Ẹsuta 8 - BAYỊBURU Ẹzaa

Iwu, eze tụru l'iswi ndu Ju

¹ Mbọku onokwawho bẹ eze bụ Áhazerusu woru ụlo Hemanu, bụ onye ọhogu ndu Ju nụ eze-nwanyị, bụ Ẹsuta. Ẹsuta bya akọoru eze gẹ yẹle Mọdekayi dụ iya dụ iya. Watazhiewho nteke ono, Mọdekayi bebe jelahaa l'iwhu eze.

² Eze bya agbata echi-mkpụshi-ẹka iya, o natarụ Hemanu nụ Mọdekayi. Ẹsuta dobe Mọdekayi t'ọ bụru ishi l'ụlo ono, Hemanu shi nweru.

³ Ẹsuta bya ekfuru yeru eze ọdo, bya adaa l'alị wụshihuru eze lẹ mgboro ọkpa akwa idemini l'ẹka l'ọoryo iya t'o mebyia ejo-idzu ono, Hemanu bụ o-shi-l'eri Agagu chịru ndu Ju.

⁴ Eze machịaru Ẹsuta mgbọro mkpọla-ododo iya, ọ gbeshi kfụru iya l'iwhu

⁵ bya asụ iya: “Ọ -bụru l'ọ dụ gụbe eze ree, ọ -bụruwho lẹ mu dụ gụbe eze l'obu, mbụ l'ị rịru l'ọo iwhe kfụru nhamụnha, tẹmenu mu dụ ghu ree l'ẹnya, tẹ gụbe eze tụnua iwu dee ya edede gude kagbua iwhe ono, Hemanu nwa Hamedata, bụ o-shi-l'eri Agagu deru l'ẹkwo sụ t'a tụko ndu Ju, bu l'obodo lile, dụ l'alị-eze ghu lakọta l'iswi.

⁶ ?Ndẹe gẹ mu l'e-shi gbabẹ obu whụ ejo-iwhe, l'abyakfuta ndu nkemu? ?Tẹmenu ndẹe gẹ mu l'e-shi gbabẹ obu whụ ẹka ndu mu lẹ whẹ bụ abụbu l'ala l'iswi?”

⁷ Eze Áhazerusu bya asụ eze-nwanyị, bụ Ẹsuta yẹle Mọdekayi, bụ onye Ju: “Iwhe meru mu woru ụlo Hemanu nụ Ẹsuta, mbụ l'iwhe meru a swị-gbua Hemanu l'oswebe bẹ bụ l'o shi eme tẹ ya gbushia ndu Ju.

⁸ Ntaa bụ t'unu gude ẹwha eze tụa iwu ọdo l'iswi ẹhu ndu Ju, dee ya edede g'ọ dụ-zhiawho unu ree, gude echi-mkpụshi-ẹka eze mee ya iwhe-ọhubama, o noo nkele ọ tọ dụdu iwhe e gude ẹwha eze dee l'ẹkwo woru echi-mkpụshi-ẹka iya mee ya iwhe-ọhubama, a bya l'agbanwe agbanwe.”

⁹ Nteke ono who b'e je ekua ndu l'ederu eze ẹkwo, whẹ byakọta. Mbọku ono bẹ ọnwa ẹto, bụ iya bụ ọnwa Sivanu gbarụ ụkporo abalị l'abalị ẹto. Mọdekayi bụru iya l'akpọru ndu o-de-ẹkwo ono iwhe whẹ l'ede l'ẹkwo, l'aa-nụ ndu Ju mẹe ndu nnọ-chi ẹnya eze mẹe ndu ọchi-ọha mẹe ndu bụ ishi l'ụkporo obodo ishii l'obodo ẹsaa ono, dụ l'alị-eze Áhazerusu; watazhiewho l'alị Indiya je akpaa l'alị Itiyópiya. Iwu ono b'e dekotaru nụ obodo nọnu lẹge obodo nọnu l'egudeje ede ẹkwo nkewhe, e dee ya l'okfu alị ndu nọnu nụ whẹ. E dee ya nụ ndu Ju lẹge whẹ l'eshije ede ẹkwo, dee ya l'okfu alị whẹ nụ whẹ.

¹⁰ Ẹkwo ono bụ l'ẹwha eze Áhazerusu bẹ Mọdekayi deru iya, gude echi-mkpụshi-ẹka eze mee ya iwhe-ọhubama. A nụ iya ndu ọkpa-ẹgwa, whẹ gude ịnya l'agbashị ọso ike wolahukota iya; mbụ ịnya a nọdu l'ẹka l'aazụru eze ịnya zụa.

¹¹ L'ime ẹkwo ono bẹ eze nụru ndu Ju, bu lẹ mkpụkpu nọnu ọkpu-ike tẹ whẹ dzukobe dzọo ishi onwowhe. Nke ọwhu bụ l'o -nwezhiaru ọha m'ọ bụ obodo, byarụ whẹ ọlwushi ọgu, tẹ whẹ kerabe laa ndu ọbu l'iyi gbugbushia whẹ, mbụ nwanyị, mbụ nwata, mee whẹ emerekete, vụa arya whẹ avụ.

¹² Mbọku, a tụ-buru tẹ ndu Ju mee iwhe ono l'obodo lile, dụ l'alị-eze Áhazerusu bẹ bụ mbọku ọnwa iri l'ẹbo, bụ iya bụ ọnwa Ada gbarụ abalị iri l'ẹto.

¹³ Iwu ono b'e zhiru t'e dee ya l'ẹkwo keshikota l'obodo lile, bya atụa ya, ọ bụru iwu t'e mee ya tẹ ndu nọnu madzuru iya, nke ọwhu ndu Ju l'a-kwakọbe ẹhu melata ndu ọhogu whẹ mbọku ono.

¹⁴ Ndu ọkpa-ẹgwa ono nyikota eli ịnya whẹ ono, l'ewhe ewhewhe ọso, l'eegudeje ejeru eze ozhi, whẹ gbagbụ-kebe je ezhikashia ozhi ono lẹge eze tụru whẹ l'iwu. Ẹka a nọdu tụa iwu ono bụ lẹ Susa, bụ ishi alị-eze Áhazerusu.

¹⁵ Mọdekayi bya eshi l'iwhu eze lụfuta, o yee uwe onye eze, dụ urwukpu-urwukpu mẹe ọwhu l'acha ụcha, o kpuru okpu-eze, e gude mkpọla-ododo mee mẹe uwe, l'ekpo wụlawula, l'eke mmee-mmee, e gude ọkpobe oghu ọcha kpaa. Ndu bu lẹ Susa l'atụkaa orooroo, ẹhu l'atsọ whẹ ụtso shii.

¹⁶ Obu bya akpẹneshihu ndu Ju, ẹhu l'atsọkaa whẹ ụtso, ẹswa ria whẹ ẹfonu, tẹmenu l'aakwabẹ whẹ ugvu.

¹⁷ L'obodo lile mẹe lẹ mkpụkpu lile, bụ ẹka iwu ono, eze tụru rwuru bẹ ndu Ju, bu iya nụ tekotaru ẹswa, ẹhu l'atsọkaa whẹ ụtso. Mbọku ono bụru whẹ eriri eriri mẹe ẹhu-ụtso ẹhu-ụtso. Igweligwe ndu shi ẹka ọdo bya aghọo ndu Ju, nkele egvu ndu Ju byarụ whẹ l'ẹhu.