Ẹsuta 6 - BAYỊBURU Ẹzaa

Eze l'akwabẹ Mọdekayi ugvu

¹ O rwua l'ẹnyashi mbọku ono, mgbẹnya te ekwe shita eze ụzo ẹnya. Ọ bya ezhia t'e wotaru iya ẹkwo-akọ, e deshiru iwhe l'eme l'alị-eze iya. E je wota iya bya agụa l'iwhu iya.

² L'ẹkwo ono b'a gụ-vuru lẹ Mọdekayi bụ iya gbarụ ama ejo-ikumu whọ, whẹ gbajẹru mbụ Byigutana yẹle Tẹreshi, bụ unwoke labọ ono, a harụ aháhá, shi eche nche l'ọnoguzo ibe eze, nteke ono, whẹ chịjeru idzu tẹ whẹ kpanyia eze Áhazerusu ẹnya.

³ Eze jịa sụ: “?Oo nweru ugvu, a kwabẹjeru Mọdekayi? ?E mejewaru a marụ ẹwha iya l'iwhe ono, o meru?” Ndu l'ejeru eze ozhi sụ: “Ẹ tẹke ọdukwa-a iwhe e meru iya.”

⁴ Eze sụ: “?Oo onye nọ l'ọma ogboduwhu mu?” Ọ bụlekwaruwho nteke ono bẹ Hemanu l'abata l'ọma ogboduwhu, dụ l'azụ ụlo eze tẹ ya bya ekfuru eze t'a swị-gbua Mọdekayi l'eli oswebe ono, ọ kwakọberu, l'aa-swị-gbu iya.

⁵ Ndu ozhi eze sụ iya: “Ọ kwa Hemanu kfụru l'ọma ogboduwhu ono.” Eze sụ t'e kua ya t'ọ bata.

⁶ Hemanu bya abata, eze jị iya sụ: “?Ọo gụnu bẹ l'ee-meru onye ọ dụ eze nke tẹ ya kwabẹ ugvu?” Iwhe gbatarụ Hemanu l'ọriri nteke ono bụ l'ọ tọ dụdu onye ọdo, eze l'a-nọ achọ tẹ ya kwabẹ ugvu gbahaa yẹbedua.

⁷ Tọ dụ iya bụ, Hemanu sụ eze: “Iwhe l'ee-meru onye ọ dụ eze tẹ ya kwabẹ ugvu

⁸ bụ t'a chịta uwe, eze yewaru eye, a kpụta ịnya, eze gbawarụ agba, mbụ ịnya, e kpuberu okpu-eze l'ishi.

⁹ T'a chịta uwe ono kpụta ịnya ono ye onye lanụ l'ẹka lẹ ndu ishi, a kagezhia ọmaru ẹwha whẹ l'alị-eze ghu-a. T'o woru uwe ono yee onye ọbu, ọ dụ eze nke tẹ ya kwabẹ ugvu ono. T'onye ọbu nọkoru l'eli ịnya ono t'e duru iya je angụ-whekota lẹ nggamgbo mkpụkpu-a, ryaarụ iya ọha aryarya sụ: ‘Ọo ẹgube-ẹ bẹ l'eemejeru iya onye ọ dụ eze nke tẹ ya kwabẹ ugvu.’ ”

¹⁰ Nteke ono eze sụ Hemanu: “Ngwa je achịta uwe ono yẹle ịnya ono je emekotaru Mọdekayi, bụ onye Ju ono, l'anọduje l'ọnoguzo ibe eze iwhe lile ono, i kfuru. T'ọ bọ dụkwa ọwhu l'ii-mewhodo emewhodo ilile lẹ g'i kfuru iya.”

¹¹ O noo ya, Hemanu je achịta uwe ono, kpụta ịnya ono, bya eworu uwe ono yee Mọdekayi, bya edoberu iya ịnya ono o nọ-koru iya l'eli, Hemanu duru iya je angụ-whekota lẹ nggamgbo mkpụkpu ono, aryarụ iya ọha aryarya asụje: “Ọo ẹgube-ẹ bẹ l'eemejeru iya onye ọ dụ eze nke tẹ ya kwabẹ ugvu.”

¹² E megee, Mọdekayi lawhu azụ l'ọnoguzo ibe eze. Ọwhube Hemanu nyịgobe gụru áwhụ, chịru ẹka bebe l'ishi gbagbụ-kebe, ọ bụru iya ọla ibe iya.

¹³ Ọ larwua je akọkotaru nyee ya, bụ Zẹreshi mẹe ndu lile whẹ l'iya l'eshi ọnya g'ọ nwụru iya. Ọnya iya whẹ ono, bụ ndu marụ ágụ mẹe nyee ya ono, bụ Zẹreshi sụ iya: “Ọ bụruwho lẹ Mọdekayi bẹ shi l'eri ndu Ju bẹ l'ịi-tịi chịtakwa ẹja ilile; ọ kwa adada bẹ l'ịi-da tsua ọnu l'alị.”

¹⁴ Whẹ kpụkwaduru-a iwhe ono l'ọnu ekfu, ndu a harụ aháhá, l'ejeru eze ozhi bata bya iya ekuku. Whẹ dulia Hemanu l'ọku l'ọku jeshia lẹ nri ono Ẹsuta kwakọberu.