe eze-nwanyị, bụ Ẹsuta tụru whẹ l'iwu, mbụ ẹgube ono whẹbedua mẹe ẹpa whẹ dobewaru mbọku, l'a-bụjeru whẹ mbọku ọswi ẹgu mẹe mbọku ọgu áwhụ.

³² Iwu, Ẹsuta tụru bya emee t'ori oge purimu ono kabaa oshihu ike, e dee ya ede l'ẹkwo.