Ẹsuta 7 - BAYỊBURU Ẹzaa

A swị-gburu Hemanu

¹ Ọo ya bụ, eze yẹle Hemanu jeshia nke Ẹsuta, bụ eze-nwanyị tẹ whẹ yeko ẹka lẹ nri.

² Whẹ watalẹwho ọngu mmẹe lẹ mbọku nke ẹbo ono, eze jịa Ẹsuta gẹ l'ọojije iya sụ: “Eze-nwanyị, bụ Ẹsuta, ?ọo gụnu bụ mkpa ghu? Kfua ya tẹ mu meeru ghu iya. ?Ọo gụnu b'ọ dụ ghu nke tẹ mu meeru ghu? O behuduru ọ bụru tẹ mu kee alị-eze mu uzhi ẹbo nụ ghu uzhi lanụ bẹ mu l'e-meru ghu iya.”

³ Eze-nwanyị, bụ Ẹsuta sụ iya: “Gụbe eze, ọ -bụruwho lẹ mu dụ ghu l'obu l'ezhi, ọ -bụru l'ọ dụ ghu ree, iwhe mu l'aryọ ghu bụ t'ị hanụ-a tẹ mu nọdu ndzụ. Gụ ahakwaawhọ tẹ ndu nkemu nọdu ndzụ; o noo iwhe ọ dụ mu nke t'i meeru mu ndono.

⁴ O noo lẹ mu lẹ ndu nkemu b'e rewaru t'e gbushikota anyi g'anyi ha. Mbụ l'e rewaru anyi t'a laa anyi l'iyi. Nggẹ l'erere, e reru anyi bụ t'anyi gbajẹ ohu mẹ mu anọ-kirishikwaa, nkele ẹgube iwhe-ọtsulanu ono ta agbadụ t'a pakfuta iya eze bya ekfuchilahaa ya nchị.”

⁵ Eze Áhazerusu bya ajịa eze-nwanyị, bụ Ẹsuta sụ iya: “?Oo onye ole b'ọ bụ? ?Ndẹe onye tụru ama tẹ ya mee ụdu iwhe dụ nno?”

⁶ Ẹsuta sụ iya: “Ọo Hemanu-a bụ onye ọbu, bụ ọhogu anyi, bụru iya l'etso anyi l'ẹhenu ọbu!” Egvu ba Hemanu l'iwhu eze yẹle eze-nwanyị.

⁷ Eze vọru ọku ghua ẹhu gbalihu haa mmẹe ono, jeshia lẹ mgbabu ibe eze. Hemanu nọpyabe eze-nwanyị, bụ Ẹsuta ryọlahaa ya t'ọ haa ya rọo tẹ ya nọdu ndzụ, nkele ọ whụwaru l'eze bẹ chịpyawaru l'iya l'e-me iya ejo-iwhe.

⁸ Ọ bụlekwaruwho nteke ono Hemanu darụ wụshihu l'oshi eze-nwanyị nọdu dawhube adawhube aryọ iya bẹ eze shi lẹ mgbabu ono bụru whẹrekete. Eze bua mkpu sụ: “Waa! ?Oomefua tẹ ya gude eze-nwanyị l'ọkpehu jekfu iya azẹe l'iwhu mu, mbụ l'ibe mu?” Ekfufuta, eze l'ekfufuta iwhe ono, e gude Hemanu kechia ya iwhu.

⁹ Onye lanụ lẹ ndu a harụ aháhá, l'ejeru eze ozhi, bụ Habona bya asụ: “O nwekwaru oswebe, l'aaswị-gbuje madzụ, dụ nji-ẹka ụkporo ugbo labọ l'iri l'eli, Hemanu meru dobe l'ibe iya. Onye o meru iya doberu bụ Mọdekayi, onye ono, gbajẹru ama ejo-ikumu whọ, a gbajẹru gụbe eze, shi nno dzọo ghu ndzụ.” Eze sụ: “Unu je aswị-gbua ya l'oswebe ono.”

¹⁰ O noo ya, e je aswị-gbua Hemanu l'eli oswebe ono, l'aaswị-gbuje madzụ, o shi mee doberu Mọdekayi. Nteke ono obu bya ejizeta eze.